100 Juchañchasiñ atipjañataki Biblian jiskʼa tʼaqanakapa

Jiwasatejj juchanacas arsusiñänejja, jupajj chekawa, asquiraquiwa juchanacas perdonañataqui, uqhamarac take jan walinacata k'omachañataquisa.

Jichhasti janiw cuna juchañchäwis utjquiti Cristo Jesusanquirinacataquejja, qhitinacatejj jan jacapqui janchin munañaparjama [jan ucasti Ajayun apnakata jacapqui ucanacataquejja].

camisatejj inti jalsut inti jalantcam wali jayajja, uqhäm jiwasanacat juchanacas jayarst'ayistu.

“Janiw yakha Diosajj jumjam utjquiti, jumasti pampachtawa ñankha luratanacapjja, juma contra sayt'asitanacapsa armaractawa, qhitinacatï marcamatjja jilt'apqui uca juc'aniru. Jumaw munasiñamjja uñacht'ayapjjesta, colerasiñamsti janiraquiw wiñayatac catjjäsctati.

Nanacatsti wasitatay qhuyapt'ayasipjjeta, ñankha luratanacajjsti jach'a kotar jakontjjam.

Ucat juchanacapatjj pampachä, janiw juc'ampjj uca juchanacapatjj amtcjjäti” sasa.

Tatitojj siwa: “Jutapjjam, uca jan wali luratanacamat parlapjjañäni. Juchanacamajj wila colorar uñtatäcchinisa, nayajj qhunjam jank'ow tucuyäjja; ch'iyar wila isir uñtatäcchinisa, nayajj jank'o t'arwaru uñtata tucuyäjja.

Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.

Diosay, k'oma chuymay utjayita, machak asqui ajay churaraquita;

“Ucampis nayajja, Diosamätajj laycojj, jake jiwayatanacamjja pichsmawa, juchanacamatsti janiw mayampsa amtascjjäti.

Uqhamasti, qhititï Cristompëjjchi ucajj machak jakëjjewa. Nayra luräwinacasti tucusjjaraquiwa, jichhajj take cunas machakar tucutawa.

Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam.

Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.

Qhititejj juchap imantascani ucajja, janiw nayrar sarcaniti, ucampis qhititejj juchap arsusisina jaytanucjjani, ucasti perdonatäjjaniwa.

Ucampis jucha luratajjaw utjäna, uc amuyasta, ucat jucha luratanacajj jan imt'csmati; juchanacajj jumar arsusiñataquiw amtta, Tatay, jumasti juchanacajjat pampachista.

Sapjjsmawa, uca pachpawa alajjpachanjj juc'amp cusisiñajj utji mä juchararan arrepientisitapatjja, llätunc tunca llätuncani asqui jakenacajj jan cunats arrepientisipjjañapajj utjqui ucanacat sipansa.

Tatituw takpach juchanacajjat pampachitu, jupaw take usunacajjat c'umarachitu;

Jesucristo quipcaraquiw juchanacasjja pachpa cuerpopjjaru apawayjje, crusan jiwasina, uqhamata jiwasajj jucha lurañar jiwañasataqui, mä suma jacañan jacañasataqui. Jupajj chhojjriñchjatänwa jumanacajj c'umaräpjjañamataqui.

ucatsti takeni jucha lurapjjatap laycusti Diosampejj janiw catokatäpquiti.

Ucampis Diosajj jupan jach'a munasiñapanjja ina ch'usatacwa catokestu, Jesucristo tokwa jiwasanacarojj khespiyaraquistu.

Khoru jakejj sarnakäwipjja apanucpan, ñankha amtañan jakesti amtañanacapjja apanucpan; Tatitun ucar cuttanjjapjjam, jupasti jumanacatjja qhuyapayasipjjätamwa; Diosasar maqhatjjapjjam, jupasti perdonañataquejj janc'aquiwa.

Nayar uñt'añataquejja janiraquiw waquiscjjaniti, yatichasipjjañanacapajj maynit maynicama amigonacaparusa, uqhamarac familianacaparusa, takeniraquiwa jisc'at jach'acama nayarojj uñt'apjjetani. Nayasti jupanacarojj ñankha luratanacapatjja perdonaraquïwa, jucha luratanacapatsti janiw mayampsa amtascjjaraquïti. Naya Tatituw ucjja arsta” sasa.

ucampis Tatitojj situwa: “Munasiñajjaquiw jumataquejj waquichatajja, nayan ch'amajjasti juc'ampi sumaw uñsti cunapachatï jakejj t'uqha jicjjatasqui ucqha” sasa. Uqhamajj nayajj cusistwa, Criston ch'amapajj nayan t'uqhasiñajjan uñstañapataqui.

Munat wawanacajja, acanacwa kellkanipjjsma juch jan lurapjjañamataqui. Ucampis cawquïritejj juchañchasqui ucataquejj, utjistuwa mä arjjatirisa alajjpach Awquisan nayrakatapana, ucasti Jesucristowa, jupajj chekawa.

“Jan yakhanacarojj juchañchapjjamti, Diosasti janiraquiw jumanacarojj juchañchapcätamti. Perdonapjjam, Diosasti perdonapjjaraquïtamwa.

Uqhamajj Yokatejj khespiyasiñ churapjjstamjja, chekpachansa khespitaw sarnakasjjapjjäta.

Juchasti janiw jumanacjjarojj ch'amanïcjjaniti, janiraquiw leyin munañapancjjapjjtati, jan ucasti Diosan qhuyapayasiñapancjjapjjtawa.

Tatay, jumajj munasiñanïtawa, juch pampachiriraquïtawa, jumar art'asirinacataquejj qhuyapayasirïtawa.

Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.

“Jumanacatejj jan wali luratanacapat masinacamarojj perdonapjjäta ucqhajja, alajjpachanquir Awquimajj jumanacarojj perdonapjjaraquïtamwa.

Masinacamar jan perdonapcäta ucasti, jumanacan Awquimasti janiraquiw cuna juchanacamatsa perdonapcaraquïtamti.

Dios Tatay, jumatejj takpach juchanac amjjäsiscaquismajja, ¿qhitirac nayrakataman sayt'aspasti?

Ucampis jumaw juchanacat pampachapjjesta, uqhämat jumar wakaychañ yatichapjjesta.

Janiraquiw mayampi juchanacapatjj amtascjjäti, ni jan wali luratanacapatsa” sasa.

Nayar jutapjjam take karjatanaca jatjatanaca, nayaw samarayapjjäma.

Juchapat k'omachayasir jakejj cusisiñaniwa, ñankha luratanacapat pampachayasitap laycu.

Nayaw juchanacamsa, pantasitanacamsa chhaktaytjja, cunjämatejj kenayanacajj chhaktapjje uqhama. Nayan ucar cuttanjjam, nayajjay jumarojj khespiysmajja.”

Diosatac chekpach loktäwejj cutiquipstat chuym loktañawa. Diosay, llamp'uptat chuymarojj janiw jumajj jisc'achctati.

Take acanacsti Dios quipcaraquiw luri, jupampisa sumancthapiyjjaraquistu ucatsti Cristo tokew, takenirus Diosampi sumancthapiyañ arunac loktañwa jaytaraquistu.

Diosan munasiñapatwa jumanacajj khespiyatäpjjtajja iyawsañ laycu. Acasti janiw jumanacan luräwinacamäquiti, jan ucasti Diosaw jumanacar churapjjtam.

janiquiy jucha luratanacajjat amtasimti, janirac wayna cancañajjan ñankha luratanacajjat amtasimti; Tatay, qhuyapayasiñam laycuy nayat amtasita, munasiñam laycurac amtasita.

Diosajj janiw Yokapjja acapachar juchañchañataqui qhitanquiti, jan ucasti acapachajj jupa toke khespitäñapataquiw qhitani.

Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.

Diosaw jiwasarojj ch'amacanacan munañapat khespiyanistu, Jesucristo Yokapan apnakatäñataquiw uchasiraquistu.

Uca Yokapasti jiwäwipampiw khespiyaraquistu, juchanacasat pampachasa.

Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.

Leyisti churatänwa juchajj juc'amp uñstañapataqui, ucampis cunapachatejj juchajj juc'ampi utjänjja juc'ampiraquiw Diosan qhuyapayasiñapajj utjaraquïna.

Criston ch'amapampejj take cunaruw saycatirista.

lanctasin ucasa, janiw tinccaniti, Tatituw amparapat wayjjäsisqui.

Ucapachaw Pedrojj sartasina Jesusarojj jisct'äna: —Tata, cunapachatejj jilajjajj cuna jan walsa luritan ucajja, ¿kawkha cutis nayajj uca juchapatjja perdonäjja? ¿Pakallk cutcamati? sasa.

Jesusasti saraquïnwa: —Janiw pakallk cuti siscsmati, jan ucasti, pakallk tunca pakallko cuti sismawa —sasa.

Ucatpï jumanac purajj maynit mayniru juchanacamjja arsusipjjañamajja, ucatsti maynejj maynitaqui orañaparaquiwa uqhamata c'umaräjjañapataqui. Mä asqui jaken oracionapasti wali ch'amaniraquiwa.

Uñisiñajj ch'ajjwanacwa utjayi, ucampis munasiñajj take juchanacwa pampachi.

Ucampis jupajj jiwasan Diosasataqui sayt'asitas laycuw chhojjriñchjatänjja, jiwasan ñankha luratanacas laycuw wali t'akhesiyatänjja; jupan t'akhesitapasti jiwasataquejj sumancañ apani, chhojjrinacap laycuw kollata uñjasiractanjja.

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

Ch'accatasipcän ucqhajj [Jesusajj sänwa: —Awquejja, perdonam, jupanacajj janiw cuna luratanacaps yatipquiti —sasa.] Soldadonacasti suerte jaktapjjäna Jesusan isip jupanaccam jaljasiñataqui.

Diosajj jiwasarojj k'ollanaptayistuwa Cristo Jesusan Diosan munañap phokhatap laycu, mä cuti wiñayatac jupa pachpa cuerpop sacrificiot loktasisa.

Ucatpï Diosarojj yupaychapuntanjja muspharcañ qhuyapayasiñapata, uca pachpa qhuyapayasiñapampiw bendicistu munat Yokapampi mayaquïtas laycu.

Diosajj jach'a munasiñapatwa Yokapan jiwäwipa toke khespiyistu, juchanacassa perdonasaraqui.

Take llaquisiñanacamsti Diosar jaytapjjaraquim, jupasti jumanacatjja llaquisiraquiwa.

Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja.

Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.

Yupaychañäni Jesucristo Tatitusan Dios Awquiparu. Jupaw jiwasar qhuyapayasir Awquisajja, uqhamarac chuymachirisasa.

Take t'akhesiñanacasanwa Diosajj chuymachistu, jiwasajj t'akhesirinacar chuymachañasataqui, cunjämtï Diosajj jiwasar chuymachquistu uqhama.

Tatituw t'akhesiyat jakenacarojj arjjatasqui, jupaw llaquisiñ pachanacan imasqui.

Ucampis yuspagaratäpan Diosajja, jupaw Jesucristo toke atipjayistu.

Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”

Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.

“Tatitur take chuymamampi catuyasim; juman ch'iqhi cancañamaruquejj jan alcatasimti.

Diosaw imantasiñasajja, ch'amañchirisasa, jupaw chijinacan arjjatirisajja.

Ucampis ucajj uqhamächi ucajja ¡kawkha juc'amp ch'amanïpachas Criston wilapajja! Ucasti wiñay jaquir Ajayu tokew Cristojj Diosaru jupa pachpa loktasi jan k'añucht'ata, wilapas k'omacharaquistuw chuymasjja jiwañaru apquistus uca jan wali luräwinacatjja, jacquir Diosar sirviñasataqui.

Chuymampiwa iyawsañajja Diosampi catokatäñataquejja, lacampisti arsuñawa Jesucriston khespiyatäñatakejja.

Jilatanaca, janiw nayajj ucampejj sañ munapcsmati niyas jicjjatquirista uqhama, jan ucasti cunatejj khepancqui ucjja, armanuctwa, nayrancquis uc jicjjatañcamaw ch'amañchasiscta,

cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.

Chuymajjaruw arunacam imta, juma contra juch jan lurañajjataqui;

Diosajjay, munasiñam laycuy qhuyapt'ayasita, qhuyapayasirïtam laycuy juchanacajjat pampachita.

Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.

Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.

Jichhajj jilatanaca, ch'amañchasipjjam Tatitumpi, uqhamarac jach'a ch'amapampisa.

“Khanacwa sapjjsma, qhititejj nayan arsutajjar ist'quejja, uqhamarac qhititejj qhitanquitu ucarus iyawscaraqui ucajja wiñay jacañaniwa, janiraquiw juchañchatäcaniti, jan ucasti jiwañat jacañaruw pasawayjje.

Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.

Acajj chekawa, takeniw acjj iyawsapjjañapa: Cristo Jesusajj aca orakerojj juchararanacar khespiyiriw juti, ucanacatsti nayaw nayrïrïtjja.

“Cusisiñanïpjjew qhitinacatejj qhuyapayasirïpqui ucanacajja, Diosasti jupanacatjja qhuyapt'ayasiraquiniwa.

Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.

Tatitur suyt'irinaca, ch'amañchasipjjam, jan ajjsarir chuymanïpjjaraquim.

Awquirojj maytwa jupan jach'a muspharcañ kamir cancañapat ch'am jumanacar churañapataqui, Diosan Ajayup toke,

ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.

Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.

Ucampis uca mä juc'a urunacana t'akhesipjjatama pasjjepansti, Diosajj jumanacarojj sumwa tucuyapjjätam, sum sayt'ayapjjaraquïtam. Uca Diosasti qhititejj take bendicionanac churquistu ucawa, uqhamarus Jesucristompi chicäñasataquiraquiwa jawsistu wiñayataqui.

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.

Diosan sumancañapay chuymanacamanjja jumanacarojj apnakpan, Diosasti uca amtäwimpiraquiw jawsapjjtam mä cuerpo tucupjjañamataqui. Ucatsti yuspagarapjjaraquim.

“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.

Cawquïritejj jawsapctam ucajja phokheriwa, uqhamajj phokhaniw take acanacjja.

jupaw machak ch'am churitu, cheka thaquinjam irpitu, sutipar jach'añchañ laycu.

Diosaw jach'a ch'amapampi churistu take cuntejj jacañataqui munctansa ucanacjja, uqhamarac jupar munañsa churaraquistu, qhititejj jach'a ch'amapampi, uqhamarac muspharcañ luräwinacapampi jawsquistu ucar uñt'ayasajja.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Janiquiy juchanacajjarojj uñtanimti, take ñankha luratanacajjat k'omachita.

Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.

Iyawsañajja: “Catokäwa” sas take chuymampi suyt'ctans ucawa, uqhamarac chekpachapuni iyawsañasa cuntejj jan uñjtan ucajj chekätapa.

ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.

Tatituruw nayajj art'asta, jupasti take llaquinacat irpsutu;

Chuymasatejj cunatsa juchañchchistojja, Diosajj juc'amp jach'awa chuymasat sipansa, jupasti take cunwa yatiraqui.

Nayajj jiwjjtwa Cristompi chic ch'accatata, ucampis janiw nayajj jacjjtti, jan ucasti Cristow nayan jacjje. Aca janchin jactsa ucajja, Diosan Yokaparu iyawsatajj laycuquiw jacasctjja, nayar munasinwa jacañapa naya laycu apt'asiwayi.

Cristojj janiw cuna juchsa lurcänti, ucampis Diosajj juparojj mä juchan jakerjamaw uñjäna jiwasanac laycu, jiwasajj Cristomp chicäjjatas laycojj mä chekap jacañanëjjañasataqui, cunjämtï Diosajj jacañas munqui uqhama.

Ucat sipansa jumanacanjja munasiñajj utjapunpan, munasiñasti walja juchanacwa perdonaraqui.

Yattanwa, nayra jacañasajj jupampi chica ch'accatatäjjewa uqhamat jiwasan cuna jan walitejj utjqui ucajj t'unjatäñapataqui, uqhamat jan juc'ampi juchar sirvjjañasataqui.

Llaquisiñajjan Tatitur art'asta, jupasti ist'ituwa, khespiyaraquituwa.

Ucatpï Diosarojj jac'achasiñasajj take chuymampi, mä suma cheka iyawsañampi, jupaw chuymanacasjj k'omacharaqui jan juchani amuyasiñasataqui, janchinacasajj k'oma umamp jarekatäjjewa.

Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim,

nayatejj ñankha thaquin sarnakerïstjja, cheka thaquinjamay irpasita.