149 Umi versíkulo bíblico oñeʼẽva Pyʼaguapy ñane korasõme

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.

Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.

Py’aguapypópe añeno ha upeichaite ake avei, che Ruete, Nde rupínte aiko porãkuaa.

Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Opaite pende jepy’apykuéra peity hi’ári, Ha’e ningo oñangarekohína penderehe.

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

Upe ohekáva mba’evai oñembotavyse voi; ha upe ohekáva mba’eporã, oporombovy’a.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Ha aporombopurahéita: Py’aguapy, py’aguapy ame’ẽse umi mombyry ha ag̃ui oikóvape, he’i pende Ruete; ha amonguera jevýta che retãme.

Ejesarekomína heko potĩva rehe, ha ema’ẽmi heko jojáva rehe, ipahaitépe oĩ py’aguapy añeteguáva kuimba’e heko potĩva ndive.

Ha justíciagui heñóita tapia g̃uarã py’aguapy, angapyhy ha kyhyje’ỹ.

Ipahápe, che hermanokuéra, che ha’ese peẽme: Pevy’aite, peheja ambuekuéra tapenemboheko ha tapenepytyvõ peiko porã jevy hag̃ua Ñanderuete renondépe, upévare peñembopy’apeteĩ jevy ha peiko py’aguapýpe oñondivepa, ha Ñanderuete, pe mborayhu ha py’aguapy Jára, penemoirũta.

Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.

Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.

Peñeha’ãmbáke, ijáva guive peẽme, peiko hag̃ua py’aguapýpe opavave ndive.

Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.

Ñanderuete ndaha’éi peteĩ apañuãi Jára, peteĩ py’aguapy Jára uvei.

Umi kapi’ipe kyrỹiha rupi chegueraha, umi y sakã rembe’ýpe chemombytu’u. Ha’e chemoangapyhy, Ha’e chesãmbyhy ijustícia rape rehe, héra rayhupápe.

Hesu he’i jevy ichupekuéra: Tapendepy’aguapy, Che Ruete chembou haguéicha, Che pomondo avei.

Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.

Che ajerovia ne ñe’ẽ rehe, Nde chemo’ã ha reñangareko porã haguére cherehe.

Iporãite umi ñe’ẽ rerahahára omyasãi ko ñe’ẽ kóva: Py’aguapy, salvacion; ha he’i Siónpe: Nde Jára oikóma mburuvicha guasuete ramo ko yvy apére.

Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.

Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

Ñanderuete voi ningo omoheñoihína pendepype hembipota porã ha Ha’e omongakuaa hembipota pende rekovépe pejapopa peve Ha’e oipotáva guive.

Ore Ruete, Nde orembopy’aguapy, nderupínte ore rembiapokuéra osẽ porãmba.

Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

Nde rejapysaka porã rire che rembiapoukapy rehe, nde py’aguapy okakuaava’erãmo’ã ysyryguasúicha, ha nde justícia (tekojoja) ojehupiva’erãmo’ã y pu’ã yguasu peguáicha,

Cheporiahuverekomína ko’ág̃a tachemoangapyhy, Nde ere hagueichaite ne rembiguáipe.

Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.

Toñemomba’eguasu Ñanderuetépe! Che aikuaa porã ahechataha Ñanderuete poriahuvereko umi oikovéva retãme. Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Ñandejára Ñanderuete ha Ñandejára Hesu Crísto poriahuvereko ha ipy’aguapy tomyenyhẽ pende rekove.

ha peñeha’ã pende py’aite guive peñemopeteĩ hag̃ua Pytu Porãmbavapype ha py’aguapy añeteguáva rupi.

Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure.

Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

Upéichamante jaikuaa ñande jaikoha ita’ýra térã itajýra añeteguáva ramo ha upéichamante Ha’e ombopy’aguapýta ñande py’apyñe’ẽ (conciéncia). Che rayhuparakuéra, ko’ág̃a jaikóma ita’ýra ha itajýra ramo, ndojehechaukáigui gueteri upe oikótava ñandehegui. Jaikuaa ningo upe ára Ha’e ojehechaukatahápe ñandéve, ñande jajoguataha ichupe, ha jahecháta Ha’e oĩ haichaite. Ñande py’apyñe’ẽ ñanemoĩ vaisérõ Ñanderuete renondépe, imborayhu ituichave ñande py’apyñe’ẽgui, Ha’e oikuaapágui voi ñande py’apýpe oĩva guive.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Og̃uahẽ ramo pe ára che akyhyjeha, nderehe katu ajerovia.

Pemonde pende py rehegua, kóva he’ise pemombe’uva’erãha Ñanderuete ñe’ẽ porãite (evangélio),

Ha mba’éicha piko ikatúta ojekuaauka Hesu Crístope ichupekuéra, noñemondói ramo avavépe hendapekuéra. Ojehaíma Ñanderuete kuatiañe’ẽme: Iporãite ningo umi py omyasãiva mba’e iporãva, (Isaías 52,7).

Hesu Crísto rupínte oĩ perdon opaite tetãyguakuérape g̃uarã, Ha’e oguerúgui pe py’aguapy yvága pegua huguy rupínte, oñeñohẽva’ekue ikurusúre.

Ohesape hag̃ua umi oguapýva pytũháme ha umi oikóva ñemano rokẽme ojereraha hag̃ua py’aguapy rape rupi.

Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).

Emomba’eguasu nde, che ánga, che Ruetépe, ha ani nderesarái imba’e porãitégui. Pemomba’eguasu Ñanderuetépe, peẽ angelkuéra imba’éva guive, peẽ pendepy’aguasu mbaretéva ha pejapóva guive iñe’ẽ, peẽ peneñe’ẽrendu porã hembiapoukapy he’ívape. Pemboete Ñanderuetépe, mayma peẽ ángel atykuéra, peẽ mburuvichakuéra ha peẽ pejapóva guive hekoitépe hembipota. Pemomba’eguasu Ñanderuetépe, hembiapokue guive, opaite tenda rupi Ha’e oisãmbyhýva. Emboete, che ánga, Ñanderuetépe. Ha’e omopotĩ ne rembiapo vai, Ha’e omonguerapa ne mba’asykuéra. Ha’e oguenoh… nde rekove ñemanógui, Ha’e neñu’ã imborayhu ha iporiahuverekópe. Ha’e omyenyhẽ nde rekove mba’eporãgui ha Ha’e nemomitã jevy ku ñapykanícha.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.

Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua. Añetehápe mombyry akañyse, aiko hag̃ua py’aguapýpe umi ñu perõme. Selah Pya’e pya’e akañyse pe yvytu ratã renondégui.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.

Añetehápe pende Ruete voi omoangapyhýma Siónpe, oiporiahuverekóta itaperekuérape ha ijyvy perõgui ojapóta Eden, ha iñuguasúgui Ñanderuete ojapóta kokue porã, ipype ojejohu hag̃ua vy’a, tory, purahéi ha ñemomba’eguasu avei.

Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.

Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.

Ha’e omombarete ikane’õvape ha omokyre’ỹ avei ikangypávape. Ha oĩ peteĩ oñe’ẽ hatãva desiértope ha he’i peẽme: Pembosako’i peteĩ tape Ñanderuetépe g̃uarã ha pembojojáke pe tape Ñanderuetépe g̃uarã desiértope. Umi mitã ikane’õ, umi mitãrusu ikangypa ha ho’apávape. Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra. Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.

ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.

Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Toñemomba’eguasu Ñanderuete ha Ñandejára Hesu Crísto Rúpe, Ha’e ome’ẽ haguére ñandéve opaichagua yvága pegua jopói (jehovasa Pytu Porãmbáva rehegua) Hesu Crísto rupi.

Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve,

Ñanderuete ñanemo’ã ha ñanemombaretéta jajejopy vai jave,

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Ore Ruete, oreporiahuvereko, nderehe rojerovia; Nde voi ningo ore jyva mbarete meme pyhareve, upévare oreguenohẽ ore jepy’apy vaígui og̃uahẽ vove.

Evy’aite Ñanderuete ndive, Ha’e tome’ẽ ndéve nde py’apy ojeruréva. Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese. Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Umi mondaha ningo ou omonda ha oporohundi hag̃uánte, Che katu aju ame’ẽ hag̃ua pe tekove añeteguáva ha hemby hag̃ua gueteri.

Ore Ruete, Nde, che Jaratee, ko’ẽju jave rohekáta, che ánga ha che rete ijy’uhéi nderehe, ijy’uhéi háicha avei pe yvy ikãmbáva (ama rehe). Oñeme’ẽta kyse puku rãimbekuépe ha oikóta hikuái aguaraguasu rembi’urã ramo. Ha pe tetã ruvicha ipy’a rorýta Ñanderuete ndive, oñemomba’eguasuva’erã katuete oimeraẽ he’íva guive pe añetegua Ñanderuete renondépe, ha oñembotýta katuete umi ijapúva juru. Upeichaite chey’uhéi avei che Jára rogaguasu rehe, ahecha hag̃ua nde pu’aka ha nde reko jajaipa. Ne mborayhu iporãve jeikovégui, che juru nemomba’eguasu manteva’erã.

Ovy’aite ningo uvei upe yvyarigua ojeroviáva Ñanderuete rehe. Ha’ete ku yvyráicha oñeñotỹva y rembe’ýpe, hi’y omohe’õ porãva hapokuéra, upévagui noñandumo’ãi avei mba’eve ivaíva og̃uahẽ ramojepe pe ára haku térã ndokyvéi ramojepe noñemyangekõiri, ha ndopytamo’ãi hi’a’ỹrehe.

Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe. Ha pejapo opaite mba’e che pohekombo’eva’ekue ha pehenduva’ekue chehegui, ha pejapo opaite mba’e pehechava’ekue che ajapova’aína. Ha pe py’aguapy Jára (Hesu Crísto) oĩhína katuete penendive.

Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.

Pejerovia cherehe, Chénte posalvakuaa, Che voi ningo pende Ruete, ha che ykére ndaipóri ambue Jára.

Ha’e katu ombohovái chéve: Iporãntema (ovaléma) ndéve che poriahuvereko pu’aka. Che pu’aka ojehechauka porãmbáre ikangývape g̃uarã. Upévare che py’aite guive añembotuichase che kangykue rehe uvei, omba’apo porãve hag̃ua chepype Hesu Crísto pu’aka.

Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.

Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme. Umi cérro omongora háicha Jerusalénpe, péicha avei Ñanderuete oiko hetã jerekue rehe opaite árape.

Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.

Pejerure ha oñeme’ẽva’erã peẽme; peheka ha pejohuva’erã; pembota ha ojepe’ava’erã peẽme.

Umi hekopotĩva ojerure asy ramo Ñanderuetépe, katuete Ha’e ohendúta ichupekuéra ha oguenohẽta ijehasa asýgui. Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.

Vy’apópe peguenohẽva’erã y pe salvacion yvúgui.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.

Pe angaipa repy ningo pe ñemano, Ñanderuete me’ẽmby rei katu pe tekove tapia g̃uarãva Ñandejára Hesu Crísto pendepype.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Ha umi Ñanderuete omosãsomava’ekue oupa jevýta ha vy’apópe oúta hikuái Siónpe; ha vy’a tapia g̃uarãva oĩta ipy’apýpe; tory ha vy’apópe oikóta hikuái, ha vy’a’ỹ ha pyahẽ asy oñemomombyrýta ichuguikuéra.

Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai.

Ojehu ningo ojehai haguéicha Ñanderuete kuatiañe’ẽme: Kuimba’e ha kuña resa ndohechaiva’ekue, ijapysa nohenduiva’ekue ha ipy’apýpe naheñoiriva’ekue, Ñanderuete ombosako’íma umi ichupe ohayhúvape g̃uarã, (Isaías 64,4).

Upévare, che rayhupára, peha’ãrõ aja ko’ã mba’e ojehútava, peñeha’ãmba peñemboyke tembiapo vaígui peñemboheko porã hag̃ua, Ñanderuete tapendejohu peikóvo ipy’aguapýpe,

Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.

Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.

Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.

Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).

Ne retã oiko tapia g̃uarã, ha ne mburuvicha reko oiko opaite ára atyguasúpe g̃uarã.

Hesaráinepa peteĩ kuña imemby kambúvagui, ndoiporiahuverekovéi hag̃ua imemby hyégui osẽva’ekuépe. Ha pe sy hesarái ramojepe, Che araka’eve ndacheresaraimo’ãi ndehegui. Peikuaa porãke, che po pytépe ahai ne ra’ãnga; ha nde korapyjere yvate tapiaite oĩ che resa renondépe.

Ñanderuete imba’eita, iñarandu ha ikuaapy ipypukuete. Ñande yvyariguakuéra ndaikatúi ñamyesakã ni jaipyguara, ñande yvyarigua arandu rupi, Ñanderuete rapekuéra ni imbojovakekuéra.

Ñane ánga toha’ãrõ Ñanderuete ojapóva rehe, Ha’e ñanepytyvõta ha Ha’e ñanemo’ãta. Upéicha Ñanderuete ñanembopy’arory jajerovia porãgui héra porãite rehe.

ha peñeha’ã pene rerakuã ta’iporã, peñeha’ãvo peiko hag̃ua (opavavete ndive) py’aguapýpe, ha pemba’apo pende pópe ore pombo’e haguéicha,

Opaite Ñanderuete ra’y ha itajýra añeteguáva ombopoguy ko múndope ijerovia heko pegua rupi. Máva piko upe ombopoguýva ko múndope, pe ogueroviáva Hesu Crísto Ñanderuete Ra’yha.

Upévare upe oikóva Hesu Cristopype oñemoingo pyahúma, oñemboheko ambuéma (nacimiénto pyahu), pe teko tuja opáma (pe teko tuja nomandavéima hekovépe). Peikuaa porãke, pe teko pyahu oñepyrũma hague.

Ipy’a rory umi ipy’a porãva hapichakuéra ndive, oñeme’ẽva’erã ichupekuéra ko yvy kóva imba’erã ramo.

Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

Nde chemboguata porã ne rekombo’e rupi, ha ipahápe chemog̃uahẽ porãta ne rendápe. Nde’ỹre, mba’éiko arekóta yvágape. Ha nde’ỹre mba’eve ndaipotái ko yvy ape ariguágui. Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

Pe yvytu omosarambi háicha araikuéra, péicha cheresaráita ndehegui reñemoĩ haguére cherehe ha opa háicha pe tatatĩna, péicha amboguéta ne rembiapo vaieta. Ejevýke che rendápe, Che roperdonáma.

Ñanderuete kuatiañe’ẽme he’i voi: Upe ohayhúva hekove ha oikoséva py’aguapýpe tojoko ijuru mba’evaígui ha japúgui, (Salmokuéra 34,13-17). Toñemboyke mba’evaígui, ha tojapo mba’eporã, toheka py’aguapy ha toho hapykuéri.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe.

Ko esperánza kóva rupi Hesu Crísto ñandesalvava’ekue, pe esperánza ojehecháva ningo ndaha’éi esperánza. Máva piko oha’ãrõve gueteri, ohupity rire umi mba’e ha’e oipotáva. Ha ñaha’ãrõ ramo ñaína umi mba’e jahecha’ỹva, he’ise ñaha’ãrõhañaína paciéncia reheve.

Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.

Ñanderuete, yvága Jára, ome’ẽ chéve peteĩ juru amokyre’ỹkuaa hag̃uáicha ikane’õvape; Ha’e chemombáy meme pyhareve ha oñe’ẽ che apysápe ahendukuaa hag̃uáicha hemimbo’eteéva.

Ejapomína chepype Nde, che Ruete, peteĩ py’a ipotĩva, ha embopyahu chepype peteĩ pytu imbaretéva.

Ñanderuete, pe py’aguapy Jára, omoingove jevymava’ekue Hesu Crístope omanóva apytégui, Hesu Crísto ningo pe ovecha rerekuaguasu ha huguytee rupi Ha’e ñanembopy’apeteĩ jevy Ñanderuete ndive, Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.

Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.

Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.

Pevy’a tapia Hesu Cristopype, ha ha’e jevy: Pevy’ákena.

Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra.

Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.

Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.

amokyre’ỹgui hi’ánga ikane’õvape, ha amoangapyhy mayma hi’ánga oñembyasývape.

Ha Ñanderuete ñanembopy’aguapýva, toĩ opavave penendive, taupéicha (amen).