Mwanzo 5 - Swahili Revised Union Version

Wazawa wa Adamu

¹ Hiki ndicho kitabu cha vizazi vya Adamu. Siku ile Mungu alipoumba mtu, kwa sura ya Mungu alimfanya;

² mwanamume na mwanamke aliwaumba, akawabariki akawaita jina lao Adamu, siku ile walipoumbwa.

³ Adamu akaishi miaka mia moja na thelathini, akazaa mwana kwa sura yake, kwa mfano wake, akamwita jina lake Sethi.

⁴ Siku za Adamu baada ya kumzaa Sethi zilikuwa miaka mia nane, akazaa wana, wa kiume na wa kike.

⁵ Siku zote za Adamu alizoishi ni miaka mia tisa na thelathini, naye akafa.

⁶ Sethi akaishi miaka mia moja na mitano, akamzaa Enoshi.

⁷ Sethi akaishi baada ya kumzaa Enoshi miaka mia nane na saba, akazaa wana, wa kiume na wa kike.

⁸ Siku zote za Sethi ni miaka mia tisa na kumi na miwili, akafa.

⁹ Enoshi akaishi miaka tisini, akamzaa Kenani.

¹⁰ Enoshi akaishi baada ya kumzaa Kenani miaka mia nane na kumi na mitano, akazaa wana, wa kiume na wa kike.

¹¹ Siku zote za Enoshi ni miaka mia tisa na mitano, akafa.

¹² Kenani akaishi miaka sabini, akamzaa Mahalaleli.

¹³ Kenani akaishi baada ya kumzaa Mahalaleli miaka mia nane na arubaini, akazaa wana, wa kiume na wa kike.

¹⁴ Siku zote za Kenani ni miaka mia tisa na kumi, akafa.

¹⁵ Mahalaleli akaishi miaka sitini na mitano, akamzaa Yaredi.

¹⁶ Mahalaleli akaishi baada ya kumzaa Yaredi miaka mia nane na thelathini, akazaa wana, wa kiume na wa kike.

¹⁷ Siku zote za Mahalaleli ni miaka mia nane na tisini na mitano, akafa.

¹⁸ Yaredi akaishi miaka mia moja na sitini na miwili, akamzaa Henoko.

¹⁹ Yaredi akaishi baada ya kumzaa Henoko miaka mia nane, akazaa wana, wa kiume na wa kike.

²⁰ Siku zote za Yaredi ni miaka mia tisa na sitini na miwili, akafa.

²¹ Henoko akaishi miaka sitini na mitano, akamzaa Methusela.

²² Henoko akaenda pamoja na Mungu. Baada ya kumzaa Methusela aliishi miaka mia tatu, akazaa wana, wa kiume na wa kike.

²³ Siku zote za Henoko ni miaka mia tatu na sitini na mitano.

²⁴ Henoko akaenda pamoja na Mungu, naye akatoweka, maana Mungu alimtwaa.

²⁵ Methusela akaishi miaka mia moja na themanini na saba, akamzaa Lameki.

²⁶ Methusela akaishi baada ya kumzaa Lameki miaka mia saba na themanini na miwili, akazaa wana, wa kiume na wa kike.

²⁷ Siku zote za Methusela ni miaka mia tisa na sitini na tisa, akafa.

²⁸ Lameki akaishi miaka mia moja na themanini na miwili, akazaa mwana.

²⁹ Akamwita jina lake Nuhu, akinena, Huyu ndiye atakayetufariji kwa kazi yetu na kwa taabu ya mikono yetu katika nchi aliyoilaani BWANA.

³⁰ Lameki akaishi baada ya kumzaa Nuhu miaka mia tano na tisini na mitano, akazaa wana, wa kiume na wa kike.

³¹ Siku zote za Lameki ni miaka mia saba na sabini na saba, akafa.

³² Baada ya Nuhu kufikisha umri wa miaka mia tano, aliwazaa Shemu, na Hamu, na Yafethi.