Ñemohenda
143 Versíkulo bíblico jajerure hag̃ua pyʼaguapy ñande rógape
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.
Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.
Iporãve peteĩ mandi’o pehẽngue nandi py’aguapy reheve, peteĩ óga henyhẽva so’ógui ñorãirõ reheve.
Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.
Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.
Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,
Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.
Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe. Jepémo okororõ ha omymýi vaipa hi’y ha ipochyetereígui omboryryipa umi cérro. Selah
Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia, ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Ore Ruete nomopu’ãi rire ore róga, reiete oñemba’apova’erãmo’ã hese, Ñanderuete noñangarekói rire peteĩ táva rehe, isoldadokuéra reiete omangeava’erãmo’ã hese.
ha peñeha’ã pende py’aite guive peñemopeteĩ hag̃ua Pytu Porãmbavapype ha py’aguapy añeteguáva rupi.
Hesu Crísto rupínte oĩ perdon opaite tetãyguakuérape g̃uarã, Ha’e oguerúgui pe py’aguapy yvága pegua huguy rupínte, oñeñohẽva’ekue ikurusúre.
Toñemotĩ joa umi oñembotuicháva ha oñe’ẽvaíva cherehe, che ningo ajepy’amongeta’aína ne rembiapoukapy rehe.
Horyete mayma okyhyjéva Ñanderuetégui, ha oguatáva hape rehe. Re’u jave nde po rembiapokue revy’aite ha oho porãmbáta ndéve. Ne rembireko ha’ete ku parral mátaicha nde róga yképe hi’a porãva, ha imembyeta oguapy ne mesa jerekuévo ku olivo’áicha hakãre. Eikuaa porãke, péicha ojehovasava’erã upe kuimba’e okyhyjéva Ñanderuetégui.
Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.
Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.
Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.
ha che retã oñemomirĩ jevy ramo, oñehenói voi che réra rupi, ha oñembo’e ramo hikuái ohekávo che rova, ha opoi ramo hape vaígui; upéicharamo Che ahendúta ichupekuéra yvága guive ha aperdonáta hi’angaipakuéra ha amongueráta avei ijyvy iplagakuéragui.
Iporãve pe tembi’u ka’avoguiguáva mborayhu reheve, ja’u rãngue peteĩ guéi oñemongyrava’ekue py’aro reheve.
Nde remo’ãta ichupekuéra umi iñañávagui, oñemoĩva ñemiháme hesekuéra; Nde reñongatúta ichupekuéra nde rogaguýpe, remo’ã hag̃ua ñe’ẽvaígui.
Pejerure Jerusalen toiko py’aguapýpe, pejévo: Toñemopu’ã poty umi ohayhúva Ñanderuetépe. Toĩ py’aguapy nde korapýpe, ha taipy’aguapy avei opaite mburuvicha guasu hogayguakuéra ndive.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe. Ñanderuete resa oma’ẽ hekopotĩva rehe, Ha’e ojapysaka porã imba’ejerure asy rehe.
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Ejesarekomína heko potĩva rehe, ha ema’ẽmi heko jojáva rehe, ipahaitépe oĩ py’aguapy añeteguáva kuimba’e heko potĩva ndive.
Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.
Oñembyai ramojepe che ro’o ha che py’a, Nde, che Ruete repytava’erã che mba’erepyetéva.
Pemonde pende py rehegua, kóva he’ise pemombe’uva’erãha Ñanderuete ñe’ẽ porãite (evangélio),
Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
Peike hokẽnguéra rupi pemomba’eguasu hag̃ua ichupe, peg̃uahẽ pepurahéivo ichupe hogaguasu korapýpe, pehechakuaa hembiapokue ha pemboete héra porãite. Ñanderuete ipy’a porãite, opaite árape oiporiahuvereko, ha iñe’ẽ añeteguáva oiko tapia ñande tuvakuéra ára guive iñemoñarenguéra jevy jey peve.
Ovy’aiteva’erã upe nde reiporavóva ha oñemoag̃uikuaáva ne rendápe, oiko hag̃ua nde korapýpe, nde rogaguasúpe, Nde oremoangapyhýta ndepy’a porãgui.
Añetehápe aiko hekoitépe ha amokirirĩ che ánga, ku mitã oñemombo’ómavaicha ha ojejokóva isy pyti’áre, peichaite che ánga ipy’aguapy chepype.
Ha pehechakuaa mba’eguasúrõ hembiapokuéra ha pehayhu ichupekuéra. Peiko py’aguapýpe oñondive.
Ajepy’apy vai jave ahenói Ñanderuetépe, ha amba’ejerure asy che Járape chepytyvõ hag̃ua. Ha’e ohendu che ñe’ẽ henda porãite guive, ha che mba’ejerure asy og̃uahẽma ijapysaitépe.
Oipe’a pe yvytu’atã ha hekovia omoĩ ára porã, ha omboguapy jevy pe y pochy. Ñanderuete ombyatyva’ekue Israelguakuéra opaite tetãgui, kuarahyresẽguio ha kuarahyreikéguio, yvatéguio ha yvýguio. Upéi ovy’a joa hikuái pe y oguapy jevy haguére, ha péicha Ha’e oisãmbyhy ichupekuéra og̃uahẽ meve pe barcoguasu pytaha (puérto) peve.
Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.
Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.
Aiko ramo jepy’apy vaípe, Nde chemoangapyhy jevy, Nde chepytyvõ umi cherehe ija’e’ỹvagui ha Nde voi reipyso nde po akatúa chepytyvõ hag̃ua.
Upeichavéramo jepe Ñanderuete oha’ãrõta pendeporiahuvereko jevy hag̃ua, ha Ha’e opu’ãta pendeporiahuvereko hag̃ua, Ñanderuete katu ombojovake porã ha ohayhu pe justícia ha ombovy’ase umi hese ojeroviávape.
Che katu ajerovia nderehe, che Ruete, che ningo ha’e: Nde, che Jára. Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.
Upéicha Ñanderuete omo’ã umi ojejopývape, Ha’e ningo iñemo’ãha renda jepy’apy vaiha árape g̃uarã.
Ñanderuete ñe’ẽ ipotĩeterei ku pláta (óro morotĩ) oñemopotĩ jo’a jo’ávaicha tatakuápe, 7 jevy oñemopotĩ jo’a jo’a ipotĩete hag̃ua. Nde, che Ruete, reñangareko porãta ne ñe’ẽ rehe; ha reñangareko porãta orerehe opaite ára ko’ã ñemoñarenguéragui.
Tesaypópe oñemitỹva’ekue, vy’apópe katu omono’õva’erã iñemitỹ’anguéra. Ha’ekuéra oñotỹ tasẽme, vy’apópe katu omono’õ jevyva’erã ikoga’akuéra.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Pe aguaraguasu oikóta ovecha ra’yrusu ndive, ha pe jaguarete oñenóta kavara ra’y ndive; pe vaka ra’yrusu, pe leõ (África pegua) ndive, ha mymba iñarõva’ekue oikova’erã oñondive, ha peteĩ mitã oñangarekóta hesekuéra. Vaka ha óso ho’úta kapi’i, ita’yrakuéra oñenóta oñondive; ha pe leõ ho’úta avei kapi’i vakakuéraicha. Ha pe mitã okambúva oñembosaráita pe mbói raity ykére, ha pe mitã opo’oramóva ipojáita mbói raity rehe. Ndojapomo’ãi ivaíva ha nomongy’amo’ãi che cérro amboykeva’ekue; pe tetã henyhẽta pende Ruete arandúgui ku y omyenyhẽ háicha pe yguasu.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme. Upe ojerurévape oñeme’ẽva’erã; upe ohekáva ojohuva’erã; ha upe ombotávape ojepe’ava’erã (pe okẽ).
Ani reheja pe ivaíva ipu’aka nderehe, upéva rãngue ndepu’aka pe ivaíva rehe mba’eporã rupi.
Peikuaa porãke, ñande ra’y ha ñande rajykuéra Ñanderuete jopói ha ijehovasaha. Ku hu’ýicha soldádo pópe, upéicha umi ta’ýra oúva peteĩ kuimba’e rekovépe ha’e ipyahu ha imbarete aja. Ovy’aite pe kuimba’e omyenyhẽva ihu’y ryru, notĩmo’ãi ha’e, oñembyaty ramojepe hese ija’e’ỹva itáva rokẽme oñorãirõ hag̃ua.
Ha anítei peka’u, upéva ningo ogueru teko vai, penerenyhẽ uvei Pytu Porãmbávagui.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Emboykemína che py’apy ne ñe’ẽ gotýo, ha anítei aguata pe tape rehe, ahupity hag̃ua opaite mba’e chéve g̃uarãnte. Emboyke che resakuéra ani hag̃ua ama’ẽ mba’e výro rei rehe, chemokyre’ỹve uvei aguata hag̃ua nde rapére.
Ha aporombopurahéita: Py’aguapy, py’aguapy ame’ẽse umi mombyry ha ag̃ui oikóvape, he’i pende Ruete; ha amonguera jevýta che retãme.
Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.
Che py’aite guive roheka pyharekuépe, ha che pytu porã chepype oĩva oikose nendive, upévare apu’ã ko’ẽ mboyve aiko hag̃ua nendive; yvyariguakuéra ohendúva guive ne rembiapoukapy oikuaa voi mba’éichapa oiko porã hag̃ua oñondive.
Che katu añemboja ramo Ñanderuete ypýpe avy’aitéta, che ajeroviágui Ñanderuete rehe, amombe’u hag̃ua hembiapo tuichaitéva.
Umi tesa horýva ombovy’a hapichápe ha peteĩ notícia porã oñemombe’úva ñandéve ñanemokyre’ỹ ha omombarete ñane retyma.
Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure.
Upévarehe che ánga opurahéita ndéve rombotuicha hag̃ua, nakirirĩmo’ãi, Ñanderuete, che Jaratee, che romomba’eguasuháve opaite árape.
Ou ramo mba’evai ore ári, térã kyse puku, térã mba’asy vai iñasãiva, térã ñembyahýi, roñembojava’erã ko ogaguasu renondépe, ha ne renondépe (nde réra oĩgui ko óga kóvape), ha orejepy’apýgui romba’ejerure asýta ndéve, ha Nde orerendu ha oresalváta katuete.
David opurahéi Ñanderuetépe oguenohẽ rõguare ichupe hese ija’e’ỹva, Saul pógui, he’ívo: Che rohayhu, Nde, che Ruete, chemombarete haguére. Ha’e ojupi ha oveve querubin (ángel ruvichaguasu) ári, ha oveve pe yvytu pepo ári. Ha omoĩ pytũ imo’ãha ramo, ijerekue rehe oĩ pytũ yguiguáva ha arai ára peguáva. Ha’e oñeñu’ãmba ypytũme, ha oiko arai ha tatatĩna apytépe. Yvate Ñanderuete omosunu, ha pe Ijyvatetéva ñe’ẽ ningo: Sunu, amandáu ha aratiri. Opa rupiete opoi ihu’ykuéragui, oity hi’aratiri ohundi hag̃ua ichupekuéra. Ore Ruete, Nde reja’o ha reipeju haguére nde pochy ojekuaa pe yeta ruguaite ha ojehechakuaa yvy pyendakuéra. Ha’e oipyso ipo yvágagui cheguenohẽ hag̃ua yguasúgui. Upéicha Ha’e cheguenohẽ umi cherehe ija’e’ỹva pógui, cherayhu’ỹva imbaretevégui chehegui. Oko’i hikuái cherehe che aime vai jave, Ñanderuete katu chemo’ã. Cheguenohẽ yvy inandi porãháme, Ha’e ningo chepytyvõ porã cherayhúgui. Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua. Upéicha Ñanderuete omyengovia porã chéve che reko heko peguáicha, ohepyme’ẽ porã chéve che pokuéra ipotĩ haguére, ha aguata haguére Ñanderuete rape rehe, ha ndapoíri che Ruetégui, aiko vai hag̃ua. Opaite hembiapoukapy oĩmba che renondépe ha namboykéi iñe’ẽ che rekovégui. Upéicha aiko hapykuéri teko potĩme ha añeñangareko anítei ha’a teko vaípe. Ha Ñanderuete omyengovia porã chéve che reko heko peguáicha, ha che pokúera ipotĩ háicha hesa renondépe. Nde ndepy’aporã ipy’aporãva ndive ha Nde nderekojoja hekojojáva ndive. Nde reko joheipyre heko joheipyréva ndive, ha nde reko pohýi hova mokoĩva ndive. Nde reipytyvõreína pe tetãygua oñemomirĩvape, ha remomirĩ umi oñembotuichávape. Nde remyendy chéve che rataindy, che Ruete, che Jára, ohesapéva chéve iñypytũha rupi. Nendive amosarambipáta cherehe ija’e’ỹvape, ha che Ruete ndive ajapyharáta táva tápia ári. Ahenóita Ñanderuetépe, amomba’eguasu hag̃ua hekoitépe; Ha’e cheguenohẽta umi cherehe ija’e’ỹva pógui.
Ehekombo’e porãke nde ra’ýpe ijejavýgui, ha nembopy’aguapýta, ha ha’e ombohorýta ne ánga.
Rehechaukáta chéve pe tekove rape, nde ypýpe oĩ vy’a añetetéva, ha péva ndopamo’ãi araka’eve.
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
Ko’ẽmba mboyve che rohenói, ajeroviaitégui ne ñe’ẽ rehe. Pyhare pukukue ndakéi ajepy’amongeta hag̃ua ne ñe’ẽ rehe.
Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve,
Nde rejapysaka porã rire che rembiapoukapy rehe, nde py’aguapy okakuaava’erãmo’ã ysyryguasúicha, ha nde justícia (tekojoja) ojehupiva’erãmo’ã y pu’ã yguasu peguáicha,
Ñanderuete ome’ẽ chéve che mba’e ha che váso (iporiahuvereko). Nde reñangareko porã che rekove rehe. Umi mba’e ho’a chéve g̃uarã po’a jeporavo rupive chembovy’aite ha iporãite pe yvy cherupitýma che mba’erã ramo.
Pema’ẽna mba’eichagua mborayhúpa Ñanderuete ome’ẽ ñandéve, ñañembohéra hag̃ua Ñanderuete ra’ykuéra ha rajykuéra, ha umivahína ñande voi. Upévare Ha’érupi ko múndo nañandekuaái, ndoikuaáigui ichupe.
Vy’apópe pepurahéi joa Ñanderuetépe, mayma yvy ape ári peikóva guive. Peju vy’apópe henondépe pejapo hag̃ua Ñanderuete rembipota. Peikuaa porãke Ñanderuete ha’eha pe oikóva tapia g̃uarã, Ha’e ñande apohare ha ñande, imba’eha. Ha’e oñangareko hetã rehe ha ijovecha aty rehe.
Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.
Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.
chemandu’a katu, Nde, che Ruete, yma rembojovake porã haguére ha péva chemoangapyhy jevy.
Ha justíciagui heñóita tapia g̃uarã py’aguapy, angapyhy ha kyhyje’ỹ. Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe). Oñeme’ẽta kyse puku rãimbekuépe ha oikóta hikuái aguaraguasu rembi’urã ramo. Ha pe tetã ruvicha ipy’a rorýta Ñanderuete ndive, oñemomba’eguasuva’erã katuete oimeraẽ he’íva guive pe añetegua Ñanderuete renondépe, ha oñembotýta katuete umi ijapúva juru. Upeichaite chey’uhéi avei che Jára rogaguasu rehe, ahecha hag̃ua nde pu’aka ha nde reko jajaipa. Ne mborayhu iporãve jeikovégui, che juru nemomba’eguasu manteva’erã.
Ñanderuete ogueru jevývo umi Jerusalen pegua iñeñapytĩgui Israel retãme, ha’eténte ku ñande képe jahecha ramoguáicha. Upe ára upévape ñande juru henyhẽva’ekue pukágui, ha ñane kũ omomba’eguasu purahéi rupi Ñanderuetépe, ha upe ára upévape ambue tetãygua he’íta: Tuichaite mba’e ojapo Ñanderuete ko’ãva rehe. Añetehápe tuichaite mba’e Ñanderuete ojapo ñanderehe, upévare ñande javy’aiteva’ekue.
Mba’eporã ha nde poriahuvereko añetehápe oĩta chendive aikove aja pukukue, che aikose Ñanderuete roga guasúpe aikove aja pukukue.
Upe oikóva teko porã ha poriahuvereko rapykuéri ojohuva’erã pe tekove, pe justícia ha terakuã porã.
Umi leõ ra’y ohasa asy ha iñembyahýi hikuái, umi ohekáva Ñanderuetépe katu ndofaltái ichupekuéra mba’eveichagua mba’eporã.
Upévare umi oikuaáva nde réra ojerovia nderehe, Nde, ore Ruete, nderepoírigui umi nderekávagui.
Pevy’a pe mborayhu ha pe py’aguapy rehe Ñandejára Ñanderuete ha Ñandejára Hesu Crísto ome’ẽva’ekue ñandéve.
Ejerovia katu Ñanderuete rehe, ha ejapo mba’eporã, epyta ne retãme ha eñeha’ãmba reiko porã hag̃ua.
Peẽ ningo Ñanderuete jehovasapyre, yvága ha yvy apohare. Umi yvága Ñanderuete mba’e, ha pe yvy Ha’e ome’ẽva’ekue yvyariguakuérape g̃uarã.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Che ra’y, remomba’e ramo che ñe’ẽ, ha reñongatu porã ramo ndepype che rembiapoukapykuéra, Pe arandu oike vove nde py’apýpe, pe akãguapy ombovy’áta nde pytúpe, pe akãguapy reko nemo’ãva’erã, ha pe akãporã reko katu oñangarekova’erã nderehe, ndesalva hag̃ua tape vaígui ha umi tekove ñe’ẽ tie’ỹgui. Pe arandu nemomombyrýta umi oñemomombyrývagui pe tape ikarẽ’ỹvagui, oiko hag̃ua tape ypytũva rehe; ha’ekuéra ovy’a ojapo ramo mba’evai, ipy’a hory tie’ỹ ñaña reko reheve, hape po’i ikarẽ, ha iguataha ojavy. Pe arandu ndesalvava’erã pe kuña reikuaa’ỹvagui, pe tembireko ambuévagui ha oporombojuru he’ẽvagui, upe kuña ningo opoi iménagui oikuaáva imitã ára guive, ha hesarái iñe’ẽ ome’ẽva’ekuégui iménape, upévare hogayguakuéra omanombáta ha hape po’ikuéra ndereraháta aña retãme. Umi hese oñemog̃uahẽva guive, ndojevyveiva’erã, ha ndohoveiva’erã pe tekove rape rehe. ha rejapysaka porã ramo pe arandu rehe, ha remoĩ ramo nde py’apy akãguapy reko rehe, Opaite ko’ã mba’e che amombe’u ndéve nde reguata hag̃ua teko potĩme ha heko potĩva rape po’i rehe. Umi heko potĩva oikova’erã yvy apére ha umi heko joheipyrévante hembyva’erã yvy apére. Umi tekove ñaña katu oñehundiva’erã yvy ape árigui, ha umi nomomba’éiva pe teko porã ojehapo’ova’erã ko yvy ape árigui. ha rejerure asy ramo akãporã ha akãguapy rehe, ha reheka ramo ku óro morotĩcha, ha rejepovyvývo ha reheka ramo ku mba’erepyeta oñeñomiva’ekuéicha (pláta yvyguýrõ guáicha): Péicha ramo reikuaáta mba’épa he’ise pe kyhyje Ñanderuetégui ha reikuaáta ichupete voi.
Ñanderuete rembiguái (ángel) oñangareko umi ojeroviáva rehe, Ha’e oguenohẽta ichupekuéra mba’evaígui.
Ñanderuete oĩ guive chendive ndakyhyjemo’ãi yvyarigua rembiapo vaígui. Ñanderuete chepytyvõgui cherayhu’ỹva oñehundíta.
Ñanderuete, pe py’aguapy Jára, omoingove jevymava’ekue Hesu Crístope omanóva apytégui, Hesu Crísto ningo pe ovecha rerekuaguasu ha huguytee rupi Ha’e ñanembopy’apeteĩ jevy Ñanderuete ndive, Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Yvyarigua mba’e ningo jajepy’amongeta (ñapensa) hag̃ua, Ñanderuete katu ome’ẽ pe pensamiénto iporãitéva.
David oñangareko hesekuéra py’a porãme, ha ombosako’i ichupekuéra ipo ikatupyry rupi.