Methali 27 - Swahili Revised Union Version

¹ Usijisifu kwa ajili ya kesho; Kwa maana hujui yatakayozaliwa na siku moja.

² Mwingine na akusifu wala si kinywa chako mwenyewe; Mtu mgeni wala si midomo yako wewe.

³ Jiwe ni zito, na mchanga hulemea; Lakini ghadhabu ya mpumbavu ni nzito kuliko hivi vyote viwili.

⁴ Ghadhabu ni kali, na hasira ni gharika; Lakini ni nani awezaye kusimama mbele ya wivu.

⁵ Lawama ya wazi ni heri, Kuliko upendo uliositirika.

⁶ Majeraha utiwazo na rafiki ni ya kweli; Bali busu la adui ni udanganyifu.

⁷ Nafsi iliyoshiba hukinai sega la asali; Bali nafsi yenye njaa huona kila kitu kichungu kuwa kitamu.

⁸ Kama ndege aendaye huku na huko mbali na kitundu chake; Ndivyo alivyo mtu aendaye huku na huko mbali na mahali pake.

⁹ Marhamu na manukato huufurahisha moyo; Kadhalika utamu wa rafiki ya mtu utokao katika kusudi la moyo wake.

¹⁰ Usimwache rafiki yako mwenyewe, wala rafiki ya baba yako, Wala usiende nyumbani mwa ndugu yako siku ya msiba wako. Afadhali jirani aliye karibu kuliko ndugu aliye mbali.

¹¹ Mwanangu, uwe na hekima na kunifurahisha moyo wangu; Ili nipate kumjibu anilaumuye.

¹² Mwenye busara huyaona mabaya na kujificha; Bali wajinga huendelea mbele wakaumia.

¹³ Twaa nguo yake amdhaminiye mgeni; Mtoza rehani aliye mdhamini wa malaya.

¹⁴ Mtu ambarikiye mwenzake kwa sauti kuu asubuhi na mapema; Itahesabiwa kuwa ni laana kwake.

¹⁵ Matone daima kudondoka siku ya mvua nyingi, Na mwanamke mgomvi ni sawasawa;

¹⁶ Atakaye kumzuia huyo huuzuia upepo; Na mkono wake wa kulia hukuta mafuta.

¹⁷ Chuma hunoa chuma; Ndivyo mtu aunoavyo uso wa rafiki yake.

¹⁸ Yeye autunzaye mtini atakula matunda yake; Naye amhudumiaye bwana wake ataheshimiwa.

¹⁹ Kama uso ufananavyo na uso katika maji; Kadhalika moyo wa mtu na mwenzake.

²⁰ Kuzimu na Uharibifu havishibi; Wala macho ya wanadamu hayashibi.

²¹ Kalibu ni kwa fedha, na tanuri kwa dhahabu; Na mtu hujaribiwa kwa sifa zake.

²² Hata ukimtwanga mpumbavu kwa mchi kinuni pamoja na ngano; Upumbavu wake hautamtoka.

²³ Fanya bidii kuijua hali ya makundi yako; Na kuwaangalia sana ng'ombe wako.

²⁴ Kwa maana mali haziwi za milele; Na taji je! Ladumu tangu kizazi hata kizazi?

²⁵ Manyasi hukatwa, na majani mabichi huchipua, Na mboga ya mlimani hukusanywa.

²⁶ Wana-kondoo hufaa kwa mavazi yako; Na mbuzi ni thamani ya shamba.

²⁷ Tena yatakuwapo maziwa ya mbuzi, Ya kukutosha kwa chakula chako, Na chakula cha watu wa nyumbani mwako, Na posho la vijakazi vyako.