95 Umi versíkulo bíblico oñeʼẽva pyʼaguapýre matrimoniope

opaite ñemomirĩ ha py’aporã reheve, ha paciéncia reheve pejogueraha porã hag̃ua oñondivepa mborayhu añeteguáva rupi,

Péicha peẽ ndapeikuaaiva’ekue Ñandejára Hesu Crístope.

Oñemombe’u porã katu Ñanderuete evangélio ha ojehekombo’e porã avei Hesu Crísto añeteguáre.

Pepoi pende reko tujágui, pe yvy arigua reko tuja oñembyaihína heko vai rembipota rupi.

Peẽ peñembopyahupeína pende pytu porãme ha pende py’apýpe.

Pemondéma pe tekove pyahu ha teko pyahúpe, Ñanderuete omoingovemava’ekue pendepype, peiko hag̃ua teko porãme pe Pytu Porãmbáva oisãmbyhy háicha pende rekove.

Upévare pepoi japúgui, peje pe añetegua pende rapichakuéra ndive, ñande ningo peteĩ tete reheguánte.

Peẽ pendepochy ramo ani peñemoangaipa. Ani peheja oike pe kuarahy pende pochy reheve.

Ani peme’ẽ Satanáme hendag̃ua (pende rekovépe).

Upe omondáva anive omonda, toñeha’ãmba uvei omba’apo hag̃ua ipo rupi, ome’ẽkuaa hag̃ua upe oikotevẽvape.

Mba’eveichagua ñe’ẽ tie’ỹ ani osẽ pende jurúgui, pejénte ñe’ẽ porã omopu’ãva’erãichagua nde rapichápe ijehasa asýpe ha ombopy’aguapy hag̃ua nerendúvape.

ha peñeha’ã pende py’aite guive peñemopeteĩ hag̃ua Pytu Porãmbavapype ha py’aguapy añeteguáva rupi.

Opaite ko’ã mba’e ári pemonde mborayhu, péva ningo ombojoaju porã añetetehápe.

Pe mborayhu añetegua oha’arõkuaa, ipy’a porã, pe mborayhu noñemohakate’ỹi, pe mborayhu noñembotuichái ni ndojererovúi,

pe mborayhu naitie’ỹi (ndojapói mba’e iky’áva), ndohekái imba’évante, ndaipochýiri, ndaipy’a rasýi avave ndive,

ndovy’ái ohendúvo hapicha oikoha hekope’ỹ, ovy’a añetegua reheve uvei.

Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.

Peẽ, menakuéra, pehayhúke pene rembirekópe Hesu Crísto ohayhu háicha ijiglésiape ha Ha’e voi oñeme’ẽ omano hag̃ua ijiglésia rehehápe.

Peẽ kuñakaraikuéra, peikóke pene menakuéra poguýpe, peiko háicha Hesu Crísto poguýpe.

Peẽ ména, peiko hekópe pene rembireko ndive pehechakuaávo ha’ekuéra ikangyveha pendehegui, upévare pe’apo ichupekuéra mba’e ramo, peikuaa porã ha’ekuéra ohupitytaha avei pe tekove tapia g̃uarãva, ani hag̃ua pene ñembo’e opyta rei (opa rei).

Peẽ ména pehayhu añetehápe pene rembirekópe, ha anítei pembopy’aro ichupekuéra.

Pe ména katu toiko hekópe hembireko ndive, ha péicha avei pe tembireko toiko hekópe iména ndive.

Ha péicha ramo ndaha’evéima mokõi tete, peteĩntema (peteĩ to’o). Upévare umi yvyariguakuéra Ñanderuete ombojoajumava’ekue, yvyariguakuéra ndoipe’aveimava’erã ojuehegui mba’evéicharõ.

Pe ojohúva peteĩ tembireko heko porãva ojohu mba’eporã, ha ohupity Ñanderuete mba’eporãmby.

Opaite mba’e ári toĩ pende apytépe pe mborayhu añeteguáva. Pe mborayhu añetegua omo’ã tembiapo vaikueita jepe, (Tiágo 5,20).

Mávapa ojehukuaa pe tembireko heko potĩva. Ha’e iporãve ita vera hepyetévagui.

Opáichavo Ñanderuete renondépe kuña ndojejapói kuimba’e’ỹre, ni pe kuimba’e ndojejapói kuña’ỹre, (mokõivévagui oiko peteĩ teténte, Génesis 1,27; Génesis 2,24).

Upévare nde, ména, ehayhu ne rembirekópe nde rejehayhu háicha voi, ha pe tembireko tomomba’e iménape.

Pejohayhu oñohermánoicha, pejo’apo mba’e ramo, péva he’ise emomba’eve ne hermánope ndejehegui voi.

Pe tembireko ikyre’ỹva iména akã jeguaka, ha pe tembireko heko vaíva katu ku úraicha iména akãme.

Upévare pe kuimba’e opoiva’erã itúva ha isýgui, oñemopeteĩ hag̃ua hembireko ndive, ha oikova’erã hikuái peteĩ to’óicha.

Poriahuvereko ha añetegua tojejohu ko tetãme, ha justícia ha py’aguapy toñohetũ.

Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.

Pe ñe’ẽ mbohovái porã ombogue pe pochy; pe ñe’ẽ pohýiva katu ohatapyña pe pochy rendy.

Upévare peñomoangapyhy ha peñomokyre’ỹ, pejapo háicha voi.

Tapendepy’a porã uvei oñondive, peñopytyvõ, pejoporiahuvereko, peñoperdona, Ñanderuete peneperdona háicha avei Hesu Crísto ruguy rupive.

Upévare, che hermanokuéra ahayhúva, opavave ta’ipya’e ohendu hag̃ua, ta’imbegue katu oñe’ẽ hag̃ua, ha ta’imbegueve ipochy hag̃ua.

Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.

Oñondive pemomba’eguasu peteĩ py’ápe ha peteĩ jurúpe Ñandejárape ha Hesu Crísto Rúpe.

Ani reñemboyke pe poriahuverekógui ni pe añeteguágui; eñapytĩke umía nde ajúra rehe ha ehaíke nde py’apýpe avei,

Ani reiko vai avave ndive, ndojapói guive nderehe mba’e ivaietéva.

Ani reikótei umi imbaretéva oiko háicha, ha ani reiporavótei hapekuéra.

Ñanderuete ndohayhúi iñañávape, Ha’e katu oĩ umi heko potĩva ndive.

Ñanderuete maldicion ningo oĩ pe tekove ñañáva ndive, Ha’e katu ohovasava’erã umi heko potĩvape.

Añetehápe Ha’e oñembohoryva’erã umi toryja apoha rehe, umi heko ñemomirĩvape katu ome’ẽva’erã mba’eporã.

Umi iñarandúva ohupityva’erã terakuã porã, umi ivýrova katu oñemotĩva’erã katuete.

péicharõ rejohúta py’aporã ha rembovy’áta Ñanderuetépe ha nde rapichakuérape avei.

Pejogueropu’aka ha peñoperdona, oime ramo oñemohembiapo vaíva; Hesu Crísto peneperdona haguéicha upéicha peperdona avei pende rapichápe.

Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,

ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.

Anítei pejapo mba’eve peñembotuichase térã peñorãirõségui, peteĩteĩ toñemomirĩ uvei, ha peguereko ambuekuérape mba’eguasuvérõ pendehegui.

Hesu Crísto rembiapo rehehápe ningo ha’e haimete omano, nahakate’ỹi hekove rehe chepytyvõ porã hag̃ua pene rendaguépe.

Anítei peheka mba’e iporãva peẽme g̃uarãnte, peheka avei mba’e iporãva pende rapichápe g̃uarã.

Pe arandu oúva Ñanderuetégui katu omboheko potĩ ha upéi ome’ẽ py’aguapy ha py’aporã, iñe’ẽrendu, oporoporiahuverekokuaa, hi’a yva Pytu Porãmba reheguáva (Galaciayguakuérape 5,22), avavépe nombojuavýi, ndahova mokõiri.

Túva yvyarigua ohejapava’erã ita’yrakuérape: Hóga ha imba’erepyeta; Ñanderuete remime’ẽ katu peteĩ tembireko iñakãguapy porãva.

Avave ndohechái araka’eve Ñanderuete rova; ñande jajohayhu ramo, Ñanderuete opyta ñandepype ha imborayhu oĩmbaite hekópe ñandepype.

Ne rembireko ha’ete ku parral mátaicha nde róga yképe hi’a porãva, ha imembyeta oguapy ne mesa jerekuévo ku olivo’áicha hakãre.

Arandupópe oñemopu’ã pe óga, ha akãguapypópe oñemoĩ atãva’erã,

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Ñanderuete tomongakuaa ha tomboheta pe mborayhu añeteguáva oñondive g̃uarã ha opavave ndive g̃uarã, ore pohayhu háicha.

Peteĩ tembiapoukapy pyahu ame’ẽ peẽme: Pejohayhúke Che pohayhu háicha, péicha pejohayhu avei peẽ.

Peẽ ningo Ñanderuete ra’ykuéra ha itajyrakuéra Ha’e ohayhuetéva, upévare peñeha’ãke peiko hag̃ua Hesu Crísto oiko haguéicha (ko yvy apére).

Oñeha’ãva oikuaa ha ojapo hag̃ua umi mba’e ombovy’áva Ñanderuetépe.

Ani pejehe’a umi pytũ rembiapo hi’a’ỹva ndive, upéva rãngue peikuaauka ivaiha.

Umi mba’evai ha’ekuéra ojapóva ñemiháme ñatĩete ñamombe’u hag̃uánte jepe.

Pe tesape ohesapehápe ohechaukáta hembiapokuéra ivaiha.

Opaite mba’e Ha’e ohechaukáva ningo tesape, upévare Ñanderuete kuatiañe’ẽme he’i avei: Epáy nde rekéva, ha epu’ã omanóva apytégui, ha Hesu Crísto nderesapéta.

Pema’ẽ porãke, mba’éichapa peikopeína, ani peiko iñarandu’ỹvaicha, iñarandúvaichante uvei peiko.

Peiporu porãke umi oportunidad ko ára kóvape Ñanderuete ome’ẽva peẽme, ko’ã ára ningo ivaieterei.

Upévare anítei peñembotarova, peñeha’ã katu peikuaa porã hag̃ua Ñanderuete rembipota.

Ha anítei peka’u, upéva ningo ogueru teko vai, penerenyhẽ uvei Pytu Porãmbávagui.

Peñomokyre’ỹke Salmokuéra rupi, puraheikuéra omomba’eguasúva Ñanderuetépe ha puraheikuéra omopu’ãkuaáva ñande rekove pytu porã reheguáva, pepurahéi ha pembopu Ñanderuetépe g̃uarã pende py’apýpe.

Ha peiko mborayhúpe, Hesu Crísto ñanderayhu haguéicha ha upévare Ha’e oñeme’ẽma ñane rendaguépe peteĩ me’ẽmby ha kuave’ẽmby ramo hyakuã porãva Ñanderuetépe g̃uarã.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Ko’ág̃a ningo opyta gueteri jerovia, esperánza ha mborayhu, ko’ã mbohapy apytégui, pe mba’e tuichavéva ningo pe mborayhu añeteguáva.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

Emoĩ Ñanderuete pópe ne rembiaporã ha osẽ porãva’erã.

upévare pemombe’u ojupe pene angaipa, (tembiapo vai) ha peñembo’e ojuehe, Ñanderuete penemokyre’ỹ ha penemonguera hag̃ua. Heko potĩva ñembo’e heta mba’e ojapokuaa.

Peñemokyre’ỹke Ñanderuete pu’akaguasu rupi, peẽ penembarete hag̃ua.

Ipahápe tapenõmbopy’apeteĩ, pejohayhu hermanokuéra ramo, pejoporiahuvereko, peñemomirĩ.

Pe mborayhu añeteguáva ningo ndojapói mba’eve ivaíva hapicha rehe. Upévare upe ohayhúva hapichápe ojapopa Moises rembiapoukapykuéra.

Iporãve peteĩ mandi’o pehẽngue nandi py’aguapy reheve, peteĩ óga henyhẽva so’ógui ñorãirõ reheve.

Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Añetehápe Che ha’e peẽme, mokõi pende apytépe oñemoĩ ramo oñoñe’ẽme ko yvy ári ojerurévo Ñanderuetépe oimeraẽ mba’e rehe, katuete Ha’e ohenduva’erã.

Peñopytyvõ pegueraha hag̃ua oñondive pene mba’e pohýi (cárga) ha péicha pejapo ramo pehóvo pejapo hekópe Hesu Crísto rembiapoukapy.

Upévare pejoguerohory ha peñangareko porã ojuehe Hesu Crísto ojapo haguéicha penendive oñembotuicha hag̃ua Ñanderuetépe.

Imembykuéra ovy’aite hendive ha iména avei omomba’eguasu ichupe.

Ha pehechakuaa mba’eguasúrõ hembiapokuéra ha pehayhu ichupekuéra. Peiko py’aguapýpe oñondive.

Pe tembireko arandu omopu’ã hóga; ha pe tembireko itavýva katu ipoite rupi oitypa jevy hóga.

Peñe’ẽ py’aporã reheve pende rapicha ndive pemopu’ã hag̃uáicha ichupe, peikuaa porã hag̃ua mba’eichaitépa pembohovaiva’erã peteĩteĩme.

Peguata hekópe, Hesu Crísto ñe’ẽ porã he’i háicha, aha ramo pene rendápe térã che pore’ỹme jepe, tahendu peẽ peimembaha peteĩ pytu porã añóme, ha peñeha’ãmba py’a peteĩme pemyasãive hag̃ua pe jerovia Hesu Crísto evangélio rehe.

Mba’eveichagua ñe’ẽ tie’ỹ ani osẽ pende jurúgui, pejénte ñe’ẽ porã omopu’ãva’erãichagua nde rapichápe ijehasa asýpe ha ombopy’aguapy hag̃ua nerendúvape.

Ñanderuete oiporiahuvereko ha ipy’aporã, hasy ipochy hag̃ua, ituicha ningo iporiahuvereko.

Upévarehe anivétei ñañombojovakeñaína, ñañeha’ãmba katu ani hag̃ua ñamoñepysãnga ñane hermánope térã jaity ichupe angaipápe.

Ha umi oñeha’ãva ojeiko porã hag̃ua, toñotỹ py’aguapy omono’õ hag̃ua justícia (heko peguáva).

Ha Isaac ogueru pe kuñataĩme isy Sára róga rymba pirekueguiguápe ha omenda Rebécare, ha ohayhu ichupe; péicha Isaac oñemoangapyhy, isy omano rire.

Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.

pe py’aro hi’a ñorãirõ; ha pe mborayhu katu oñu’ãmbase hapicha rembiapo vai;

Upéicha avei peẽ tembirekokuéra peñemoĩ pene menakuéra poguýpe, oimérõ iména ndojeroviáiva Hesu Crísto rehe, ha’e ojevy hag̃ua avei Ñanderuete rendápe hembireko reko ha hembiapo porã rupi, ha’e nomombe’úi ramojepe ichupe,

Opaite mba’e peẽ peipotáva guive ojejapo penderehe, peichagua mba’e pejapova’erã peẽ ambuekuéra rehe avei, kóva ningo Ñanderuete rembiapoukapy ojehai háicha ikuatiañe’ẽme.

Ha peẽ peipota háicha umi kuimba’e ha kuñakuéra ojapo penderehe, upeichaite pejapo avei peẽ hesekuéra.

Opaite mba’e pejapóva guive, pejapo mborayhúpe.

Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.

Ipahápe, che hermanokuéra, che ha’ese peẽme: Pevy’aite, peheja ambuekuéra tapenemboheko ha tapenepytyvõ peiko porã jevy hag̃ua Ñanderuete renondépe, upévare peñembopy’apeteĩ jevy ha peiko py’aguapýpe oñondivepa, ha Ñanderuete, pe mborayhu ha py’aguapy Jára, penemoirũta.

upéicharõ ojokova’erã ijuru, ani hag̃ua osẽ mba’evai térã japu ijurúgui.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Che hermanokuéra, ajerure peẽme Ñandejára Hesu Crísto rérape peñe’ẽmba hag̃ua peteĩ mba’énte, ha anítei oĩ pende apytépe ñorãirõ, tapeiko uvei oñondivepa peteĩ py’ápe ha peteĩ ñe’ẽme.

Ha peñemoĩ ojopoguýpe Hesu Crísto kyhyje rupi.

Heta paciéncia rupi oñembopochy poi mbojovakehárape, ha ñe’ẽ vevúi asýva kangue jepe omopẽkuaa.

upévare ñañeha’ãmba ñañomokyre’ỹ ha jajohayhu hag̃ua, jajapove jahávo tembiapo porã.

Ojehayhuhína ipy’a potĩvape, iñe’ẽ juky rupi oikóta tetã ruvicha angirũ (amígo) ramo.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

Opaite ko’ã mba’e ningo, Ñanderuete rembiapo voi, Ha’émante orembopy’apeteĩ jevy hendive Hesu Crísto rupi, ha Ha’e oipota ore roiko porã opavave ndive.

Pejohayhu tova mokõi’ỹre. Pejeguaru mba’evaígui, pejapo uvei mba’eporã ha heko peguáva.

Oime ramo peteĩ ñane hermáno noñangarekóiva igentekuéra rehe, heko ivaive ojerovia’ỹva rekógui.

Pe tekove ipochy reíva oñorãirõsénte, ha hasyete katu peteĩ ipochýva ombogue hapicha pochy rendy.

Kóva ningo che rembipota: Tapejohayhu, Che pohayhu háicha.

Peẽ pendepochy ramo ani peñemoangaipa. Ani peheja oike pe kuarahy pende pochy reheve.

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

Iporãiteve jaiko ramo cárpa guýpe, ñaime rãngue kuña iñorãirõ katúva ndive peteĩ ogaguasúpe.

Ñanderuete kuatiañe’ẽme he’i voi: Upe ohayhúva hekove ha oikoséva py’aguapýpe tojoko ijuru mba’evaígui ha japúgui, (Salmokuéra 34,13-17).

Toñemboyke mba’evaígui, ha tojapo mba’eporã, toheka py’aguapy ha toho hapykuéri.

Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.

Che hermanokuéra, Ñanderuete ningo penerenói peiko hag̃ua teko sãsóme (libertádpe). Ani peiporu, pe teko sãso peiko jevy hag̃ua pende yvyarigua rete rembipota vai poguýpe. Peñopytyvõ uvei Hesu Crísto mborayhu reheve.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Che hermanokuéra ani japorohayhu ñande jurúpente térã ñe’ẽ rei rupínte, japorohayhu katu uvei añetehápe ñane rembiapo porã rupi.

Pemomba’e pene mendare reko, ha peẽ pemendáva ani peñemongy’a ambue ndive. Ñanderuete voi ombojovakéta umi oñemongy’áva ha umi omongy’ávape imendare reko.

Ejeroviáke nde py’aite guive Ñanderuete rehe, ha ani rejejoko ne arandu rehe.

Nemandu’áke hese opaite nde rape rehe, ha Ha’e omyesakãta ne raperã.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Iporãiteve ojeiko desiértope, ojeiko rãngue peteĩ kuña iñorãirõiterei ha ipochýva ndive.

Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.