Ñemohenda
150 Versículos jajuhu haĝua Py’aguapy Kirirĩ ha Soledad-pe
Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.
Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,
Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.
Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.
Ñanderuete ipy’a porãgui umi hese ojeroviávape g̃uarã, ha umi ohekávape g̃uarã ichupe. Iporãite ñaha’ãrõ kirirĩháme Ñanderuete ñepytyvõ rehe.
Ha justíciagui heñóita tapia g̃uarã py’aguapy, angapyhy ha kyhyje’ỹ. Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.
Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.
Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.
Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.
Umi kapi’ipe kyrỹiha rupi chegueraha, umi y sakã rembe’ýpe chemombytu’u. Ha’e chemoangapyhy, Ha’e chesãmbyhy ijustícia rape rehe, héra rayhupápe.
Añetehápe aiko hekoitépe ha amokirirĩ che ánga, ku mitã oñemombo’ómavaicha ha ojejokóva isy pyti’áre, peichaite che ánga ipy’aguapy chepype.
Ñanderuete he’i ichupe: Esẽ okápe ha eñembo’y pe cérrope nde Jára renondépe. Ha péina ápe Ñanderuete ombou peteĩ yvytu atãiterei ombotiríva cerrokuéra, ha ojokáva itaguasukuéra, ha ohasa Elías henonderãme, Ñanderuete katu noĩri yvytúpe. Ha pe yvytu rapykuéri ou yvyryrýi, Ñanderuete katu noĩri pe yvyryrýi apytépe. Ha pe yvyryrýi rapykuéri katu ou tata; Ñanderuete katu noĩri tata rendy mbytépe ha pe tata rapykuéri ou peteĩ yvytu kangymíva.
Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.
Peteĩ mba’e ajerure Ñanderuetépe, ha upéva ahekáta: Taiko Ñanderuete rogaguasúpe aikove aja pukukue ajepy’amongeta hag̃ua Ñanderuete rehe ha romomba’eguasu joáta ichupe. Ha’e oñangarekóta cherehe hogaguasúpe og̃uahẽ jave pe ára ivaipáva, Ha’e cheñu’ãta hekoha ijyvatehápe.
Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.
Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.
Ha nde reñembo’e ramo, eike nde kotýpe, emboty ne rokẽ, ha eñembo’e nde Ruetépe ne añoháme, ha nde Ruete ohechapáva, pe ñemiháme jepe rejapóva, omyengoviáta ndéve.
Ha Ha’e he’i ichupekuéra: Peju pepytu’umi desiértope, ndaijáigui ichupekuéra okarumi hag̃ua jepe, hetaitereígui umi ou ha ohóva hendápe.
Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.
Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.
Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua. Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.
Ajepy’amongeta ne rembiapoukapy rehe, ama’ẽ porãta nde rape rehe. Oñemboja cherehe umi chembotavyséva, oñemomombyry ningo hikuái ne rembiapoukapýgui. Che Ruete, Nde katu reĩ ag̃uiete chehegui, ha opaite ne rembiapoukapy omombe’u pe añetegua. Yma guivéma aikuaa ne ñe’ẽ porãite opytataha tapia g̃uarã. Ema’ẽmína che jepy’apy asy rehe ha chepe’amína ichugui, ne rembiapoukapýgui ndacheresaráirigui. Eñorãirõ cherehehápe ha chejora, chemoingove jevy ne ñe’ẽ rupi, ere haguéicha. Umi tekove vaívape Nde nereipytyvõmo’ãi, ndojaposéigui hikuái ne rembiapoukapy. Tuichaite ningo nde poriahuvereko, Nde, che Ruete, chemoingovemína ne ñembojovake rupi. Hetaite oĩ chemuña ha chejopýva, ne rembiapoukapýgui katu nañemboykéi. Ahecha ramo umi oñemoĩva nderehe, chepochy, noma’ẽséigui ne ñe’ẽ rehe. Ehechamína, Nde, che Ruete, ahayhuha ne rembiapoukapy, chemokyre’ỹmi jevýna nde poriahuvereko rupi. Chepy’arory ne rembiapoukapy reheve, ndacheresaráiri ne ñe’ẽgui.
Ñanderuete, yvága Jára, ome’ẽ chéve peteĩ juru amokyre’ỹkuaa hag̃uáicha ikane’õvape; Ha’e chemombáy meme pyhareve ha oñe’ẽ che apysápe ahendukuaa hag̃uáicha hemimbo’eteéva.
Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe.
Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.
Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.
Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.
Oipe’a pe yvytu’atã ha hekovia omoĩ ára porã, ha omboguapy jevy pe y pochy. Ñanderuete ombyatyva’ekue Israelguakuéra opaite tetãgui, kuarahyresẽguio ha kuarahyreikéguio, yvatéguio ha yvýguio. Upéi ovy’a joa hikuái pe y oguapy jevy haguére, ha péicha Ha’e oisãmbyhy ichupekuéra og̃uahẽ meve pe barcoguasu pytaha (puérto) peve.
Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.
Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.
Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.
Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.
Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.
Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).
Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.
Nde ningo che mo’ãha, ha Nde reñangareko porã cherehe mba’evaígui; purahéi vy’a reheguávape Nde chembojere. Selah
Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.
Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.
Ovy’aite pe kuimba’e Nde rehekombo’éva, Nde, ore Ruete, ha rehechaukáva ne rembiapoukapy. Nde remombytu’úta ichupe jepy’apy vai árape, ojejo’o aja tekove iñañáva tyvyrã (sepulturarã).
Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua.
Peje ipy’a kangývape: Peñembopy’aguasu, ani pekyhyjétei, pende Jára oútama omyengovia hag̃ua penderehe ija’e’ỹva rembiapo vaikue, Ñanderuete voi oúta, ha peneguenohẽta pende jejopy vaígui.
Umi hekopotĩva ojerure asy ramo Ñanderuetépe, katuete Ha’e ohendúta ichupekuéra ha oguenohẽta ijehasa asýgui.
Pe yvy apýra guive amba’ejerure asýta ndéve, che py’a ikangypáma. Cheguerahamína upe itaguasu ijyvatevéva ári. Nde voi ha’égui che mo’ãhára ha che róga yvate mbarete cherehe ija’e’ỹva renondépe. Taiko opaite árape Nde rekohápe, kyhyje’ỹme aiméta nde pepo guýpe. Selah
Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.
Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.
Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.
Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.
Aguata ramojepe ka’aguy iñypytũha rupi ndakyhyjemo’ãi mba’eveichagua mba’evaígui, Nde repytágui chendive ha nde yvyra po’i ha nde yvyra puku chemoangapyhy.
Añetehápe pende Ruete voi omoangapyhýma Siónpe, oiporiahuverekóta itaperekuérape ha ijyvy perõgui ojapóta Eden, ha iñuguasúgui Ñanderuete ojapóta kokue porã, ipype ojejohu hag̃ua vy’a, tory, purahéi ha ñemomba’eguasu avei.
Pemoangapyhy, pembopy’aguapy che retãme, he’i Ñanderuete. Pema’ẽ porãke, Ñanderuete, pe jaraitéva oúta ipu’aka reheve, ijyvápe ombopoguypáta, pema’ẽ porãke hendive ou yvyarigua rembiapo repyrã ha hetãyguakuéra oguata henonderãme, Ha’e omyengoviáta hembiapokue oĩ haichaite. Ku ovecha rerekua oñangareko háicha hymba aty rehe; ijyva ári ogueraháta umi ovechara’y, ha ipyti’akuápe oñongatu ichupekuéra, mborayhupópe oñangarekóta umi imembyramóva rehe. Máva piko oha’ãra’e umi yeta ipo pytépe ha umi yvága ipo tuichakuépe, mávapa oha’ãkuaa yvy timbo térã ibalánzape umi cérro pohyikue. Máva piko omboguata Ñanderuete Pytu Porãitépe, térãpa ohekombo’éra’e ichupe. Mávapa ohekombo’e ichupe arandupópe ha mávapa ombo’éra’e ichupe pe justícia rapére, térã ombo’éra’e ichupe kuaapy arandúre, térã ohechaukára’e ichupe akãguapy rape. Peikuaa porãke, umi tetã ichupe g̃uarã ku ýicha otykýva kambuchígui, ha ku yvy timbóicha opytáva balánza rehe; péina ápe umi ísla oĩva yguasúpe ojogua ichupe g̃uarã peteĩ yvyku’i ra’ỹimíme. Pe Líbano ka’aguýpe jepeve ndahetamo’ãi jepe’a hatápe g̃uarã, ha imymbakuéra heta ramojepe imbovyetéta ikuave’ẽmbyrãme g̃uarã. Opaite tetãnguéra ku mba’evetérõ guáicha ichupe g̃uarã; Ha’e ohecha umía mba’evete ramo. Máva ndivépa pembojojase Ñanderuetépe, térã mba’eichagua ta’ãngápa pejapose ichupe g̃uarã. Kuimba’e ikatupyrýva ojapokuaa ijára gua’u ra’ãnga ha pe ombohykukuaáva óro oipyso hese óro ha omoĩ hese peteĩ cadena’i óro morotĩguiguáva. Peñe’ẽ Jerusalen py’apýpe ha sapukaipópe peje ichupe og̃uahẽma pe ára ijehasa asy opamaha ha hembiapo vaikue oñemyengoviapamaha ohupity haguére jehavira jo’a Ñanderuetégui, opaite hembiapo vai ojapova’ekue rehe.
Anítei peñemokangy pende jeroviápe, péva rupi oñeme’ẽ peẽme mba’e ndetuicháva. Peikotevẽ paciéncia rehe, pejapo hag̃ua Ñanderuete rembipota ha pehupity hag̃ua Ha’e oprometemava’ekue peẽme.
Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre. Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo; Pene akã rague jepeve ojepapáma. Upévarupi ani pekyhyje. Peẽ, mba’eguasueteve heta guyra’ígui.
Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.
Cheporiahuverekomína ko’ág̃a tachemoangapyhy, Nde ere hagueichaite ne rembiguáipe.
Pe py’aguapy porã ningo omopu’ã ñande rete; ha pe mba’epotaitereíva katu ombyai ñande rete.
Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.
Cheapensa ramo che ha’atama’aína, ne mborayhu katu, che Ruete, chejoko jevy. Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.
Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.
Ñanderuete ohóta ne renonderãme; Ha’e oĩta nendive, ndojeimo’ãi ndehegui ha nanemotyre’ỹmo’ãi; ani rekyhyjétei ha ani reñembopy’amirĩtei.
Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).
Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.
he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.
Ku sy omoangapyhy háicha imembýpe, péicha Che voi pomoangapyhýta peẽme, ha Che pomoangapyhýta Jerusalen távape.
Peĩ yvagakuéra pepurahéike, ha nde yvy evy’aitéke, peẽ cerrokuéra pesapukái puraheipópe, Ñanderuete omoangapyhýgui hetãme, ha oiporiahuvereko jevy umi ohasa asývape.
Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).
Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.
Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.
Ani rekyhyje, nde Jacóbo yso, peẽ Israelgua pene mbovy ramojepe, Che ningo pene pytyvõhára, Che voi pende Ruete, Israel Jára, peneguenohẽva pende jejopy vaígui.
Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.
Upévare ningo umi ohasa asýva Ñanderuete oipotágui, tomoĩ hi’ánga Ñanderuete pópe ha oñemomirĩvo tojapo mba’eporã.
Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.
Upéicha ojehu, rojejopy vai ramojepe opaite mba’épe ndoropoíri ore jeroviágui ha orepy’angata ramojepe, ndaorepy’aropúi. Heta oñemoĩ ramojepe orerehe Ñanderuete ndaorerejái ore año, ambuekuéra orereity ramojepe, ndaikatúi orehundieté hikuái.
Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.
Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.
Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.
ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.
Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.
Ñanderuete rape iporãite, ha ore Ruete ñe’ẽ ipotĩete. Ha’e voi omo’ã opaite hese ojeroviávape.
Ñanderuete he’íva guive katuete oikova’erã avei, Ha’e ningo umi hese ojeroviáva mo’ãha.
Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.
Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.
Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,
Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.
Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.
Ore roha’ãrõ Nde oremboguata porã ore rekove rape rehe nde justícia rupi; ore ánga ijy’uhéi nembotuicha ha nemomba’eguasu hag̃ua. Che py’aite guive roheka pyharekuépe, ha che pytu porã chepype oĩva oikose nendive, upévare apu’ã ko’ẽ mboyve aiko hag̃ua nendive; yvyariguakuéra ohendúva guive ne rembiapoukapy oikuaa voi mba’éichapa oiko porã hag̃ua oñondive.
Ñanderuete voi ningo omoheñoihína pendepype hembipota porã ha Ha’e omongakuaa hembipota pende rekovépe pejapopa peve Ha’e oipotáva guive.
Ñanderuete rembiapoukapykuérape ndaipóri jejavy, omoangapyhy katu yvyariguakuérape, opaite mba’e Ñanderuete he’íva guive katuete ojehu avei, Ha’e omoaranduhína umi oikuaa’ỹvape. Ñanderuete rembiapoukapy iporã ha ombohory yvyarigua py’apy, Ñanderuete rembiapoukapy hesakã ha ohesape porã yvyarigua resakuéra.
Ñanderuete katu oikohína chéve g̃uarã che mo’ãha ramo, ha Ha’e che itaguasu (salvador) che akañykuaahápe.
Eñangareko porãve nde py’apy rehe opaite ambue mba’égui, ichugui heñóigui pe tekovete.
Upévagui Nde voi ehekombo’e ichupekuéra oguata hag̃ua hekoitépe nde rape rupi, Nde voi rehechaukamava’ekue ichupekuéra.
Ha opaite mba’e peẽ pejeruréva che rérape, upéva Che ajapóta avei. Che Ruete oñembotuicha hag̃ua chérupi. Peẽ pejerure ramo che rérape, Che ajapova’erã.
Ymaite guivéma Ñanderuete oñeñanduka chéve, ha he’i: Che rohayhuete, mborayhu apyre’ỹme, upévagui roiporiahuvereko tapia g̃uarã.
Ani peñemomandu’átei umi mba’e ohasamava’ekue rehe, ha ani peguerútei pene akãme umi mba’e ymaveguare. Pema’ẽ porãke, Che ajapo mba’e ipyahúva; pya’ete ojekuaáta, ndapehechakuaái piko. Ambohape jevýta tape yvy perõ rupi ha ysyry, heñoi’ỹháme mba’eve.
Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.
Peheka pende Ruetépe, ikatu aja ojejohu ichupe, pehenói ichupe hi’ag̃ui rehe gueteri pendehegui.
Ojehu ningo ojehai haguéicha Ñanderuete kuatiañe’ẽme: Kuimba’e ha kuña resa ndohechaiva’ekue, ijapysa nohenduiva’ekue ha ipy’apýpe naheñoiriva’ekue, Ñanderuete ombosako’íma umi ichupe ohayhúvape g̃uarã, (Isaías 64,4).
Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.
Ñanderuete voi ningo chemombaretéva ha Ha’e oñangareko porã cherehe, che py’apýpe ajerovia hese, upévagui ahupity iñepytyvõ, ha vy’apópe che ñe’ã opurahéi, omomba’eguasu hag̃ua ichupe.
Umi yvy opytáva cerrokuéra pa’ũme toñemboyvate, ha toñembokarape umi cérro ha yvy pu’ã; ha umi ikarẽva toñemokarẽ’o, ha umi yvy oñembojoja’ỹva toñembojoja. Upéramo Ñanderuete ohechaukáta heko jajaipa, opaite yvyariguakuéra ohecha hag̃ua; Ñanderuete juru he’iva’ekue voi opa ko’ã mba’e.
Ani pekyhyjétei peẽ, Ñanderuete iglesiayguakuéra napenderetái ramojepe, pende Ruete voi ome’ẽta peẽme hetãguasu.
Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia, ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza,
Rehechaukáta chéve pe tekove rape, nde ypýpe oĩ vy’a añetetéva, ha péva ndopamo’ãi araka’eve.
Upéramo pende apysa ohendúta pe ñe’ẽ pende rapykuéguio he’íva: Kóa ha’ehína pe tape, peiko ipype; ha ani pejepoítei pende akatúa gotýo ni pepia pende asu gotýo.
Upévare che hermanokuéra, che ajerure asy peẽme, Ñanderuete poriahuvereko rehe, peme’ẽmba pende rekove Ñanderuetépe g̃uarã peteĩ kuave’ẽmby oikovévaicha, ipotĩva ha ombohorýva ichupe, kóva ningo pe cúlto añeteguáva ñame’ẽkuaáva Ñanderuetépe. Pejohayhu oñohermánoicha, pejo’apo mba’e ramo, péva he’ise emomba’eve ne hermánope ndejehegui voi. Ani peneate’ỹ pene rembiapópe, peñemokyre’ỹ katu pende pytu porãme, ha pejapopa Hesu Crísto he’íva guive peẽme. Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei. Peipytyvõ hermanokuérape hemikotevẽme, peporombohupa porãkena. Pehovasa umi ndaija’éiva penderehe, pehovasa ha ani pemaldeci. Pevy’a umi ovy’áva ndive, ha pejahe’o umi ojahe’óva ndive. Peiko peteĩ py’ápe oñondive; ani peñembotuicha, peñemomirĩ uvei; ani pejeguereko iñarandúva ramo. Ani pemyengovia avavépe ivaíva ivaívare, peñeha’ãmba katu pejapo hag̃ua mba’e iporãva opavavépe g̃uarã. Peñeha’ãmbáke, ijáva guive peẽme, peiko hag̃ua py’aguapýpe opavave ndive. Che hermanokuéra pohayhúva, ani peñevenga peẽ voi pende rapicha rehe, pemoĩmba katu Ñanderuete pópe. Ojehai voi Ñanderuete kuatiañe’ẽme: Che avengáta ha amyengoviáta opavave rembiapo vaikue, (Deuteronómio 32,35). Ha anítei pende reko ojogua kuimba’e térã kuña ko’ag̃agua rekópe, upéva rãngue peheja pende reko oñemoambue hag̃ua ohóvo (Pytu Porãmbáva rupi) pende py’apy rembipotapype, peikuaa hag̃ua Ñanderuete rembipota iporãha, hekópe ha oporombohorýva.
Peime ramo chepype, ha Che ñe’ẽ oĩ ramo pendepype, opaite mba’e pejeruréva guive oñeme’ẽta peẽme.
Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.
Ehendumína, Nde, ore Ruete, che mba’ejerure asy, che ñembo’e rehe ejapysakamína. Pe yvy apýra guive amba’ejerure asýta ndéve, che py’a ikangypáma. Cheguerahamína upe itaguasu ijyvatevéva ári.
Oñembyai ramojepe che ro’o ha che py’a, Nde, che Ruete repytava’erã che mba’erepyetéva.
Pe karu’ỹ Che ahayhúva péicha: Pepoi pene rembiapo vaígui (angaipágui), pepoi umi peẽ pejopy asývagui ha pemopẽ opaichagua cangálla peẽ voi pemoĩva pende rapicha ati’ýre,
Che hermanokuéra ani japorohayhu ñande jurúpente térã ñe’ẽ rei rupínte, japorohayhu katu uvei añetehápe ñane rembiapo porã rupi. Upéichamante jaikuaa ñande jaikoha ita’ýra térã itajýra añeteguáva ramo ha upéichamante Ha’e ombopy’aguapýta ñande py’apyñe’ẽ (conciéncia).
Opaite ko’ã mba’evai ñande jagueropu’akapa Hesu Crísto rupi, ñanderayhúgui. Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.
Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe. Umi okyhyjévape ichugui Ha’e ojapo mba’eporã, ha ohenduhína avei isapukái asykuéra, ha oguenohẽ ichupekuéra ijejopy vaígui.
Peẽ ningo tetãyguakuéra resape; pe táva oñemopu’ãva cérro ru’ãme ndaikatúi oñemi. Avave nomyendýi peteĩ tataindy omoĩ hag̃ua peteĩ mba’yru guýpe, tataindy renda árinte uvei, ohesapepa hag̃ua oĩva guive pe óga ryepýpe. Péicha tohesape avei pende resape pende rapichakuéra apytépe, ohecha hag̃ua hikuái pene rembiapo porã ha omomba’eguasu hag̃ua pende Ruetépe oĩva yvagakuérape.
Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.