Masalimo 118 - Buku Lopatulika

Wa Salimo alemekeza Mulungu womlanditsa m'manja mwa adani

¹ Yamikani Yehova; pakuti Iye ndiye wabwino; pakuti chifundo chake nchosatha.

² Anene tsono Israele, kuti chifundo chake nchosatha.

³ Anene tsono nyumba ya Aroni, kuti chifundo chake nchosatha.

⁴ Anene tsono iwo akuopa Yehova, kuti chifundo chake nchosatha.

⁵ M'mene ndinasautsika ndinaitanira pa Yehova; anandiyankha nandiika motakasuka Yehova.

⁶ Yehova ndi wanga; sindidzaopa; adzandichitanji munthu?

⁷ Yehova ndi wanga, mwa iwo akundithandiza; m'mwemo ndidzaona chofuna ine pa iwo akundida.

⁸ Kuthawira kwa Yehova nkokoma koposa kukhulupirira munthu.

⁹ Kuthawira kwa Yehova nkokoma koposa kukhulupirira akulu.

¹⁰ Amitundu onse adandizinga, zedi, m'dzina la Yehova ndidzawaduladula.

¹¹ Adandizinga, inde, adandizinga: Indedi, m'dzina la Yehova ndidzawaduladula.

¹² Adandizinga ngati njuchi; anazima ngati moto waminga; indedi, m'dzina la Yehova ndidzawaduladula.

¹³ Kundikankha anandikankha ndikadagwa; koma Yehova anandithandiza.

¹⁴ Yehova ndiye mphamvu yanga ndi nyimbo yanga; ndipo anakhala chipulumutso changa.

¹⁵ M'mahema a olungama muli liu lakufuula mokondwera Dzanja lamanja la Yehova ndi la chipulumutso:

¹⁶ Dzanja lamanja la Yehova likwezeka, Dzanja lamanja la Yehova lichita mwamphamvu.

¹⁷ Sindidzafa koma ndidzakhala ndi moyo, ndipo ndidzafotokozera ntchito za Yehova.

¹⁸ Kulanga anandilangadi Yehova: koma sanandipereke kuimfa ai.

¹⁹ Nditsegulireni zipata za chilungamo; ndidzalowamo, ndidzayamika Yehova.

²⁰ Chipata cha Yehova ndi ichi; olungama adzalowamo.

²¹ Ndidzakuyamikani, popeza munandiyankha, ndipo munakhala chipulumutso changa.

²² Mwala umene omangawo anaukana wakhala mutu wa pangodya.

²³ Ichi chidzera kwa Yehova; nchodabwitsa ichi pamaso pathu.

²⁴ Tsiku ili ndilo adaliika Yehova; tidzasekera ndi kukondwera m'mwemo.

²⁵ Tikupemphani, Yehova, tipulumutseni tsopano; tikupemphani, Yehova, tipindulitseni tsopano.

²⁶ Wodala wakudzayo m'dzina la Yehova; takudalitsani kochokera m'nyumba ya Yehova.

²⁷ Yehova ndiye Mulungu, amene anatiunikira; mangani nsembe ndi zingwe, kunyanga za guwa la nsembe.

²⁸ Inu ndinu Mulungu wanga, ndipo ndidzakuyamikani; ndinu Mulungu wanga, ndidzakukwezani.

²⁹ Yamikani Yehova, pakuti Iye ndiye wabwino, pakuti chifundo chake nchosatha.