VERSIÓN OÑEʼẼVA ÑEʼẼTEKUAA

Ñandejárare rejerovia ramo, umi mba’e ijetu’uetereva ñande rekovépe ojehupíramo jepe, ikatu reñemombarete. Jaikóramo guare ko yvy ape ári, heta mba’e py’ỹi ha jehasa’asy jahasa va’erã. Oĩ umi ndahasýiva ha oĩ avei umi ñandepy’ajopýva. Heta tapicha noñemomba’éi Ñandejárare ojerovia haguã, oimo’ãgui hembiapokuéra naiporãiha. “Angaipa ñanemomombyry Ñandejára mborayhúgui” ha katu ñapensáramo ijykére iporãvéva: “Ñandejára mborayhu ñanemomombyry angaipágui”. Upévare, ejerovia ha eñemboja Chupe.

Ikatu ñapensa Jesús rehe jerovia ñamoĩ rire, opa mba’e oĩ porãmaha. Ha añetehápe, peteĩ hendápe, upéicha. Ñane mba’e iñimportantevéva oĩma porã: ñande rekove opave’ỹva. ¡Jaikuaáma Jesús ndive jaikotaha opa árape guarã! Ha katu, ko’áğa gueteri jaiko ko yvy ape ári ha heta mba’e ijetu’u jahasáta gueteri. Ñandejára ndive ñaime jave ha ñe’ẽ jave Chupe ára ha ára, py’aguapy ha pytu’u jahupyty ñane ángape. Eñemboja Chupe ha eme’ẽ Chupe opa nde remikotevẽ.

Ñandejárare jerovia ndaha’éi ja’e’ỹha jahasataha mba’e py’ỹi térã mba’e ijetu’uetereva. Ha katu, ñanepytyvõ ñambohovái haguã kyhyje’ỹme ha jeroviápe. Ojeroviáva Ñandejárare oikuaa Ha’e ndohejamo’ãiha chupe ha nombohasamo’ãiha mba’e ogueropu’akavétavagui. Ejerovia Ñandejárare ha eñemopy’aguapy. Ko’ápe retopáta heta Ñandejára Ñe’ẽ nepytyvõtava rejeroviave haguã Chupe.

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

Ñanderuete oñorãirõta ñanderehehápe ha peẽ peiméta py’aguapýpe.

Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.

Iporãite ñaha’ãrõ kirirĩháme Ñanderuete ñepytyvõ rehe.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

Ñanderuete katu oĩ hogaguasúpe. Tokirirĩke henondépe opavave oikóva guive ko yvy apére.

Ñanderuete ndivénte che ánga opytu’ukuaa, ichuguínte ou chéve ñepytyvõ.

Opaite tetãyguakuéra tokirirĩ Ñanderuete renondépe, Ha’e opu’ãmagui osẽ hag̃ua hekoha porãitégui.

Ha justíciagui heñóita tapia g̃uarã py’aguapy, angapyhy ha kyhyje’ỹ. Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.

Peẽ pendepochy ramo, ani peñemohembiapo vai, pejepy’amongeta porã peime jave pende rupápe ha pekirirĩ. Selah

Añetehápe aiko hekoitépe ha amokirirĩ che ánga, ku mitã oñemombo’ómavaicha ha ojejokóva isy pyti’áre, peichaite che ánga ipy’aguapy chepype.

Ha nde reñembo’e ramo, eike nde kotýpe, emboty ne rokẽ, ha eñembo’e nde Ruetépe ne añoháme, ha nde Ruete ohechapáva, pe ñemiháme jepe rejapóva, omyengoviáta ndéve.

Ha pe yvyryrýi rapykuéri katu ou tata; Ñanderuete katu noĩri tata rendy mbytépe ha pe tata rapykuéri ou peteĩ yvytu kangymíva.

Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe).

Upe oikóva pe Jára Ijyvatetéva ãme ha pe Ipu’akapáva poguýpe,

Pembojegua uvei pende py’apy mba’e oñembyai’ỹva ha ojehecha’ỹva reheve, péva ningo Pytu Porãmbáva rembiapo, Ha’e omomirĩva ha ombopy’aguapýva tetãyguakuérape, ha koichagua teko ombohory Ñanderuetépe.

Cherendúke kirirĩháme, peẽ tetãnguéra yguasu pegua tapenemombaretéke; peñemboja che rendápe ñañemongeta ha ñañombojovake hag̃ua.

Umi kapi’ipe kyrỹiha rupi chegueraha, umi y sakã rembe’ýpe chemombytu’u.

Oipe’a pe yvytu’atã ha hekovia omoĩ ára porã, ha omboguapy jevy pe y pochy.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã.

Rehechaukáta chéve pe tekove rape, nde ypýpe oĩ vy’a añetetéva, ha péva ndopamo’ãi araka’eve.

Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua.

Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Ekirirĩetéke pende jara pu’akapáva renondépe, hi’ag̃uietéma pende Ruete ára, pende Ruete voi ombosako’íma pe kuave’ẽmby, ha omopotĩma umi ohenóivape ikaruguasuhápe.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

ha peñeha’ã pene rerakuã ta’iporã, peñeha’ãvo peiko hag̃ua (opavavete ndive) py’aguapýpe, ha pemba’apo pende pópe ore pombo’e haguéicha,

opaite tetã ruvicha ha mburuvichakuéra rehe, jaiko hag̃ua py’aguapýpe ha ñorãirõ’ỹre, ñamomba’eguasu hag̃ua Ñanderuetépe ñande reko porã rupi ha jeroviapópe.

Oiko py’aguapýpe ha opytu’u porãva’erã hupápe mayma ojeroviáva Ñanderuete rehe.

Ejevýna, nde che ánga rejohu haguépe nde pytu’u, Ñanderuete katu ojapo ndéve g̃uarã mba’e iporãva.

Peteĩ ivýrova okirirĩ rire, ojeguerekova’erãmo’ã ichupe iñarandúva ramo; ha upe ojejuru mbotýva ojeguereko iñakãguapýva ramo.

Oñemondoro hag̃ua hi’ára, oñembovyvy hag̃ua hi’ára jevy; oñekirirĩ hag̃ua hi’ára, ha oñeñe’ẽ hag̃ua hi’ára avei.

Pe ñe’ẽ mbohovái porã ombogue pe pochy; pe ñe’ẽ pohýiva katu ohatapyña pe pochy rendy.

Opaite pende jepy’apykuéra peity hi’ári, Ha’e ningo oñangarekohína penderehe.

Umi hese oma’ẽva’ekue ojehesape’a, ha hovakuéra noñemotĩmo’ãi.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Peẽ chembo’e porã ramo, akirirĩta, pehechauka chéve moõitépa añemoangaipára’e.

Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

Upe ombohováiva, ojapysaka porã mboyve, ningo tapicha výro ha katuete oñemotĩva’erã.

Ha ani rembopya’e nde juru ome’ẽ hag̃ua peteĩ promésa Ñanderuete renondépe, nde reimégui yvy apére, Ha’e katu oĩ yvágape, upévare reñe’ẽ mboyve epensa porã ovale hag̃uáicha.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Nde cherenói ramo Che ambohováita ndéve ha rombo’éta mba’e ndetuichapa jepévare, iñemimby ha reikuaa’ỹvare.

Opaite árape agueropurahéita Ñanderuete poriahuvereko, tapia amombe’uva’erã che juru rupi umi mba’e Nde eremava’ekue, katuete Nde rejapopáta avei.

Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10).

Ñanderuete ñanemo’ã ha ñanemombaretéta jajejopy vai jave,

Che ajerovia ne ñe’ẽ rehe, Nde chemo’ã ha reñangareko porã haguére cherehe.

upe oñe’ẽitereíva katuete oñemohembiapo vai, ha upe ojokokuaáva ijuru katu iñarandu;

Che rupápe chemandu’a nderehe ha pyharekuépe ake’ỹ jave añamindu’u ne ñe’ẽre,

Pe heko potĩva py’apy opensa porã oporombohovái mboyve, ha umi iñaña rekóva juru katu omyasãi iñe’ẽ reínte.

Peheka pende Ruetépe, ikatu aja ojejohu ichupe, pehenói ichupe hi’ag̃ui rehe gueteri pendehegui.

Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

Peha’ãrõ ha pehechava’erã umi mba’e tuichaitéva Ñanderuete ojapótava pende resa renondépe.

Ñanderuete, yvága Jára, ome’ẽ chéve peteĩ juru amokyre’ỹkuaa hag̃uáicha ikane’õvape; Ha’e chemombáy meme pyhareve ha oñe’ẽ che apysápe ahendukuaa hag̃uáicha hemimbo’eteéva.

Temiendy ningo ne ñe’ẽ che pykuérape g̃uarã, ha mba’e ohesapéva che rape.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Nde, Israel, ejerovia Ñanderuete rehe, ko’ág̃a ha opaite árape g̃uarã.

Ñemano ha tekove oĩhína pe kũ pu’aka poguýpe, ha upe ojejokóva, ho’uva’erã hi’akuégui.

Peñeha’ã ha pehecháta Ñanderuete ipy’a porãha, ovy’aite upe kuimba’e ojeroviáva hese.

Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.

Ha nahániri ramo nde cherendu chéve, ekirirĩetéke ha che rombo’éta pe añetegua nearandu hag̃ua.

Pe ojokokuaáva ijuru oñangareko porã hi’ánga rehe; ha umi oñe’ẽ rei reívape katu ojehuva’erã mba’evaiete.

Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.

Romomba’eguasúta opaite árape heko potĩva apytépe rejapo porãmba haguére, ha ndehegui aha’ãrõta opaite mba’e Nde ndepy’a porãgui.

Upéichamante jaikuaa ñande jaikoha ita’ýra térã itajýra añeteguáva ramo ha upéichamante Ha’e ombopy’aguapýta ñande py’apyñe’ẽ (conciéncia). Che rayhuparakuéra, ko’ág̃a jaikóma ita’ýra ha itajýra ramo, ndojehechaukáigui gueteri upe oikótava ñandehegui. Jaikuaa ningo upe ára Ha’e ojehechaukatahápe ñandéve, ñande jajoguataha ichupe, ha jahecháta Ha’e oĩ haichaite. Ñande py’apyñe’ẽ ñanemoĩ vaisérõ Ñanderuete renondépe, imborayhu ituichave ñande py’apyñe’ẽgui, Ha’e oikuaapágui voi ñande py’apýpe oĩva guive.

Pe oñangarekóva ijuru ha ikũ rehe, hi’ánga ndo’amo’ãi jepy’apýpe.

Peteĩ mba’e ajerure Ñanderuetépe, ha upéva ahekáta: Taiko Ñanderuete rogaguasúpe aikove aja pukukue ajepy’amongeta hag̃ua Ñanderuete rehe ha romomba’eguasu joáta ichupe.

Iporãiteve peteĩ ára nde (rogaguasu) korapýpe, 1.000 ára aiko rãngue okápegui. Iporãve añembo’y ramo che Jára rogaguasu rokẽme, aiko rãngue tekove ñaña rogaguasúpe.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Yvagakuéra pepurahéike Ñanderuetépe ha’e voígui pende apohareteetéva; yvy rugua esapukái vy’apópe; cerrokuéra, ka’aguy ha oimeraẽ yvyra oĩva guive ipype pepurahéi torypápe Ñanderuete oipytyvõ jevýtagui Jacóbope, ha Israel retãme oñemomba’eguasu jevýta ichupe.

Pekaru ramo térã pey’u ramo, térã pejapo ramo ambue mba’e, pejapopa pemomba’eguasu hag̃ua Ñanderuetépe.

Ha upéi he’i ojupe hikuái: Ndajajapo porãi ningo. Ko ára ningo mba’eporã ñamombe’u hag̃ua, ha ñande jaguerokirirĩ; ñaha’ãrõve ramo ko’ẽmba peve, ñande reko vai ñanderupitýne. Jaha katu ko’ág̃a voi jaike Samáriape ha ñamombe’u ko marandu iporãva tetã ruvicha rógape.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

Pe ñe’ẽ osẽva iñarandúva jurúgui oporombovy’a, ha umi ivýrova ñe’ẽ katu ogueru ijupe g̃uarã mba’evai. Ojejuru pe’a guive he’i mba’e výro rei, ha oñe’ẽmbotávo he’i ñe’ẽ ivýro reíva jevy. Pe ivýrova omboheta hetave iñe’ẽ, jepevémo avave ndoikuaái pe ojehutavahína; ha avave ndoikuaaukamo’ãi ichupe umi mba’e ojehútava henonderãme.

Peteĩ ñe’ẽ hekoitépe oje’éva, hi’oraitépe, ojogua manzána oroguiguávape, oñeme’ẽva peteĩ ña’ẽmbe óro morotĩme.

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Opaite mba’e, opapotaite upévare peñeñangarekóke peñembo’e hag̃ua hekoitépe.

Peñe’ẽ py’aporã reheve pende rapicha ndive pemopu’ã hag̃uáicha ichupe, peikuaa porã hag̃ua mba’eichaitépa pembohovaiva’erã peteĩteĩme.

Kirirĩháme cheñe’ẽngúra’e, nda’éi mba’eve añeha’ãmba ajejoko hag̃ua, ha añeñandu vai.

Mba’eveichagua ñe’ẽ tie’ỹ ani osẽ pende jurúgui, pejénte ñe’ẽ porã omopu’ãva’erãichagua nde rapichápe ijehasa asýpe ha ombopy’aguapy hag̃ua nerendúvape.

Upévare, che hermanokuéra ahayhúva, opavave ta’ipya’e ohendu hag̃ua, ta’imbegue katu oñe’ẽ hag̃ua, ha ta’imbegueve ipochy hag̃ua.

Pe ivýrova ojorapaite ipochy, ha pe iñarandúva katu oñeha’ã ombopy’aguapy hag̃ua ichupe.

Hesu Crísto rembiguái natekotevẽi oñorãirõ, ipy’a porãva’erã uvei opavave ndive, ikatupyryva’erã oporombo’e hag̃ua ha ipacienciakuaava’erã avei.

upéicharõ ojokova’erã ijuru, ani hag̃ua osẽ mba’evai térã japu ijurúgui.

umi iñarandúva imbegue ombohasa hag̃ua iñarandu; umi ivýrova katu ndojokói ijuru, pya’e ombohasa ivýro reko;

Pe iñarandúva ñe’ẽ oñehenduseve py’aguapypópe, ovaleve pe tetã ruvicha sapukáigui ivýrova apytépe.

Ipy’a rory umi ipy’a porãva hapichakuéra ndive, oñeme’ẽva’erã ichupekuéra ko yvy kóva imba’erã ramo.

Upe tapicha imbeguéva ipochy hag̃ua ohechauka iñaranduetereiha; ha upe ipya’éva ipochy hag̃ua ohechauka ivýro reko.

upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe. Jepémo okororõ ha omymýi vaipa hi’y ha ipochyetereígui omboryryipa umi cérro. Selah

Ha justíciagui heñóita tapia g̃uarã py’aguapy, angapyhy ha kyhyje’ỹ.

Ñanderuete kuatiañe’ẽme he’i voi: Upe ohayhúva hekove ha oikoséva py’aguapýpe tojoko ijuru mba’evaígui ha japúgui, (Salmokuéra 34,13-17).

Ahayhuete ningo ne rembiapoukapykuéra, umívare ajepy’amongetáva ára pukukue.

Ha’e omombarete ikane’õvape ha omokyre’ỹ avei ikangypávape. Ha oĩ peteĩ oñe’ẽ hatãva desiértope ha he’i peẽme: Pembosako’i peteĩ tape Ñanderuetépe g̃uarã ha pembojojáke pe tape Ñanderuetépe g̃uarã desiértope. Umi mitã ikane’õ, umi mitãrusu ikangypa ha ho’apávape. Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Nde, che Ruete, emoĩ peteĩ oñangarekóva che juru rehe ha che rembe rokẽ rehe.

Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.

Eñeha’ãmba reiko hag̃ua hekópe Ñanderuete renondépe, hembijokuái porãvaicha natekotevẽi reguerotĩ, emyasãi hekópe uvei Ñanderuete ñe’ẽporãite (evangélio).

Ñamombe’úrõ ñane rembiapo vaikue Ñanderuetépe, Ha’e ipy’aporã ha heko porãgui operdona ñane rembiapo vaikue ha ñanemopotĩ opaichagua mba’e heko pegua’ỹvagui.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme.

Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.

Rehecha ramo peteĩ tapicha oñe’ẽ hetaitereíva opensa porã’ỹre, naipohãmo’ãi, ipohãve katu peteĩ ivýrovape g̃uarã.

Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

Pyharevépe tañandu ne mborayhu, nderehe ajeroviágui, ehechaukamína chéve che raperã aguata porã hag̃ua, che ánga nderehénte ojerovia.

Peñeñangarekóke ha peñembo’e ani hag̃ua pe’a jepy’ara’ãme. Pe pytu porã ningo ikyre’ỹ, pe to’o (ánga) katu ikangyete.

Eñangarekomína cherehe ku nde resa ra’ỹicha, cheñomi nde pepo guýpe,

Oñembyatyhápe mokõi térã mbohapy che rérape, ijapytepekuéra aĩta Che avei.

Ovy’aite umi oñongatúva iñe’ẽ ipy’apýpe ojapo hag̃ua hekoitépe umía, ha ipy’aite guive ohekáva hembipota iporãva (añeteguáva);

Pe ojokóva ijuru iñarandu, ha pe ipy’aguapýva ohechauka iñakãguapy iporãha.

Mávapa iñarandu ha iñakãguapy pende apytépe tohechauka heko porã rupi ha’e iñaranduha ha oguata porãha Ñanderuete rape rehe.

Ñanderuete tapia oĩ che resa renondépe; ha Ha’e oĩgui che akatúape nda’amo’ãi.

Pe Pytu Porãmbáva ñanemokyre’ỹ ha ñanepytyvõ ñamboyke hag̃ua ñande py’apy kangy ha ñanepytyvõ ñañembo’e hag̃ua hekoitépe Ñanderuetépe, Ha’e oipota háicha ha ovale hag̃uáicha ichupe g̃uarã upévare pe Pytu Porãmbáva ojerure ñanderehe pyahẽ oje’e’ỹkuaáva reheve.

Ojehayhuhína ipy’a potĩvape, iñe’ẽ juky rupi oikóta tetã ruvicha angirũ (amígo) ramo.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Pe arandu oúva Ñanderuetégui katu omboheko potĩ ha upéi ome’ẽ py’aguapy ha py’aporã, iñe’ẽrendu, oporoporiahuverekokuaa, hi’a yva Pytu Porãmba reheguáva (Galaciayguakuérape 5,22), avavépe nombojuavýi, ndahova mokõiri. Ha umi oñeha’ãva ojeiko porã hag̃ua, toñotỹ py’aguapy omono’õ hag̃ua justícia (heko peguáva).

upévare ñañeha’ãmba ñañomokyre’ỹ ha jajohayhu hag̃ua, jajapove jahávo tembiapo porã. Ani hag̃ua japoi ñande iglésiagui, oĩ háicha umi ojapóva, ñañomokyre’ỹ uvei, pehechámagui oñemoag̃uiha ohóvo pe ára Hesu Crísto ou jevy hag̃ua.

Peñomokyre’ỹke Salmokuéra rupi, puraheikuéra omomba’eguasúva Ñanderuetépe ha puraheikuéra omopu’ãkuaáva ñande rekove pytu porã reheguáva, pepurahéi ha pembopu Ñanderuetépe g̃uarã pende py’apýpe. Ha peiko mborayhúpe, Hesu Crísto ñanderayhu haguéicha ha upévare Ha’e oñeme’ẽma ñane rendaguépe peteĩ me’ẽmby ha kuave’ẽmby ramo hyakuã porãva Ñanderuetépe g̃uarã. Ha peagradece opaite árape Ñandejára Hesu Crísto ha Ñandejára Ñanderuetépe opaite mba’e rehe.

ovy’aite pe kuimba’e cherendúva, ha oha’arõva che rokẽme ko’ẽ ko’ẽ rehe, ha oñangarekóvo che rokẽ horcon rehe,

Hesu katu oho desiértope oñembo’e hag̃ua.

Pejerovia cherehe, Chénte posalvakuaa, Che voi ningo pende Ruete, ha che ykére ndaipóri ambue Jára.

Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.

Hesu katu he’i ichupe: Márta, Márta, nde rejepy’apy heta mba’e rehe ha reñemoangekõiete; peteĩ mba’énte oñekotevẽva, ha péva María oiporavóma, ndojepe’amo’ãi ichugui.

Ha ohopa rire hetãyguakuéra Hesu ojupi peteĩ cérrope oñembo’e hag̃ua ha’eñoháme.

Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.

Upévare che hermanokuéra, che ajerure asy peẽme, Ñanderuete poriahuvereko rehe, peme’ẽmba pende rekove Ñanderuetépe g̃uarã peteĩ kuave’ẽmby oikovévaicha, ipotĩva ha ombohorýva ichupe, kóva ningo pe cúlto añeteguáva ñame’ẽkuaáva Ñanderuetépe.

Che py’aite guive roheka pyharekuépe, ha che pytu porã chepype oĩva oikose nendive, upévare apu’ã ko’ẽ mboyve aiko hag̃ua nendive; yvyariguakuéra ohendúva guive ne rembiapoukapy oikuaa voi mba’éichapa oiko porã hag̃ua oñondive.

Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.

Ha upe cherendúva katu, oikova’erã kyhyje’ỹme ha oikoveva’erã py’aguapýpe okyhyje’ỹre mba’evégui.

Ajepy’amongeta ne rembiapoukapy rehe, ama’ẽ porãta nde rape rehe.

Ha oime ramo pende apytépe peteĩ iñarandu’ỹva, tojerure Ñanderuetépe, Ha’e katuete ome’ẽta arandu oimeraẽ ojerurévape, ha nombotovemo’ãi.

Ñanderuete rupi ñande jaiko Hesu Cristopype, Ha’érupi jahupity Ñanderuetégui: Arandu, justícia (tekojoja), teko potĩ ha salvacion,

che ahayhu umi cherayhúvape, ha umi cherekáva chejohúta avei katuete,

Ha pejapo opaite mba’e che pohekombo’eva’ekue ha pehenduva’ekue chehegui, ha pejapo opaite mba’e pehechava’ekue che ajapova’aína. Ha pe py’aguapy Jára (Hesu Crísto) oĩhína katuete penendive.

Nde, ore Ruete, ne pensamientokuéra ningo tuichaiterei mba’e chéve g̃uarã. Ndaikatúi ñambyatypa jaipota ramojepe.

Upévare ani peiko ha’ekuéraicha; pende Ruete ningo oikuaapa voi pene remikotevẽ, peẽ pejerure mboyve ichupe.

Peime ramo chepype, ha Che ñe’ẽ oĩ ramo pendepype, opaite mba’e pejeruréva guive oñeme’ẽta peẽme.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Nde, che Ruete, eikuaaukána chéve nde rape aguata hag̃ua ne ñe’ẽ añetegua he’i háicha, emopeteĩ che py’apýpe akyhyje hag̃ua ndehegui.

Ñanderuete tome’ẽ heko jajái mba’eitagui pe pu’aka penemombareteve hag̃ua pehóvo pendepype Ipytu Porãite rupi. Hesu Crísto oiko hag̃ua pende py’apýpe pende jerovia rupi, ha pene mborayhu toñembohapo mbareteha tokakuaa porãve ohóvo,

Ejerovia katu Ñanderuete rehe, ha ejapo mba’eporã, epyta ne retãme ha eñeha’ãmba reiko porã hag̃ua. Heko potĩva juru oñe’ẽ arandu reheve, ha ikũ oñe’ẽ heko peguáva. Ñanderuete ñe’ẽ oĩ ipy’apýpe, upévare ndaipysyrymo’ãi araka’eve. Pe iñañáva omangea heko potĩvare, ha oñeha’ãmba ojuka hag̃ua ichupe. Ñanderuete ndohejamo’ãi ha’e ho’a, ni oñecondena hag̃ua ichupe mbojovakehára renondépe. Eha’ãrõke Ñanderuetépe, ha eiko hape rehe, Ha’e nemopu’ãta ome’ẽ hag̃ua ndéve ko yvy ne mba’erã ramo, nde katu rehecháta umi iñañáva oñehundiveha ohóvo. Che ahecha peteĩ iñañávape oñembotuichaitereíva, ha’e oñemyasãi ku yvyraguasúicha, uperire katu ahasa jevy upérupi, ha péina ápe noĩvéima, aheka ichupe ha ndajohuvéi ichupe. Ejesarekomína heko potĩva rehe, ha ema’ẽmi heko jojáva rehe, ipahaitépe oĩ py’aguapy añeteguáva kuimba’e heko potĩva ndive. Opaite iñañáva katuete oñehundíta, iñañáva ñemoñare opa reíta avei. Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave. Evy’aite Ñanderuete ndive, Ha’e tome’ẽ ndéve nde py’apy ojeruréva.

Mitã kambúicha peheka kamby oñembojehe’a’ỹva, kóva ningo Ñanderuete ñe’ẽ oñembojehe’a’ỹva, ha Pytu Porãmbáva pu’aka rupi pende jerovia okakuaa porãve hag̃ua pejesalva peve.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Pe jerovia onace pe evangéliogui, ha pe evangélio ou Hesu Crísto ñe’ẽgui, (Isaías 53).

Ñembo’e Ñandejárape