Genesisy 36 - Baiboly Katolika

Ireo vadin’i Esao sy ireo zanany tany Kanaana

¹ Izao no taranak’i Esao, izay Edôma ihany: Naka vady tamin’ny zanaka vavin’i Kanaana i Esao.

² I Adà, zanaka vavin’i Elôna, Heteanina, i Oolibama, zanaka vavin’i Anà, zanaka lahin’i Sebeôna Heveanina;

³ ary i Basemata, zanaka vavin’i Ismaely, sady anabavin’i Nabaiôta,

⁴ Ka ny naterak’i Adà, tamin’i Esao dia i Elifaza; ny naterak’i Basemata dia i Rahoela;

⁵ ary ny naterak’i Oolibama dia i Jehosy sy i Ihelôna ary i Kôre. Ireo no zanaka lahin’i Esao naterany tany amin’ny tany Kanaana.

Nifindra monina i Esao

⁶ Ary nentin’i Esao ny vadiny, ny zanany lahy, ny zanany vavy ny olona rehetra teo an-tranony, ny biby fiompiny, ny bibiny rehetra, mbamin’ny fananany rehetra noharîny tany Kanaana, ka lasa izy nankany amin’ny tany anankiray lavitra an’i Jakôba rahalahiny.

⁷ Fa efa samy be loatra ny haren’izy ireo ka tsy nahazo niara-monina intsony izy, fa tsy omby azy ireo intsony ny tany nonenany, noho ny biby fiompiny.

⁸ Dia tany an-tendrombohitra Seira i Esao no nonina. I Esao dia Edôma ihany.

Ireo taranak’i Esao tany Seirà

⁹ Izao no taranak’i Esao, rain’i Edôma tany an-tendrombohitra Seirà.

¹⁰ Ny anaran’ny zanaka lahin’i Esao, dia izao: Elifaza, zanak’i Adà vadin’i Esao; Rahoela, zanak’i Basemata vadin’i Esao.

¹¹ Ny zanaka lahin’i Elifaza dia i Temàna, i Omara, i Sefao, i Gatama ary i Seneza.

¹² I Tamnà, vaditsindranon’i Elifaza zanak’i Esao, niteraka an’i Amaleka tamin’i Elifaza. Ireo no zanaka lahin’i Adà, vadin’i Esao.

¹³ Izao kosa no zanaka lahin-dRahoely: I Nahata, i Zara, i Samà, ary i Mezà. Ireo no zanaka lahin’i Basemata, vadin’i Esao.

¹⁴ Ary izao no zanaka lahin’i Oolibama, zanaka vavin’i Anà, zanaka vavin’i Sebeôna, vadin’i Esao; niteraka an’i Jehosy sy i Ihelona ary i Kôre tamin’i Esao izy.

Ireo loham-pirenena teo amin’i Edôma

¹⁵ Izao no loham-pirenena amin’ny zanak’i Esao: ireo zanaka lahin’i Elifaza: i Temàna loham-pirenena, i Omara loham-pirenena, i Sefao loham-pirenena, i Seneza loham-pirenena,

¹⁶ i Kôre loham-pirenena, i Gathama loham-pirenena, i Amaleka loham-pirenena. Ireo no loham-pirenena avy amin’i Elifaza amin’i Edôma. Zanak’i Adà ireo.

¹⁷ Zanaka lahin-dRahoely, zanak’i Esao: i Nahata loham-pirenena, i Zarà loham-pirenena, i Samà loham-pirenena, ary i Mezà loham-pirenena. Ireo no loham-pirenena avy amin-dRahoely, amin’ny tanin’i Edôma. Zanak’i Basemata, vadin’i Esao, ireo.

¹⁸ Zanaka lahin’i Oolibama, vadin’i Esao: i Jehosy loham-pirenena, i Ielona loham-pirenena, ary Kôre, loham-pirenena. Ireo no loham-pirenena avy amin’i Oolibama, zanaka vavin’i Anà, sy vadin’i Esao.

¹⁹ Ireo no zanaka lahin’i Esao, ireo no loham-pirenena; izany no Edôma.

Taranak’i Seira Hôreanina

²⁰ Izao kosa no zanaka lahin’i Seira Hôreanina, izay efa nonina teo amin’ny tany rahateo: i Laotàna, i Sobala, i Sebeôna, i Anà, i Disona, i Eserà ary i Disàna.

²¹ Ireo no loham-pirenena amin’ny Hôreanina, zanaka lahin’i Seirà, tamin’ny tanin’i Edôma.

²² Ny zanaka lahin’i Laotàna dia i Hori sy i Hemana, ary i Tammà no anabavin’i Laotàna.

²³ Izao no zanakalahin’i Sobala: i Alvana, i Manahata, i Ebala, i Sefao, ary i Onama.

²⁴ Izao no zanaka lahin’i Sebeôna: i Ajà sy i Anà. Io Anà io no nahita ny loharano mafana tany an’efitra, raha niandry ny ampondran’i Sebeôna rainy izy.

²⁵ Izao no zanak’i Anà: i Disona sy i Oolibama, zanaka vavin’i Anà.

²⁶ Izao no zanaka lahin’i Disona: i Hamdàna, i Esebàna, i Jetrama ary i Karàna.

²⁷ Izao no zanaka lahin’i Esera: i Balàna, i Zavàna, ary i Akàna.

²⁸ Izao no zanaka lahin’i Disàna: i Hosy sy i Arama.

²⁹ Izao no loham-pirenena amin’ny Hôreanina: i Laotàna loham-pirenena, i Sobala loham-pirenena, i Sebeôna loham-pirenena, i Anà loham-pirenena,

³⁰ i Disona loham-pirenena, i Esera loham-pirenena, i Disana loham-pirenena. Ireo no loham-pirenena Hôreanina izay samy loham-pirenena any amin’ny tanin’i Seirà.

Ireo mpanjakan’i Edôma

³¹ Izao no mpanjaka efa nanjaka tany amin’ny tanin’i Edôma, talohan’ny nisian’ny mpanjaka nanjaka tamin’ny zanak’i Israely.

³² I Bela, zanak’i Beôra, nanjaka tany Edoma, ary ny anaran’ny tanànany dia atao hoe Denaba.

³³ Dia maty i Bela ary i Jôbaba, zanak’i Zorà, avy any Boarà, no nanjaka nandimby azy.

³⁴ Maty i Jôbaba, dia Hosama, avy amin’ny tanin’ny Temanita, no nanjaka nandimby azy.

³⁵ Maty i Hosama, ary nanjaka nandimby azy i Adada, zanak’i Badada, ilay nandresy an’i Madianina, tany amin’ny tanin’i Moaba; ary Avita no anaran’ny tanànany.

³⁶ Maty i Hadada, ary i Semlà, avy any Masrekà, no nanjaka nandimby azy.

³⁷ Maty i Semlà, ary i Saola avy any Rohôbôta, amin’ny ony, no nanjaka nandimby azy.

³⁸ Maty i Saola, ary i Balanàna zanak’i Akora, no nanjaka nandimby azy.

³⁹ Maty i Balanàna, zanak’i Akora, dia nanjaka nandimby azy i Hadara, ka ny anaran’ny tanànany dia Faho ary ny anaran’ny vadiny dia Meetabela, zanaka vavin’i Matreda, zanaka vavin’i Mezaaba.

Ireo loham-pirenena teo amin’i Edôma ihany indray

⁴⁰ Izao no anaran’ny loham-pirenena amin’ny taranak’i Esao, araka ny fokony sy ny faritaniny ary ny anarany avy: Tammà loham-pirenena, Alvà loham-pirenena, Jetela loham-pirenena,

⁴¹ Oolibamà loham-pirenena, Finona loham-pirenena,

⁴² Seneza loham-pirenena, Temàna loham-pirenena, Mabsara loham-pirenena.

⁴³ Magdiela loham-pirenena, Hirama loham-pirenena. Ireo no loham-pirenena amin’i Edôma, araka ny fonenany, any amin’ny tany onenany avy. Izany no Esao, rain’i Edôma.