Ñemohenda
VERSIÓN OÑEMBOYKE HA OÑEMBOKOTEVẼVA
Ñandejára nderepái, py’aguasu katu. Ha’e oguereko ipoguýpe ko’ã mba’e rehasámava. Reñembyasýramo, eñembo’e Ñandejárape ha Ha’e nemyenyhẽta vy’águi. Repyrãramo, eme’ẽ ko’ã mba’e ne Túva Yvágapeguápe ha Ha’e oñangarekóta hese. Ñandejára ombohováita nde ñembo’e hi’árapegua, upévare py’aguasu. Ñandejára he’i Iñe’ẽme reñeha’ã ha’e ha reñembarete, ha’e oĩ nendive opa rupi rehohápe. Reikóramo jepe tesape’a ñemboypýri, ani rekyhyje, Ñandejára oĩ nendive. Ejerovia ne Túva Yvágapeguáre, nderecháiramo jepe, Ha’e omba’apo nde rehehápe, ndeayhuetégui. Peñembopy’aguasu ha peñembarete opavave pejeroviáva Ñandejárare (Salmo 31:24). ¡Nda’éi nde’año! Ehede Ñandejárape tombohova’atã nde rapykuéri. Eiko Jesús py’ápe ha upépe retopáta py’aguapy, tesape ha tape nde rekovepe guarã. Ani araka’eve repyta jerovia’ỹre, heta heta jehasa’asy oguereko va’erã pe hekopetegua, ha katu opavave umívagui Ñandejára omosalváta ha opavave umívape ome’ẽta chupe iñemboty.
Peñeha’ã ha peñemombaretéke; ani pekyhyjétei, ha ani peñemondýi ichuguikuéra, Ñanderuete, Ñandejára, ohóta penendive; Ha’e ndopoimo’ãi pendehegui ha napenemotyre’ỹmo’ãi.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.
Okyhyjeiterei ningo hikuái ohechávo ichupe. Hesu katu oñe’ẽ ichupekuéra ha he’i: Tapendepy’aguapy. Chénteko, ani pekyhyjétei.
Ha ogueru hikuái ichupe peteĩ ijapáva, ñenoháme, hupápe. Hesu ohechávo ijerovia, he’i pe hete kuruchĩmbávape: Eñemokyre’ỹke che ra’y, ne angaipakuéra oñeperdonámagui.
Hesu oma’ẽ hesekuéra ha he’i: Yvyariguakuérape g̃uarã ningo ndaikatúi voi, Ñanderuetépe g̃uarã katu opaite mba’e ikatu.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Ha pe pyhare ambuépe Ñandejára Hesu Crísto ojehechauka Páblope ha he’i ichupe: Páblo, eñembopy’aguasu. Nde remyasãi porã haguéicha che réra Jerusalénpe péicha nde remyasãita avei Rómape.
Hesu katu ojere ha ohechávo ichupe he’i: Evy’áke che rajy, nde jerovia ndesalváma. Ha pe kuña okueraite opytávo imba’asýgui.
Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.
Ñanderuete ohóta ne renonderãme; Ha’e oĩta nendive, ndojeimo’ãi ndehegui ha nanemotyre’ỹmo’ãi; ani rekyhyjétei ha ani reñembopy’amirĩtei.
Peime ramo chepype, ha Che ñe’ẽ oĩ ramo pendepype, opaite mba’e pejeruréva guive oñeme’ẽta peẽme.
Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Amomba’eguasu Ñanderuetépe, cherekombo’e porã haguére; ha pyharekue jepeve che py’apyñe’ẽme cheavisa (amboete hag̃ua ichupe). Ñanderuete tapia oĩ che resa renondépe; ha Ha’e oĩgui che akatúape nda’amo’ãi.
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe. Jepémo okororõ ha omymýi vaipa hi’y ha ipochyetereígui omboryryipa umi cérro. Selah
Ñanderuete oñangareko nderehe, Ñanderuete nde kuarahy’ã nde po akatúa gotýo. Pe kuarahy nanembohasymo’ãi arakuépe; ni jasy pyharekuépe. Ñanderuete nemo’ãta opaite mba’evaígui, Ha’e oñangarekóta nde rekove rehe. Ñanderuete oñangarekóta nderehe resẽ ramo nde rógagui térã reike ramo ipype, ko’ág̃a guive ha opaite ára peve.
Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.
Ñanderuete oikuaa porã umi ojeroviáva hese, Ha’e ipy’aporã hendivekuéra; ichupekuéra g̃uarã Ha’e peteĩ táva oñemombaretéva, oiko hag̃ua ipype og̃uahẽ ramo pe jehasa asy.
Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.
Péina ápe, Che aĩ nendive, ha añangarekóta nderehe mamo rehoha rupi, ha rogueru jevýta ko yvýpe nde reho hágui, ndorohejamo’ãigui, rejapopa peve Che ha’eva’ekue guive ndéve.
Ovy’aite ningo uvei upe yvyarigua ojeroviáva Ñanderuete rehe. Ha’ete ku yvyráicha oñeñotỹva y rembe’ýpe, hi’y omohe’õ porãva hapokuéra, upévagui noñandumo’ãi avei mba’eve ivaíva og̃uahẽ ramojepe pe ára haku térã ndokyvéi ramojepe noñemyangekõiri, ha ndopytamo’ãi hi’a’ỹrehe.
Pejesaupi ha pema’ẽ porãke mbyja atykuéra rehe. Máva piko ojapopa umía, Ha’e voi omboguatapa umíape, Ha’e ohenói umíape héra rupi, ha ndaipóri peteĩnte jepe ou’ỹva Ha’e ohenói guive, peichaite tuicha ipu’aka.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Pende py’a rory pende rapicha pendeja’o ramo, pendepersegui ramo ha japúpe oñe’ẽvai ramo penderehe che réra rayhupápe. Pevy’aite ha tapendepy’a roryete, ituichágui pe jopói (regálo) peguerekóva yvágape, péicha omuñava’ekue avei hikuái umi profetakuérape, oikomava’ekue peẽ mboyve guaréva.
Umi mitã ikane’õ, umi mitãrusu ikangypa ha ho’apávape. Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Pesẽ ramo peñorãirõ penderehe ija’e’ỹva ndive, ha pehechávo ikavaju, icárro ha isoldadokuéra hetave pendehegui, ani pekyhyjétei ichuguikuéra, Ñanderuete, Ñandejára, oĩva’erã penendive, Ha’e voi peneguenohẽva’ekue avei Egípto retãgui.
Che Ruete rekohápe oĩ heta óga, upeicha’ỹ rire ha’eva’erãmo’ã peẽme, ko’ág̃a katu aháta ambosako’i hag̃ua pene rogarã. Upe ára upévape peẽ peikuaa porãta Che aĩha che Ruetepype, ha peẽ peĩha (peimeha) chepype ha Che aĩha pendepype. Upe oikuaáva che rembipota ha ojapóva avei, upéva ningo cherayhu añetehápe, ha upe cherayhúva, Ñanderuete ohayhuva’erã avei ichupe. Ha Che ahayhúvape ahechaukáta avei che mborayhu. Upérõ Júdas he’i Hesúpe, ndaha’éi pe Iscarióte: Ore Jára, mba’érehe piko rejekuaaukáta orévente ha ambue yvyariguakuérape nahániri. Ha Hesu ombohovái ichupe ha he’i: Upe cherayhúva katuete ojapo avei che rembipota, ha che Ruete ohayhuva’erã avei ichupe, ha rojuva’erã hendápe rombosako’i hag̃ua ore rekoha ipype. Upe cherayhu’ỹva katu ndojapói che rembipota. Ha pe ñe’ẽ peẽ pehendúva guive che jurúgui, ndaha’éi che ñe’ẽ pe chembouva’ekue ñe’ẽ uvei. Ko’ã mba’e ko’ãva ha’epáma peẽme aĩ aja gueteri penendive ko yvy ári. Pe Pytyvõhára, pe Pytu Porãmbáva, Ñanderuete omboútava pene rendápe che rérape, Ha’e penembo’éta opaite mba’e, ha penemomandu’áta opaite umi mba’e Che ha’emava’ekue peẽme. Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei. Pehendu ningo Che ha’éma hague peẽme: Aháta, aju jevy hag̃ua avei pene rendápe. Peẽ cherayhúrõ ningo pevy’aitéta ha’e haguére ahataha che Ruete rendápe, pe Túva ningo mba’eguasuve chehegui. Che amombe’u ko mba’e kóva peẽme ojehu mboyve, peguerovia hag̃ua ojehu ramog̃uarã umi mba’e ha’éva peẽme. Ha Che aha rire ha ambosako’ipa rire avei, aju jevýta pene rendápe pogueraha hag̃ua chendive, peẽ peiko hag̃ua avei che aikohápe.
Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.
Ha Ñanderuete he’i Josuépe: Ani rekyhyjétei ichuguikuéra, Che amoĩma ichupekuéra nde pópe, ha’ekuéra ndaipu’akamo’ãi nderehe.
Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).
Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.
Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Upévare ningo ndaorepy’akangýi, omano ramojepe ohóvo ore kuimba’e oka peguáva, ore kuimba’e pypeguáva katu oñembopyahuve ohóvo ko’ẽ ko’ẽ rehe. Umi mba’e ore rohasavaroína ivevúi, rohasa asy ramojepe, roikuaágui uperire roguerekotaha hetave teko mimbipa ha vy’a añeteguáva. Ore noroma’ẽi umi mba’e ojehecháva rehe, umi ojehecha’ỹva rehe uvei; umi mba’e ojehecháva ndahi’aréi, umi mba’e ojehecha’ỹva katu oikotahína tapia g̃uarã.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia, ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza, ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Pevy’ákena che hermanokuéra, pehasa ramo opaichagua jepy’ara’ã rupi, Pe kuimba’e ipochýva ndojapói mba’e iporãva Ñanderuete renondépe. Upévare pepoi opaite mba’e ky’a ha ivaívagui, peñemomirĩ ha peñemomba’e Ñanderuete ñe’ẽre osalvátava pene angakuérape. Pejapo katu Ñanderuete ñe’ẽ, anítei pehendúnte; ani hag̃ua peẽ voi peñembotavy pendejupe. Upe ohendúnteva Ñanderuete ñe’ẽ ha ndojapóiva, ha’ete ku oma’ẽva hovatee rehe, peteĩ espéjope. Ha’e oma’ẽ ramojepe ijehe, oho rire, pya’e hesarái mba’eichaitépa ra’e hova. Upe oma’ẽ porãva pe tembiapoukapy hekoite peguáva ñanemosãsóvare ha oñeha’ãmbaite ojapo hag̃ua ko tembiapoukapy kóva he’i háicha, upéva ndaha’éi peteĩ ohendúnteva ha uperire hesarái jevýva; upéva ningo peteĩ ovy’aitéva hembiapo porã rupi. Oimérõ peteĩ he’íva ijehe ha’e ojerovia porãha Ñanderuete rehe ha ndojokói ijuru, ha’e oñembotavy ijupe voi ha icúlto (ijerovia) výro rei. Pe ñemomba’eguasu (cúlto) ipotĩva, Ñandejára Ñanderuete ohayhúva ningo kóva: Ñaipytyvõ umi ityre’ỹvape ha imenave’ỹvape hemikotevẽme, ha ñañemboyke opaichagua teko vaígui. ko’ãva omoañete ha oha’ã (oaprova) pende jerovia, ha pe jerovia añeteguáva hi’a paciéncia. Pe paciéncia katu okakuaaveva’erã ohóvo, upévare pepyta kirirĩháme pe jepy’ara’ã poguýpe Ñanderuete penemoambue porãvégui ohóvo Hesu Crísto rekópe, ani hag̃ua peẽ pe’a angaipápe ha anítei ofalta mba’eve pende jeroviápe.