Kasta
SARNAQÄWINAKAT ARSUÑATAKI VERSIÓN
Diosan wawapanakaparuw wakyasisipxañapatakiw jawsanipjje. Wakyasiñaxa ch'uwa, Diosatak wakichasqa, payaruw jilsutañawa. Uka ch'uwañchatakiw Diosan jan munapki ukanakapat jithiqtañasawa. Arupas nayrjamaxwa kunatix Diosan jan munapki uk yatichistani. Sapa uruw Arupar liyiñama, ukhamatwa Diosar juk'amp uñt'añama. Ukham lurasax kunatix wali, kunatix jan wali, kunatix Tatitur jak'achasistu, kunatix jithiqasistu ukanak yatipjjarakitama.
(Salmos 119:9) ¿Kunjamsa waynaxa ñanapar ch'uwachaspa? Arumampiwa. Jesucristopax jiwasanak laykuw jakap churäna, ch'uwachasiñasataki, wakyasisipjjañasataki. Jumanakax chiqpachansa Alaxpach Tatitur munapxtaxa, jithiqasipkakitamawa kunanakatï jumanakar jithiqasipxtam ukat. Sapa uruw jumanakar jalluntapxarakitama, taqi kunanakan wakyasisipxañatak ch'amachasipkakitama.
Sapa uruw uka wakyasiñ Diosan jawsanipkistu uk thaqhañama. Arupas akham siwa: Taqiniw ch'amachasipxañapax suma jakasiñatakisa, wakyasisipxañatakisa; ukhamax janiw khitis Tatitur uñjaspati (Hebreos 12:14). Alaxpach Tatitax wakyasisitaw jumanakar uñjañ munani, jumanakan almampi, cuerpompi ch'ichiniqapki ukanak jithiqatataw munani.
Aka chiqanxa walja arunak wakyasiñ tuqit jikxatasiñamawa, kunjämatï ukax Jesucristotak wali wakisiñäki uk yatipjjañamataki.
Ucampisa janitï jumanacajj Diosar sirviñ munapcsta ucajj, jichhüruy ajllisipjjam qhitirutï sirvipjjäta uca. Awquinacamajj Eufrates sat jawira lacana sirvipcäna uca diosanacaruti, jan ucajj cawquïrinacatï aca orakenacan jacapqui uca amorreonacan diosaparucha. Ucampisa nayampi take familiajjampejja Diosaruw sirvipjjä.
Tatitutejj jan utachcaspajja, inamayaquiw utachirinacajj ch'am tucusipcaspa; Tatitutejj marcar jan imcaspajja, inamayaquiw marc uñjirinacajj uñch'uquisipcaspa.
Ñankha lurir jaken utaparojj ñankhachiwa, ucampis asqui jaken utaparojja asquimpiw phokt'i.
Alajjpachanquir Take atipirin imat sarnaker jakejja, Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui. Amparapjjaruw apapjjätam, cayuman kalar jan lanctasiñapataqui; catarinacarusa, asïrunacarus takjjatascaquïtawa, leonanac taypinsa, ajjsarcañ animalanac taypinsa, sarnakascaquïtawa. “Nayar munasitap laycusti, juparojj khespiyäwa, nayar uñt'atap laycusti, juparojj imaraquïwa. Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä; walja maranacaw jacayä, ¡khespiyäwejjampiw jupar cusisiyaraquï!” Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.
“Juman chuymamaruy catokam cawquïri camachi arunactï jichhüruna churcsma ucanacjja. Ucatsti wawanacamaruw yaticharaquïta; utamanccasina, thaquinjam sarcasina, uqhamaraquiw parlaraquïta iquintañataqui, sartañataquisa.
Munasiñamamp qhuyapayasiñamampejj sapürupuniw nayamp chicäsqui, Tatay, utamansti wiñayapuniw jacä.
Yatiñ cancañampiwa utajj lurata, cimientonacapasa ch'iqhi cancañampiwa uchantataraqui. Jayra jaken yapu jac'apwa pasawayta, pisi amuyt'an jaken uva yapup jac'a. Ucatsti yapupwa uñjta ch'aphinacampi chhaktayata, kala uyupasa liju tucjataraqui. Uqham uñjasinsti chuymajjanjja amthapistwa; uc uñjasinsti aca yatichäwi yatekta: jumajj juc'ampis ict'ascactawa, amparanacamsa khomjjarusiscactawa sum iquiñataqui, uccañcamasti pobrernucstañawa acatjamata catuntätam, mä muyuycu jakjama wali ch'amampi. Ucatjja uta mankherojja yatiñampiw phokhantataraqui, jila alani muncaña yänacampi.
Llamp'u chuymanïpjjam, munasirinaca, paciencianïpjjaraquim maynit maynicama munasiñan sarnakasa. Ucampis jumanacajj janiw uca casta lurañanacjja Cristot yatekapctati, jumanacatejj chekpachan juparu ist'apjjsta uqhamarac jupamp yatichatäpjjsta Jesusan asqui luräwinacaparjama ucajja. Nayra jacäwinacamarjam sarnakañjja apanucupjjam, uca sarnakäwisti cunayman jucha lurañanacampi sallkjatänwa. Jumanacajj machakar trocatäjjapjjañamawa ajayunacamansa uqhamarac amuyt'añanacamansa, ucatsti Diosan munañaparjama luratäqui uca machak jacäwimpi isthapisipjjam, suma k'oma cheka cancañan jacapjjaraquim. Uqhamasti jichhajj c'arinacjja jan parlcjjapjjamti; sapa maynis jake masinacamarojj cunatejj chekäqui ucac parlapjjam, takenis mä sapa cuerpon luriripaquïtanwa. Colerasisinjja jan juch lurapjjamti, uca colerasiñanacamajj jan jornalpachäpati. Janirac Supayarus jac'achayasipjjamti. Qhititejj lunthatasirïcän ucajja jan juc'amp lunthatascjjpanti, jan ucasti irnakañaru uscuspan, sum irnakasinwa pobrenacar yanapt'añataquis utjaraquini. Jan wali arunacjj jan parlapjjamti, jan ucasti suma arunacamp parlapjjam, uqhamata ist'irinacamajj jiltañana yanapt'atäñapataqui, uqhamarac bendicitäñapataqui. Janipun t'akanoktañar sarapjjamti, jan ucasti mayaquïpjjapunim Kollan Ajayun yanapapampi, sumancañajj mayachthapipctam uca toke.
Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.
Yatiñan warmejj utapjja sumwa uñjasi, ucampis jan amuyt'an warmejja pachpa amparapampiwa utaparojj tucji.
chekap jacañpun munta. ¿Cunapacharac nayar tumpitätasti? Reyi utajjansa, sarnakäwejjajj jan camscayäniwa,
Qhitintejj munasiñajj utjqui ucajj llamp'u chuymaniwa, suma jakewa, janiw envidiasirïquiti, janiw jach'a jach'a tucurïquiti. Janiw cuna jan walsa lurquiti, janiraquiw cunsa jupataquiqui munirïquiti, janiw colerasquiti, janiraquiw colerasitapsa imjjäsisquiti. Janiw cunatejj jan walïqui ucatjj cusisiñ yatquiti, jan ucasti cunatejj chekapäqui ucat cusisiñ yati. Take cun t'akhesi, take cun iyawsi, take cun llamp'u chuymampi suyt'araqui.
Nayan Diosajjawa take cunatejj jumanacan jan utjquisa ucjja churapjjätam Cristo Jesusan walja c'ajquiri kamir cancañaparjama.
“Awquimaru, taycamaru jach'añcham, uqhamata Tatitu Diosamajj churcätam uca orakena jaya maranac jacañamataqui.
Wawanaca, awquimaru taycamaru ist'apjjam, Tatitur munasina. Acawa chekapajja. Jichhajj jilatanaca, ch'amañchasipjjam Tatitumpi, uqhamarac jach'a ch'amapampisa. Jarc'akasipjjam take armanactejj Diosajj churapctam ucanacampi, Supayan c'ari arunacaparu atipjañataqui. Janiw jakenac toketi nuwasctan, jan ucasti alajjpachanacanquiri ñankha ajayunac tokewa, qhitinacatejj aca ch'amac oraken munañampi apnakapqui ucanac contraw nuwastanjja. Uqhamajj catjjarupjjam kawkha armanactejj Diosajj churapctam ucanaca, uqhamat jan wali urun atipjapjjañamataqui, uqham lurasinsti juc'amp ch'amani sayt'apjjañamataqui. Ch'amani sayt'asipjjam, cheka cancañampi wac'antata, ucatsti cheka sarnakañampi imt'atäpjjaraquim cunjämtejj mä soldadojj armadurampi pechopat imt'asquejj uqhama. Sumancañ arunac parlañatac waquichasipjjam, cunjämtejj mä soldadojj waquichasi zapato uscusisinjja uqhama. Ucatsipansa, iyawsañanacamajj mä escudjamäpan, Supayan akquir flechanacapat jarc'akasiñataqui. Khespiyasiñampisti mä cascompjam p'eker uscusipjjam, Diosan arupsti catjjarupjjaraquim mä espadar uñtata cuntejj Kollan Ajayojj churapctam uca. Acanacsti oracionampipuni lurapjjam, Diosar mayisina Kollan Ajayu toke. Uc lurañataquisti janc'aquïpjjam, jan pächasisa, uqhamarac take qhitinacatejj Diosancapqui ucanacataquis Diosatjj mayipjjaraquim. Nayataquis Diosatjja mayipjjaraquim, parlcta ucapach Diosajj nayar arunac churañapataqui, uqhamat take ch'amampi parlañajjataqui, imantatäqui uca khespiyasiñ arunac mayninacar yatiyasa. Bendicitäñatac arsuta nayrïri jach'a camachejja acawa: “Awquimar taycamar jach'añcham, Diosajj nayarojj aca arunacatjja mä uñt'ayiritjamwa qhititu, ucataracwa jichhas preso catuntatäsctjja. Diosat mayipjjam, nayajj cunjämtejj take ch'amampi aca arunac parlañajjäqui uqham parlañajjataqui. Tatitun irnakäwipan wal yanapasir munat Tíquico jilatasaw nayjjat take yatiyäwinac yatiyapjjätam, uqhamarac cunanactejj lurctjja ucanacsa. Ucataquiw qhitanta, cunjämäsipctejj uc jumanacaru yatiyañapataqui, uqhamat juc'amp jumanacaru ch'amañchañataqui. Dios Awquisa, Tatit Jesucristosa jumanacarojj sumancaña, munasiña, uqhamarac iyawsañsa churpan. Diosajj bendispan qhitinacatejj Tatit Jesucristosaru jan pächasisa munapqui ucanacarusa. cusisitäñamataqui, uqhamarac jaya maranac aca oraken jacañamataqui.” Uqhamarac awquinaca, jumanacajj wawanacamarojj jan colerayapjjamti, jan ucasti chekapar yatichasina sum uywapjjam, Tatitur iyawsapjjañapataqui.
Ñankha jakenacajj aynacht'apjjewa, ucatsti ucaraquiw tucuyapajja, ucampis asqui jaken utapasti janiw tucjatäcaniti.
Uta mankhemansti, warmimajj achuntir uva alir uñtatäniwa; wawanacamasti mank'añawjamar muyuntatajja, ch'ich'tanir olivo alinacar uñtatäniwa. Tatitojj uqhäm jupar wakaychirirojj asquinac churani.
Maynit maynicamaw munasipjjañama jila purjam take chuymampi, suma aytat sarnakañansti purapat suma ajjsartañampi uñjasisa.
“Qhititejj ist'quitu ucat cuntejj siscta uc luraraquejja, ucajj mä suma amuyun jakempi sasiwa, utapsa mä karka pataru lurascaspa uqhama. Jallu purintatapatsti jawiranacaw wal sarti, ucamp chicasti waliraquiw thayajj thayt'ani uca utarojja, ucampis janiw tincuyquiti karka patancatap laycojja.
Warminaca, chachanacamarojj ist'apjjam Tatiturjama. Chachajj warmin p'ekepawa, cunjämatejj Cristojj iglesian p'ekepäqui uqhama. Cristojj iglesian khespiyiriparaquiwa; iglesiasti jupan cuerpoparaquiwa. Ucampis cunjämatejj iglesiajj Cristoru ist'ejja, uca pachparaquiw warminacajj take cunansa chachaparojj ist'añapa. Chachanaca, munasipjjam warminacamaru, cunjämtejj Cristojj iglesiaru munasi, uqhamarac jacañapsa jupa laycu apt'asiwayi uqhama.
Jan armt'asipjjamti utanacamar visitanac catokañjja, uqham lurasajj yakhepanacajj jan yatisaquiw angelanacs catokapjjäna.
Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam. Ucatsipansa wali munasiñanïpjjam, munasiñasti mayaruw tucuyi, take cunsa phokharaquiwa.
Ucat sipansa jumanacanjja munasiñajj utjapunpan, munasiñasti walja juchanacwa perdonaraqui. Korpacht'asipjjaraquim jumanaccamajja mä suma chuymampi.
Jichhajj jilatanaca, cusisitäpjjapunim. Jacañanacamansti chekapapunïpjjam, chuymachasipjjaraquim, sumanaraqui jumanaccamajj jacapjjam. Samarañ churir munasir Diosaw jumanacampïscanejja.
Chijejj janiw jac'achascätamti, usus janiraquiw utamar purincaniti, Diosajj angelanacaparuw qhitanini, sarnakäwim imañataqui.
Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim. Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.
Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.
Diosarojj janipuniw qhitis cunapachas uñjquiti. Ucampis jiwasatejj munasiñäni maynit maynicama ucajja, Diosajj jiwasanwa jaqui, munasiñapasti jiwasan phokhasiraqui.
“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.
Ucampis llamp'u cancañampi chuymachasiñampi churir Diosajja jumanacan jacäwimana yanappan sumaqui mayninacajj mayninacampi jacapjjañamataqui, Tatit Jesusanquirinacjama, uqhamata takenisa mayaqui jach'a Dios Awquisaru yupaychañataqui, jupasti Jesucriston Awquiparaquiwa.
Wali kamiri, llaquita jacañat sipansa, wali asquiwa pobrëscaña, Tatiturusa yupaychascañajja.
Tatiturojj take chuymamp alcatam, asc luraraquim, oraken jacasim, chekaparac jacam; Asqui jakejj yatiñ cancañampiw parli, lajjrapajj chekap sarnakañ khanañchi. Diosapan leyinacap chuymapar catjjäsi, cayunacapasti janipuniw llust'caniti. Ñankha lurir jakejj asqui jakeruw uñch'uqui, jupar jiwayañ amtaraqui; Tatitusti janiw amparapar jalt'ayquiti, janiraquiw taripäwin juchañchat uñjasiñap munquiti. Tatitur takpach chuymamp suyt'am, jupar jaysaraquim, jupaw orak catokañamataquejj ch'amañchätam, ñankha luririnacan t'unjasïwip uñjaraquïta. Ñankha lurir jakeruw jach'achasir uñjta, ch'ojjña kokjam jilantasquir uñjaracta; uca khepat wasitat uñjir sarta, jupasti tucusjjataynawa, jupar thakasasti janiw jicjjatcti. Asqui jaker uñtam, suma jaker uñjam: jutir jacañapajj sumancañ jacañäniwa; ñankha luririnacasti tucjatäpjjaniwa, jutir pachpa jacañapaw t'unjascani. Asqui jakenacajj Tatitut yanap catokapjje, juparaquiw jan walt'añ urunacan arjjatiripajja. Tatiturojj suma chuymamp munasim, jupasti chuyma mankheman mayisitamarjamaw churätam.
Jan amuyasisa utapa apanucurejja, jan cunaniw kheparani; jan amuyt'an jakejja, yatiñan jaken sirviripäniwa.
Jichhajj jilatanaca, ch'amañchasipjjam Tatitumpi, uqhamarac jach'a ch'amapampisa. Jarc'akasipjjam take armanactejj Diosajj churapctam ucanacampi, Supayan c'ari arunacaparu atipjañataqui.
“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”
Tatitun arunacapajj chuymanacamarojj phokhantpan, jumanaccamaraqui yaticht'asipjjam, waytt'asipjjaraquim take amuyt'a chuymampi, Tatitur k'ochuñäqui ucanacsa k'ochupjjaraquim, Diosar yuspagarasa. Cuntejj lurapjjäta, uqhamarac arsupjjäta ucanacjja Tatitun sutiparu lurapjjam, Dios Awquir yuspagarasa Jesucristo toke.
Ucampis maynitejj utapjja jan sum apnakañ yatcchi ucajja, ¿cunjämrac Diosan iglesiap sum apnakaspasti?
Nayan camachejjajj acawa: Munasipjjam maynit maynicama, cunjämtejj nayajj jumanacar munasipjjsma uqhama.
Tatitun amparapar sarnakäwim catuyasim, jupar take chuymamp alcatam, jupasti yanapätamwa.
Uqhamasti, nayrakatajj Diosan reinopa munapjjam, uqhamarac cunatejj chekäqui jupan nayrakatapanjja ucanaca, ucatsti take aca yänacajja jumanacarojj churataquïpjjätawa.
Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.
Tatituw take jan walt'añanacat imasctam; jupaw jacañam imasqui; Tatituw mistutamsa, mantatamsa uñjascani, jichhürut wiñaycama.
Wawarojja suma sarnakañapataquejja jisc'atpach sum yaticham, ucatsti awquëjjan ucqhajja janiw uca yatichäwinacatjja armascaniti.
Sapüruw templon tantachasipjjäna. Utanacapansti mayaquiw t'ant'a pachjasajj mank'asipjjäna take cusisiñampi, llamp'u chuymampiraqui. Diosarusti wal yupaychapjjäna, take jakenacansa wali munatäpjjaraquïnwa. Tatitusti sapüruw iglesiar yapjjattayäna qhitinacatejj khespiyasiñapäcän ucanacampi.
¡Tatitojj jach'añchatäpan! Tatitur ajjsartir jakejj cusisiñaniwa, arsutanacapar munasir jakejj cusisiñaniwa. Ñankha lurir jakesti jupar uñjasajj k'apisiwa, jan camächirjamäjjasajj laca ch'aqhanacap t'urusi. Ñankha jakenacan inampst'añ chuymapajj aynacht'aniwa. Asqui jaken allchhinacapajj acapachan kollanäpjjaniwa, sarakerinacapasti oraken munañanïpjjaniwa.
“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.
“Jumanacajj ucatjja cusisitaw mistunjjapjjäta, marcamarusti sumaquiw cuttawayjjapjjaraquïta. Jumanacar uñjasinsti montenacasa, kollunacasa cusisiñat k'ochupjjani, pampanquiri kokanacasti amparanacapwa t'ajjllisipjjaraquini.
¡Tatitur ajjsart'ir jake, cusisiñanïtawa, Tatitur jaysir jake, cusisiñanïtawa. Ch'ama tucutamatjam mank'asïta, cusisitaw utjasïta, take cunas waliquiw sararapïtam.
Ucatsti jupajj sumwa uñjasiraqui utapajj cunjamäsquisa ucjja, janipuniw ina ch'usata jicjjatata mank'jja mank'quiti.
Tatitojj jaken sarnakäwinacap sarayasqui, jupar cusisiyir thaquiruw ucharaqui, lanctasin ucasa, janiw tinccaniti, Tatituw amparapat wayjjäsisqui.
“Jumanacäpjjaractawa acapach khanajja. Mä kollu patanquir marcajj janiw cunjämatsa imantascaspati. Janiraquiw mä lamparasa jamasaru uchañataqui aktayatäquiti, jan ucasti khanawjar uchatäñapawa take uta mankhanquirinacaru sum khantañapataqui. Uqhamaraqui jumanacan khanamajj jakenacataquejj khant'aracpan. Uqham suma wali luräwinacam uñjasa jumanacan Dios Awquimaru yupaychapjjañapataqui.
ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.
Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.
Ucampis Tatitojj chekawa, jupajj ch'amañchapjjätamwa, take jan walitsa imapjjaraquïtamwa.
Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.
Take acanacansti atipirinacat sipansa juc'ampïtanwa jiwasar munquistus ucan yanapapampi. Uqhamajj jichhajj yattwa, janiwa cunas Diosan munasiñapatjja apakquistaspati, janiw jiwañasa, ni jacañasa, ni angelanacasa, ni alajjpach ch'amanacasa, ni jichhasa, ni jutcani ucasa, ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.
Thakañasaw maynit maynicama cunjäman yanapt'asiñasataqui munasiñanïñasataqui, uqhamarac suma luräwinac uñacht'ayasa. Janiraquiw tantachasïwinacasar janejj sarañasäquiti cunjämtejj yakhepanacajj jan sarapquiti uqhama, jan ucasti maynit mayniruw waytt'asiñasa, Tatitun jutäwipa jac'ancjjatapa yatisinsti juc'ampïñapawa.
Tatitun bendicionapawa kamiriptayi; janiw cuna llaquisiñsa ucampi chicajj apayanquiti.
Tatitut Diosanïqui uca marcajj cusisiñaniwa, jupatac ajllitäqui uca marcajj cusisiñaniwa.
Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa. Jupar arquirinacan munataparjamaw phokhe, arnakasitanacap ist'i, khespiyaraqui.
Cusisitäpjjapunim. Jan inact'as orapjjam. Take cunatsa Diosar yuspagarapjjam, Diosasti jumanacatjja uqhamwa muni, Cristo Jesusan iyawsirinacapjamajja.
Suyt'añanjja cusisitaquïpjjam; t'akhesiñanaca utjipanjja llamp'u chuymanïpjjaraquim. Janirac Diosat oracionan mayisiñjja armasipjjamti.
Jumanacajj Diosan munat wawanacapäpjjtawa, jupajj cunjämäquitejj uqhamäpjjaraquimaya. Cuntejj Diosataquejj asquïqui uc yatekañ munapjjapunim. Ch'amacanquirinacan jan cunatac sirviri luräwinacapanjja jan sarnakapjjamti, jan ucasti, uca jan wali luräwinacjja khanaru apsupjjam. Jupanacan jamasan luräwinacapat arsuñas p'enkasiñjamawa; ucampis cunapachatejj take uca jan walinacajja khanaru uñstayatächejja, take cunas khanaw yatisi, khanampisti take cunwa uñjasi. Ucatpï aqham sejja: “P'arjjtasim, juma iquirejja; jiwatanac taypit sarthapim, Cristow khant'ätam” sasa. Uqhamajj sarnakäwinacamanjja sum amuyasipjjam. Yatiñ cancañampi jacapjjam, janirac jan yatirinacjamajja. Jan tiempjja ina ch'usaru tucuyapjjamti, urunacajj jan walëjjatap laycu. Jan lokhëpjjamti, jan ucasti cunäquitejj Tatitun munañapajja uc amuyañaru uscusipjjam. Jan machjasipjjamti, machjasiñasti jiwañaruw api; antisas Kollan Ajayumpi phokt'atäpjjam. Salmonacampi maynit maynicama chuymachasipjjam, yupaychañ k'ochunacampi, ajayun k'ochunacamp k'ochusina, uqhamarac Tatituru take chuymamp yupaychasina. Munasiñan jacapjjam, cunjämtejj Cristo Tatitojj munasquistu uqhama. Jupajj jiwasanac laycuw jacañap apt'asi, mä wilañchat ovejar uñtata, Diosatac suma k'apquir ofrenda loktasa.
Aca machak camachwa churapjjsma: Maynit maynicama munasipjjam. Cunjämtejj nayajj munasipjjsma, uqhama jumanacajj maynit maynicam munasipjjañamaraquiwa. Jumanacatejj maynit maynicama munasipjjätajja, takeniw amuyapjjani nayan discipulonacajjäpjjatama —sasa.
Uqhamasti jumanacajj suman sarnakapjjam, qhuyapayasipjjaraquim jumanaccamajja jilapurjama munasisa, llamp'u chuymanïpjjaraquim. Jan ñankhat ñankhjja cutt'ayapjjamti, ni jan wali arut jan wali arsa cutt'ayapjjaraquimti. Jan ucasti asqui arumpi cutt'ayapjjam, Diosasti bendición catokapjjañamataquiw jumanacarojj jawsapjjtam.
Jumaw arjjatirejjätajja, imantasiñajjätasa, jumaw khespiyirejjätasa, Diosajjätasa, nayar imantir karkajjätasa, imir jarc'akasiñajjätasa, khespiyir ch'amajjätasa, wali amstanquir imantasiñajjätasa.
Utjistuwa Diosar iyawsañasajja, yatiractanwa cuntejj Diosarojj mayiñäni munañaparjama ucjja jupajj ist'istuwa. Cunjämtï yattanjja Diosajj oracionanacasarojj ist'istuwa, uca pachparaquiw yattanjja cuntejj mayctanjja ucajj niyaw utj-jjestu.
Tatitun sutipajj imantasiña jach'a torrer uñtatawa, asqui jakenacajj jupan ucar imantasiñataqui jutapqui ucanacataquejja.
Jan ucasti Tatitur jach'achapjjam chuymanacamanjja. Ucatsti waquicht'atäpjjaraquim qhitinacatejj jumanacaru suyt'añanacamjjat jisct'apcätam ucanacar sañataquejja ucampis sapjjam suma chuymampi.
Iyawsäwi laycu Dios nayrakatan asquit uñt'atäjjatasatwa Diosampi sumancañajj utjistu Jesucristo Tatitusana. Diosan uñisiripäcasinsa Dios quipcaw sumancthapiyistu jupan Wawapan jiwatap toke, ucataracwa jichhajj uca Wawapan jacäwip toke khespiyatäñäni, jupampi sumancthapitas laycu. Janiw ucaquïcaraquiti jan ucasti Diosancjjasinjja cusisiractanwa Jesucristo toke, Tatit Jesucristos tokew Diosampejj sumancthapitäjjtanjja. Cunjämatejj mä sapa jake toke juchajj aca oraker mantanquejja, ucat jiwajj uca jucha laycurac utjejja, uqhamaraquiw jiwajj take jakerojj catuntawayi juchachasitap laycu. Janïr ley utjquipanwa aca orakenjja juchajj utj-jjäna, cawqhantejj jan leyejj utjquejja janiraquiw juchajj amtatäquiti. Ucampis Adanan urunacapat Moisesan urunacapcamajja, jiwañajj ch'amanïnwa juchachasirinacataquejja, jupanacajj janis Adanjama juch lurapcchïna ucasa. Adanasti chekpachansa mä uñacht'äwiquïnwa qhititejj jutañapäcän ucatjja. Ucampis Adanan juchapjja janiw cuntejj Diosajj churquistu ucampejj mayachcsnati. Mä jaken juchar puritap laycojja walja jakenacaw jiwari. Ucampis Diosajj ina ch'usataqui khespiyasiña churquistu mä jake Jesucristo toke ucasti, chekpachansa juc'amp jach'awa, uqhamarac walja jakenacatac asquiraquiwa. Mä sapa jaken jucha luratapajja janiw Diosan jiwasar khespiyasiñ churquistu ucampejj uñtascaspati. Juchañchatäñasti mä sapa jucha laycuw utji, ucampis khespiyasiñjja Diosajj ina ch'usatacwa jakenacarojj churi, uca jakenacajj walja juchanïscpasaya. Jiwañatejj mä sapa jaken jucha luratap laycu mantanchïnjja, ucat juc'ampiwa machak jacañanjja munañanïpjjani, qhitinacarutejj Diosajj ina ch'usataqui catokqui Jesucristo laycu ucanacajja. Cunjämatejj Adanan juchap laycuqui juchañchatäñajj take jaketaqui utjejja, uca quipcaraquiw Diosan asqui munasiñapajj Jesucristo toke khespiyasiñajj jakenacataquejj utjaraqui. Cunjämatejj mayni jaken juchañchasitap laycuqui waljani juchararäpjjejja, uqhamaraquiw mayni sapa jaken ist'asiri tucutap laycojj waljaniraqui Dios nayrakatanjja asquit catokatänejja. Cristo tokeraquiw jiwasanacajj Diosarojj jac'achastanjja, iyawsäwi laycu jupat bendiciona catokañataqui. Uca bendicionansti takeniw ch'amani sayt'atätanjja, Diosan marcaparu mantañataqui suyt'äwinsti cusisitätanwa.
Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?
Diosajj jumanacarojj munapjjtamwa, jupancapjjañamataquiw ajllisipjjtam. Uqhamajj qhuyapayasiñampi, suma jakëñampi, jisc'ar tucuñampi, llamp'u chuymanïñampi isthapitay sarnakapjjam. Jumanac purajj llamp'u chuymampi sarnakapjjam, maynit maynirus perdonasipjjaraquim jan wali lurasipjjsta ucapachajja. Cunjämtï jumanacarojj Cristojj perdonapjjtamjja, uqhamarac jumanacajj perdonapjjam. Ucatsipansa wali munasiñanïpjjam, munasiñasti mayaruw tucuyi, take cunsa phokharaquiwa. Diosan sumancañapay chuymanacamanjja jumanacarojj apnakpan, Diosasti uca amtäwimpiraquiw jawsapjjtam mä cuerpo tucupjjañamataqui. Ucatsti yuspagarapjjaraquim.
ucampis Tatitojj situwa: “Munasiñajjaquiw jumataquejj waquichatajja, nayan ch'amajjasti juc'ampi sumaw uñsti cunapachatï jakejj t'uqha jicjjatasqui ucqha” sasa. Uqhamajj nayajj cusistwa, Criston ch'amapajj nayan t'uqhasiñajjan uñstañapataqui.
Takenimpis suman sarnakasiñ thakapjjam, k'oma jacañan sarnakasa, jan ucampisti janiw qhitis Tatitur uñcatcaspati.
Jan cunsa lurapjjamti purapat ch'ajjwasajja, ni jach'a jach'a tucuñ munasasa, jan ucasti alt'at chuymampi lurapjjam, maynit mayniru uñjasipjjam, maynejj jupat juc'amp sumäcaspas uqhama.
“Jumanacatejj jan wali luratanacapat masinacamarojj perdonapjjäta ucqhajja, alajjpachanquir Awquimajj jumanacarojj perdonapjjaraquïtamwa. Masinacamar jan perdonapcäta ucasti, jumanacan Awquimasti janiraquiw cuna juchanacamatsa perdonapcaraquïtamti.
Uqhamasti jiwasanacajj cunanacatejj sumancaña apanqui ucanac thakascaquiñäni, ucampiraquiw ajayu token jiltañanjja maynit maynicama yanapt'assnajja.
Jilatanaca, Jesucristo Tatitusan sutipjjaruw achict'apjjsma, maya amtañaniquïpjjam, jan jumanac taypin yakhachasiñajj utjcpanti. Jan ucasti, mä wawac sarnakasipjjam; mä sapa amtañani, mä chuymaniquiraqui.
Cunjämatejj hierrojja yakha hierrompi lek'jasa ariptayatajja, uqhamaraquiw jakejj jake masipampi suma amuyt'ayataraqui.
Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.
Janipun qhitirus manüpjjamti, jan ucasti jumanac pura munasiñanac manüpjjam. Jake masipar munirejja cuntejj leyejj sisqui ucwa phokhe.
Uqhamajj sarnakäwinacamanjja sum amuyasipjjam. Yatiñ cancañampi jacapjjam, janirac jan yatirinacjamajja. Jan tiempjja ina ch'usaru tucuyapjjamti, urunacajj jan walëjjatap laycu.
Yakhanacarojj churapjjam, jumanacarusti Diosaw churapjjätam. Diosasti bolsanacamarojj wali phokt'at churapjjätam, suma thalantt'ata, limintt'ataraqui. Cunjämtï yakhanacarojj lurapcäta uca pachparacwa Diosajj jumanacampejj luraraquini.”
Tatitusti jumanacar jiltaypan, juc'ampi maynit maynicam munasiñanacamajj utjaracpan, cunjämtejj nanacajj jumanacar munasipjjsma uqhama. Uqhamaraqui chuymanacamanjja ch'amañchatäpjjañamataqui, k'omachata jan cuna juchani Dios Awquisan nayrakatapana, cunapachatejj Tatit Jesusajj take jupanquirinacapampi jutcani ucapachajja.
Cheka uñjäwisti sumancañwa utjayani, samarañana sarnakasiña, jan ajjsarasa, ucasti wiñayataquïniwa. Marcajjasti mä suma samarañ chekanwa jacani, suma utanacana, samarata jacañ utanacana,
“Mayipjjam, Diosajj churapjjätamwa; thakapjjam, jicjjatapjjaraquïtawa; puncsa lekt'apjjam, jist'aratäpjjaraquïtawa. Mayirejja catokewa, thakheristi jicjjataraquiwa, puncu lekt'irirusti jist'arataraquiwa.
Tatitur wakaychirinacataquisti munasiñapajj wiñayawa, asqui cancañapajj allchhin allchhipataquis utjascaquiwa: arust'äwiparjam sarnakerinacataqui, arsutanacaparjam phokherinacataqui.
Warminaca, chachanacamaru ist'apjjam, uqham lurañanacamaraquiw Diosanquirjamajj wact'apjjtam. Chachanacasti warminacamarojj munapjjaraquim, janiraqui jupanacataquejj khorüpjjamti. Alajjpach yänacat lup'ipjjam, jan acapach yänacatjja. Wawanaca, awquimar taycamarojj take cunansa ist'apjjapunim, uca lurañasti asquiw Dios nayrakatanjja. Awquinaca, jan wawanacamampejj sinti khorüpjjamti jan jupanacan mayjt'asipjjañapataqui.
“Sapjjaracsmawa, jan llaquisipjjamti, cuntejj mank'apcäta, umapcaraquïta, isisipcäta ucanacatjja. ¿Janiti jacañajj mank'at sipansa juc'ampi sumäqui, janchisti isitsa juc'ampïcaraquejja? Uñtapjjam jamach'inacajj jalasqui uca, janiw jupanacajj satapquis ni apthapipcaraquisa, janiraquiw juyranacsa pirwanacarus imapquiti, ucampis alajjpachanquir Awquimaw ucanacarojj mank'ayi. Uca jamach'inacat sipansa jumanacajj juc'amp munatäpjjtawa.
Uqhamajj mank'apjjamsa, umapjjamsa jan ucajj cunsa lurapjjam, ucampis take cunsa Diosar jach'añchañataquiqui lurapjjam.
Uqhamasti jilatanaca, Diosan qhuyapayasiñap laycuw achict'apjjsma, jumanacajj Diosarojj jacquir ofrendjamay loktasipjjam, Diosar cusisiyquiri loktata. Ucawa Diosataquejj ajayu token chekpach Diosar sirviñajja.
Nayajj jan cuna llaquiniw iquintta, mäquiw icjaracta, Tatay, jumaquiw iyawsañ chuymamp jacayistajja.
munasiñamajj jacañat sipan juc'ampiwa, lacajjajj jumaruw k'ochütam. Take jacäwejjan jach'ar aptäma, jumar art'asisaw amparanacajj aytä.
Yatipjjam Dios Awquejj kawksa munasistu wawanacapat uñt'atäñasataqui, jïsa wawanacapapunïsctanwa. Ucatpï Diosar jan iyawsirinacajj jan uñt'quistutejja, Diosar jan uñt'apjjatap laycu.
Take cunsa amuc lurapjjam jan jumanac pura ch'ajjwasa, uqhamat jan qhitis cunatsa jumanacar juchañchañapataqui, jan ucasti Diosan wawanacapjama jan cuna k'añuni jan wali jakenac taypins jicjjatasipjjañamataqui. Jumanacasti jupanac taypinjja c'ajapjjapunim cunjämatejj mä warawarajj ch'amac taypin c'ajqui uqhama,
Tatitur ajjsarañajj jacañaruwa irpi; ucatsti cusisitaquiwa jacasi, cuna jan walt'añansa jan t'akhesisa.
Ucatpï jumanacajj jan jaya jakenacäcjjapjjtatejja yakha orakensa, take Diosanquirinacampejj marca masëjjapjjtawa, Diosan familiapäjjapjjaractawa. Acapachan sarnakäwinacaparjamaw jacasipcäyäta, cawquïri ajayutejj ñankha ajayunacaru apnakqui, uqhamarac ch'amañchqui Diosar jan ist'irinacarusa, uca ajayun munañap lurasina. Jumanacajj mä jach'a utjamäpjjtawa, apostolonacjjaru uqhamarac profetanacjjaru perkjjatatäpjjtawa. Pachpa Jesucristoraquiw kallta esquin kalajja. Uca kaljjaru utajj sayt'ayatawa. Uca kalasti Cristowa ucatsti saraparjamaw ucjjaru suma perkasisqui mä templo jicsutäñapcama, Diosar catuyata, Tatitur mayachataraqui. Uca pachparaquiw jumanacajj Cristoru mayachatäpjjta, takenimpis mayachasisa mä utaru tucuñataqui, uca utanwa Diosajj Ajayup toke jaqui.
Iyawsañajja: “Catokäwa” sas take chuymampi suyt'ctans ucawa, uqhamarac chekpachapuni iyawsañasa cuntejj jan uñjtan ucajj chekätapa.
Tatituw ch'amajjajja, arjjatirejjasa: juparuw takpach chuymamp iyawsta, jupasti yanapt'ituwa. Chuymajjajj cusisitawa, Tatituruw k'ochü, yuspagararaquï.
Tatituw nayarojj asquinacamp phokhantitani: Tatay, qhuyapayasiñamajj wiñayawa, amparamamp luratanacarojj janiquiy armanucumti.
Jumanacatejj khorücasin wawanacamarojj sumanac churirïpjjstajja, ¡kawkha juc'amps alajjpachanquir Awquimajj Kollan Ajayjja churanejja mayipqui ucanacarojja!
Puncunacapar jac'achasipjjam, kollan utapar mantapjjam, yuspagar churapjjam, sutip jach'añchapjjaraquim. Tatitojj munasiñaniwa, qhuyapayasiñapajj wiñayawa, cheka cancañapasti jan tucusquiriwa.
Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu, Tatiturupun iyawsapjjam, jupaw jiwasan wiñay arjjatirisajja.
Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.
Acjj sapjjsmawa jumanacajj samarañ jicjjatapjjañamataqui nayaru iyawsatanacam laycu. Acapachanjja jumanacajj t'akhesipjjätawa, ucampis ch'am catjjatapjjam, nayajj acapacharojj atipjtwa —sasa.
Naya, juman Tatitu Diosamaw, jumarojj amparat wayjjarsma, irparacsma; nayaw saracsma: ‘Jan ajjsaramti, nayaw yanapascäma.’ ”
Tatay, munasiñamajj alajjpachcamaw puri, asqui cancañamasti alajjpachcamaw jict'asi, chekapar uñjañ cancañamajj jach'a kollunacjamawa, arsutanacamasti jach'a lamar umanacjamawa. Tatay, jumaw jakenacarusa, animalanacarus uñjasctajja. ¡Diosay, munasiñamajj muspharcayawa! Chhekhanacamamp imantayasiñataquiw jakenacajj jumar thakapjjtam,
Jumaw nayan yanapirejjätajja, ¡amparamancasajj cusisitätwa! Ajayojjajj jumamp chict'atawa, cupi amparamasti janiw antutnucquituti.
Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.
“Wawajjay, ist'am awquimana yatichäwinacapa, janiquiy taycaman yatichäwinacapjja jisc'achamti. Uca yatichäwinacasti jumataquejj mä suma c'achachäwïniwa, mä suma collarar uñtataraqui.
Tatitun nayrakatapan amuct'am; jupan yanapap llamp'u chuymamp suyam, ñankha lurir jaken atipjatapat jan k'apisimti; ñankhanac amtir jakets janirac mayjt'asimti.
Diosajj jupar catuyasita k'oman jacañasataquiw jawsistu, janiw juchan jacañasataquiti.
Ajjsarcay urun waytasita, nayajj jumaruquiw alcatsma. Diosaruw takpach chuymamp iyawsta, arunacap jach'ar aptaracta; Diosaruw takpach chuymamp alcatta, janiw cunarus ajjsarcti: ¿Camächaraquitan jakesti?
Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.
Ucampis Diosajj munasiñapwa uñacht'ayistu, cunapachatejj jiwasanacajj juchanïscäyätan ucapachaw Cristojj jiwasanac laycu jiwawayi.
Jan walt'añ urunac purincan ucapachajj, Tatituw utapan imantitani; ch'iwipampiw imjjäsitani; mä karka patjjaruw sayt'ayitani,
Sapa maynis cunjämtejj Diosat ch'am catokquejj uqhama maynirojj sirvpan, uqhamata take bendiciontï Diosajj churquistu ucajja sum apnakañasataqui.
Diosasti asquiwa, janiw armascaniti cuntejj lurapcta, uqhamarac munasiñanacamsa uñacht'ayapjjaracta Diosanquir jilatanacar yanapt'asina ucanacatjja. Jichhacamas ucjj lurasipcactawa.
Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim, nayatejj ñankha thaquin sarnakerïstjja, cheka thaquinjamay irpasita.
“Tatitur thaktapjjam jicjjatañjamäquipana, jac'ancquipan jawsapjjam. Khoru jakejj sarnakäwipjja apanucpan, ñankha amtañan jakesti amtañanacapjja apanucpan; Tatitun ucar cuttanjjapjjam, jupasti jumanacatjja qhuyapayasipjjätamwa; Diosasar maqhatjjapjjam, jupasti perdonañataquejj janc'aquiwa.
Sumancañan Diosajj Jesucristorojj jiwatanac taypit jactayi. Uca Jesucristosti ovejanacan jach'a awatiripawa, wilapampiwa wiñay arust'äwipjja arsuwayi. Diosasti jumanacarojj k'om tucuypan, sumaquiraqui take cunansa, munañapa lurasiñapataqui, jiwasampisti cuntejj lurañ munqui uc luristpan, Jesucristo toke. ¡Jesucristojj jach'achatäpan wiñayataqui! Uqhamäpan.
Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa.