DUNGWVNC 12 - ASII LAKDAP Bible (BSI)

Tiichhii Wan Poi

¹ Tatiwe raq Mosheq nai Aron ma Ejip mung maq chongto:

² “Ümchaü jipi arka namshiq ma rawii phawan jipi lü miraq.

³ Israilnok mungmaiqse kunli ma tsii ka akha chongkuq ronglaq: Ümchaü jipi lüwa jiha raroqshi ranaiq na maiqwere takitek raq skuse are se riimakla chhechhi are se ka apaiq jamkun miitu tsea raüta thü chang.

⁴ Kiimaq apaiq jamkun ka maiq atsapse nyamse pumshi ka wiita phaq lot mak chang raüla, apaiq nai apaiq jamthoti tashi sitlaq kriirai riiphea phaq mimai. Tsang tanai liipan na maiq apa atsap sitlaq kra phan phan kiimaq maiq loweatek raq ngam ka ümchuwa miphaq lot chang kra khan khan ngam ka riiphea phaq chang.

⁵ Namshiq raq nyamse ka skuse lo riimakla chhechhise tsea mimai. Shatmaq kriika apongse arawii wiishi akhum ka nyeajokjok phintsaqtsaq jamlai ami atsi ahü riichang.

⁶ Kra raütiishe kra jipi wa jikham rablai ngo raji niishe, Israilnok mungmaiqse tlotli raq kra nyamse ka tachang.

⁷ Raüta mungmaiqse raq ngam tiijai wiijam ka lam raüta kra nyamse taphaqtlaq jamti raq kilam chong kop tsangkilii siimko nai wiita na kiimaq kilamchong kop chang ra nü na kriijaq ngam tiijai ka nyat chang.

⁸ Raüta kra rawa ngam ka wa na shechang, raüta rum wa sangjaq akhap wiq phan nai pi maq shohü winsii alum krai phaq chang.

⁹ Kra ngam ka asang maq nai kham maq lum lantiika naq phaq rongkiq. Shatmaq wiipumtam, akhupo, kiimaq ahok pe thun, kiimaq atsan among thun kiimin nong nong chumhü miili wa na shu lanta phaq ronglaq.

¹⁰ Namshiq raq kra ngam ka abung akhiismin ranap na saüli tiichong maimak. Ümkhii miiwa aphaq bung tiichongki raüla, kriika wa na chaq baiq ratlo.

¹¹ Namshiq raq kra ngam ka taülaü khiq maq phaq chang. Jamkhano ngukla namshiq ka miirii samje maq alaü wan miitu khekham maq hokkop ka hok na para chhaq kiimaq maiqmii nyeakii ka jaq na doraq chhaq maq ngam ka phaq chang. Arka Tiichhii Wan Poi phaqsea, Ngi, Tatiwe shreng miitu.

¹² “Kra rawa Ngi ka Ejip mung tlotli na mikiha. Lata chhikhuse maiqwe sere angu ka kiimaq jam nyamse chhikhuse thun ka kunli mijiip baiqha. Kiimaq Ejip mung wa phra kong thun ka wiita mitsat baiqha. Ngi ka Tatiwe.

¹³ Kilamchong pumpat na ngam tiijai nyattlan kriika namshiq sitlan jam thun ka pong na araibaiq miithii shong miraq. Krai mren ümtiikiiwa Ngi raq ngam tiijai ka michhiha, Ngi raq namshiq jam thun ka alea mirwanha. Kiimaq Ejip mungti tsat baiq wan tiikang na, Ngi raq namshiq ka tsat mang mitiihangha.

¹⁴ Namshiq raq ara ranaiq arka, Ngi Tatiwe raq jamlai wa shamkuq kang kra tsan na tiitsang wan miitu kamtsantsii poi ma seng lanta lang wan ratlo. Arka Ngi Tatiwe raq namshiq miitu jamlai jaqwa shamkuq kang kra nam tsan na tiitsang shat miitu akam alam poi nguta lang wan ratlo. Arka pattup pat-sa langruq ronglaq.”

Pi Maq Shohü Winsii Phaq Poi

¹⁵ Tatiwe raq nguto, “Ramiishi na saüli namshiq raq pi maq joshe winsii ka phaq maimak. Pi maq shohü winsii kli phaq ronglaq. Apha wan ranaiq na namshiq jam wa pi ka tiisiirai lambaiq ronglaq. Kra ramiishi liipan na maiq ashi ra raq winsii ka pi maq shoje phaq raüla, kriiwe ka isenginok wa weshi nguta wea dam mak she miraq.

¹⁶ Apha wan ranaiq na kiimaq ramiishi ngo ranaiq na hali namshiq ka shomnoqkai noqku na kai ratlo. Kra ranaiq thun bala namshiq raq minshiiqkai raamak. Shatmaq namshiq raq phaqsea kloliika amai.

¹⁷ Ara poi arka namshiq raq lang ronglaq. Jamkhano ngukla ara ranaiq na Ngi raq namshiqnok maiq phan thun ka Ejip mung wa tiidong wan kang. Pattup pat-sa na saüli namshiq raq ümchaü ranaiq arka poi klo lanta lang ratlo.

¹⁸ Rawii phawan jipi lüwa raroqshi ri rablai raji maq pha wan lanta, raroqnai ri ranaiq shi raji na saüli, namshiq raq pi ma shoje winsii ka akhiismin nü na thü maimak.

^19-20 Kra ramiishi liipan na namshiq jamkun thun na pi ka akhiismin si maimak. Jamkhano ngukla juli jiimin, noktiwe lo riimakla wanshawe lo, jurwa kra bala winsii ka pi maq shoje phaq raüla, apaiq ka isenginok phong wa weshi nguta weadam mak she miraq.”

Apha Shaqshaq Tiichhii Wan Poi

²¹ Mosheq raq Israilnok welabi thun ka kunli adam na tiiheakito. Raüta tsangshiq ma akha nguto, “Namshiq loweatek raq skuse ashi riimakla chhechhise are se ka achhuq chhuq tsea ronglaq. Lanta ta ronglaq. Kra lanta namshiq takitek raq Tiichhii Wan Poi ka klo ronglaq.

²² Lanta hissop pekü nyamtu lam lanta nüchhong winpin na ngam tiijai kiijaq tsam ronglaq. Lantiishe kra ngam tiijai maq namjam kilamchong siimko nai ri pumpat kiijaq nai kilamchong pumpat ra nüti kiijaq nei ronglaq. Namshiq jamti maiq jumin ranap ra miwü shaq wiiwii kinphai na dongkai maimak.

²³ Krai mren ümtiikiiwa Tatiwe ka Ejip mung hamli wa Ejipnok tseakai kitlaq akhing na, apaiq raq kilamchong rati pumpat na nai siimkonai ri pumpat na ngam tiijai ka michhi. Raüla apaiq raq maiqtseati rase kitlaq kriika, namshiqnok jam mong na tiiwa mak miraq. Raüta namshiq ka tiitsat baiq mak miraq.

²⁴ Namshiq nai namsetiim raq ara tri raütu arka pattup pat-sa lang ratlo.

²⁵ Ümtiikiiwa namshiq ka Tatiwe raq namshiq ma mikuqha nguta kiqkhamtaq mung niishe saü wan hanla, namshiq raq ara mrochhi arka klo wan ruq klo ratlo.

²⁶ Riita ümtiikiiwa namsetiim raq akha waijiiq, ‘Riita ara mrochhi liichum ka jamlai wa?’

²⁷ Namshiq raq akha mitrehan, ‘Arka Tatiwe shreng Tiichhii Wan Poi honglu na ataakuq. Jamkhano ngukla apaiq raq Ejip mung maq Israilnok jam thun ka alea raüta wa wanto. Apaiq raq Ejip mungti ka jiipbaiqto. Shatmaq nashiqnok ka atiiwong riikuqto.’” Kiimaq Israilnok ka hiq na bum raüta shomnoqto.

²⁸ Raütiishe tsangshiq ka kihoto. Raüta Tatiwe raq Mosheq nai Aron ma jamlai aming wa kuqtaq kra kloto.

Chhikhusetiim Tsaito

²⁹ Rawa wathung wakham na Tatiwe raq Ejip mung wa chhikhusetiim ka wiita tsat baiqto. Hokhamwe se hokham ma shong chang kriimaq phaho raüta longsha phaqtek mong na sitiwe shumwiwe se miitaq kun kun tsatbaiqto. Kiimaq nyamse chhikhu anyung thun kriimin wiita tsat baiqto.

³⁰ Kra rawa, hokhamwe, kiimaq asengi ajong alabi thun kiimaq Ejip mungti mungmaiqse kun kun ka akon wa samto. Ejip mung tlotli na maiqho siitrang wa li she hoq trang wanto. Jamkhano ngukla ase tsaimak dea maiq jam ka jamshi min ahü riito.

³¹ Kra rawa liipan niili hokhamwe raq Mosheq nai Aron ka tiiheakito. Raüta akha nguto, “Tiibin ronglaq! Namnai nai namnok Israilnok ka! Ara imung ara baiqthütlo ronglaq. Lanta kironglaq. Kiimaq namshiq raq jamkhii shomnoqkai wa lung wiitlan, Tatiwe ka shomnoq ki rongkiq.

³² Namshiq skukong, chhechhikong, kiimaq minsaü kong thun kra tsuqho lanta laü wan ronglaq. Lanta ngi miitu ri achu shiiman lap ma achu jaükuq thü ronglaq.”

³³ Ejip mungti raq Israilnok ka kotsi pinhotlo ronglaq lanta tsang mung ka baiqthütlo ronglaq nguta thaüto. Tsangshiq raq nguto, “Namshiq ka tiibintlo man riihanla, naishiq ka wiita ajiim mirhai.”

³⁴ Krai mren Israilnok raq tsangshiq winsii lumphaq chang winpin kaütiim ka pi maq shohü winsii da maq tiimali chhaq miito. Raüta khea maq thopto. Raüta tsangshiq phaqlam na boqraq chhaq miishe laü wanto.

³⁵ Mosheq raq jamkho tsii chongkuqtaq kra phan phan, tsangshiq raq kloto. Tsangshiq raq Ejip mungti jaq wa chaq nai kampho maq atiiq laktum nai khu akhea thun kra jaüto.

³⁶ Tatiwe raq Ejip mungti tsantsii ka Israilnok ma shreng manto tiichhike miitu tiininkeje riito. Kiimaq tsangshiq raq jamlai wa jaütlaq kra wiita kuqto. Akha Israilnok raq Ejip mung wa tachong tsiiq anyam ka wiita tsuq wanto.

Israilnok Ka Ejip Mung Wa Laü Wanto

³⁷ Israilnok ka Rameses chela maq hoksii maq Sukkoth hiq lam maq laü wanto. Tsangshiq ka maiqwere dongdii li 600,000 tin khan riito. Jechakre nai nosere thun kla weahü.

³⁸ Kiimaq maiq munghinti min pahea tsangshiq rai laü wan damto. Kiimaq skukong, chhechhikong, kiimaq minsaü kong kiimin tsangshiq rai pahea tsuq wan raüta wa wanto.

³⁹ Tsangshiq raq lamsea ka Ejip mung wa ahowan wongwinda kham maq nyiimje kra wa lum raüta phaqto. Jamkhano ngukla tsangshiq ka Ejip mung raq tiidong chhaq miili jobaiqto. Kra ningkhan tsangshiq raq tsangshiq lamsea ka tiije lap mak dea riito, riimakla pi maq sho raüta tiija lapmak dea riito.

⁴⁰ Israilnok ka Ejip mung na rawii 430 sito.

⁴¹ Rawii 430 ka nyito she angu ranaiq na, Tatiwe sengi maiq phan thun raq Ejip mung ka miimthüto.

⁴² Kra rawa ka Tatiwe raq tsangshiq ka Ejip mungwa kheshat maq tsuq wan akhing rawa riito. Kiimaq ara rawa arka Israilnok raq pattup pat-sa miitu Tatiwe ma kiinong kuqto. Arka Israilnok raq rawa minru kheshat nga rawa.

Tiichhii Wan Poi Thungtri

⁴³ Tatiwe raq Mosheq nai Aron ma akha nguto, “Tiichhii Wan Poi thungtri ka arthun ara: Pongmungti raq ara Tiichhii Wan Poi dung ka phaqsea dam maimak.

⁴⁴ Shatmaq namshiq raq ari arhan dise ka atho hanjeti raq phaqsea dam ka mimai.

⁴⁵ Namshiq rai jaqlo miitu wanshawe sitlaq kriiti riimakla ningchangti sitlaq kriiti riika phaq sea dam maimak.

⁴⁶ Kra poi dung ka ümra jam miiwa klotlan kra jam miili tiithumli phaqsea chang. Kiiwa kinphai na lamho maimak. Kiimaq nyamse taphaq tlan kra arok arii thun kiimin riishi min tiingoq raamak.

⁴⁷ Israilnok phan kunli raq ara poi ara lang ratlo.

⁴⁸ Shatmaq maiqwere atho hanhüti raq phaqsea dam maimak. Kiimaq pong mungti namshiq rai ashong wanti raq Tatiwe shreng ara poi ara lomdam ro raüla, namshiq raq kriiwe jamkun wa maiqwere thun ka kongkhu atho ka hanke ratlo. Kra raüta apaiq kiimin noktiwe Israilnok phan she nguta wura maq tiiham wan ratlo. Kiimaq apaiq raq kra poi ka lomdam mimai.

⁴⁹ Kra tri ka Israilnok phan noktiwe miitu min kiimaq namshiq rai pongmungti ashong wan wanwe kriiti miitu min adam siili.”

⁵⁰ Kiimaq Tatiwe raq Mosheq nai Aron ma jamkho aming kuqtaq kra phan phan Israilnok kunli raq langto.

⁵¹ Kra ranaiq Tatiwe raq Israilnok maiqphan thun ka Ejip mung wa tiidong tsuq wanto.