150 Versíkulo bíblico japytuʼu ha jaiko hag̃ua pyʼaguapýpe

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Py’aguapypópe añeno ha upeichaite ake avei, che Ruete, Nde rupínte aiko porãkuaa.

Ñanderuete che rerekua, Ha’e ome’ẽmba chéve aikotevẽva guive. Umi kapi’ipe kyrỹiha rupi chegueraha, umi y sakã rembe’ýpe chemombytu’u. Ha’e chemoangapyhy, Ha’e chesãmbyhy ijustícia rape rehe, héra rayhupápe.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

Opaite pende jepy’apykuéra peity hi’ári, Ha’e ningo oñangarekohína penderehe.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra. Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.

Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.

Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Reñeno vove, nderekyhyjemo’ãi, ha reñeno rire reke porãta.

Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Ha Ha’e he’i: Che aháta nendive rombopy’aguapy hag̃ua.

Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.

Ha justíciagui heñóita tapia g̃uarã py’aguapy, angapyhy ha kyhyje’ỹ.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

Che añeno ramo, ake porã ha apáy py’aguapýpe, che Ruete oñangareko porãgui cherehe. Ndakyhyjemo’ãi 10.000 soldádogui, oñembo’y ramojepe che jerekuévo.

Che rupápe chemandu’a nderehe ha pyharekuépe ake’ỹ jave añamindu’u ne ñe’ẽre, reikógui chéve che pytyvõhára ramo, ha péicha nde pepo guýpe chepy’arory asýta.

Oiko py’aguapýpe ha opytu’u porãva’erã hupápe mayma ojeroviáva Ñanderuete rehe.

Ñanderuete tapia oĩ che resa renondépe; ha Ha’e oĩgui che akatúape nda’amo’ãi. Upévagui che py’a hory ha che pytu ovy’a, Ha’e oñangareko porã avei che retére.

Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5).

Ñanderuete ñanemo’ã ha ñanemombaretéta jajejopy vai jave,

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Ha upe cherendúva katu, oikova’erã kyhyje’ỹme ha oikoveva’erã py’aguapýpe okyhyje’ỹre mba’evégui.

Ha pejapo opaite mba’e che pohekombo’eva’ekue ha pehenduva’ekue chehegui, ha pejapo opaite mba’e pehechava’ekue che ajapova’aína. Ha pe py’aguapy Jára (Hesu Crísto) oĩhína katuete penendive.

Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme.

Ñane ánga toha’ãrõ Ñanderuete ojapóva rehe, Ha’e ñanepytyvõta ha Ha’e ñanemo’ãta. Upéicha Ñanderuete ñanembopy’arory jajerovia porãgui héra porãite rehe.

Che ovechakuéra ohendu katuete che ñe’ẽ ha che aikuaa porã ichupekuéra, ha ha’ekuéra oñemboja che rendápe oho hag̃ua che rapykuéri Che ahasehápe. Ha Che ame’ẽ ichupekuéra tekove tapia g̃uarãva, ha noñehundimo’ãi máramo, ha avavete ndoipe’amo’ãi ichupekuéra che pógui.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Añetehápe aiko hekoitépe ha amokirirĩ che ánga, ku mitã oñemombo’ómavaicha ha ojejokóva isy pyti’áre, peichaite che ánga ipy’aguapy chepype.

Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.

Ha’e omonguera umi ipy’a ojekávape, ha ojokua jevy ipire oñekytĩ haguépe.

Upe ohekáva mba’evai oñembotavyse voi; ha upe ohekáva mba’eporã, oporombovy’a.

Ovy’aite pe kuimba’e Nde rehekombo’éva, Nde, ore Ruete, ha rehechaukáva ne rembiapoukapy. Nde remombytu’úta ichupe jepy’apy vai árape, ojejo’o aja tekove iñañáva tyvyrã (sepulturarã).

Ñanderuete ndaha’éi peteĩ apañuãi Jára, peteĩ py’aguapy Jára uvei.

Peñeha’ãmbáke, ijáva guive peẽme, peiko hag̃ua py’aguapýpe opavave ndive.

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.

Ñanderuete oikógui ipype ndoku’emo’ãi. Ñanderuete oipytyvõtagui ichupe ko’ẽtĩ jave.

Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.

Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.

Ipahápe, che hermanokuéra, che ha’ese peẽme: Pevy’aite, peheja ambuekuéra tapenemboheko ha tapenepytyvõ peiko porã jevy hag̃ua Ñanderuete renondépe, upévare peñembopy’apeteĩ jevy ha peiko py’aguapýpe oñondivepa, ha Ñanderuete, pe mborayhu ha py’aguapy Jára, penemoirũta.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua.

Peje ipy’a kangývape: Peñembopy’aguasu, ani pekyhyjétei, pende Jára oútama omyengovia hag̃ua penderehe ija’e’ỹva rembiapo vaikue, Ñanderuete voi oúta, ha peneguenohẽta pende jejopy vaígui.

Ñanderuete ohóta ne renonderãme; Ha’e oĩta nendive, ndojeimo’ãi ndehegui ha nanemotyre’ỹmo’ãi; ani rekyhyjétei ha ani reñembopy’amirĩtei.

Ku sy omoangapyhy háicha imembýpe, péicha Che voi pomoangapyhýta peẽme, ha Che pomoangapyhýta Jerusalen távape.

Ipepópe neñuãmbáta ha kyhyje’ỹme reiméta ipoguýpe, heko añete nemo’ãta ha Ha’e oñangarekóta nderehe. Pyhare aja nderekyhyjemo’ãi mba’evégui, térã hu’ýgui ojepoíva arakuépe.

Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a. Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.

Ñanderuete oñorãirõta ñanderehehápe ha peẽ peiméta py’aguapýpe.

Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

Ndajeruréi Nde reipe’a hag̃ua ichupekuéra ko yvy árigui, ajerure uvei Nde reñangareko hag̃ua hesekuéra mba’evaígui (Añagui).

Ha’ekuéra ojejopy vaiete jave, Ha’e ojepy’apy avei, upévagui Ñanderuete ombou ijyvága rembijokuái oipytyvõ hag̃ua ichupekuéra, Ha’e ipy’aporã ohay’úgui ichupekuéra. Ha’e ojogua ichupekuéra ha omopu’ã jevy jey ha ohupi ichupekuéra ijyva ári ymaite guive.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Ejevýna, nde che ánga rejohu haguépe nde pytu’u, Ñanderuete katu ojapo ndéve g̃uarã mba’e iporãva.

Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.

Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.

Umi cérro omongora háicha Jerusalénpe, péicha avei Ñanderuete oiko hetã jerekue rehe opaite árape.

Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.

Toñemboyke mba’evaígui, ha tojapo mba’eporã, toheka py’aguapy ha toho hapykuéri.

Ñanderuete toiko ore Jaratee ramo opaite árape g̃uarã, Ha’e ñanesãmbyhyva’erã pe ñemano amo gotyove g̃uarãgui jepeve.

Ndereikuaái ha nerehendúi piko Ñanderuete, yvága atykuéra Jára ningo tapia g̃uarã voi. Ha’e oikohína, Ha’e ojapo ypyva’ekue ko yvy ijapýra paha peve. Ndaipy’akangýi, naikane’õi ha ndaipóri avave ohupitýva ikuaapy arandu. Ha’e omombarete ikane’õvape ha omokyre’ỹ avei ikangypávape.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Peikuaa porãke Ñanderuete ha’eha pe oikóva tapia g̃uarã, Ha’e ñande apohare ha ñande, imba’eha. Ha’e oñangareko hetã rehe ha ijovecha aty rehe.

Pe túva oiporiahuvereko háicha ita’yrakuérape, péicha Ñanderuete oiporiahuvereko umi ichugui okyhyjévape. Ha’e oikuaa voi mba’eichaguaitépa hína ñande, ha oikuaa porã voi ñande yvy timbonteha.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe). Oñeme’ẽta kyse puku rãimbekuépe ha oikóta hikuái aguaraguasu rembi’urã ramo. Ha pe tetã ruvicha ipy’a rorýta Ñanderuete ndive, oñemomba’eguasuva’erã katuete oimeraẽ he’íva guive pe añetegua Ñanderuete renondépe, ha oñembotýta katuete umi ijapúva juru. Upeichaite chey’uhéi avei che Jára rogaguasu rehe, ahecha hag̃ua nde pu’aka ha nde reko jajaipa. Ne mborayhu iporãve jeikovégui, che juru nemomba’eguasu manteva’erã. Che jurúpe che romboetéta, nde rérape añembo’éta ahupívo che pokuéra (yvága gotýo).

Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).

Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.

Che, Che voi ningo, pomoangapyhýva. Mba’érehepa rekyhyje yvyarigua omanótavagui, iñemoñarẽnguéra ojogua umi kapi’ípe.

Ajepy’apy jave ahenói Ñanderuetépe, ha Ha’e cherendu ha chemosãso. Ñanderuete oĩ guive chendive ndakyhyjemo’ãi yvyarigua rembiapo vaígui.

Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

Nde remo’ã haguére ikangývape, Nde reipytyvõ haguére umi ojejopývape, Nde reiko haguére ñemo’ãha ramo oky tuicha ha kuarahy hakuete jave, umi iñañáva pu’aka opa reíta ku ama opa rei háicha ojohu guive pe óga tápiare.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Pe yvytu omosarambi háicha araikuéra, péicha cheresaráita ndehegui reñemoĩ haguére cherehe ha opa háicha pe tatatĩna, péicha amboguéta ne rembiapo vaieta. Ejevýke che rendápe, Che roperdonáma.

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Nde, che Ruete, nde poriahuvereko iporãite: Upévagui yvyariguakuéra oñemo’ã nde pepo guýpe. Hyg̃uatãta hikuái umi mba’e kyrágui oĩva nde rógape, ha nde remboy’úta ichupekuéra ne mba’eporã reheve osyry peve.

Opaite mba’e ikatu chéve g̃uarã, Ha’e chemombaretégui.

Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.

Ore Ruete, Nde orembopy’aguapy, nderupínte ore rembiapokuéra osẽ porãmba.

Ha mba’éicha piko ikatúta ojekuaauka Hesu Crístope ichupekuéra, noñemondói ramo avavépe hendapekuéra. Ojehaíma Ñanderuete kuatiañe’ẽme: Iporãite ningo umi py omyasãiva mba’e iporãva, (Isaías 52,7).

Péicha Ñanderuete py’aporiahuvereko ogueru ñandéve pe tesape yvatetégui. Ohesape hag̃ua umi oguapýva pytũháme ha umi oikóva ñemano rokẽme ojereraha hag̃ua py’aguapy rape rupi.

Peñeñangarekóke! Pepyta hatãkena pende jeroviápe, peñomokyre’ỹ ha peñomombaretéke. Opaite mba’e pejapóva guive, pejapo mborayhúpe.

Peñemokyre’ỹke Ñanderuete pu’akaguasu rupi, peẽ penembarete hag̃ua. Peiporu hekópe Ñanderuete ñorãirõ rembiporukuéra peñemoĩ hag̃ua Satana rehe, ha’e pende reitységui iñuhãme.

Hesu Crísto ndopoimo’ãi iñe’ẽ ome’ẽva’ekuégui, Ha’e voi penemombarete ha oñangarekohína penderehe mba’epochýgui.

Upe okyhyjéva yvyariguakuéragui ho’ava’erã ñuhãme ha Ñanderuete rehe ojeroviáva oñemoĩ porãva’erã.

Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.

Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.

Chéverõ g̃uarã umi jehasa asy ko’ag̃agua jahasavañaína, ndaha’éi mba’eve, ñambojoja ramo pe teko jajaipáva rehe ojehechaukava’erã ñande rekoverãme.

Jaiko jajeroviágui, ndaha’éi ñande jahecháva rehe.

Umi oñemomirĩvape oñeme’ẽta ko yvy imba’erã ramo ha ovy’aitéta ohasa porãtaháre.

Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype. Upéicharamo Hesu Crísto iglesiaygua tomomba’eguasu Ñanderuetépe Hesu Crísto rupi, ko ára atyguasúpe ha opaite ára atyguasurãme, péva he’ise tapia g̃uarã, taupéicha (amen).

Ko’ág̃a, nde Jacóbo, pende Ruete rembiapo, nde apohare he’iuka ndéve: Ani rekyhyjétei, Che roperdonáma; Che rohenói nde réra rupi, nde ningo che mba’énteva voi.

Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.

Nde, che Ruete, chemboguatava’ekue heta jepy’apy ha mba’evaiete rupi, Nde katu chemoingove jevy, ha cheguenohẽ jevy umi yguasu pypukúgui. Nde chemoĩ porãve aiko haguégui, ha chemoangapyhy porã jevy.

Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.

Ndohejamo’ãi ndepysyrỹi ha pe oñangarekóva nderehe ndokemo’ãi. Peikuaa porãke Israel ñangarekohára ndahopehýiri ni ndokemo’ãi.

Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia, ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.

Vy’apópe peguenohẽva’erã y pe salvacion yvúgui.

Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.

ha peñeha’ã pene rerakuã ta’iporã, peñeha’ãvo peiko hag̃ua (opavavete ndive) py’aguapýpe, ha pemba’apo pende pópe ore pombo’e haguéicha,

Nde katu, che Ruete, reiko che jerekuévo chemo’ã hag̃ua, nde reko jajaipa oĩ chendive chemoakãrapu’ã hag̃ua.

Ipy’a rory umi imba’embyasýva, Ñanderuete voi omoangapyhyva’erã ichupekuéra (Apocalípsis 21,4).

Ko esperánza kóva rupi Hesu Crísto ñandesalvava’ekue, pe esperánza ojehecháva ningo ndaha’éi esperánza. Máva piko oha’ãrõve gueteri, ohupity rire umi mba’e ha’e oipotáva. Ha ñaha’ãrõ ramo ñaína umi mba’e jahecha’ỹva, he’ise ñaha’ãrõhañaína paciéncia reheve.

Ñanderuete ohesape’a umi ohecha’ỹvape, Ha’e omopu’ã umi ho’ava’ekuépe, Ha’e ohayhu umi heko potĩvape.

Ñandejára Ñanderuete ha Ñandejára Hesu Crísto poriahuvereko ha ipy’aguapy tomyenyhẽ pende rekove. Ñanderuete rupi ñande jaiko Hesu Cristopype, Ha’érupi jahupity Ñanderuetégui: Arandu, justícia (tekojoja), teko potĩ ha salvacion, upévare ojehai avei Ñanderuete kuatiañe’ẽme: Oime ramo oñemomba’eguasuséva toñemomba’eguasu Ñanderuetepype, (Jeremías 9,23). Che agradece tapia Ñanderuetépe penderehe, Ha’e penderovasa haguére Hesu Crísto rupi.

Hesu oma’ẽ hesekuéra ha he’i: Yvyariguakuérape g̃uarã ningo ndaikatúi voi, Ñanderuetépe g̃uarã katu opaite mba’e ikatu.

Péicha he’i pende Ruete: Pema’ẽ porãke, che amyasãi py’aguapy hi’ári ysyrýicha, ha umi tetã mba’erepy ku ysyry hatãváicha ojeguerúta pene rendápe; upéramo Che añangarekóta penderehe pe sy ojapo háicha imemby okambúvare, Che pogueraháta che jyva ári ha Che pomokunu’ũta che renypy’ã ári.

Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.

Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi.

Pe jerovia añeteguáva tuicha mba’e voi umi oñemomirĩvape g̃uarã ha ovy’áva umi mba’e oguerekóva rehe; mba’eve ningo ndajaguerúi ko yvy apére, ha mba’evete ndajaguerahamo’ãi avei.

Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra.

Hetã pu’aka ituichaiterei ha ipy’aguapy ndaijapyramo’ãi, Ha’e oguapýta David guapyhaguasu ári ha Ha’e oisãmbyhýta hetãme, oguenohẽvo oimeraẽvape tape porãme ha ombojovakéta hekoitépe, upe ára upéva guive opaite ára peve g̃uarã, yvága atykuéra Jára, ojapopáta ko’ã mba’e.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre. Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo; Pene akã rague jepeve ojepapáma. Upévarupi ani pekyhyje. Peẽ, mba’eguasueteve heta guyra’ígui.

Ñanderuete ningo ipu’aka omboheta hag̃ua opaichagua temime’ẽ pende rekovépe, peẽ peguereko hag̃ua peikotevẽva guive ha peipytyvõkuaa hag̃ua pende rapichakuérape,

ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.

Ñanderuete ñanemo’ã porã ha kuarahýicha ñanderesape. Jeporiahuvereko ha terakuã porã Ñanderuete ome’ẽkuaa. Ha umi heko potĩvape Ha’e ohovasava’erã.

Ipy’a rory umi ipy’a porãva hapichakuéra ndive, oñeme’ẽva’erã ichupekuéra ko yvy kóva imba’erã ramo.