Kasta
147 Cruzan kun sañs muni uka toqet Biblian jiskʼa tʼaqanakapa
“Diosajj acapachar wal munatap laycuw mä sapa Yokapar qhitani, take qhitinacatejj jupar iyawsapqui ucanacajj jan chhakañapataqui, jan ucasti wiñay jacañanïñapataqui.
Chhakañar sarir jakenacataquejj Criston crusan jiwatapat parlañajja, mä lokhe cancañäcaspas uqhamawa. Ucampis jiwas khespiyat jakenacataquisti, Diosan ch'amapawa Criston crusan jiwatapat parlañajja.
Nayajj jiwjjtwa Cristompi chic ch'accatata, ucampis janiw nayajj jacjjtti, jan ucasti Cristow nayan jacjje. Aca janchin jactsa ucajja, Diosan Yokaparu iyawsatajj laycuquiw jacasctjja, nayar munasinwa jacañapa naya laycu apt'asiwayi.
Diosaw take jucha manusjja phokhawayjje. Uca juchasti jiwasarojj leyirjamajj juchañchistänwa. Crusar ch'accatasaw uca manusjja phokhawayjje. Tatit Jesucristo tokew Dios Awquejj take ajayunacan ch'amanacaparojj atipjawayi. Khanpacharacwa mä p'enka jupanacarojj jisc'achjawayi, presöpcaspas uqhama jupan atipjatapampi apasina takenin uñjcata.
Ucampis jupajj jiwasan Diosasataqui sayt'asitas laycuw chhojjriñchjatänjja, jiwasan ñankha luratanacas laycuw wali t'akhesiyatänjja; jupan t'akhesitapasti jiwasataquejj sumancañ apani, chhojjrinacap laycuw kollata uñjasiractanjja.
Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.
Jesucristo quipcaraquiw juchanacasjja pachpa cuerpopjjaru apawayjje, crusan jiwasina, uqhamata jiwasajj jucha lurañar jiwañasataqui, mä suma jacañan jacañasataqui. Jupajj chhojjriñchjatänwa jumanacajj c'umaräpjjañamataqui.
Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.
Jesusajj uca c'allc'u vinwa umt'äna, ucatsti sänwa: —Take cunaw phokhasjje —sasa. Ucatsti p'ekep alt'asin jiwawayjjäna.
Jumanacampïcasinjja janiw nayajj cunatsa yatiñ muncäyätti jan ucasti Jesucriston crusan jiwatapatac yatiñ munäyätjja.
Uqhamatwa Cristojj crusan jiwasina paypach marcan ch'ajjwanacap tucuyawayi, Diosampis sumancayaraqui, jupanacat mä sapa cuerporu tucuyasina.
Ucampis nayajj janiw cunatsa jach'ar tucuñ muncti, jan ucasti jiwasan Tatit Jesucristosa crusan jiwatapatacwa jach'aru tucuñajjajj utjitu. Criston crusap tokequiwa nayataquejj acapach luräwinacajj jiwata, nayasti acapach luräwinacataquejj jiwataraquïtwa.
Jesusasti discipulonacaparojj saraquiwa: —Maynitejj nayar arcañ munchitu ucajja, jupa quipcat armt'aspan, ucatsti arquitpan jacañap apt'asirjamäcchi ucasa.
Cunapachatejj jaker tucutäjjän ucqhajja, jupa quipcaw jisc'ar tucuwayi, jaysatap laycusti crusan jiwañcamaraquiw puriwayi, uqham jiwañajj sinti p'enkäcchïna ucasa.
Ucatsti munaraquïnwa aca orakpachpana Cristo toke sumancañajj utjañapa, take aca orakpachanquirinacampi, alajjpachanquirinacampisa, sumancthapiñapa Criston crusan jiwäwip toke.
Cristojj janiw cuna juchsa lurcänti, ucampis Diosajj juparojj mä juchan jakerjamaw uñjäna jiwasanac laycu, jiwasajj Cristomp chicäjjatas laycojj mä chekap jacañanëjjañasataqui, cunjämtï Diosajj jacañas munqui uqhama.
Diosasti Jesucristoruw juchan pagopjama uchi, jupan jiwäwip laycu khespiyasiñajj utjañapataqui, iyawsäwi toke. Take acanacasti lurasiwa jupan llamp'u chuymapajj uñstañapataqui nayra juchanacas perdonatapatjja.
Aqhamanquiw munasiñajja: janiw jiwasanacati Diosar munapcäyätanjja, jan ucasti jupaw munistu Wawap qhitanisina juchanacasat khespiyañataqui.
Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.
Yattanwa, nayra jacañasajj jupampi chica ch'accatatäjjewa uqhamat jiwasan cuna jan walitejj utjqui ucajj t'unjatäñapataqui, uqhamat jan juc'ampi juchar sirvjjañasataqui.
Cristojj leyin maldicionapatwa khespiyistu, jupajj juchanacas laycu maldicitaraquïnwa, Kellkatanjja aqham siwa: “Maldicitäpan take qhititejj mä lawaru warccatatäqui ucajja” sasa.
Janiw juc'ampi jach'a munasiñanejj utjcaspati cawquïritejj amigonacap laycu jacañap apt'asquis ucat sipanjja.
Jaken Yokapajj janiw sirviyasiñatac jutquiti jan ucasti sirviriw juti, uqhamarac jacañap churiri walja jakenacar khespiyañataqui —sasa.
Nayrakatajja cuna yatichäwinactï nayajj yatekctjja ucaracwa jumanacarojj yatichapjjsma; ucasti aqhamawa: Cristow Kellkatanacarjamajj crusan jiwawayi juchanacas laycu. ¿Cunataraqui jiwasasti sapa cutisa jan walt'añancasctansti? Sapüruw nayajj niya jiwañanacan jicjjatasta, ucasti chekapunïsquiw jilatanaca, nayasti chuymajjanjja cusistwa jumanacajj Cristoncapjjatamatjja. Uqham sasinjja, nayajj Éfeso marcanjja jakenacampejj leonanacampjamaw nuwastjja. Ucampisa, ¿cunaraqui jicjjatsti? Jiwatanacan jacatatañapatejj jan chekäcchi ucqhajja, cunjämtejj säwejj sisqui uqhamaracwa sisnajja: “Mank'asiñäni, umt'asiñäni, khärurojj jiwjjchiñänejjaya” sasa. Jan sallkjayasipjjamti. Cunjämtejj säwejj sisqui: “Jan wali jakenacampi sarnakañajj suma luräwinaca chhakhayañawa” sasa. Jumanacajj sum amuyasipjjam, janirac juc'ampi juch lurcjjapjjamti. Jumanacat yakhepanacasti janïraw Diosar uñt'apquiti, acsti sistwa jumanacan p'enkasipjjañamataqui. Inas yakhepanacajj jisct'asiñ munchi: “¿Cunjämsa jiwatanacajj jactapjjani? ¿Cunjäm janchinëpjjanisa?” sasa. Uca jisct'ajj mä pisi amuyunin jisct'apawa. Cunapachatejj jatha phawanttanjja, uca jathajj jiwañapawa yakha ali utj-jjañapataqui. Cunapachatejj yapuchctan ucqhajj janiw alpacha yapuchctanti, jan ucasti jathacwa usctanjja, trigöpasa jan ucajj yakha jathäpasa. Ucatsti Diosajj uca jatharojj cunjämtï munqui uqhamwa tucuyi, ucatsti sapa jatharaquiwa mä ali tucojja. Janiw take cuerponacajj mä sapa janchinïquiti. Jaken cuerpopajja yakha casta janchiwa, animalanacan janchipasa yakha castaraquiwa, jamach'inacansa, chawllanacansa janchipajj yakharaquiwa. Jupajj p'amp'antatänwa quimsürutwa Kellkatanacarjama jacatataraquïnjja,
Uqhamaraquiw Cristojj mä cutiqui sacrificionjj loktasïna waljanin juchapa apakañataqui. Ucatsti khepïrinjja uñstaniraquiniwa, janiw juchanac apakeriti, jan ucasti jupar suyt'irinacar khespiyañataqui.
Cristo quipcaraquiw juchanacas laycojj jiwäwipanjja t'akhesiwayejja jan mayampitaqui. Jupajj asqui jakënwa, ucampis jiwasan jan walïtas laycuw t'akhesiwayi, jiwasar Diosar irpañataqui. Janchinaqui jiwatänjja ucampis ajayupanjja jactanjjewa.
Diosan uñisiripäcasinsa Dios quipcaw sumancthapiyistu jupan Wawapan jiwatap toke, ucataracwa jichhajj uca Wawapan jacäwip toke khespiyatäñäni, jupampi sumancthapitas laycu.
Diosajj jiwasarojj k'ollanaptayistuwa Cristo Jesusan Diosan munañap phokhatap laycu, mä cuti wiñayatac jupa pachpa cuerpop sacrificiot loktasisa.
Qhä urunacansti jumanacan ajayunacamanjja jiwaratäsipcäyätaw juchanacam laycu, uqhamarac jan circuncidatäpjjatam laycu. Ucampis jichhajj Diosajj jacañwa churjjapjjtam Cristompi chica, take juchanacamatsa perdonasaraqui. Diosaw take jucha manusjja phokhawayjje. Uca juchasti jiwasarojj leyirjamajj juchañchistänwa. Crusar ch'accatasaw uca manusjja phokhawayjje.
Jiwasatejj khanan jacstan, cunjämatejj Diosajj khanancqui uqhamjja, mayaquïtanwa maynimpi maynimpisa, Jesucristo Yokapan wilapaw take juchanacasat k'omacharaquistu.
Ucatpï jichhajj jilatanaca, Sinti Kollan Chekawjarojj jan ajjsarañampi mantjjsnajja Jesucriston wilap laycu, Leyitejj k'omachaspajja, uca sacrificionacajj janiw loktascjjaspati, uca loktirinacajj mä cut k'omachatäspajja, janiw juchanjam amuyascjjapjjaspati. uca pachpa machak wiñay jacañ thac arcasina, cawquïrtejj cortin tok jupajj jist'ararapistu, ucasti sañ muni jupan pachpa cuerpop toke.
Ucampis jupajj jiwasan t'akhesiñanacas apt'atäscänwa, pachpa aykoñanacaswa apjjäsiscänjja. Jiwasasti Diosas juparojj usuchjcaspa uqham amuyayätanjja, Diosajj juparojj t'akhesiycaspas jan ucajj jisc'achcaraquispas uqhama. Ucampis jupajj jiwasan Diosasataqui sayt'asitas laycuw chhojjriñchjatänjja, jiwasan ñankha luratanacas laycuw wali t'akhesiyatänjja; jupan t'akhesitapasti jiwasataquejj sumancañ apani, chhojjrinacap laycuw kollata uñjasiractanjja.
Ucampis jichhajj uca munasiñapjja uñacht'ayiwa Khespiyiri Jesucristosan jutäwipampi, cawquïritejj jiwañan ch'amapjja t'unjawayi khespiyasiñ arunac toke, uqhamarac jan t'unjatäcani uca jacañjja khanaruw apsuraqui.
Jupasti jiwañaru catuyatänwa jiwasanacan juchanacas laycu, ucatsti jactayataraquïnwa jupa toke jiwasanacajj Diosampi catokatäñasataqui.
Cristoruquiw uñt'añ munta, jacatatäwipan ch'amap catokañ munaracta, t'akhesiñanacapan chekäñ munta, jiwañansti jupjamaw jiwañ munaracta,
Acasti nayan wilajjaraquiwa. Ucasti [machak] arust'äwiwa, cawquïritejj wartatäcani walja jakenacar juchanacapata khespiyañataqui.
Qhitinacatejj Cristoncjjapjje ucanacajja, janchin munañanacapjja ch'accatjjapjjewa ñankha amtañanacampi, uqhamarac munañanacapamp chica.
ucampis Tatitojj situwa: “Munasiñajjaquiw jumataquejj waquichatajja, nayan ch'amajjasti juc'ampi sumaw uñsti cunapachatï jakejj t'uqha jicjjatasqui ucqha” sasa. Uqhamajj nayajj cusistwa, Criston ch'amapajj nayan t'uqhasiñajjan uñstañapataqui.
Diosajjay, Diosajjay, ¿cunatarac jaytanucustasti?, ¿cunatarac khespiyirist jan jutistasti?, ¿cunatarac arnakasitajjar jan ist'tasti?
Yattanwa cunäquitejj munasiñajj ucjja, Tatit Jesucristojj jacañapwa jiwasanac laycu churawayäna; uca pachparaquiw jiwasanacajj jilatanacas laycu jacañas churañasa.
Janiw mayni jilïri sacerdotenacjamäquiti, ucanacasti animalanac jiwayasin sacrificionac sapüru loktapjje, nayrakatajj jupanacan pachpa juchanacapata, ucjjarojj jaken juchanacapatraqui. Ucampis Jesusajj mä cutiquiw wiñayataqui jupa pachpa taketac loktasiwayi.
Juchan wajjt'asiñapasti jiwañawa, ucampis Diosan wajjt'äwipajj wiñay jacañawa Cristo Jesús Tatitusana.
Janiw qhitis jacañajj apakquituti, jan ucasti naya pachpawa munañajjat jacañajj churta. Munañanïtwa churañataqui, uqhamarac wasitat catokañataquisa. Acajj Awquejjan camachipawa.”
Diosajj janiw Wawaparus perdonquiti, ucatpï Wawaparojj jiwañaru catuyejja jiwasanacan juchanacas laycu. Uqhamasti ¿janiquit take cuns churquistani Wawapamp chicjja?
Cristojj Sinti Kollan Chekaruw manti, janiraquiw cabritonacan ni vaca kallunacan wilap loktirisa, jan ucasti jupan pachpa wilapa loktasiriw manti. Uqhamaw mä cutiqui takenitaqui mantawayi, ucatsti wiñay khespiyasiñwa jiwasatac jicjjataraqui.
Munasiñan jacapjjam, cunjämtejj Cristo Tatitojj munasquistu uqhama. Jupajj jiwasanac laycuw jacañap apt'asi, mä wilañchat ovejar uñtata, Diosatac suma k'apquir ofrenda loktasa.
Diosasti jumanacarojj khespiyanipjjtamwa uca ina ch'usa jacaña nayra awquinacamata catokapcta ucata. Jumanacasti sumwa yatipjjaractajja uca khespiyasiñajj janiw tucusir korimpis kollkempis alatäquiti, jan ucasti Tatit Jesucriston suma wilapampi alatawa. Uca Tatitusti mä suma k'oma jan camacht'ata ovejar uñtata sacrificion loktataraquïnwa.
Diosajj phokhawayjjewa cuntejj Moisesan leyipajj jan lurcäna jan ch'amanïtapata, jiwasanacan wali juchararätas laycu. Diosasti jupan mä sapa Wawaparuw qhitani jiwasjam janchi cuerponi, uca quipca jucharus purirjamaraqui. Jupasti jucha laycu jiwañataquiw juti, ucatsti jupajj jucharojj juchañchawayiwa, janchincasinracwa atipjawayi. Uqham kalltatpach yakhachatanacarojj jawsjjaraquiwa, uca jawsatanacaparusti catokjjaraquiwa, uca catokatanacarusti jach'aruraquiw apti, ucanacarusti jupampïñataquiw uscu. ¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti? Diosajj janiw Wawaparus perdonquiti, ucatpï Wawaparojj jiwañaru catuyejja jiwasanacan juchanacas laycu. Uqhamasti ¿janiquit take cuns churquistani Wawapamp chicjja? ¿Qhitis Diosan ajllitanacaparojj juchañchani? Diosaw jupanacarojj jan juchanit catoke. ¿Qhitiraqui jupanacarusti juchañchaspasti? Janiw qhitisa. Cristowa jiwquis ucajja, juparaquiw jiwatanac taypit jactanquis ucajja, jichhasti Diosan cupëjjapan kont'atäsquiwa, jiwasanacataquisti mayiscaraquiwa. ¿Qhitiraqui Criston munasiñapat apakestaspasti? ¿T'akhesiñati, jachañacha, llaquisiñacha, uñisitäñacha, pist'ayasiñacha, awtjayasiñacha, jan isinïñacha, jiwayatäñacha? Kellkatanjja saraquiwa: “Juma laycuw sapürusa nanacajj jiwañataqui yakhachatäpjjta. Qhariñ ovejanacarjamaraquiw uñjapjjetu” sasa. Take acanacansti atipirinacat sipansa juc'ampïtanwa jiwasar munquistus ucan yanapapampi. Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu. Take acanacsti lurawayiwa jiwasanacan cuntejj leyejj sisquis ucanac lurañasataqui, jiwasanacasti janiw janchin munañaparjam jacjjtanti, jan ucasti Ajayumpi chict'ataw jacjjtanjja.
Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam.
Uca quipca horasaraquiw Jesusajj wali jach'at art'äna: “Elí, Elí, ¿lama sabactani?” sasa. (Ucasti sañ muni: Diosajjay, Diosajjay, ¿cunats aqham nayar antutt'asista?)
Qhititejj nayan janchejj mank'qui, wilajjsa umcaraqui ucajja, wiñay jacañaniwa, nayapï khepa urunjja jacatatayaraquëjja.
Chekpachansa mä pisi ch'ama jakjam ch'accatatänwa, ucampis Diosan ch'amapampiw jichhajj jacasqui. Uqhamaraquiw nanacajj jupjam pisi ch'amanjamäpjjtjja, ucampis jupampi chicäjjasinjja Diosan ch'amapanwa jacjjapjjtjja jumanacar sirviñataqui.
Cunapachatejj jiwasanacajj jan ch'amanïcäyätan jiwaspacha khespiyasiñataquejja, ucapachaw Cristo Tatitusajj horasapar jiwawayi jiwasan juchanacas laycu.
Ch'accatasipcän ucqhajj [Jesusajj sänwa: —Awquejja, perdonam, jupanacajj janiw cuna luratanacaps yatipquiti —sasa.] Soldadonacasti suerte jaktapjjäna Jesusan isip jupanaccam jaljasiñataqui.
Ucampis jichhajj Cristo Jesusampejj mayaquëjjapjjtawa. Nayrajj jayancapjjäyätawa, jichhajj Criston jiwatap laycuw jac'ancjjapjjtajja.
Cunapachatejj nayajj oraket aptatäjjä ucqhajja, takeniruw apthapëjja naya pachparu —sasa. Acampejj cunjämtejj jiwcani uc sañwa munäna.
Jupajj Diosäcchïna ucasa, janiw Diosjam uñjatäñ muncänti, jan ucasti maysaruw Diosa cancañapjja apanucu, mä uywataruw tucu, jaker tucusaw naciwayi. Cunapachatejj jaker tucutäjjän ucqhajja, jupa quipcaw jisc'ar tucuwayi, jaysatap laycusti crusan jiwañcamaraquiw puriwayi, uqham jiwañajj sinti p'enkäcchïna ucasa.
jan ucasti Diosaw jumanacarojj jila alampi alapjjtam. Ucatpï Diosarojj wakaychapjjañamajja janchinacamana, ajayumana ucanacasti Diosancaraquiwa.
Jichhasti janiw cuna juchañchäwis utjquiti Cristo Jesusanquirinacataquejja, qhitinacatejj jan jacapqui janchin munañaparjama [jan ucasti Ajayun apnakata jacapqui ucanacataquejja].
yuspagarasinsti, pachjänwa, ucat säna: “Mank'apjjam, acajj janchejjawa jumanac laycuraquiw t'unjata. Acsti nayat amtasis lurapjjam” sasa. Mank'a tucutatsti copa astasinjja saraquïnwa: “Aca copajj jichhajj machak arust'äwiwa nayan wilajjampi chimpuntatawa. Sapa cuti umapcäta ucqhajja, nayat amtasisaw lurapjjäta” sasa.
Ucampis cunapachatejj tiempojj phokhasiwayjjejja, Diosajj Yokapwa qhitani mä warmi toke yurisa, mä judío jakjamaw leyir phokhasa jacaraquïna. Uqham jutasinwa leyin amparapat jiwasanacaru khespiyäwi jacañ churawayistu, Diosajj jiwasanacaru jupan wawanacapat catokañapataqui.
Mä familian wawanacapajj mä janchita, uqhamarac mä wilat jutiriquiwa; Jesusajj janchimpit wilampit jutaraqui uqhamat jiwañapataqui, ucatsti qhititejj jiwayañatac ch'amanïcän ucaru t'unjañataqui, ucasti Supayawa. Uqhamatwa khespiyat sarnakañ churi take qhitinacatejj jiwañar ajjsarasin esclavjam jacasipqui take jacäwipana ucanacarojja.
Jesusasti wasitat jach'at art'asiraquïnwa, ucatsti jiwt'awayjjänwa. Ucapachaw templonquir uca jach'a cortinajj payaru ch'iyjtawayjjäna, amstat kalltasina aynachcam tucuyasa. Orakes qhathatiraquïnwa, karkanacasti ch'iyatattaraquïnwa.
Ucataquipï Diosajj jawsapjjtamjja, Cristojj jumanac laycuw t'akhesïna, jumanacar mä uñacht'äwi churasa, uqhamat cayup arcapjjañamataqui.
Take jiwasanacaw ovejanacar uñtat saranuctan, chhakharactan, sapa maynis pachpa thaquipa sarasa, ucampis Tatitojj juparuw apjjaruyi jiwasan ñankha luratanacasjja.
Jesusajj saraquïnwa: —Nayätwa thaquejja, chekasa, jacañasa. Naya tokequiw Awquin ucar puriñajj utji.
Diosaw jiwasarojj ch'amacanacan munañapat khespiyanistu, Jesucristo Yokapan apnakatäñataquiw uchasiraquistu. Uca Yokapasti jiwäwipampiw khespiyaraquistu, juchanacasat pampachasa.
Lacamampitejj Jesusarojj Tatituw sätajja, ucat chuymamansti iyawsaraquïta Diosajj jiwatanac taypit jactatapjja ucqhajja, khespiyatäyätawa.
Mä sapa Diosaquiw utji, Diosampi jakenacampi sumancthapiyirejja mayniquiraquiw utji, ucasti Jesucristowa. Jesucristojj jiwañaruw catuyasiwayi takenin khespiyasiñap alañataqui, acasti horasaparuw yatiyasiraqui.
Uqhamaraquiw Jesusajj marcat ankana jiwayatäna, jakenacaru suma k'omachañataqui jupan pachpa wilap toke.
Tatit Jesucristow jacañap loktasiwayi uca tokew juchanacasajj perdonatäjje, janiw jiwasan juchanacasacti, jan ucasti take aca orakpachan juchanacapa.
Ucjjarusti takeniruw saraquïna: —Maynitejj nayar arcañ munchitu ucajja, jupa quicpat armt'aspan, crusap apt'at sapüru arquitpan, jacañap apt'asirjamächi ucasa.
Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.
Uca quipcaraquipï jumanacajj, munat jilatanaca, Criston cuerpopar catuyatäjjapjjsta ucajja, leyitaquejj jiwatäjjapjjtawa, uqhamata yakhampi jacapjjañamataqui. Jichhajj Cristoncjjapjjtawa qhititejj jiwatanaca taypit jacatatawaycatayna ucana, ucasti jiwasan Diosataqui asquïñasataquiwa.
Ucatpï Diosarojj jac'achasiñasajj take chuymampi, mä suma cheka iyawsañampi, jupaw chuymanacasjj k'omacharaqui jan juchani amuyasiñasataqui, janchinacasajj k'oma umamp jarekatäjjewa.
Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.
Iyawsäwi laycu Dios nayrakatan asquit uñt'atäjjatasatwa Diosampi sumancañajj utjistu Jesucristo Tatitusana.
Ucampis jiwasanacajj Cristojj ch'accatatäcän ucjjatwa parlapjjtanjja. Uca arunacasti judionacataquejj p'enkawa, jan judionacataquisti lokhe cancañaraquiwa.
Jiwasan uca jach'a jilïr sacerdotesasti qhuyapt'ayasistaspawa t'uqha cancañasanjja, jupa quicparaquiw take casta yant'anaca jiwasjama t'akhesiwayi, ucampis jan juchar purisa.
Uqhamasti jilatanaca, Diosan qhuyapayasiñap laycuw achict'apjjsma, jumanacajj Diosarojj jacquir ofrendjamay loktasipjjam, Diosar cusisiyquiri loktata. Ucawa Diosataquejj ajayu token chekpach Diosar sirviñajja.
Jumanacajj Cristomp chicaw jiwjjapjjtajja, take jakenacan amtatanacapatjja jithektasjjapjjaractawa take cunanac toketsa. ¿Cunataraqui jichhasti acapacha jakenacjam jacasipctasti jaken amtatanacapar ist'asasti,
Cawquiritï juchar apapctam uca nayra levaduratjja k'omachasipjjam, uqhamata jumanacajj Pascuan mank'añäquis uca t'ant'jam tucupjjañamataqui. Uca t'ant'asti janiw levaduranïquiti, machak suma jac'ut lurataraquiwa, jumanacasti chekpachansa uqhamäpjjaractawa. Cristoraquiwa jiwas laycu sacrificion jiwawayi, juparaquiwa Pascua Corderosajja.
Uca suyt'äwiw sum catjjäsistu uqhamarac almasa uñjaraqui, cunjämatejj anclajj mä barcorojj catjjäsejja uqhama. Jiwasan utjquistu uca suyt'äwejj alajjpach templon cortinap khepäjjan suma acht'ayatawa, bautismo toket yatichäwimpita, iyawsirinacjjaru amparanac uchañjjata, jiwatanacan jacatatañapata, uqhamarac wiñay t'akhesiñampitjja. cawquirutejj Jesusajj jiwas laycu mantcäna, jiwasatac thac jist'arañataqui. Uqhamanwa Jesusajj wiñayatac mä jilïr sacerdote tucuwayi Melquisedec castata.
Jiqhanejj churta nayar jawk'añapataqui, sunqhanacajjsa jiq'irayasiractwa. Qhitinacatejj nayar jisc'achapjjetäna, uqhamaraqui thuscatapjjetäna ucanacatsa janiw maysaru uñtcaractti.
Saraquïnwa: “Awquejja, munsta ucajja, aca t'akhesiñatjja khespiyita; ucampis jan munañajja luratäpati, jan ucasti juman munañamac luraspan” sasa.
Ucampis Cristo Jesusar jactayqui jiwatanac taypita uca Ajayutejj jumanacancchejja, uca quipca Diosaw jiwat janchinacamarojj jactayanejja, Diosan Ajayupajj jumanacan jacqui uca toke.
Jesucristojj jiwasanac laycuw jiwawayi jupamp chica jacañasataqui, jacascañänisa jan ucajj jiwatäñänisa.
Aca khanañchäwejja, Diosajj wiñay jacañ churistu ucawa; aca wiñay jacañasti Yokapanquiwa. Qhititejj Diosan Yokaparojj catokqui ucajja wiñay jacañaniwa; ucampis qhititejj Diosan Yokapar jan catokqui ucajj janiw wiñay jacañanïquiti.
Jupamp chicasti pani lunthatanacaraquiw ch'accatatäna, maynïrejja cupëjjaparu, maynïristi ch'ekäjjaparu.
Cawqhanacarutejj sarapcta ucarojja, janchinacajjanjja apapjjapuntwa Criston jiwatapjja, uqhamata Jesucriston jacatapajj nanac toke uñstañapataqui. Nanacasti jaccasinjja sapürus jiwañar catuyatapunïpjjtwa Cristo laycu, Jesusan jacañapajj aca jiwir janchi toke uñstañapataqui.
Chekpachansa Cristompi chicaw bautismo toke jiwasanacajj imantatäjjtanjja, ucatsti jiwatäjjaractanwa, ucat jactasina mä machak jacañan jacañataqui, cunjämtejj Cristojj jactawaycäna Dios Awquin jach'a ch'amap laycu uqhama.
Chachanaca, munasipjjam warminacamaru, cunjämtejj Cristojj iglesiaru munasi, uqhamarac jacañapsa jupa laycu apt'asiwayi uqhama. Acjja iglesiaru Diosatac yakhachasawa luri, umampi uqhamarac arupampi k'omachasina, jupan nayrakatapar jach'añchat iglesia irpcatañataqui, jan k'añuchata, jan cuna phullch'uni, jan cunamp camacht'ata, jan ucasti suma k'oma Diosatac yakhachata.
Take jumanacajj Cristompi mayachasiñataqui bautisasipjjta ucanacajja, jupampejj mä isimpi isthapitäpcasmas uqhamäpjjtawa.
Jesusajj juparojj saraquïnwa: —Chekpachawa sisma, jichhürpachaw jumajj nayampi chica paraisoncjjäta —sasa.
Ucjjarojj Jesusajj sänwa: —Nayätwa jactañasa, jacañasa. Qhititejj nayaru iyawsaraquitu ucajja jiwatäcanisa, jacaniwa.
Diosan Yokapa Jesusaw jiwasan jach'a jilïri sacerdotesajja. Juparaquiw Diosan nayrakataparojj mantejja. Ucatwa juparojj take iyawsañasampi arcañasajja. Jiwasan uca jach'a jilïr sacerdotesasti qhuyapt'ayasistaspawa t'uqha cancañasanjja, jupa quicparaquiw take casta yant'anaca jiwasjama t'akhesiwayi, ucampis jan juchar purisa. Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.
Uqhamajj jumanacajj Cristomp chica jacatatjjapjjsta ucajja, alajjpach yänacay thakapjjam, cawqhantï Cristojj Diosan cupëjjapan kont'atäquis ucanaca. Jichhasti machakat isthapitäpjjtawa, uca machakar tucuñasti sapürunjamaraquiw juc'amp machakar tucus sarasqui Diosan munañaparjama, uca Diosaraquiw uca machakar tucuñjja luri, jupar sum uñt'añascama. Janiw jichhajj utjcjjeti judiöñas, griegöñasa; circuncidatäñasa, jan circuncidatäñasa; jaya jakëñasa, jan amuyt'anïñasa, esclavöñasa, jan ucajj khespiyatäñasa; jan ucasti Cristow take cunajja, jupajj take cunancaraquiwa. Diosajj jumanacarojj munapjjtamwa, jupancapjjañamataquiw ajllisipjjtam. Uqhamajj qhuyapayasiñampi, suma jakëñampi, jisc'ar tucuñampi, llamp'u chuymanïñampi isthapitay sarnakapjjam. Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam. Ucatsipansa wali munasiñanïpjjam, munasiñasti mayaruw tucuyi, take cunsa phokharaquiwa. Diosan sumancañapay chuymanacamanjja jumanacarojj apnakpan, Diosasti uca amtäwimpiraquiw jawsapjjtam mä cuerpo tucupjjañamataqui. Ucatsti yuspagarapjjaraquim. Tatitun arunacapajj chuymanacamarojj phokhantpan, jumanaccamaraqui yaticht'asipjjam, waytt'asipjjaraquim take amuyt'a chuymampi, Tatitur k'ochuñäqui ucanacsa k'ochupjjaraquim, Diosar yuspagarasa. Cuntejj lurapjjäta, uqhamarac arsupjjäta ucanacjja Tatitun sutiparu lurapjjam, Dios Awquir yuspagarasa Jesucristo toke. Warminaca, chachanacamaru ist'apjjam, uqham lurañanacamaraquiw Diosanquirjamajj wact'apjjtam. Chachanacasti warminacamarojj munapjjaraquim, janiraqui jupanacataquejj khorüpjjamti. Alajjpach yänacat lup'ipjjam, jan acapach yänacatjja. Wawanaca, awquimar taycamarojj take cunansa ist'apjjapunim, uca lurañasti asquiw Dios nayrakatanjja. Awquinaca, jan wawanacamampejj sinti khorüpjjamti jan jupanacan mayjt'asipjjañapataqui. Esclavonacasti uywirinacamarojj ist'apjjaraquim aca orakenjja, janiw jupanacan uñjcataqui cunsa sum lurirjam tucupjjañamäquiti, jan ucasti take chuymaw Diosar ajjsartasa sirvipjjañamajja. Cuntejj lurapjjät ucjja lurapjjam take chuymampi, Tatitutaquis lurapcasma uqhama, jan jakenacatacjamajja. Yatipjjaractawa, Tatitojj jumanacan luratanacamatjja mä herencia churapjjätam, jumanacasti Cristoruw sirvisipctajja, juparaquiw chekpachansa Tatitojja. Ucampis jan wali lurirejja jan wali luratapatjja pago catokaraquini. Diosasti takeniruw uñji, janiraquiw qhitirus yakhachcaspati. Jumanacasti Cristomp chicaw jiwjjapjjta, jichhasti jumanacan jacañanacamajj Cristomp chicäjjewa Diosan nayrakatapana.
Jiwasanacatejj jiwäwipana Cristompejj mayachatästanjja, uqhamaraquiw jacatatañapanjja jupampi mayachatäñäni.
Acat kheparojj janiw qhitis nayar jan walt'ayañapjja muncti, walja chhojjrinacaraquiw janchejjan utji, ucanacaw Tatit Jesusar sirvirïtajj uñacht'ayi.
Khepürusti Juanajj Jesusaruw uñjäna, jupar jac'achasisinquiri, ucatsti sänwa: “Uñtapjjam, acawa Diosan Corderopajja, acapachan juchap k'omachirejja.
Jiwa, ¿cawquincaraqui atipjir ch'amamasti? ¿Cawquincaraqui mich'imasti?” sasa. Jiwan mich'ipajj juchawa, nayra leyiraquiw jucharojj uca ch'amjja churaraqui. Ucampis yuspagaratäpan Diosajja, jupaw Jesucristo toke atipjayistu.
Janiw nayajj evangeliotjj p'enkascti, ucasti Diosan ch'amapawa take iyawsir jakenacar khespiyañataqui, nayrakata judionacaru uqhamarac jan judiöpquis ucanacarusa.
Sirvirejjajj take cunan atipjani, wali jach'aru aptatäniwa. Cunjämtejj yakhanacajj jupat muspharapcäna k'ala tucjata jan uñnakani, jan jaker uñtasita tucjata uñjasajja, uqhamaraquiw jichhajj muspharasipjjani; reyinacas jupar uñjasajj janiw cuns sapcaniti, cuntejj jupanacajj janipuni ist'apjjerïcatayna ucanac uñjapjjatapa, uqhamarac amuyt'apjjatap laycu.
Uqhamaw Cristojj Yokapäcasina t'akhesiñap toke jaysañjja yatekäna. Uqhama suma tucuyatäsinjja wiñay khespiyasiñ chuririw tucu take jupar jaysirinacarojja;
Ucatsti saraquïnwa: —Aqham kellkatawa: Cristojj jiwaniwa, ucatsti quimsürut jiwatanac taypitjj jacatatani; sutipanaracwa take marcanacarojj parlasini, Jerusalenat kalltasina, aqham sasa: ‘Jan wali jacäwinacamatjja arrepientisipjjam juchanacamajj perdonatäñapataqui’ sasa.
Angelasti warminacarojj saraquïnwa: “Jan ajjsarapjjamti, nayajj yattwa ch'accatatäcäns uca Jesusar thakasipcatama. Janiw acancjjeti, jan ucasti jactawayjjewa, cunjämtejj siscäna uqhama. Jutapjjam, uñjapjjaraquim cawquirutejj imatäcän uca.
Ucampis Diosajj jupan jach'a munasiñapanjja ina ch'usatacwa catokestu, Jesucristo tokwa jiwasanacarojj khespiyaraquistu. Diosasti Jesucristoruw juchan pagopjama uchi, jupan jiwäwip laycu khespiyasiñajj utjañapataqui, iyawsäwi toke. Take acanacasti lurasiwa jupan llamp'u chuymapajj uñstañapataqui nayra juchanacas perdonatapatjja.
Uqhamajj Diosan qhitanacapjamawa jumanacar jutapjjsma, Dios quicpas jumanacar achict'apquiristam nanac toke uqhama. Tatitun sutipjjaruw achict'apjjsma: sumancthapjjapjjamay Diosampejja. Cristojj janiw cuna juchsa lurcänti, ucampis Diosajj juparojj mä juchan jakerjamaw uñjäna jiwasanac laycu, jiwasajj Cristomp chicäjjatas laycojj mä chekap jacañanëjjañasataqui, cunjämtï Diosajj jacañas munqui uqhama.
Ucatwa Diosajj juparojj jach'a jilïrinac taypir utt'ayani, jach'a jilïri munañaninacampiw atipjäwinjja cusisiraquini, jiwañaru catuyasitap laycu, mä juchan jakëcaspas uqhama, ucampisa walja jakenacan juchanacap jupajj aparaquïna, juchararanacatwa arjjatasiraquïna.
Jupawa Diosan jach'a c'ajquir khanapajja, juparaquiw cunäquitejj Diosajj uc uñacht'ayirejja, juparaquiw ch'aman arupampejj take cuns catjjäsi. Juchanacasat k'omachasinjja, alajjpachanjja Diosan tronopan cupëjjaparuw kont'asi.
Ucatpï jilatanaca, cunjämtejj Tatitojj janchipan t'akhesiwayejja, jumanacajj janc'aquïpjjañamaraquiwa t'akhesiñataquejja. Ucatwa uca janchin t'akhesirejja, juchjja apanucuwayjje, Sapa maynis cunjämtejj Diosat ch'am catokquejj uqhama maynirojj sirvpan, uqhamata take bendiciontï Diosajj churquistu ucajja sum apnakañasataqui. Maynitejj parlchejja, Diosan arunacaparjam parlpan. Maynitejj qhitirus mä asqui lurchejja, Diosan ch'amapampi ucjja lurpan. Take cuntejj lurapjjta ucajja Diosar yupaychañataquïpan Jesucristo toke, juparuraqui munañanïñasa, jach'a cancañasa churatäpan wiñayan wiñayapataqui. Uqhamäpan. Munat jilatanaca, jan mayjt'asipjjamti uca jach'a yant'anaca jumanacjjaru jutatapatjja, mä cuna jan walis jutcaspa uqhama. Jan ucasti cusisipjjam Tatitjama t'akhesipjjatanacamatjja, uqhamata cusisiñan phokt'atäpjjañacamataqui cunapachatejj jupajj jach'a cancañapampi uñstancan uc uñjapcäta ucqhajja. Tatit laycutejj jumanacar jan wali arunacampi tokepjjätam ucajja, cusisiñanïpjjtawa, Diosan Ajayupasti jumanacjjaruw utt'asi. [Jupanacasti uca Ajayu contraw jan wali parlapjje, ucampis jumanacajj uca Ajayurojj jach'añchapjjaractawa.] Maynitejj jumanacat t'akheschi ucajja, jan jake jiwayatap laycu t'akhespati, lunthatasitap laycus, cuna jan wali luratap laycusa, jaken chh'ajjwañanacapar mantatap laycusa. Ucampis maynitejj Cristor arquirïtap laycu t'akheschejja, janiw p'enkasiñapäquiti t'akhesitapatjja, jan ucasti Diosar yupaychañapawa sutip apatap laycu. Horasajj purinjjewa, Diosan taripäwipajj wawanacapata kalltañapataqui. Taripäwitejj jiwasampi uqham kalltchi ucajja, ¿cunjämaraquïni qhitinacatejj Diosar jan iyawsapqui ucanacan tucuyapasti? “Asqui jakenacatejj ch'ama tucuñampi khespiyaschi ucajja, ¿cunjämaraquïni jucharar jaketaquisti?” Uqhamajja, Diosan munañaparjam t'akhesirinacajja, asquinac lurasipcañapaquiwa, Diosaruraquiw almanacapsa catuyasipjjañapa, qhititejj jiwasar lurirïqui ucaru, jupasti chekaparaquiwa. Diosan munañaparjam take jacäwipana jacjjañapataqui, jan janchin munañaparjam jaysañataquejja.
Jan ucasti Jesucristomp isthapt'asipjjam, janiraqui lup'ipjjamti janchin munañapa lurañjja.
Cristompïtas laycuwa Diosajj nayratpacha ajlliwayistu, cuntejj jupajj jiwasanacar churañapäcän uc catokañasataqui. Take acanacasti Diosan amtäwiparjamawa, cawquïritejj take cuns lurqui cunatejj jupataquejj asquïqui uqhamarjama.
Ucampis janiw qhitis Diosan nayrakatapanjja catokatäcaniti Moisesan leyip phokhatap laycojja, jan ucasti Jesucristoru iyawsatap laycuquiw catokatäni. Ucataracwa nanacas Jesucristorojj iyawsapjjtjja, aca iyawsañ toke catokatäñataqui, janiw catokatäpcti leyin luräwinacap laycojja. Janiw qhitis Diosan nayrakatapanjja catokatäcaniti leyejj cuntï sisqui ucarjama phokhatap laycojja.
Jesusasti mistuwayänwa crusap apt'ata, Calavera sat chekar sarañataqui, hebreo arunjja Gólgota satawa.
Ucatpï Jesucristojj machak arust'äwin sumancthapiyiripajja. Nayra arust'äwirjam jucha luratanacasajj Criston jiwatap laycuw perdonatäjje, qhitinacarutejj Diosajj jawsqui ucanaca Diosajj churañatac arscatayna uca wiñay herencia catokapjjañapataqui.
Jan wali jakenacajj anunacjamaw muyuntitu, ñankha lurir tama jakew uyuchrantitu: amparanacajjamp cayunacajjamp chhojjriñchapjjetu, ch'aqhanacajjas jaqhuñjamäjjewa. Timanacajjasti atipjasajj jan phisayaw uñch'uquipjjetu, jupanaccamaw isinacajj jalanokasipjje, patjja isejj catusiñataquisti suerte jaktapjje.
Take acanacansti atipirinacat sipansa juc'ampïtanwa jiwasar munquistus ucan yanapapampi.
“Lunthatajj jutiwa lunthatasiñataqui, jiwayañataqui, tucjañataqui, ucampis nayajj juttwa jacañanïpjjañamataqui, uqhamarac jilarquir jacañanïpjjañamataquiraqui.
Cristo tokewa Diosar jan ajjsarasina jac'achasiñasajj utji, jupar iyawsctansa uca iyawsañampi.
Ucatwa Jesusajj jach'at art'asïna: —¡Awquiy, amparamaruw ajayojj-jja catuyasjjsma! —sasa. Uc arsusinwa jiwawayjjäna.
Cunjämtejj Jesusan jiwatapar jactatapar iyawsapjjtanjja; uca pachparaquiw iyawsaractan, qhitinacatejj jupar iyawsasa jiwapjje ucanacarojj Dios Awquejj Jesusampi chica jactayani.
Qhitanquitu ucan munañapajja acanacawa: Take qhitinacatejj Diosan Yokaparu uñjquejja, uqhamarac jupar iyawsquejja ucanacajj wiñay jacañanïñapa, nayasti khepa urunjja jacatatayaraquïwa.
Uqhamarus Cristojj uca cuerpon p'ekepawa, ucasti iglesiawa. Juparaquiw uca cuerporojj jacañ churi, jupajj jiwatanacat nayrakat jactiriwa, uqhamat jupajj take cunansa nayrancañapataqui.
Janiw Diosan qhuyapayasiñapjja apanucuñ muncti. Maynitejj Diosampi catokatäspa leyiru ist'atap laycu ucajja, janiw cunataquis Criston jiwatapajj asquïcaspati.
Qhititejj jacañap khespiyasiñ munanejja, apt'asiniwa, ucampis qhititejj jacañap naya laycu apt'asinejja, khespiyasiniwa.
Qhititejj Yokar iyawsqui ucajja wiñay jacañaniwa, ucampis qhititejj jan Yokaru iyawsqui ucajja janiw wiñay jacañanïcaniti, jan ucasti Diosan ajjsarcañ mutuyäwipwa catokani.”
Takenimpis suman sarnakasiñ thakapjjam, k'oma jacañan sarnakasa, jan ucampisti janiw qhitis Tatitur uñcatcaspati.
Janiraquiw nanacpachas cuna lurañataquis yatekatäpquirista uqhamäpcti, jan ucasti take cuntï lurapcta ucajj Diosatwa juti.
Utachirinacan jakonucut kalajja, esquina kalaruw tucjje. Tatituw uqhäm tucuyi, ucajj jiwasanacatac muspharcayawa.
Uqham sinti t'akhesiña tucusitapatsti jupajj khana uñjani, uc yatisitapatsti c'uchiquiw uñjasjjaraquini; Tatitun cheka sirviripasti waljaniruw khespiyani, jupanacan juchanacapsti aparaquiniwa.
Jacañap khespiyasiñ munirejj apt'asiniwa, ucampis naya laycu jacañap apt'asiristi khespiyasiniwa.
Marcat mistcasinjja mä jakeruw jicjjatapjjäna. Jupasti Cirenenquirïnwa, sutipasti Simón sata. Juparuraquiw Tatitun crusapjja apayapjjäna.
Ucampis Diosajj jach'a qhuyapayasiñaniwa, walrac munasiraquistu. Ucatwa Cristomp chica jacañ churistu, juchanacasan jiwatascchïyätan ucasa. Uqhamajj jumanacajj Diosan qhuyapayasiñapatwa khespiyatäpjjtajja.
Uqhamasti munat jilatanaca, jumanacajj Tatitumpejj sum sayt'asipjjam, janirac sarakapjjamti. Irnakasipcaquim juc'ampi juc'ampi Tatitun luräwipanjja; jumanacajj yatipjjaractawa Tatitumpi mayaqui irnakapjjatamajj janiw inamayäquiti.
Mä machak k'ochu k'ochupjjaraquïna: “Jumajj asquïtawa uca libro catuñataqui, sellonacap ch'iyarañataquisa; jumarojj jiwayapjjäyätamwa, ucatsti wilamampiw Diosataqui alapjjestajja, take casta jakenacaru, cunayman parlani jakenacaru jisc'a marcaru, jach'a marcaru.