Methali 15 - Swahili Revised Union Version

¹ Jawabu la upole hugeuza hasira; Bali neno liumizalo huchochea ghadhabu.

² Ulimi wa mwenye hekima hutamka maarifa vizuri; Bali vinywa vya wapumbavu humwaga upumbavu.

³ Macho ya BWANA yako kila mahali; Yakimchunguza mbaya na mwema.

⁴ Ulimi safi ni mti wa uzima; Bali ukorofi wa ulimi huvunja moyo.

⁵ Mpumbavu hudharau kurudiwa na babaye; Bali yeye aangaliaye maonyo hupata busara.

⁶ Katika nyumba ya mwenye haki mna akiba nyingi; Bali mapato ya mtu mbaya huwa taabu tu.

⁷ Midomo ya mwenye haki hueneza maarifa; Bali moyo wa mpumbavu haufanyi hivyo.

⁸ Sadaka ya mtu mbaya ni chukizo kwa BWANA; Bali maombi ya mtu mnyofu ni furaha yake.

⁹ Njia ya mtu mbaya ni chukizo kwa BWANA; Bali humpenda mtu afuatiaye wema.

¹⁰ Adhabu kali ina yeye aiachaye njia; Naye achukiaye kukemewa atakufa.

¹¹ Kuzimu na Uharibifu viko wazi mbele za BWANA; Si zaidi basi, mioyo ya wanadamu?

¹² Mwenye mzaha hapendi kukaripiwa; Wala yeye hawaendei wenye hekima.

¹³ Moyo wa furaha huchangamsha uso; Bali kwa huzuni ya moyo roho hupondeka.

¹⁴ Moyo wa mwenye ufahamu hutafuta maarifa; Bali kinywa cha wapumbavu hula upumbavu.

¹⁵ Siku zote za mtu ateswaye ni mbaya; Bali ukunjufu wa moyo ni karamu ya daima.

¹⁶ Kuwa na mali chache pamoja na kumcha BWANA; Ni bora kuliko mali nyingi pamoja na taabu.

¹⁷ Chakula cha mboga palipo na upendo; Ni bora kuliko ng'ombe aliyenona pamoja na kuchukiana.

¹⁸ Mtu wa hasira huchochea ugomvi; Bali asiye mwepesi wa hasira hutuliza mashindano.

¹⁹ Njia ya mtu mvivu ni kama boma la miiba; Bali mapito yao wenye unyofu hufanyika njia kuu.

²⁰ Mwana mwenye hekima humfurahisha babaye; Bali mpumbavu humdharau mamaye.

²¹ Upumbavu ni furaha kwake aliyepungukiwa na akili; Bali mwenye ufahamu huunyosha mwenendo wake.

²² Pasipo ushauri mipango vuhunjika; Bali kwa wingi wa washauri huthibitika.

²³ Mtu hulifurahia jibu la kinywa chake; Na neno linenwalo wakati wa kufaa ni jema kama nini!

²⁴ Kwa mtu mwenye akili njia ya uhai huenda juu; Ili atoke katika kuzimu chini.

²⁵ BWANA ataing'oa nyumba ya mwenye kiburi; Bali atauthibitisha mpaka wa mjane.

²⁶ Ushauri mbaya ni chukizo kwa BWANA; Bali maneno yapendezayo ni safi.

²⁷ Atamaniye faida huifadhaisha nyumba yake mwenyewe; Bali achukiaye zawadi ataishi.

²⁸ Moyo wa mwenye haki hufikiri jinsi atakavyojibu; Bali kinywa cha wasio haki humwaga mabaya.

²⁹ BWANA yuko mbali na wasio haki; Bali huisikia sala ya mwenye haki.

³⁰ Mng'ao wa macho huufurahisha moyo; Habari njema huinenepesha mifupa.

³¹ Sikio lisikilizalo lawama yenye uhai Litakaa kati yao wenye hekima.

³² Akataaye maonyo huidharau nafsi yake mwenyewe; Bali yeye asikilizaye lawama hujipatia ufahamu.

³³ Kumcha BWANA ni maonyo ya hekima; Na kabla ya heshima hutangulia unyenyekevu.