Ñemohenda
VERSOS OÑEMBOYKEVA’EKUE
Che irũ, ko tekove ningo yvate ha iguy gotyo oho oho, ñane mbyasy ha ñane vy’a reheve. Ha katu Ñandejára ñanembo’e jaiko ha’e peichagua yvyra oñeñotỹva ysyry rembe’ýpe, imburuvicha ha hoja’ỹva aravai ramo jepe. Ñañembyasyetereíramo, ñane’ãrõ ndaikatuveimo’ãi ja’e ko’ã mba’asygui. Ha katu Ñandejára ñandeporiahuvereko meméva, akóinte ñanderovasa iñe’ẽ porã rupive, ñanepytyvõ jeyve hag̃ua ñane moingévo. Ñande py’a oĩva’erã chupe g̃uarãnte, ha upéicharõmante ko’ã ára ijetu’úva ohasa pya’eterei. Ñandejára oĩ nendive, nereiko’ãi ne’ẽme. Ha’e omongueráta opa nde resa ha nemyenyhẽta vy’a reheve. Rojerovia Cristo Jesús reheve reñandu hag̃ua Espíritu Santo ñande pytu’u reheve, ha rojerure’asy Ñandejárape tanepytyvõ ha nembopy’aguasu jey.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.
Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.
Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Ko’ág̃a, nde Jacóbo, pende Ruete rembiapo, nde apohare he’iuka ndéve: Ani rekyhyjétei, Che roperdonáma; Che rohenói nde réra rupi, nde ningo che mba’énteva voi. Peẽ ningo che rechahare, he’i pende Ruete, ha che rembiguaikuéra, Che aiporavomava’ekue. Peẽ chekuaa ha pejerovia cherehe, ha peikuaa porã ndaiporiha ambue Jára; Che mboyve ndojejapói ambue jára, ha Che aikota’aína opa rire umi jára gua’u paha. Chénte pende Jára ha che’ỹre ndaipóri avave ikatúva peneguenohẽ pende jehasa asýgui. Che amombe’uka ha poikuaaukava’ekue che réra, ha Che poipytyvõva’ekue oĩ mboyve ambue jára pende apytépe. Peẽ voi che rechahare, he’i yvága Jára, Chénte apytava’erã tapia g̃uarã yvága ha yvy Jára ramo. Ko ára kóva ha’e jevy: Ndaipóri avave ikatúva ohekýi peteĩ mba’e che pógui. Ha umi mba’e ajaposéva, katuete ajapóta avei, ha ndaipóri avave ikatúva chejoko. Péicha he’i yvága Jára, Israel Jára Porã, Chémante posalváta: Penderehehápe amondova’ekue ichupe Babilóniape, omokañy hag̃ua ichupekuéra, ha umi Caldeaygua okañy avei ibarcoguasukuérape, umía rupi oñembotuichava’ekue. Che voi ningo pende Ruete, pe Heko jajaipáva, Israel apohare, pene retã ruvichaguasu. Péicha he’i pende Ruete, penembohapéva yguasu rupi ha ombosako’iva’ekue pe tape po’i y ipochyveha rupi. Che voi aheja osẽ hag̃ua icárro, ikavaju, isoldádo aty ipu’aka reheve, aity hag̃ua ha ho’a opu’ãve’ỹ hag̃uáicha; oguepa hag̃ua hikuái, ku tataindy ogue háicha. Ani peñemomandu’átei umi mba’e ohasamava’ekue rehe, ha ani peguerútei pene akãme umi mba’e ymaveguare. Pema’ẽ porãke, Che ajapo mba’e ipyahúva; pya’ete ojekuaáta, ndapehechakuaái piko. Ambohape jevýta tape yvy perõ rupi ha ysyry, heñoi’ỹháme mba’eve. Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.
Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.
Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.
Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.
Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.
Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra. Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.
Upéi umi cherehe ija’e’ỹva oguevipava’erã hapykuere gotýo, che amba’ejerure asy jave ndéve, che ningo aikuaa porã voi Ñanderuete oĩha chendive.
Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.
Ha’e katu ombohovái chéve: Iporãntema (ovaléma) ndéve che poriahuvereko pu’aka. Che pu’aka ojehechauka porãmbáre ikangývape g̃uarã. Upévare che py’aite guive añembotuichase che kangykue rehe uvei, omba’apo porãve hag̃ua chepype Hesu Crísto pu’aka.
Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.
Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.
Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre. Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo; Pene akã rague jepeve ojepapáma. Upévarupi ani pekyhyje. Peẽ, mba’eguasueteve heta guyra’ígui.
Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.
Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua. Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Aguata ramojepe ka’aguy iñypytũha rupi ndakyhyjemo’ãi mba’eveichagua mba’evaígui, Nde repytágui chendive ha nde yvyra po’i ha nde yvyra puku chemoangapyhy.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Pevy’a tapiákena. Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10). Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.
Oñembyai ramojepe che ro’o ha che py’a, Nde, che Ruete repytava’erã che mba’erepyetéva.
Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.
Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Ne rendápe, che Ruete, amog̃uahẽ che ánga. Opaite Ñanderuete rapekuéra ohechauka iporiahuvereko ha imborayhu, umi oñongatúva ha ojapóvape g̃uarã iñe’ẽ. Nde réra rehehápe, Nde, che Ruete, eperdona che rembiapo vai, heta ramo jepe. Mba’épa ojehúta upe kuimba’e okyhyjéva Ñanderuetégui, Ha’e ohekombo’éta ichupe oiporavokuaa hag̃ua haperã. Ha’e oiko porãitéta ha iñemoñarenguérape g̃uarã opytáta ko yvy kóva imba’etee ramo. Ñanderuete ohayhuhína umi okyhyjévape ichugui ha umi mba’e ha’ekuéra oikuaa’ỹva Ha’e omoarandúta ichupekuéra omoirũ porã guive ichupe. Ajesareko Ñanderuete rehénte, Ha’émante oguenohẽta che pykuéra che ñuhãgui. Ema’ẽmína cherehe ha cheporiahuverekomína, aimégui che año ha jejopy vaípe. Ajepy’apyeterei ningo, cheguenohẽmína che jehasa asýgui. Ema’ẽmína che jepy’apy asy ha che jehasa asy rehe, ha cheperdonami opaite che rembiapo vaíre. Ema’ẽmína umi cherehe ija’e’ỹvare, mba’eichaitépa oñemboheta hetave hikuái ha pochy vaipópe chejukase. Che Jaratee, nderehe ajerovia, anítei chemotĩ umi cherehe ija’e’ỹva térã umi cherehe oñembohorýva renondépe.
Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.
ha umi Jerusalengua ojepy’apy asývape ame’ẽukáta iñakã jeguakarã, tanimbu rãngue; acéite ryakuã porã, jahe’o rãngue; ahoja tory rehegua, jepy’apy rãngue; hérata tajy justícia rehegua, Ñanderuete oñotỹtava ohechauka hag̃ua heko jajaipáva.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Ha upe cherendúva katu, oikova’erã kyhyje’ỹme ha oikoveva’erã py’aguapýpe okyhyje’ỹre mba’evégui.
Upévare amomba’eguasúta Ñanderuete ñe’ẽ, iñe’ẽ ae amombe’úta. Ñanderuete rehe ajerovia, upévare ndakyhyjemo’ãi. Mba’épa umi yvyarigua ojapokuaa cherehe.
Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.
Ajahe’o rãngue, ajeroky vy’apópe. Nde rejoráma che ao vosakue rehegua, ha cheku’a jopyha torypápe. Upévarehe che ánga opurahéita ndéve rombotuicha hag̃ua, nakirirĩmo’ãi, Ñanderuete, che Jaratee, che romomba’eguasuháve opaite árape.
Pe Pytu Porãmbáva ñanemokyre’ỹ ha ñanepytyvõ ñamboyke hag̃ua ñande py’apy kangy ha ñanepytyvõ ñañembo’e hag̃ua hekoitépe Ñanderuetépe, Ha’e oipota háicha ha ovale hag̃uáicha ichupe g̃uarã upévare pe Pytu Porãmbáva ojerure ñanderehe pyahẽ oje’e’ỹkuaáva reheve.
Pe ojepy’apy asývape g̃uarã opaite ára hasyeterei, ha pe ipy’a rorývape katu ojogua peteĩ vy’aguasúpe.
Ipy’a rory umi imba’embyasýva, Ñanderuete voi omoangapyhyva’erã ichupekuéra (Apocalípsis 21,4).
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Mba’érehe piko nde che ánga nekangy, ha mba’érehe piko rekyhyjereína chepype. Ejerovia Ñanderuete rehe. Amomba’eguasu jevýta ichupe, Nde ningo che pytyvõhára ha che Jarateetéva.
Ñanderuete noĩri ramo penendive, reiete pepu’ã voiete pemba’apo pohýi hag̃ua ka’aruete peve, ha pe’u hag̃ua ñembyasypópe pene pan, Ñanderuete katu ome’ẽ umi mba’e umi ohayhúvape ichupe oke ramojepe.
Peẽ pehasa asy ramo pende jerovia rehehápe, Ñanderuete penderovasáta. Ani pekyhyje, ha’ekuéra pendejopyete ramo, ani pene’angekõitei.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.
Napeẽmo’ãi peñorãirõtava, pepyta kirirĩháme, pehecha hag̃ua mba’éichapa Ñanderuete pendesalváta. Juda ha Jerusalen ani pekyhyjétei ha ani pende py’akangýtei; ko’ẽ ramo pehóta hendapekuéra, Ñanderuete oĩta penendive.
Ajepy’apy vai jave ahenói Ñanderuetépe, ha amba’ejerure asy che Járape chepytyvõ hag̃ua. Ha’e ohendu che ñe’ẽ henda porãite guive, ha che mba’ejerure asy og̃uahẽma ijapysaitépe.
Upéicharamo ndapeikovéima angaipa rembiguái ramo, peẽ ndapeikovéiguima Moises rembiapoukapy poguýpe, Ñanderuete mborayhu ha iporiahuvereko poguýpema uvei peikopeína ko’ág̃a.
Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia, ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.
Cheporiahuverekomína ko’ág̃a tachemoangapyhy, Nde ere hagueichaite ne rembiguáipe.
Peñeñangarekóke! Pepyta hatãkena pende jeroviápe, peñomokyre’ỹ ha peñomombaretéke.
Cheapensa ramo che ha’atama’aína, ne mborayhu katu, che Ruete, chejoko jevy. Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.
Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.
Nde katu, che Ruete, reiko che jerekuévo chemo’ã hag̃ua, nde reko jajaipa oĩ chendive chemoakãrapu’ã hag̃ua.
Ñanderuete nemo’ãta opaite mba’evaígui, Ha’e oñangarekóta nde rekove rehe. Ñanderuete oñangarekóta nderehe resẽ ramo nde rógagui térã reike ramo ipype, ko’ág̃a guive ha opaite ára peve.
Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Ha Nde, che Ruete, ani reñemomombyryvétei chehegui, Nde chemombaretekuaánte, pya’éna chepytyvõ.
Reñeno vove, nderekyhyjemo’ãi, ha reñeno rire reke porãta. Nderekyhyjemo’ãi pe jehasa asýgui, ni mba’evaiguasúgui oúva tekove iñañáva ári. Ñanderuete ningo oñangarekóta nderehe ha Ha’e ndohejamo’ãi re’a peteĩ ñuhãme.
Avy’a, Ñanderuete ohendu ramo che ñe’ẽ ha che mba’ejerure asy. Ajerovia gueteri, ha’e ramojepe: Ajepy’apy vaieteha. Che jepy’apy vaiete jave ha’éma: Ijapu ningo mayma kuimba’e ha kuñakuéra. Mba’éichapa amyengoviáne Ñanderuetépe opaite mba’eporã cherehe ojapova’ekue. Ajapyhýta pe váso tekove añete reheguáva, ha ahenóita Ñanderuete réra. Ko’ág̃a ajapóta opaite mba’e aprometeva’ekue Ñanderuetépe, opaite tetãyguakuéra renondépe. Hasy asy Ñanderuete resápe umi heko potĩva omano ramo. Nde, che Ruete, che añetehápe ne rembiguái, che ningo ne rembiguái membykuimba’e, Nde remondoho pe cadéna oñapytĩva che rekove rehe. Aikuave’ẽta ndéve kuave’ẽmby ñemomba’eguasu reheguáva, ha ahenóita nde réra, ore Ruete. Ajapóta che ñe’ẽ ame’ẽmava’ekue Ñanderuetépe mayma hetãyguakuéra renondépe. Ñanderuete róga korapýpe, Jerusalen mbytépe aikuave’ẽta. Alelúia, pemomba’eguasu Ñanderuetépe. Ha’e oñakãity omoĩgui ijapysa cherendu hag̃ua, che ahenói guive héra.
Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe. Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Nderehe, che Ruete, añemo’ã, aníkena araka’eve añemotĩ. Umi cherehe ija’e’ỹva oñemongetáma oñondive ha umi oha’ãrõva che amano hag̃ua he’i voi hikuái: Ñanderuete oheja reíma ichupe, pemuña ha pejapyhy ichupe, ndaipórigui oipytyvõtava ichupe. Nde, che Ruete, ani reñemomombyry chehegui, che Jaratee pya’emína eju chepytyvõ hag̃ua. Toñemotĩmba ha tomanomba umi cherehe oñemoĩva, ñemotĩ ha ñembohory tohupity umi chejukasévape. Che katu tapiaite ajerovia nderehe, ha ko’ýte ko’yteve romomba’eguasuve ahávo. Che juru tomombe’u tapiaite nde justícia ha ne rembiapo porãita, umía ndojepapakuaái. Amombe’u, Che Jára, che Ruete rembiapo tuichaitéva; amomandu’áta nendivénte oĩha ñembojovake añeteguáva. Nde, ore Ruete, chembo’eva’ekue che mitãrusu ára guive, ha ko’ág̃a peve amombe’u’aína ne rembiapo tuichaitéva. Chetujáma ningo ha che akã rague morotĩmbámarõ jepe, Nde, che Ruete, ani chereja rei, amombe’uve hag̃ua nde pu’aka ha ne mbaretekue che ñemoñarenguérape ha mayma ouva’erãvape. Nde, ore Ruete, nde justícia og̃uahẽ yvága peve, Nde ningo rejapo tuichaite mba’e; ore Ruete, máva piko ndeichagua. Ndepy’a porã rupi chepytyvõmína ha cheguenohẽmi che jejopy vaígui, ehendumína ha chepytyvõmína. Nde, che Ruete, chemboguatava’ekue heta jepy’apy ha mba’evaiete rupi, Nde katu chemoingove jevy, ha cheguenohẽ jevy umi yguasu pypukúgui. Nde chemoĩ porãve aiko haguégui, ha chemoangapyhy porã jevy. Upévare che romomba’eguasúta avei árpa púpe. Nde, che Jaraite, Nde reñangareko porã haguére che rekove pukukue rehe che rogueropurahéita mbaraka púpe, Nde ha’égui Israel ha che Jára heko porãva. Torypápe che juru ndegueropurahéita, ha romomba’eguasúta reguenohẽ haguére che ánga jejopy vaígui. Ha che juru tomombe’u tapiaite nde justícia, toñemotĩmba umi ohekáva chéve g̃uarã mba’evai. Eiko chéve g̃uarã peteĩ itaguasu ramo, ikatu hag̃ua che aju tapiaite hendápe. Nde chepytyvõukava’ekue. Nde ha’égui che itaguasu chemombytu’úva.
Peguata hekópe, Hesu Crísto ñe’ẽ porã he’i háicha, aha ramo pene rendápe térã che pore’ỹme jepe, tahendu peẽ peimembaha peteĩ pytu porã añóme, ha peñeha’ãmba py’a peteĩme pemyasãive hag̃ua pe jerovia Hesu Crísto evangélio rehe.
Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Mba’érehepa nde che ánga nekangy, ha neangekõi chepype. Ejerovia Ñanderuete rehe, ha emomba’eguasu jevy che pytyvõhára ha che Jarateépe.
Che Ruete, che romomba’eguasu Nde cheguenohẽ haguére cherayhu’ỹva pógui, ha Nde nderehejái ha’ekuéra oñembohory cherehe.
Hesu Crísto ñanerenói pe teko sãsóme g̃uarã, upévare pepyta hatãkena pe teko sãsóme ha anítei peñemoĩ jevy tembiguái cangálla poguýpe.
Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.
Toñemboete ore Jára, ore Ruetépe, Ha’e ñandereraha ijapére, Ñanderuete voínte ñanepytyvõta ñane rembiapópe. Selah
Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.
Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.
Ejapomína chepype Nde, che Ruete, peteĩ py’a ipotĩva, ha embopyahu chepype peteĩ pytu imbaretéva.
Ojehu ningo ojehai haguéicha Ñanderuete kuatiañe’ẽme: Kuimba’e ha kuña resa ndohechaiva’ekue, ijapysa nohenduiva’ekue ha ipy’apýpe naheñoiriva’ekue, Ñanderuete ombosako’íma umi ichupe ohayhúvape g̃uarã, (Isaías 64,4).
Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.
Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.
Tesaypópe oñemitỹva’ekue, vy’apópe katu omono’õva’erã iñemitỹ’anguéra. Ha’ekuéra oñotỹ tasẽme, vy’apópe katu omono’õ jevyva’erã ikoga’akuéra.
Eme’ẽmína chéve akã porã ha eñangarekomína cherehe ajapo hag̃ua che py’aite guive ne rembiapoukapy.
Ani pembyaty pirapireita ko yvy ári, kupi’i ha ao raso ombyai hag̃uáme, ha mondahakuéra omonda hag̃uáme, Reme’ẽ jave pirapire imboriahúvape ani rembopuka turu, ne renondépe umi tova mokõi (fariseokuéra) ojapo háicha Ñanderuete rogakuérape ha táva cálle rupi, oñembotuicha hag̃uánte. Añetehápe Che ha’e peẽme ha’ekuéra ohupitýma hembiapo porã repy. pembyaty uvei pirapireita yvágape, kupi’i ha ao raso ombyai’ỹ hag̃uáme, ha mondahakuéra omonda’ỹ hag̃uáme. Nde pirapireita oĩháme, upépe oĩva’erã avei ne ñe’ã (korasõ).
Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.
Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.
Peñopytyvõ pegueraha hag̃ua oñondive pene mba’e pohýi (cárga) ha péicha pejapo ramo pehóvo pejapo hekópe Hesu Crísto rembiapoukapy.
Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.