Ñemohenda
VERSIÓN ÑE’ẼTEKUAA PY’AGUAPY REHEGUA
Ko ñande yvy ape ári niko oĩ heta mba’e vai, jeiko asy, ha ikatu avei nde rekove pyharevete oĩ henyhẽte apañuã ha jehasa’asygui. Ñandejára katu opromete ñandéve ome’ẽtaha py’aguapy tuichavéva opa mba’égui, py’aguapy ndaikatúiva ñantende porã. Jaheka va’erã upéva ára ha ára, Ñandejára ra’ykuéra ramo, ha jahechauka va’erã imborayhu.
Ñandejára ñanehenói jaiko hag̃ua py’aguapýpe opa mba’e vai ñandéve ojehúva apytépe. Jajeroviáramo Ñandejárare, ha’e ñanepytyvõta jaguereko hag̃ua py’aguapy. Iñe’ẽme he’i: “(Isaías 26:3) Upe oñakãrapu’ãva nderehe reñangarekóta hese py’aguapýpe opa árape, pórke nderehe ojerovia.” Ñandejára he’i ñandéve jajerovia va’erãha hese. Ikatu hasy jerovia hese ñande jepy’apy ha ñande jasy jave, ha katu ñande Ru Yvagagua rehe jajeroviáramo, ha’e ome’ẽta ñandéve py’aguapy.
Ñandejára ogana ko mundope. Ani rekyhyje. Opa mba’e oĩ ipoguýpe, ha neñeñangareko.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.
Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.
Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.
Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.
Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.
Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,
Aguata ramojepe ka’aguy iñypytũha rupi ndakyhyjemo’ãi mba’eveichagua mba’evaígui, Nde repytágui chendive ha nde yvyra po’i ha nde yvyra puku chemoangapyhy.
Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.
Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.
Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.
Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.
Umi mondaha ningo ou omonda ha oporohundi hag̃uánte, Che katu aju ame’ẽ hag̃ua pe tekove añeteguáva ha hemby hag̃ua gueteri.
Oñembyai ramojepe che ro’o ha che py’a, Nde, che Ruete repytava’erã che mba’erepyetéva.
Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme.
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe.
Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.
Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Kuarahyresẽ imombyry háicha kuarahyreikégui, péicha Ha’e omomombyry ñandehegui ñande reko ñaña rembiapo vai.
Evy’aite Ñanderuete ndive, Ha’e tome’ẽ ndéve nde py’apy ojeruréva. Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese. Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.
Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a.
Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.
Upéicha ojehu, rojejopy vai ramojepe opaite mba’épe ndoropoíri ore jeroviágui ha orepy’angata ramojepe, ndaorepy’aropúi. Heta oñemoĩ ramojepe orerehe Ñanderuete ndaorerejái ore año, ambuekuéra orereity ramojepe, ndaikatúi orehundieté hikuái.
ha peñeha’ã pende py’aite guive peñemopeteĩ hag̃ua Pytu Porãmbavapype ha py’aguapy añeteguáva rupi.
Umi hekopotĩva ojerure asy ramo Ñanderuetépe, katuete Ha’e ohendúta ichupekuéra ha oguenohẽta ijehasa asýgui. Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.
Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.
Ipepópe neñuãmbáta ha kyhyje’ỹme reiméta ipoguýpe, heko añete nemo’ãta ha Ha’e oñangarekóta nderehe.
Pe ñe’ẽ mbohovái porã ombogue pe pochy; pe ñe’ẽ pohýiva katu ohatapyña pe pochy rendy.
Hesu Crísto rupínte oĩ perdon opaite tetãyguakuérape g̃uarã, Ha’e oguerúgui pe py’aguapy yvága pegua huguy rupínte, oñeñohẽva’ekue ikurusúre.
Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.
Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Hesu Crísto oguerahava’ekue hetére ñane rembiapo vai kurusúre, ñande ñamano hag̃ua tembiapo vaípe g̃uarã ha jaiko justíciape g̃uarã. Ijekutukue rupi ningo peẽ pekuera.
Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.
Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.
Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.
Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.
Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.
Ipy’a rory umi ipy’a porãva hapichakuéra ndive, oñeme’ẽva’erã ichupekuéra ko yvy kóva imba’erã ramo.
Ha’e omombarete ikane’õvape ha omokyre’ỹ avei ikangypávape. Ha oĩ peteĩ oñe’ẽ hatãva desiértope ha he’i peẽme: Pembosako’i peteĩ tape Ñanderuetépe g̃uarã ha pembojojáke pe tape Ñanderuetépe g̃uarã desiértope. Umi mitã ikane’õ, umi mitãrusu ikangypa ha ho’apávape. Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.
Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.
Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.
Og̃uahẽ ramo pe ára che akyhyjeha, nderehe katu ajerovia. Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.
Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.
Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra. Máva piko pende apytégui ojepy’apyve ramo jepe ikatu ombopukuve hekove peteĩ ára (día) jepe.
Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.
Ñanderuete che rerekua, Ha’e ome’ẽmba chéve aikotevẽva guive. Umi kapi’ipe kyrỹiha rupi chegueraha, umi y sakã rembe’ýpe chemombytu’u. Ha’e chemoangapyhy, Ha’e chesãmbyhy ijustícia rape rehe, héra rayhupápe.
Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Umi cérro omongora háicha Jerusalénpe, péicha avei Ñanderuete oiko hetã jerekue rehe opaite árape.
Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.
Iporãve peteĩ mandi’o pehẽngue nandi py’aguapy reheve, peteĩ óga henyhẽva so’ógui ñorãirõ reheve.
Pejapo opaite mba’e peñe’ẽngururu’ỹre ha pejepy’apy’ỹre, peiko hag̃ua Ñanderuete ra’y ha itajýra añeteguáva ramo ha avave anítei ojohu mba’evai pende rekovépe, oñe’ẽvai hag̃ua penderehe, peiko uvei heko potĩva ramo peikove ramojepe tekove vai ha iñañáva apytépe, pemimbi ha pehesape hag̃ua ko yvy apére ku jasytata omimbi háicha ára rehe.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.
Pembojegua uvei pende py’apy mba’e oñembyai’ỹva ha ojehecha’ỹva reheve, péva ningo Pytu Porãmbáva rembiapo, Ha’e omomirĩva ha ombopy’aguapýva tetãyguakuérape, ha koichagua teko ombohory Ñanderuetépe.
Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.
Ha aporombopurahéita: Py’aguapy, py’aguapy ame’ẽse umi mombyry ha ag̃ui oikóvape, he’i pende Ruete; ha amonguera jevýta che retãme.
Ñande ñañemoĩva’ekue ramojepe Ñanderuete rehe, Hesu Crísto ñanemoĩ porãma iñemano rupi Itúva ndive. Ha Ñanderuete omoingove jevy haguére Hesu Crístope omanova’ekue apytégui, Ha’e ñanemoingove jevýta avei omanova’ekue apytégui. Ha’e ñanemopotĩva’ekue jaikove hag̃ua tapia Hesu Crísto ha Ñanderuete ndive yvágape.
Ipahápe, che hermanokuéra, che ha’ese peẽme: Pevy’aite, peheja ambuekuéra tapenemboheko ha tapenepytyvõ peiko porã jevy hag̃ua Ñanderuete renondépe, upévare peñembopy’apeteĩ jevy ha peiko py’aguapýpe oñondivepa, ha Ñanderuete, pe mborayhu ha py’aguapy Jára, penemoirũta.
Mba’eporã ha nde poriahuvereko añetehápe oĩta chendive aikove aja pukukue, che aikose Ñanderuete roga guasúpe aikove aja pukukue.
Ñanderuete ohayhuetégui opaite tetãyguakuérape Ha’e ome’ẽ Ita’ýra peteĩetévape, opaite ojeroviáva guive hese ani hag̃ua oñehundi, oguereko hag̃ua uvei pe tekove tapia g̃uarãva. Ñanderuete ningo nomboúi ita’ýrape ko yvy ape ári ombojovake hag̃ua kuimba’e ha kuñakuérape, osalva hag̃ua uvei opavave ojeroviávape guive hese.
Tapendepy’a porã uvei oñondive, peñopytyvõ, pejoporiahuvereko, peñoperdona, Ñanderuete peneperdona háicha avei Hesu Crísto ruguy rupive.
Pejogueropu’aka ha peñoperdona, oime ramo oñemohembiapo vaíva; Hesu Crísto peneperdona haguéicha upéicha peperdona avei pende rapichápe.
Hesu he’i ichupe: Che ningo pe tape, pe añetegua ha pe tekovete, avave ndaikatúi og̃uahẽ che Ruete rendápe cherehe’ỹ. Cherupímante uvei ikatu oñeg̃uahẽ Ñanderuete rendápe.
Ha umi árape oĩta arandu ha py’aguapy, ha pe kyhyje oguerekóva Ñanderuetégui Sion mba’erepy.
Ñanderuete oĩgui Hesu Cristopype, ombopy’apeteĩ jevy hag̃ua tetãyguakuérape hendive, upévare Ha’e operdona ñane rembiapo vai ha omoĩ ñande pópe ko perdon rehegua ñe’ẽ. Ko ñande róga (tete) ko’ag̃aguápe ñanepyahẽ gueteri, jaikeségui ñande róga yvága peguápe ku peteĩ kuimba’e térã kuña oñemondese ramoguáicha ijao ipyahúvape. Upéicha ore romombe’u ko perdon ñe’ẽ Hesu Crísto rendaguépe ha Ha’e oavisa tetãyguakuérape: Peheja Hesu Crísto tapenemoingo porã jevy Ñanderuete ndive.
Ojoko opaichagua ñorãirõguasu opa rupiete oikóva ko yvy apére. Omopẽmba guyrapa, ha yvyra puku akua ha tatápe ohapypa icarrokuéra.
Pe tapicha akãguapýva ojekuaáta ojokokuaágui ipochy, ha oñemombe’u porãta ichupe operdonakuaa ramo hapicha rembiapo vai.
Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua.
Opaite mba’e peẽ peipotáva guive ojejapo penderehe, peichagua mba’e pejapova’erã peẽ ambuekuéra rehe avei, kóva ningo Ñanderuete rembiapoukapy ojehai háicha ikuatiañe’ẽme.
Sapy’aitemínte hi’are ipochy, ijeporiahuvereko katu oiko kuimba’e ha kuñakuéra rekove pukukue. Ka’aru pytũme og̃uahẽ jahe’o, iko’ẽvo katu opa, ha hendaguépe og̃uahẽma vy’a tuicháva.
Upéichamante jaikuaa ñande jaikoha ita’ýra térã itajýra añeteguáva ramo ha upéichamante Ha’e ombopy’aguapýta ñande py’apyñe’ẽ (conciéncia). Che rayhuparakuéra, ko’ág̃a jaikóma ita’ýra ha itajýra ramo, ndojehechaukáigui gueteri upe oikótava ñandehegui. Jaikuaa ningo upe ára Ha’e ojehechaukatahápe ñandéve, ñande jajoguataha ichupe, ha jahecháta Ha’e oĩ haichaite. Ñande py’apyñe’ẽ ñanemoĩ vaisérõ Ñanderuete renondépe, imborayhu ituichave ñande py’apyñe’ẽgui, Ha’e oikuaapágui voi ñande py’apýpe oĩva guive.
Pe angaipa repy ningo pe ñemano, Ñanderuete me’ẽmby rei katu pe tekove tapia g̃uarãva Ñandejára Hesu Crísto pendepype.
Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra). Ema’ẽmína oĩpa chepype ñaña reko, ha chemboguata pe tape añeteguáva rehe.
Ha upérõ Pédro oñemboja ijypýpe ha oporandu: Che Jára, mboy jevy pevépa aperdonava’erã che hermáno oñemoangaipávape chendive. Ovaléma piko 7 jevy. Ha Hesu he’i ichupe: Nda’éi ndéve 7 jevy peve, 70 jevy 7 jevy peve uvei (he’ise 490 veces térã opaite ára peve).
Iporãiteve pe kuimba’e hasýpe ipochýva, peteĩ soldádo oñorãirõ porãvagui; ha peteĩ kuimba’e ojokokuaáva hi’ánga rembipota iporãve peteĩ kuimba’e ombopoguývagui peteĩ távape.
Ani reheja pe ivaíva ipu’aka nderehe, upéva rãngue ndepu’aka pe ivaíva rehe mba’eporã rupi.
Pe arandu oúva Ñanderuetégui katu omboheko potĩ ha upéi ome’ẽ py’aguapy ha py’aporã, iñe’ẽrendu, oporoporiahuverekokuaa, hi’a yva Pytu Porãmba reheguáva (Galaciayguakuérape 5,22), avavépe nombojuavýi, ndahova mokõiri. Ha umi oñeha’ãva ojeiko porã hag̃ua, toñotỹ py’aguapy omono’õ hag̃ua justícia (heko peguáva).
Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe.
Pe Ñe’ẽ ningo pe Tesape añeteguáva, ouva’ekue ko yvy ape ári ohesape hag̃ua opavave kuimba’e ha kuñáme.
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Pe mborayhu añeteguáva ningo ndojapói mba’eve ivaíva hapicha rehe. Upévare upe ohayhúva hapichápe ojapopa Moises rembiapoukapykuéra.
Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai. Nde poriahuvereko tuicha og̃uahẽ yvága guive, ha ne mborayhu ojepyso araíre. Reñemboyvate yvagakuéra ári, Nde, che Ruete, opa rupiete yvy ape ári toñemyasãi nde reko jajaipa. Amba’ejerure asy Ñanderuete Ipu’akaitévape, Ha’e chepytyvõ hag̃ua.
Toñemomba’eguasu Ñandejára Ñanderuete ha Hesu Crísto Rúpe iporiahuvereko rupi omoingove jevyva’ekue Hesu Crístope omanomava’ekue apytégui, péva ñanepytyvõ porã ñande ñaha’ãrõ hag̃ua avei Ha’e ñanemoingove jevy peve, ha upéicha ñaha’ãrõ jahupity hag̃ua ime’ẽmby ñane mba’erãva oñeñongatúva yvágape, ha ko Ñanderuete me’ẽmby kóva noñembyaimo’ãi araka’evénte, noñemongy’amo’ãi ni ndaipirumo’ãi.
Oñeñohẽ meve Pytu Porãite yvate pegua ñandeári pe ñu perõgui oiko jevýta kokue porã oñeñemitỹ hag̃ua, ha pe kokue porãgui oiko jevýta ka’aguy porã. Upéramo opa rupi oĩta justícia pe tetã ruguaietépe jepe ha hekoitépe oñembojovakéta.
Ore akã ári rembohasa kuimba’ekuéra, rohasa avei tata ha y rupi, ha upéi Nde oreguenohẽ ko’ã jejopy vaígui.
Ejehekýi karia’y rete rembipota vaígui, ha ejapyhy uvei opaite mba’e porãva: Justícia (tekojoja), jerovia, mborayhu, py’aguapy, py’apotĩ reheve, ha eñembo’e Ñanderuetépe nde py’apotĩ reheve.
Peẽ peperdona ramo pende rapicha rembiapo vai, Ñanderuete operdonáta avei pene rembiapo vaikue. Peẽ napeperdonái ramo pende rapicha rembiapo vai, Ñanderuete katuete noperdonamo’ãi avei pene rembiapo vaikue.
Ojehayhuhína ipy’a potĩvape, iñe’ẽ juky rupi oikóta tetã ruvicha angirũ (amígo) ramo.
Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.
Jaiko ramo tesapépe, Ha’e oĩ háicha tesapépe, upéicharamo jaiko porã avei oñondive, ha Hesu Crísto ruguy ñanemopotĩ opaichagua tembiapo vaígui. Hesu Crísto Ñanderuete Ra’y voi.
Ñanderuete, pe py’aguapy Jára, omoingove jevymava’ekue Hesu Crístope omanóva apytégui, Hesu Crísto ningo pe ovecha rerekuaguasu ha huguytee rupi Ha’e ñanembopy’apeteĩ jevy Ñanderuete ndive, Hesu Crísto tapenembokatupyry opaite tembiapo porãme, pejapóvo hembipota, ha Ha’e toiporu ore rekove Ha’e oipota háicha. Toñemomba’eguasu Ñanderuetépe ára atyguasukuéra guive ára atyguasukuerarã meve, amen.
Nda’éi ko’ã mba’e ajejopy vaígui, che voi ajepokuaáguima, añecontenta hag̃ua arekomíva rehevénte. Che ahasa asykuaa ha areko hetakuaa, che ryg̃uatãkuaa ha cheñembyahyikuaa, che ajepokuaáma hemby ramo térã opa ramo che pirapire.
Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.
Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave.
Ovy’aite upe oipytyvõva imboriahúvape. Ñanderuete oipytyvõta avei ichupe, ha’e ohasa asy jave. Che Ruete, cheporiahuverekomína, ha chemopu’ã, amyengoviakuaa hag̃ua hembiapokuéra. Ko’ã mba’e rupi aikuaáma Nde cherayhuha, umi cherehe ija’e’ỹva anive hag̃ua opuka cherehe. Ha che reko ipotĩ haguére Nde chemopu’ã jevýta, ha chemoĩta ne renondépe opaite árape g̃uarã. Toñemomba’eguasu ore Ruete, Israel Járape, ára atyguasu guive ára atyguasu peve, amen (taupéicha). Ñanderuete oñangarekóta hese ha omoingovéta ichupe, ha’e ovy’aite hag̃ua yvy apére, ha Nde neremoĩmo’ãi ichupe umi hese ija’e’ỹva pópe.
Nde rejapysaka porã rire che rembiapoukapy rehe, nde py’aguapy okakuaava’erãmo’ã ysyryguasúicha, ha nde justícia (tekojoja) ojehupiva’erãmo’ã y pu’ã yguasu peguáicha,
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.
Ñanderuete mborayhu rupi peẽ pejesalva ha pejerovia Hesu Crísto rehe ndaha’éi katu pendejehegui, Ñanderuete me’ẽmby rupínte. Ndaha’éi yvyarigua rembiapo porã rupi, ani hag̃ua avave oñembotuicha.
Ovy’aite upe tapicha ojohúva arandu ha ohupitýva akãguapy; umía jahupity ramo iporãve plátagui ha umía jaguereko ramo iporãve órogui. Hepyeteve ita vera hepývagui; ha opaite mba’e ikatúva guive reipota, ndaikatúi ñambojoja hesekuéra. Tekove puku oĩ ijakatúa gotýo; ha ijasu gotýo oĩ mba’erepyeta ha terakuã porã. Hapekuéra ningo nembopy’a rory ha hape po’ikuéra nembopy’aguapýta. Ha’ehína yvyra oporomoingovéva umi hese oñemomba’évape g̃uarã, ha ovy’a iterei umi oñemomba’etévape hese.
Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.
Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.
Ko’ã mba’e ko’ãva Che ha’éma peẽme che vy’a oĩ hag̃ua pendepype, ha penerenyhẽ hag̃ua vy’águi.
Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme. Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme. Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã. Upévare pemombarete jevy pende jyva ikane’õva ha pene renypy’ã ikangýva. Pemyatyrõ pende rape ikarẽva, ani hag̃ua pende pykuéra ikaráu, tokuera uvei. Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe. Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31). Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope). Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka. Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra. Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.
Nda’eséi ag̃uahẽmaha hu’ã meve, ni che reko hekoitepemaha, añeha’ãmba katu ahupitypa peve, Hesu Crísto mborayhu cherupity ha chejokóguima. Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.
Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.
Opaite árape pejerovia hese, peẽ che retãyguakuéra, henondépe peguenohẽ pende py’apýpe oĩva guive, Ñanderuete ningo ñane mo’ãhára. Selah