Ñemohenda
149 Umi versíkulo bíblico oñeʼẽva Pyʼaguapýre
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Ñanderuete che rerekua, Ha’e ome’ẽmba chéve aikotevẽva guive. Umi kapi’ipe kyrỹiha rupi chegueraha, umi y sakã rembe’ýpe chemombytu’u. Ha’e chemoangapyhy, Ha’e chesãmbyhy ijustícia rape rehe, héra rayhupápe.
Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.
Ha justíciagui heñóita tapia g̃uarã py’aguapy, angapyhy ha kyhyje’ỹ. Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.
Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Ejevýna, nde che ánga rejohu haguépe nde pytu’u, Ñanderuete katu ojapo ndéve g̃uarã mba’e iporãva.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.
Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.
Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.
Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.
Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.
Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.
Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.
Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.
Mba’érehepa nde che ánga nekangy, ha neangekõi chepype. Ejerovia Ñanderuete rehe, ha emomba’eguasu jevy che pytyvõhára ha che Jarateépe.
Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe).
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.
Emomba’eguasu nde, che ánga, che Ruetépe, ha ani nderesarái imba’e porãitégui. Pemomba’eguasu Ñanderuetépe, peẽ angelkuéra imba’éva guive, peẽ pendepy’aguasu mbaretéva ha pejapóva guive iñe’ẽ, peẽ peneñe’ẽrendu porã hembiapoukapy he’ívape. Pemboete Ñanderuetépe, mayma peẽ ángel atykuéra, peẽ mburuvichakuéra ha peẽ pejapóva guive hekoitépe hembipota. Pemomba’eguasu Ñanderuetépe, hembiapokue guive, opaite tenda rupi Ha’e oisãmbyhýva. Emboete, che ánga, Ñanderuetépe. Ha’e omopotĩ ne rembiapo vai, Ha’e omonguerapa ne mba’asykuéra. Ha’e oguenoh… nde rekove ñemanógui, Ha’e neñu’ã imborayhu ha iporiahuverekópe. Ha’e omyenyhẽ nde rekove mba’eporãgui ha Ha’e nemomitã jevy ku ñapykanícha.
Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme.
Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.
Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a.
Ñanderuete ñanemo’ã porã ha kuarahýicha ñanderesape. Jeporiahuvereko ha terakuã porã Ñanderuete ome’ẽkuaa. Ha umi heko potĩvape Ha’e ohovasava’erã.
Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.
Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.
reikógui chéve che pytyvõhára ramo, ha péicha nde pepo guýpe chepy’arory asýta. Che ánga oñemboja nderehe, nde po akatúa chejoko porã.
Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).
Ehendumína, Nde, ore Ruete, che mba’ejerure asy, che ñembo’e rehe ejapysakamína. Pe yvy apýra guive amba’ejerure asýta ndéve, che py’a ikangypáma. Cheguerahamína upe itaguasu ijyvatevéva ári.
Che añeno ramo, ake porã ha apáy py’aguapýpe, che Ruete oñangareko porãgui cherehe. Ndakyhyjemo’ãi 10.000 soldádogui, oñembo’y ramojepe che jerekuévo.
Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.
Che ovechakuéra ohendu katuete che ñe’ẽ ha che aikuaa porã ichupekuéra, ha ha’ekuéra oñemboja che rendápe oho hag̃ua che rapykuéri Che ahasehápe. Ha Che ame’ẽ ichupekuéra tekove tapia g̃uarãva, ha noñehundimo’ãi máramo, ha avavete ndoipe’amo’ãi ichupekuéra che pógui.
Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Ha upe kuimba’e ojoguáta ñemo’ãháme yvytu’atãme ha ama vaípe; ku ysyrýicha yvy perõme, ku itaguasu kuarahy’ãicha ára hakuetépe.
Ñanderuete, pe yvága Jára, chepytyvõtagui natĩmo’ãi, upévare che amohatã che rova ku itáicha ha aikuaa porã natĩmo’ãiha.
Eñangareko porãve nde py’apy rehe opaite ambue mba’égui, ichugui heñóigui pe tekovete.
Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra. Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.
Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua.
Nde, che Ruete, nde poriahuvereko iporãite: Upévagui yvyariguakuéra oñemo’ã nde pepo guýpe. Hyg̃uatãta hikuái umi mba’e kyrágui oĩva nde rógape, ha nde remboy’úta ichupekuéra ne mba’eporã reheve osyry peve.
Hesaráinepa peteĩ kuña imemby kambúvagui, ndoiporiahuverekovéi hag̃ua imemby hyégui osẽva’ekuépe. Ha pe sy hesarái ramojepe, Che araka’eve ndacheresaraimo’ãi ndehegui. Peikuaa porãke, che po pytépe ahai ne ra’ãnga; ha nde korapyjere yvate tapiaite oĩ che resa renondépe.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.
Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Ovy’aite ningo uvei upe yvyarigua ojeroviáva Ñanderuete rehe. Ha’ete ku yvyráicha oñeñotỹva y rembe’ýpe, hi’y omohe’õ porãva hapokuéra, upévagui noñandumo’ãi avei mba’eve ivaíva og̃uahẽ ramojepe pe ára haku térã ndokyvéi ramojepe noñemyangekõiri, ha ndopytamo’ãi hi’a’ỹrehe.
Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.
Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.
Pevy’a tapia Hesu Cristopype, ha ha’e jevy: Pevy’ákena. Pende py’aporã tojekuaauka opavavépe, Hesu Crísto jeju hi’ag̃uíma.
Pe yvytu omosarambi háicha araikuéra, péicha cheresaráita ndehegui reñemoĩ haguére cherehe ha opa háicha pe tatatĩna, péicha amboguéta ne rembiapo vaieta. Ejevýke che rendápe, Che roperdonáma.
Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.
Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,
Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.
Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.
Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
Ha umi Ñanderuete omosãsomava’ekue oupa jevýta ha vy’apópe oúta hikuái Siónpe; ha vy’a tapia g̃uarãva oĩta ipy’apýpe; tory ha vy’apópe oikóta hikuái, ha vy’a’ỹ ha pyahẽ asy oñemomombyrýta ichuguikuéra.
Oipe’a pe yvytu’atã ha hekovia omoĩ ára porã, ha omboguapy jevy pe y pochy. Ñanderuete ombyatyva’ekue Israelguakuéra opaite tetãgui, kuarahyresẽguio ha kuarahyreikéguio, yvatéguio ha yvýguio. Upéi ovy’a joa hikuái pe y oguapy jevy haguére, ha péicha Ha’e oisãmbyhy ichupekuéra og̃uahẽ meve pe barcoguasu pytaha (puérto) peve.
Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.
Ejapomína chepype Nde, che Ruete, peteĩ py’a ipotĩva, ha embopyahu chepype peteĩ pytu imbaretéva.
Pejerovia cherehe, Chénte posalvakuaa, Che voi ningo pende Ruete, ha che ykére ndaipóri ambue Jára.
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Ñanderuete, pe Jaraite Pytu Porãitéva oĩ cheári, Ha’e cheporavo; Ha’e chemondo ambohasa hag̃ua iñe’ẽ porãva umi ohasa asývape, ha ambopy’aguapy hag̃ua umi ojepy’apývape, amombe’u hag̃ua umi oñeñapytĩvape ojejorapataha, ha ojepe’apataha cárcel rokẽnguéra; Chepy’aroryetéta Ñanderuete ndive, che ánga ovy’aitéta che Jára ndive, chemonde haguére isalvacion pegua aópe ha cheñuã ijustícia rehegua ahojápe, ku omendátava peguáicha chembojeguaka hikuái, oñembojeguaka háicha kuñataĩ omendátava ijeguaka hepývape. Pe yvy omongakuaa háicha temitỹnguéra, ha pe ka’avoty omoheñói háicha imba’e ra’ỹi, péicha Ñanderuete, pe ipu’akapáva omoheñóita ijustícia ha ñemomba’eguasu opaite tetãnguéra apytépe. amyasãi hag̃ua Ñanderuete jeporiahuvereko áño og̃uahẽmaha hetãme. Ha upe áño upévape Ñanderuete omyengoviapáta opaichagua tembiapo vai ojapova’ekue hikuái umi orerehe oñemoĩmava’ekue, ha umi Jerusalengua ojepy’apy asývape ame’ẽukáta iñakã jeguakarã, tanimbu rãngue; acéite ryakuã porã, jahe’o rãngue; ahoja tory rehegua, jepy’apy rãngue; hérata tajy justícia rehegua, Ñanderuete oñotỹtava ohechauka hag̃ua heko jajaipáva.
Ha’e oñangarekóta cherehe hogaguasúpe og̃uahẽ jave pe ára ivaipáva, Ha’e cheñu’ãta hekoha ijyvatehápe.
Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.
Ñandejára Hesu Crísto ha Ñandejára Ñanderuete ñanderayhúva ha ñanemoangapyhýva tapia iporiahuvereko rupi, péva ningo pe esperánza jaguerekóva. Ha’e tomokyre’ỹ pende py’apy ha tapenemombarete opaichagua ñe’ẽ ha tembiapo porã rupi, pejéva ha pejapóva guivépe.
Upéicha Ñanderuete omo’ã umi ojejopývape, Ha’e ningo iñemo’ãha renda jepy’apy vaiha árape g̃uarã.
Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.
Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.
Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Iporãiteve peteĩ ára nde (rogaguasu) korapýpe, 1.000 ára aiko rãngue okápegui. Iporãve añembo’y ramo che Jára rogaguasu rokẽme, aiko rãngue tekove ñaña rogaguasúpe.
Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra.
Ha umi árape oĩta arandu ha py’aguapy, ha pe kyhyje oguerekóva Ñanderuetégui Sion mba’erepy.
Ñanderuete voi ningo omoheñoihína pendepype hembipota porã ha Ha’e omongakuaa hembipota pende rekovépe pejapopa peve Ha’e oipotáva guive.
Pe Pytu Porãmbáva oikuaauka ñande pytu porãme ñande ha’eha Ñanderuete ra’y ha itajyraha.
Ñanderuete kuatiañe’ẽme he’i voi: Upe ohayhúva hekove ha oikoséva py’aguapýpe tojoko ijuru mba’evaígui ha japúgui, (Salmokuéra 34,13-17). Toñemboyke mba’evaígui, ha tojapo mba’eporã, toheka py’aguapy ha toho hapykuéri.
Ñanderuete, pe py’aguapy Jára, omoingove jevymava’ekue Hesu Crístope omanóva apytégui, Hesu Crísto ningo pe ovecha rerekuaguasu ha huguytee rupi Ha’e ñanembopy’apeteĩ jevy Ñanderuete ndive, Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.
Umi cérro omongora háicha Jerusalénpe, péicha avei Ñanderuete oiko hetã jerekue rehe opaite árape.
Oĩ umi ojeroviáva icarrokuéra rehe ha ambuekuéra ikavajukuéra rehe, ore katu rojerovia ore Jára réra rehe.
Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.
Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.
Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe. Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva. Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.
Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.
Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah
Nde katu, che Ruete, che Jára oporoporiahuverekóva ha ipy’a porãva, nembegue ndepochy hag̃ua, ha nde poriahuvereko ha nde py’aporã katu ituichaite.
Pe angaipa repy ningo pe ñemano, Ñanderuete me’ẽmby rei katu pe tekove tapia g̃uarãva Ñandejára Hesu Crísto pendepype.
Upevarã ore roñembo’e tapia penderehe Ñanderuetépe, Ha’e tombosako’ive ohóvo pende rekove peiko hag̃ua hekópe, Ha’e penerenóigui. Ha ore rojerure Ñanderuetépe, Ha’e tapenemombarete peiko hag̃ua py’a porã ha jerovia pu’aka poguýpe. Oñemomimbi hag̃ua Ñandejára Hesu Crísto réra pendepype, ha peẽ ipype, Ñanderuete ha Ñandejára Hesu Crísto poriahuvereko rupi.
Anína ere nearanduha; ekyhyjéke Ñanderuetégui ha eñemboyke mba’evaígui, péva ningo pohã añeteguáva nde retépe g̃uarã, ha piro’y ne kanguekuérape g̃uarã.
Ko’ág̃a, nde Jacóbo, pende Ruete rembiapo, nde apohare he’iuka ndéve: Ani rekyhyjétei, Che roperdonáma; Che rohenói nde réra rupi, nde ningo che mba’énteva voi.
Ne mborayhu iporãve jeikovégui, che juru nemomba’eguasu manteva’erã. Che jurúpe che romboetéta, nde rérape añembo’éta ahupívo che pokuéra (yvága gotýo).
Ñande rekoharã ningo oĩ yvágape, upégui ñaha’ãrõ avei ñane salvacion Ñandejára Hesu Crísto rupi. Ha’e voi ningo omoambuéta ñande rete poriahu ojogua hag̃ua hete ojajaipávape, ha ipu’akaguasu rupi ombopoguypáta umi oñemoĩvape hese, opytapa hag̃ua ipoguýpe opaite mba’e ojejapomava’ekue guive.
Ñanderuete reko noñemoambuéi, Ha’e nopyrũi iñe’ẽ rehe araka’eve, Ha’e ningo penerenoiva’ekue peñembopy’apeteĩ hag̃ua ita’ýra, Ñandejára Hesu Crísto ndive.
Jaikovérõ, jaikove Ñanderuetépe g̃uarã; ha ñamanórõ, ñamano avei Ñanderuetépe g̃uarã. Upéicha ningo jaikovérõ térã ñamanórõ, ñande ningo Ñanderuete mba’e voi.
Mba’eporã ha nde poriahuvereko añetehápe oĩta chendive aikove aja pukukue, che aikose Ñanderuete roga guasúpe aikove aja pukukue.
Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve, ha upéicha ñaha’ãrõ jahupity hag̃ua ime’ẽmby ñane mba’erãva oñeñongatúva yvágape, ha ko Ñanderuete me’ẽmby kóva noñembyaimo’ãi araka’evénte, noñemongy’amo’ãi ni ndaipirumo’ãi. Ñanderuete ipu’aka rupi, oñangareko penderehe pejeroviaháre hese ha pehupity hag̃ua pe salvacion ojehechaukátava ára pahápe.
Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a. Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.
Ñanderuete ohayhuetégui opaite tetãyguakuérape Ha’e ome’ẽ Ita’ýra peteĩetévape, opaite ojeroviáva guive hese ani hag̃ua oñehundi, oguereko hag̃ua uvei pe tekove tapia g̃uarãva.
Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua. Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.
Ñanderuete tome’ẽ heko jajái mba’eitagui pe pu’aka penemombareteve hag̃ua pehóvo pendepype Ipytu Porãite rupi. Hesu Crísto oiko hag̃ua pende py’apýpe pende jerovia rupi, ha pene mborayhu toñembohapo mbareteha tokakuaa porãve ohóvo, ikatu hag̃ua peikuaa porãve pehóvo opaite ambue Hesu Crísto reheguáva ndive, pe mborayhu pukukue, ipekue, ijyvatekue ha ipypukukue, ha peñemomba’e porã Hesu Crísto mborayhu rehe peẽ penerenyhẽmba hag̃ua Ñanderuete mborayhu reheve.