Biblia Todo Logo
La Biblia Online
- Anuncios -


Hosea 2 - ASII LAKDAP Bible (BSI)

1 Kriikha na namphu namno Israilnok ka “Shiikeawe sengi” kiimaq “Tatiwe raq Lungwiiheanok” ngutiishe mingu wan.


Gomar ka Sethoq Nyung Kiikhiisii Israil Kiimin Sethoq Nyung

2 Shiikeawe raq Israilnok ma ngutlo, “Isetiim lei, namnyung ma tsii chongkuq ronglaq. Namnyung ka ümchaü ichak riimak she. Kiimaq ngi min awese ka riimang she. Apaiq raq sethoq jasha kra thaqbaiq tlo raüjaq ahea miraq. Kiimaq mephe nyung miika jamak she nguraü jaq ahea miraq.”

3 Kiimaq apaiq mephe ja ka tsaqmak, jaruq li ja raü la, ngi raq anaiq ka wiita chhut baiq lata, kheahü miishe, anyung wok mong maq, rawiichhi ranaiq na kheahü riitaq, kiikha anaiq ka michhut baiqha. Ngi raq apaiq ka wakram shinram shinriiq kealoklok, jamlai chhijang wanchang min riimak ikhiishe, mishthen baiqha. Raüta apaiq ka akhamnyangtsi raq mitsai.

4 Ngi raq asetiim kiimiimin, mangchan tiichhi kuqmang she mirha. Jamkhano ngukla tsangshiq ka siqphin sekong, anyung mephe jaki raüta ahum wan.

5 Jamkhano ngukla anyung mephe ja wanto, kriiwa asetiim ka hum wanto. Tsangshiq chiiwanti anyung ka ajeasi ahü mephe jawanto. Jamkhano ngukla, “Ngi ka iwesetiim ahinti phaniishe mikihoha; Tsangshiq raq ngi ma tü adung kuqphaq siq tlo. Ngi ma skurai khea kiimaq raihi-nairai khea, kiimaq olip petsi tsai nai che thun kuqphaqsiq tlo” nguta anyung raq bomtlo

6 Kra ningkhan ümchaü ngi raq, apaiq kai chang lam na, kiida raütsung miishe miruk baiqha. Lata ngi raq apaiq kaichang lam ka, khetuk hailata mitang baiqha. Krai mren, apaiq raq akai chang lam ka hum mak she miraq.

7 Apaiq raq akongtiwetiim jai ka mijoho. Shatmaq tsangshiq jai ka lomak miraq. Apaiq raq tsangshiq ka mirit. Shatmaq tsangshiq ka hummak miraq. Kiijiishetiq, “Ai ngi arka, iwese wechüwe phaniili jang wan nong chang miraq. Man na ngi apaiq rai siji niika, khusang rakhang maq sikang. Shatmaq ümchaü ngi ka naolaq she,” nguta apaiq ka mitiibot.

8 Apaiq ma tü atsam, che, olip petsi tai, kampho, kiimaq chaq thun ka, Ngi raq apaiq ma aphong kuqha nguta sapmak dea riito. Kriithun ka apaiq raq Baal shomnoq ma, tiisheshi baiqto.

9 Arningkhan ümchaü ngi raq, itii itsam apaiq ma ashiiman kuqha kra, akhing hongto angu na alam she mirwan nongha, kiimaq skurai nai raihi-nairai thun, akhea taqsam chang, kra wiita milam wan ha.

10 Lata Ngi raq apaiq ka akongtiwetiim makki na, adü wa akhu akhea thun ka chhut baiq lata, apaiq ka naiqhü she mitiingaha. Kiimaq kra akhing na apaiq ka ijaqkhon mong wa juwe riimin tiichhiikuq lot mak she miraq.

11 Ngi raq apaiq raq poi thun klotlaq kra, rawiitek nai jipitek poi klotlaq thun kra, kiimaq apaiq raq Asii Niitiitsak Ranaiq poi klotlaq kra, kiimaq apaiq raq Shiikeawe shomnoq akhing poi klotlaq thun kra, wiitashe mitiithen baiqha.

12 “Arthun ara iwesetiim raq ngi ma ijaq maq akuq,” nguta tiitsakitlaq, apaiq spiqro nai phupmup ro ka, Ngi raq wiitashe mishthen baiqha. Lata rumnyangkhi miishe mitiija baiqha. Kiimaq rumnyamse kong riishe, petsiro thun wiita mishthen baiq.

13 Kiimaq apaiq raq ngi laqbaiq raüta, Baal phra shomnoq wanto, kra miitu mitsa shaha. Lata mitiichamchaoha. Kiimaq apaiq raq achaq aseng laktum thun ka, lak raüta awesekong jaijo wantaq kra miitu, ngi raq apaiq ka mitiichamchaoha. Arka Tatiwe raq chongtlo.


Asenginok Miitu Tatiwe Mangchan Tsii

14 Arkha na ngi raq apaiq ka, rumnyangkhi kumtsaiphii na hali misheaho nongha. Lata kiijaq ngi raq apaiq ma, tlung tiiwii bomtsi chongkuq lata, ngi rai siwan nong miitu mitlin wanha.

15 Lata apaiq ma spiqro thun kra, mijangkuq nongha. Lata Chamchao Hiqthung Tan ka, aran phan chang kilüchong miishe mitiija wan ha. Kiijaq apaiq raq ibom ka man na, apaiq junriiji na, Ejip mung maq saü wantaq akhing na, ngi ka jamkho lungwiitaq, kiikhahali milungwii nong.

16 Kra akhing na ümniiraq ngi ka, “Iwese loi” ngutiishe mihea haü. Kra akhing na ümniiraq ngi ka, “Itawe Baal Phra,” ngutiika hea maü she miraq, nguta Tatiwe raq nguto.

17 Jamkhano ngukla kra akhing na, Ngi raq anübok wa Baal phra mang thun ka alamshe mirbaiqha. Krai mren Baal phra mang thun ka tsangshiq nübok maq dongmak she miraq.

18 Kra akhing na ümmiitu, Ngi raq rumnyamsekong nai ra na biti wushi rai, kiimaq hiqraikhü na khumti jongsaü jüse wiita rai, wehea riijawan miitu tong she mishong wan ha. Lata isenginok sichang mung wa, chiqdong redong, ko aliq, ja apiq thun ka wiitashe milam baiq wan ha. Lata Ngi raq ümniika hansang miishe mitiikon kang. Kiimaq ahai asong ahü miishe mitiishong nga wan kang.

19 Lata ngi raq ümniika pattup pat-sa miitu, ijamti-nyung miishe mitiija wan ha. Ngi raq ümniika tsapsaü kapse miishe milungwii wan ha. Ngi raq ümniima lungwiitsii ka pharang rang miishe mithü wanha. Ngi raq ümniima kaphap wan tsii mitiichhikuqha.

20 Ngi raq ümniima kiqkham kuq kang kra tingting mithü wanha. Lata ümniika ichak dea nguta tsapkapkap mirüm wan ha. Kiimaq kra akhing na ümnii riimin, Ngi ka üm Tatiwe dea nguta milang wan haü.

21-22 Kra akhing na ngi raq isengi Israilnok, achu jaü mitreha. Ngi raq ra mitiijun kuqha. Krai mren tsangmung na, tü atsam nai spiqtsi kiimaq Olip petsi thun aheawiq mitsingo.

23 Kra akhing na Ngi raq isenginok ka, Israil mung na mitiichhanchhi wanha. Kiimaq tsangshiq ka chiithe lüwa mitiija wanha. Lata “lungwiimak” anguti ka milungwiiha. Kiimaq, “Isengi riimak” anguti ka, “Namshiq ka isengi” ngutiishe minguha. Kiimaq tsangshiq raq Ngi ka, “Ümniika i Shiikeawe’’ ngutiishe mihea wan.

Tangsa Naga Bible - ASII LAKDAP

Copyright © 2015 by The Bible Society of India

Used by permission. All rights reserved worldwide.

Bible Society of India
Síguenos en:



Anuncios


¡Síguenos en WhatsApp! Síguenos