NEHEMIA 9 - ASII LAKDAP Bible (BSI)

Mungmaiqse Raq Mra Tiidiito

^1-2 Kra jipi lü na sii hali, raroqnai ri rablai ranaiq na, Israilnok ka adam na thung nongto. Raüta, tsangshiq ngarai miitu shutkai dea nguta tsanbi tiichhi mra tiidii dungsea achu jaüto. Kra akhing na, tsangshiq ka pongmung maiqse phong wa pong na atiitsea wan wishe riito. Raüta, makphai khüshang maq, tsangshiq khakam na botkhulai maq tiinyat raüta, kiimaq wunthaü riinaü thoila sam raüta, ngarai tiidiito. Raüta achap lam maq tsangshiq ngarai ümchu wa tang wantaq, kiimaq tsangtitiim pat na ngarai ümchu wa tang wantaq thun kra wiita tiidiito.

³ Raüta, apha na nari tsam tin tsangshiq ma Tatiwe, tsangshiq Shiikeawe Thungtri kra tiitai phatkuqto. Raüta kra lot jai maq, naritsam she hali ka tsangshiq raq maiqmii ngarai kra tiidii wan, achu jaüto. Raüta tsangshiq Tatiwe tsangshiq Shiikeawe ka shomnoqto.

⁴ Kra mungthung tlaq kiijaq, maiqchap chang riirin apa kiijaq Lewinok ka chapto. Kiijaq chap wanti Lewinok ka arthun ara: Jeshua, Bani, Kadmiel, Shebania, Bunni, Sherebia, Bani, kiimaq Chenani riito. Raüta, tsangshiq raq Tatiwe tsangshiq Shiikeawe man na, hong raüta, agilülü achu jaüto.

⁵ Kra akhing na, mungmaiqse ma noqku lamsheati Lewinok ka arthun ara riito: Jeshua, Kadmiel, Bani, Hashabneiah, Sherebia, Hodia, Shebania, kiimaq Pethahia thun riito. Tsangshiq raq akha nguto: “Chap ronglaq, lanta namshiq Tati Shiikeawe ka shomnoq rong laq. Apaiq kli pattup pat-sa, tiitsam kam ronglaq! Apaiq mangchong khushü jonglu ka, hongtoshe nguta ahü; li jiimin, maiqse angu wiita raq, tiitsam kam ronglaq.”

Mra Tiidii Achu Jaüto

⁶ Kra jai maq Israilnok raq mra tiidii akha achu jaüto: “Tatiwe lei, ümniili kata Tatiwe. Ümniiraq ramungtan thun tiiq laü, ra na raiqsaiq diimtlaq kra tiiq laü. Ümniiraq mangjong hiq nai sammok tra jü kra tiiq laü; kiimaq kiijaq siti wiita tiiq laü. Ümniiraq tsangshiq tarü ma tsitsü thiikuq laü. Ramungtan na siti ningkun rümti wiita raq, ümniili noqtlo.

⁷ O, Tati Shiikeawe lei, ümniiraq Abram ka tsea wan laü. Laüta Bebilon mung na Ur hiq shong wa shea wan laü ihata; Laüta ümniiraq apaiq mang ka, Abraham ngutiishe mang laü.

⁸ Ümniiraq apaiq ka tsapkapkap maq, ümnaq lungwiitiwe nguta sap wan laü. Krai mren ümniiraq apaiq rai, tongshong wan laü. Laüta ümniiraq apaiq ma, Kanannok hiqshong, Hitaitnok nai Amoraiqnok hiqshong, kiimaq Perisaiqnok hiqshong, Jebusaiqnok nai Girgashaiqnok hiqshong thun kra, apaiq saü setiim hiqshong ma, tiite wan miitu mikuq wan ha, nguta kiqkham kuq laü ihata. Krai mren, ümniiraq ümkiqkham ka, kunkun shiikupi kuq wan laü. Jamkhano ngukla ümniika tsapkapkap maq, kiqkham raüpot rümwantiwe.

⁹ “Ümniiraq naititiim ka Ejip mung na, jamkho chamchao wantaq kra achhi haü kata. Ümniiraq khamshii chumjong mong maq, tsangshiq hoqsii wantaq kra tre kuq laü ihata.

¹⁰ Ümniiraq Pharao khuthaq na, apaiq jaqthü wanti welabi khuthaq na, asengi mungmaiqse khuthaq na, awang chang jaqsham tiichhikuq wan laü. Jamkhano ngukla tsangshiq raq, ümsengi Israilnok ka pinthum, tiichamchao wanto nguta asap haü. Kra laüta ümkhushü tiijong laü ihata, kra ümkhushü jong ka ümchaü min asi.

¹¹ Khamjong chum mong maq, ümsengi ma lam tankuq wan laü. Laüta lam shinriiqriiq hea maq, ümsengi nok ka tlea wan laü. Shatmaq tsangshiq jowantinok rewe ka, longpo khamjong chum na atiidea baiq ikha, wiita jü mong na tiithap baiq laü.

¹² Tsangshiq ka ranaiq na phumkham maq, shun shea wan laü. Kiimaq rawa na tsangshiq ka, waniitu maq shea wan laü.

¹³ Ramungtan maq Sinai pum na satki laü. Laüta ümsengi ma Thungtri ahea, kiimaq sung atsii ahea chongphan kuq laü.

¹⁴ Asii Niitiitsak Ranaiq ranaiq ka asii maq, lang ronglaq nguta, tsangshiq ma, ümniiraq shrinkuq wan laü. Kiimaq ümluqkhapse Mosheq lümaq, tsangshiq ma ümtri raü, khakuq wan laü.

¹⁵ “Tsangshiq ramtsi na tsangshiq ma, ramungtan wa manna dung, tiidea kuq laü. Kiimaq tsangshiq khamnyang tsi na, longkaü wa kham, tiiphok kuq wan laü. Ümniiraq mikuq kang nguta kiq akham kuq haü, mungtan ashi kiimin, tsangshiq ma, ‘Siq wan rong liishe,’ nguta, chongkuq wan laü.

¹⁶ Shatmaq naititiim ka ashkong she riiwanto. Kiimaq nilan miishe jawanto. Kiimaq ümniiraq aming akuq haü, lang wan mak she riito.

¹⁷ Tsangshiq raq ümkiq akhü riiwanto; ümniiraq ümtin khan wa, tsangshiq miitu jaqshamkuq laü, wiita laqbaiqto. Ümniiraq ümtinkhan wa awang chang, jaqsham kuq laü, wiita she laqbaiqto. Raüta tsangshiq khünga tsantsii tri maq, tsangshiq khuthaq na, wela ashi shong wanto. Raüta Ejip mung na, di ma jaki nong rong i nguta, jangho danto. Shatmaq, ümniika mra diike wanti Shiikea. Ümniika kaphap mangchan, rümtiwe, kiimaq pinthum lungwii tsantsii, rüm wantiwe. Ümniika khiq saq khiq maü phan. Ümniiraq rüm tlaü tiihang wan mang chan ka jonghea. Ümniiraq tsangshiq ka, tiishaü baiq maü riilaü.

¹⁸ Tsangshiq raq minsaü pongwe sumla hai wanto. Raüta, ‘Ahata Ejip mung wa nashiq shea wanti phra kaü ira!’ nguta, noq wanto. O, Tatiwe lei, tsangshiq raq ümniika pinthum, tairai wanto!

¹⁹ Shatmaq ümniiraq tsangshiq ka, rumnyangkhi kumtsaiphii na, miimbaiq thü maü dea. Jamkhano ngukla, tsangshiq miitu ümniiraq, tiihang wan mangchan ka, jonghea thü wan tlaü. Tsangshiq ma ranaiq na lam sheaketi phumkham, kiimaq rawa na sheaketi wakham ka, lambaiq maü riilaü.

²⁰ Ümlungwii tsii khong maq, tsangshiq raq jamlai jaqsham chang wa, kra chongkuq laü. Ümniiraq tsangshiq ka manna dungpin maq, dunghiq wan laü. Kiimaq tsangshiq letsi na, kham tiiphok laüta letsi tiitsaq kuq laü.

²¹ Wiiroq blai rumnyangkhi kumtsaiphii maq, dunghiq wan laü ümniiraq; tsangshiq dü na asam wan khea, akhiismin chüki mak riito; akhumtsi raq tsangshiq hokphi, achhang alang tsi mak riito.

²² “Ümniiraq tsangshiq ma, mungrap mungrii khat kuq wan laü. Tsangshiq hiq rai wa, maiqmung ahin thun khatkuq wan laü. Tsangshiq raq Heshbon mung langti, Sihon hokham ka long wanto; raüta tangto. Kiimaq Bashan mung min long wanto. Raüta tsang hokhamwe, Og ka tangto.

²³ Tsangshiq saü asetiim phong ka, ra na raiqsaiq diimtlaq ikha, awea lot mai tiipu kuq wan laü. Kiimaq tsangshiq ma mung ashi kuq wan laü kra, Khat wan wan maq tiijü kuq wan laü. Kriika, ‘Namsaü namsetiim pat na mikuq kang,’ nguta tsangtitiim ma akhamkuq haü riito, kra phan phan kuq wan laü.

²⁴ Tsangshiq raq Kanan mung ka long wanto. Ümwokhong maq tsangshiq raq, tangto. Ümniiraq ümsenginok ma tsangshiq rewe ka, ji maq tiini wan laü, tiibun tlak khat wan miitu, ningkun kuq wan laü. Tsangshiq raq Kanan mung na siti, chiqse rewe nok ka, tsang hokhambi rai rewe thun aki ka, wiita khat wan miitu ningkun kuq laü.

²⁵ Ümsengi nok raq long maq aruk chela thun wiita khat wan raüta jii wanto; hiqpo hiqwin hiqshong ramsea asi, jam awak chaq nai seng tum aphong, jamkea na khappong theje, Olip petsi ro chhije, petsi wiqtsam ro aphong, kiimaq spiqro aphong chhije kuq wan laü. Krai mren, tsangshiq ka wok phetak tak maq, rongboq phaqsiq wanto. Ümtin khan wa ümniiraq ahea awa phan, tsangshiq ma kuq wan laü, tsangshiq raq polokhiq phaqsiq wanto.

²⁶ “Shatmaq ümsenginok raq, maiqmii wela jawanto, ümbom taimak, ümkiq akhii riiwanto. Tsangshiq ma akuq haü, Thungtri ka jainong nü maq shungbaiq wanto. Tsangshiq ma tsii chongke wanti, shammibi ka atsea riibaiqto. Ümniipha na jang wan ronglaq nguta, bom chongke wanti shammibi wiita, tsatbaiq wanto. Tsangshiq raq ümniika bliiq kiki, shummii shipoq wanto.

²⁷ Kriikha niishe tsangshiq ka, tsang jaqtibi ma, kiinong kuq baiq laü. Raüta tsang jaqtinok riishe tsangshiq ka, khat raüta jamsha wanto. Tsang lit tsi miishe tiq, tsangshiq raq ümman na hoqsii wanto. Krai mren ümniiraq tsangshiq achu jaü ka, ramungtan maq tre kuq laü. Ümmangchan jong mong miishetiq, tsangshiq khuthaq na, ashun ashea wanti welabi tiiki laü. Tsangshiq riishetiq, tsang jaqtinok jaqkhon mong wa, dokda kuqto.

²⁸ Raüta tsangshiq ma mungtsing maq, tiishongnga wanto. Kra riikiita tsangshiq raq ngarai tang nongto. Kriikha na ümniiraq, tsangshiq ka tsang jaqti ma hali, kiinong kuq baiq nong laü. Shatmaq tsangshiq raq maiqmii mra, tiidü wan raüta, ümman na hali hoqsii wan nongto. Krai mren, ümmangchan jonghea khong maq, ümniiraq tsangshiq achujaü ka, ramungtan maq tre kuq laü, tsangshiq ka tiithongkiki, chiqse rewe jaqkhon mong wa, dokda kuq wan nong laü.

²⁹ Ümniiraq tsangshiq ma phaqthak nithak, ümtri khong na, siwan ronglaq nguta ümtin khan wa, trantsii wan laü. Shatmaq tsangshiq shiikong tsantsii asi kha maq, ümniiraq akuq haü thungtri, rilung tsitsü raü kra, lang mak maq shipoq wanto. Tsangshiq ka nilan, tsangtsantsii ka wan shak shak. Tsangshiq raq ümbomtsi ka, lang wan mak riito.

³⁰ Li jiimin, ümniiraq tsangshiq ma, rawiitek tsan tiibum laüta, hon kam wan tsii chongkuq laü. Ümniiraq ümshammibi tiiki laüta, tsan achhü maq ümbomtsi, tiichong kuq laü. Shatmaq ümsenginok ka nitangnok. Kriikha niishe ümniiraq tsangshiq ka, maiq mung ahinti ma, tiikhat laüta rewe jaqkhon mong na, kiinong kuq wan laü.

³¹ Kiitin khan taü maq li jiimin, ümnaq tiihang wan mangchan tsii ka, jonghea kha maq, ümniiraq tsangshiq ka, thumpak lang lang, tiithum maü riilaü. Ümniika kaphap mang chan, kiimaq tiihang wan mangchan jonghea, rümti Shiikea!

³² “O, Shiikeawe lei, naishiq Shiikeawe le! Ümniika achong lot mai, rakaü hiqwe Shiikea! Ümniika phiiptsi jiiptsi Shiikea! Ningkun ajong rümti Shiikea! Ümniika tongshong bom kham, tsapkapkap maq rümtiwe. Naishiq ka Asiria hokham we pat maq, tiicham chaopha wan raüta, ümchaü ranaiq niitaq, ümtinkhan wa chamchao wankai! Naimung hokhambi, naimung welabi, naimung wa ramwebi, kiimaq naimung wa shammibi, kiimaq naiti thun, kiimaq naimung wa mungmaiqse wiita, ümtinkhan wa chamchao, riihum wanto. Shiikeawe lei, naishiq atinkhan she, chamchao wan kai, ümtsan na tiitsang laq!

³³ Riita ümniiraq naishiq, tiichamchao tlaü arka riikhaq li dea. Naishiq raq ümtinkhan wa, ngarai klo wan kai li jiimin, ümniiraq naishiq ka tsapkapkap maq, rümkom tlaü.

³⁴ Naititiim nai naihokhambi raq, naimung welabi raq kiimaq ramwebi raq, ümniiraq akuq haü Thungtri, lang mak dea riito. Tsangshiq raq ümnaq aming ka, tai wan mak dea riito, kiimaq ümniiraq honlam tsii, achongkuq haü, lang wan mak riito.

³⁵ Ümramkham maq tiibok kuq laü, hokhambi raq ümsengi ahea maq peng wanto. Tsangshiq ka tümlüm tümli, hiqpo hiq win tan, ümniiraq akuq haü hiqshong na shongto. Shatmaq tsangshiq ngarai lamphan thaq mak riito. Raüta Tisho ümnaq shomnoq alaq riito.

³⁶ Riita ümchaü naishiq ara, chuhiq khamhiq mung na sitiikai, shatmaq maiqdi miili jatiikai, ara hiqshong naishiq ma akuq haü.

³⁷ Naishiq minshiiq hunnii wankai, hokhambi ma tijong hihi kuq wan kai. Arka naishiq ngarai tang wan kha na, ümniiraq naishiq ma, dise kharü li she tiiho kuq laü. Tsangshiq raq naishiq khuthaq na, naishiq nyamse khuthaq na, ji maq nishishi lishe, tiichamchao wanto. Naishiq ka pinthum pitlang pitthea, chamchao kharü mong na, sitiikai!”

Mungmaiqse Raq Kiqri Tongshongto

³⁸ Arthun chamchao riihum wan kai kha maq, naishiq Israilnok raq, kiqshi maq jaq phak na riihan laita, tri raü ka akhii she waiq thü kai. Krai mren, naishiq shunsheati mungtubi, naishiq Lewinok raq, kiimaq naishiq ramwebi raq, tsangshiq jaq maq ara tri raütu lakwaiq wankai arjaq mangkhat wanto.