Methali 13 - Swahili Revised Union Version

¹ Mwana mwenye hekima husikiliza mausia ya babaye; Bali mwenye dharau hasikilizi maonyo.

² Mtu atakula mema kwa matunda ya kinywa chake; Bali nafsi ya mtu haini itakula jeuri.

³ Yeye alindaye kinywa chake huilinda nafsi yake; Bali afunuaye midomo yake atapata uharibifu.

⁴ Nafsi ya mtu mvivu hutamani asipate kitu; Bali nafsi ya mwenye bidii itanenepeshwa.

⁵ Mwenye haki huchukia kusema uongo; Bali mtu mbaya huwa karaha, hupatwa na aibu.

⁶ Haki humlinda yeye aliye mnyofu katika njia yake; Bali ubaya humwangusha mwenye dhambi.

⁷ Kuna mtu anayejitajirisha, lakini hana kitu; Kuna anayejifanya kuwa maskini, lakini ana mali nyingi.

⁸ Fidia ya nafsi ya mtu ni utajiri wake; Bali mtu maskini hasikii ogofyo lolote.

⁹ Nuru ya mwenye haki yang'aa sana; Bali taa ya mtu mbaya itazimika.

¹⁰ Kiburi huleta mashindano tu; Bali hekima hukaa nao wanaoshauriana.

¹¹ Mali iliyopatikana kwa haraka itapunguka; Bali yeye achumaye kidogo kidogo atazidishiwa.

¹² Kilichotarajiwa kikikawia kuja, moyo huugua. Bali haja ya mtu ikipatikana, ni mti wa uzima.

¹³ Kila anayelidharau neno hujiletea uharibifu; Bali yeye anayeiogopa amri atapewa thawabu.

¹⁴ Sheria ya mwenye akili ni chemchemi ya uzima, Ili kuepukana na tanzi za mauti.

¹⁵ Ufahamu mwema huleta upendeleo; Bali njia ya muasi huangamiza.

¹⁶ Kila aliye na busara hutenda kazi kwa maarifa; Bali mpumbavu hueneza upumbavu.

¹⁷ Mjumbe mbaya huanguka maovuni; Bali mjumbe mwaminifu ni afya.

¹⁸ Umaskini na fedheha zitampata yeye akataaye kurudiwa; Bali yeye aangaliaye maonyo ataheshimiwa.

¹⁹ Haja iliyopatikana ni tamu nafsini mwa mtu; Bali kujitenga na maovu ni chukizo kwa wapumbavu.

²⁰ Nenda pamoja na wenye hekima, nawe utakuwa na hekima; Bali rafiki wa wapumbavu ataumia.

²¹ Uovu huwafuatia wenye dhambi; Bali mwenye haki atalipwa mema.

²² Mtu mwema huwaachia wana wa wanawe urithi; Na mali ya mkosaji huwa akiba kwa mwenye haki.

²³ Chakula kingi chapatikana kwa ukulima wa maskini; Bali viko viharibiwavyo kwa sababu ya dhuluma.

²⁴ Yeye asiyetumia fimbo yake humchukia mwanawe; Bali yeye ampendaye humrudi mapema.

²⁵ Mwenye haki hula akaishibisha nafsi yake; Bali tumbo la mtu mbaya litaona njaa.