Masalimo 102 - Buku Lopatulika

Wopsinjika apempha Mulungu achitire anthu ake chifundo, amitundu nammverenso

Pemphero la Wozunzika, m'mene anakomoka natsanulira cholingalira chake pamaso pa Yehova.

¹ Yehova, imvani pemphero langa, ndipo mfuu wanga ufikire Inu.

² Musandibisire nkhope yanu tsiku la nsautso yanga; munditchereze khutu lanu; tsiku limene ndiitana ine mundiyankhe msanga.

³ Popeza masiku anga akanganuka ngati utsi, ndi mafupa anga anyeka ngati nkhuni.

⁴ Mtima wanga ukunga udzu womweta, nufota; popeza ndiiwala kudya mkate wanga.

⁵ Chifukwa cha liu la kubuula kwanga mnofu wanga umamatika kumafupa anga.

⁶ Ndikunga vuwo m'chipululu; ndikhala ngati kadzidzi wa kumabwinja.

⁷ Ndidikira, ndikhala ngati mbalame ili yokha pamwamba pa tsindwi.

⁸ Adani anga anditonza tsiku lonse; akundiyalukirawo alumbirira ine.

⁹ Pakuti ndadya mapulusa ngati mkate, ndi kusakaniza chomwera changa ndi misozi,

¹⁰ chifukwa cha ukali wanu ndi kuzaza kwanu; popeza munandinyamula ndipo munandigwetsa.

¹¹ Masiku anga akunga mthunzi womka m'tali; ndipo ine ndauma ngati udzu.

¹² Koma Inu, Yehova, mukhalabe kunthawi yonse; ndi chikumbukiro chanu ku mibadwomibadwo.

¹³ Inu mudzauka, ndi kuchitira nsoni Ziyoni; popeza yafika nyengo yakumchitira chifundo, nyengo yoikika.

¹⁴ Pakuti atumiki anu akondwera nayo miyala yake, nachitira chifundo fumbi lake.

¹⁵ Pamenepo amitundu adzaopa dzina la Yehova, ndi mafumu onse a dziko lapansi ulemerero wanu.

¹⁶ Pakuti Yehova anamanga Ziyoni, anaoneka mu ulemerero wake;

¹⁷ anasamalira pemphero la iwo akusowa konse, osapepula pemphero lao.

¹⁸ Ichi adzachilembera mbadwo ukudza; ndi mtundu wa anthu umene udalengedwa udzamlemekeza Yehova.

¹⁹ Pakuti anapenya pansi ali kumwamba kuli malo ake opatulika; Yehova pokhala kumwamba anapenya dziko lapansi;

²⁰ kuti amve kubuula kwa wandende; namasule ana a imfa.

²¹ Kuti anthu alalikire dzina la Yehova mu Ziyoni, ndi chilemekezo chake mu Yerusalemu;

²² Posonkhana pamodzi mitundu ya anthu, ndi maufumu kuti atumikire Yehova.

²³ Iye analanda mphamvu yanga panjira; anachepsa masiku anga.

²⁴ Ndinati, Mulungu wanga, musandichotse pakati pa masiku anga: Zaka zanu zikhalira m'mibadwomibadwo.

²⁵ Munakhazika dziko lapansi kalelo; ndipo zakumwamba ndizo ntchito ya manja anu.

²⁶ Zidzatha izi, koma Inu mukhala: Inde, zidzatha zonse ngati chovala; mudzazisintha ngati malaya, ndipo zidzasinthika:

²⁷ Koma Inu ndinu yemweyo, ndi zaka zanu sizifikira kutha.

²⁸ Ana a atumiki anu adzakhalitsa, ndi mbeu zao zidzakhazikika pamaso panu.