149 Versíkulo bíblico oñeʼẽva pyʼaguapýre pe torménta mbytépe

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve. Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Ñanderuete ñanemo’ã ha ñanemombaretéta jajejopy vai jave, Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra. Ñanderuete, yvága atykuéra Jára, oĩ ñanendive, Jacóbo Jára ningo ñane mo’ãhára. Selah upévarupi ndajakyhyjeiva’erã, jepémo ko yvy ojeipa hendágui ha cerrokuéra ho’apa ramo yguasúpe. Jepémo okororõ ha omymýi vaipa hi’y ha ipochyetereígui omboryryipa umi cérro. Selah

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Upe oikóva pe Jára Ijyvatetéva ãme ha pe Ipu’akapáva poguýpe, Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe. Ñanderuete he’íta hi’angelkuérape oñangareko hag̃ua opaite nde raperã rehe. Hi’angelkuéra ndererahava’erã ipopekuéra ani hag̃ua ita rehe reñepysãnga. Nde rehasa ramo jepe leõ ha mbói ári, nde rehundipáta ichupekuéra. Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra. Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe. Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã). he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã. Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã. Ndépa ha’ehína pe Crísto ouva’erãva térãpa roha’ãrõta gueteri ambuépe. Che cangálla ningo hu’ũ asy ha ivevúi pe cárga aguerahaukáva peẽme.

Ko’ã mba’e ko’ãva Che ha’éma peẽme, peẽ pendepy’aguapy hag̃ua chepype. Peẽ ningo pehasa asyva’erã ko yvy ape ári, pejerovia katu ko múndo kóva oĩmaha che poguýpe.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Opaite pende jepy’apykuéra peity hi’ári, Ha’e ningo oñangarekohína penderehe.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Aguata ramojepe ka’aguy iñypytũha rupi ndakyhyjemo’ãi mba’eveichagua mba’evaígui, Nde repytágui chendive ha nde yvyra po’i ha nde yvyra puku chemoangapyhy.

Aníke peiko umi hakate’ỹvaicha, oikóva pirapire rekávonte, pevy’a uvei peguerekomíva reheve; Ñanderuete voi he’i: Che ndapoimo’ãi araka’eve pendehegui ha araka’eve Che ndapohejamo’ãi tyre’ỹ ramo, (1 Timotéope 6,6; Josue 1,5). Ja’e uvei jeroviapópe ha kyhyje’ỹre: Ñanderuete ningo che pytyvõhára ha ndakyhyjemo’ãi: Mba’e piko ikatúne ojapo cherehe che rapichakuéra, (Salmokuéra 118,6).

Hesu Crísto, pe py’aguapy Jára, tome’ẽ peẽme ipy’aguapy peiko porã hag̃ua oñondive opaite árape ha opaite hendápe ipy’aguapýpe.

Ejeroviáke nde py’aite guive Ñanderuete rehe, ha ani rejejoko ne arandu rehe. Nemandu’áke hese opaite nde rape rehe, ha Ha’e omyesakãta ne raperã.

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Ahekágui Ñanderuetépe, Ha’e cherendu, ha opaite mba’e chemongyhyjéva oipe’a chehegui.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Ema’ẽ porãke, Che ha’éma ndéve eñeha’ãmba ha eñembopy’aguasu; ani rekyhyjétei ha ani ndepy’akangýtei, pende Ruete, pende Jára, oĩta nendive mamo rehoha rupi.

Ñanderuete ndivénte che ánga opytu’ukuaa, ichuguínte ou chéve ñepytyvõ. Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe). Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa, ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha. Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

Ipepópe neñuãmbáta ha kyhyje’ỹme reiméta ipoguýpe, heko añete nemo’ãta ha Ha’e oñangarekóta nderehe. Pyhare aja nderekyhyjemo’ãi mba’evégui, térã hu’ýgui ojepoíva arakuépe.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Og̃uahẽ ramo pe ára che akyhyjeha, nderehe katu ajerovia.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

reikógui chéve che pytyvõhára ramo, ha péicha nde pepo guýpe chepy’arory asýta. Che ánga oñemboja nderehe, nde po akatúa chejoko porã.

Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Mávapa térã mba’épa upéicharamo ñandepe’áne Hesu Crísto mborayhúgui: Jehasa asy, térãpa kyhyje, térãpa persecucion, térãpa ñembyahýi, térãpa opívo, térãpa pelígro, térãpa jejuka. Ojehai háicha Ñanderuete kuatiañe’ẽme: Nderehehápe katu orejuka hikuái opaite árape; rojeguereko ningo umi ovecháicha ojegueraháva ojejuka hag̃uáme (Salmokuéra 44,22). Opaite ko’ã mba’evai ñande jagueropu’akapa Hesu Crísto rupi, ñanderayhúgui. Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái, ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Opaite mba’e ikatu chéve g̃uarã, Ha’e chemombaretégui.

Ñanderuete tapia oĩ che resa renondépe; ha Ha’e oĩgui che akatúape nda’amo’ãi.

Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

Upéicha ojehu, rojejopy vai ramojepe opaite mba’épe ndoropoíri ore jeroviágui ha orepy’angata ramojepe, ndaorepy’aropúi. Heta oñemoĩ ramojepe orerehe Ñanderuete ndaorerejái ore año, ambuekuéra orereity ramojepe, ndaikatúi orehundieté hikuái.

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Noñeme’ẽipa mokõi guyra’i média hóra tembiapo repy rehe, ha peteĩ jepe ndo’amo’ãi pende Ruete oikuaa’ỹre. Felípe ha Bartolome, Tomas ha Matéo, pe impuésto mbyatyhára; Jacóbo, Alféo ra’y, ha Tadéo; Pene akã rague jepeve ojepapáma. Upévarupi ani pekyhyje. Peẽ, mba’eguasueteve heta guyra’ígui.

Ajesaupíta umi cérro rehe, upégui oúta chepytyvõtava. Ñanderuete ningo chepytyvõta, Ha’e ningo yvagakuéra ha yvy apohare.

Anítei peku’e, ha peikuaa Che ha’eha pende Ruete, tetãnguéra chemomba’eguasúta ha che poguýpe opytapa ko yvy ha opaite tetãnguéra.

Peje ipy’a kangývape: Peñembopy’aguasu, ani pekyhyjétei, pende Jára oútama omyengovia hag̃ua penderehe ija’e’ỹva rembiapo vaikue, Ñanderuete voi oúta, ha peneguenohẽta pende jejopy vaígui.

Che ánga, ejerovia Ñanderuete rehe, toñemokyre’ỹ ha toñemombarete che py’apy ojerovia porã hag̃ua Ñanderuete rehe.

Nde ningo che mo’ãha, ha Nde reñangareko porã cherehe mba’evaígui; purahéi vy’a reheguávape Nde chembojere. Selah Ñanderuete he’i: Che rohekombo’éta ndéve ha ahechaukáta ndéve pe tape moõrupípa nde reguatava’erã, Che ahechaukáta ndéve che rembipota ha ajesarekóta nderehe.

Ha Che ame’ẽ ichupekuéra tekove tapia g̃uarãva, ha noñehundimo’ãi máramo, ha avavete ndoipe’amo’ãi ichupekuéra che pógui. Che Ruete ipu’akapa ha Ha’e voi ome’ẽma chéve umi ovechakuéra, ha avavete ndoipe’amo’ãi ichupekuéra che Ruete pógui.

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.

Peha’ãrõ vy’apópe ani penekangy ou ramo pe jepy’ara’ã, peropu’akakuaákena, peñembo’epeína uvei.

Emoĩna Ñanderuete pópe nde rekove rape, Ha’e nemboguata porã hag̃ua; ha hesénte ejerovia, Ha’e oñangareko porã hag̃ua nderehe.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

ha Hesu he’i ichupekuéra: Mba’érehe piko pekyhyje, peẽ ningo pejerovia’iete Ñanderuete rehe. Upévo Ha’e opu’ã ha oñe’ẽ pohýi pe yvytu ha pe yguasúpe, ha opi pe yvytu ha pe y pochy oguapypa.

Ñanderuete oĩ guive chendive ndakyhyjemo’ãi yvyarigua rembiapo vaígui.

Ñanderuete ohóta ne renonderãme; Ha’e oĩta nendive, ndojeimo’ãi ndehegui ha nanemotyre’ỹmo’ãi; ani rekyhyjétei ha ani reñembopy’amirĩtei.

Hesaráinepa peteĩ kuña imemby kambúvagui, ndoiporiahuverekovéi hag̃ua imemby hyégui osẽva’ekuépe. Ha pe sy hesarái ramojepe, Che araka’eve ndacheresaraimo’ãi ndehegui. Peikuaa porãke, che po pytépe ahai ne ra’ãnga; ha nde korapyjere yvate tapiaite oĩ che resa renondépe.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Mba’érehepa nde che ánga nekangy, ha neangekõi chepype. Ejerovia Ñanderuete rehe, ha emomba’eguasu jevy che pytyvõhára ha che Jarateépe.

Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva. Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

Peñemombaretéke opavave peẽ pejeroviáva guive Ñanderuete rehe, ha pemokyre’ỹ pende py’apy.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Ñanderuete réra katu peteĩ óga yvate oñemombarete porãva; hendápe oñaniva’erã pe heko potĩva ojesalva hag̃ua.

Umi ojeroviáva Ñanderuete rehe ojoguaite Jerusalen cérrope, ndoku’éiva, opyta hatã uvei opaite ára oĩháme. Umi cérro omongora háicha Jerusalénpe, péicha avei Ñanderuete oiko hetã jerekue rehe opaite árape.

Ha justíciagui heñóita tapia g̃uarã py’aguapy, angapyhy ha kyhyje’ỹ.

Pe yvy apýra guive amba’ejerure asýta ndéve, che py’a ikangypáma. Cheguerahamína upe itaguasu ijyvatevéva ári.

Ore roha’ãrõ Ñanderuete omoñepyrũva’ekue pe tembiapo iporãva pendepype, Ha’e voi penemog̃uahẽtaha hu’ãme, Hesu Crísto ou jevyha árape.

Umi jepy’ara’ã pehupitýva ndaipohyietereíri, yvy arigua reheguánte, Ñanderuete ndohejamo’ãi ipohyieterei pegueropu’aka’ỹ hag̃uáicha, hendivénte voi oĩ pe pohã pegueropu’aka hag̃ua ha Ha’e ome’ẽta peteĩ tape peropu’akapa hag̃ua.

Ha Hesu pya’e oñe’ẽ ichupekuéra, ha he’i: Peñembopy’aguapy, Chénteko, ani pekyhyje.

Ñanderuete hi’ag̃ui umi ohasa asývagui, ha oipytyvõ umi oñembyasývape ojapo vai haguére.

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Peñemokyre’ỹke Ñanderuete pu’akaguasu rupi, peẽ penembarete hag̃ua. Peiporu hekópe Ñanderuete ñorãirõ rembiporukuéra peñemoĩ hag̃ua Satana rehe, ha’e pende reitységui iñuhãme.

Che, Che voi ningo, pomoangapyhýva. Mba’érehepa rekyhyje yvyarigua omanótavagui, iñemoñarẽnguéra ojogua umi kapi’ípe.

Jaiko jajeroviágui, ndaha’éi ñande jahecháva rehe.

Cheporiahuverekomína, Nde, che Ruete, eiporiahuverekomína, che ánga ojeroviágui nderehe ha añemo’ãta nde pepo guýpe ohasapa peve che jepy’apy vai. Nde poriahuvereko tuicha og̃uahẽ yvága guive, ha ne mborayhu ojepyso araíre. Reñemboyvate yvagakuéra ári, Nde, che Ruete, opa rupiete yvy ape ári toñemyasãi nde reko jajaipa. Amba’ejerure asy Ñanderuete Ipu’akaitévape, Ha’e chepytyvõ hag̃ua.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure. Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

Che ajerovia ne ñe’ẽ rehe, Nde chemo’ã ha reñangareko porã haguére cherehe.

Che ningo pe parral máta, ha peẽ ningo che rakãnguéra. Pe cherehe ojoajúva, ha Che hese, upévamante hi’a porã. Peẽ ndaikatúi pejapo mba’evete cherehe’ỹ.

Ore Ruete, oreporiahuvereko, nderehe rojerovia; Nde voi ningo ore jyva mbarete meme pyhareve, upévare oreguenohẽ ore jepy’apy vaígui og̃uahẽ vove.

Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui. Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.

Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.

Ñanderuete, Nde ningo che itaguasu (ajesalva hag̃ua) ha che róga yvate oñemombaretepyréva ha che pytyvõharaite; Nde, che pytu’u rendaitéva, nderehe ajerovia tapiaite; che mo’ãhára, Nde reñangareko porã cherehe, Nde reĩ chendive chesalva hag̃ua.

Ha’e oñangarekóta cherehe hogaguasúpe og̃uahẽ jave pe ára ivaipáva, Ha’e cheñu’ãta hekoha ijyvatehápe.

Upéicha ramo ovy’aite mayma ojeroviáva guive nderehe, tovy’a joaite hikuái opaite ára peve, Nde remo’ã porãgui ichupekuéra, ha tahory ndereheve umi ohayhúva guive nde réra.

Hesu he’i jevy ichupekuéra: Che ningo ko múndo resape. Upe oúva che rapykuéri ndoikomo’ãvéima pytũnguýpe, oguerekóma uvei pe tekove resape.

Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.

Nde kuarahy ndoikemo’ãvéi araka’eve, ha ndoguemo’ãi avei nde jasy rendy; Ñanderuete voi oikóta nde resapehára ramo opaite ára peve, ha opáta umi ára reñemonde hag̃ua aovosakuépe.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy. Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe. Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe. Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre. Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua. Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva. Toñemotĩ ha toñemondyipa umi oñembohorýva cherehe, ha chehundiséva. Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi. Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui. Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua.

Hesu Crísto ningo naiñambuéi, peteĩchánte kuehe, ko ára ha ára atyguasurãme g̃uarã (por los síglos).

Ñanderuete mborayhu katu oĩ peteĩ ára atyguasu guive ambue ára atyguasu peve umi okyhyjéva ichugui ndive, ha ijustícia opyta iñemoñarenguéra peve, umi ojapóva guivénte iñe’ẽme’ẽ, ha umi imandu’áva hembiapoukapy rehe ojapo hag̃ua hekoitépe.

Pe jerovia onace pe evangéliogui, ha pe evangélio ou Hesu Crísto ñe’ẽgui, (Isaías 53).

Reñeno vove, nderekyhyjemo’ãi, ha reñeno rire reke porãta.

Ñanderuete chemombarete ha upévare aropurahéita ichupe, Ha’émante cheguenohẽ che jejopy vaígui. Oñehendu heko potĩva rógape peteĩ sapukái rory ha ñepytyvõ reheguáva, Ñanderuete po akatúape oĩgui pu’akaguasu. Ñanderuete ohupi ramo ipo akatúa ohechaukáta ipu’aka.

Koichagua mba’e Nde rejapo nderehe ojeroviáva rayhupápe, ko’ã mba’e ko’ãva noñehendúi araka’eve ha ndaipóri voi ohechámava koichagua mba’e.

Tou ne retãguasu, tojejapo avei ne rembipota ko yvy ári yvága peguáicha.

Ne rembiapoukapy ndoikói rire che py’apýpe chembovy’a hag̃ua, che jepy’apy chejukava’erãmo’ã. Araka’eve ndacheresaráiri ne rembiapoukapýgui, umíva rupi Nde voi chemoingovéta.

Ñanderuetépe g̃uarã ndaipóri mba’eve ikatu’ỹva ojapo.

Peẽ pehendu rire pe ñe’ẽ añeteguáva, pe evangélio oporosalváva, pejerovia avei Hesu Crísto rehe ha peñemarcáma pe Pytu Porãmbávape. Ko Pytu Porãmbáva ningo pe adelánto (ñemohenonde) umi mba’erãgui oñeme’ẽtava ñandéve g̃uarã. Ko jopói kóva térã ko salvacion rupi ñande japytáta imba’eteerã ramo, ñamomba’eguasu hag̃ua Ñanderuete reko jajaipávape.

Hesu Crísto oguerahava’ekue hetére ñane rembiapo vai kurusúre, ñande ñamano hag̃ua tembiapo vaípe g̃uarã ha jaiko justíciape g̃uarã. Ijekutukue rupi ningo peẽ pekuera.

Ñanderuete nome’ẽi ñandéve peteĩ Pytu Porãva ñanemokangýva, ome’ẽ uvei ñandéve peteĩ Pytu Porãva ipu’akáva, oporohayhúva ha iñarandúva.

Ha’ekuéra ojejopy vaiete jave, Ha’e ojepy’apy avei, upévagui Ñanderuete ombou ijyvága rembijokuái oipytyvõ hag̃ua ichupekuéra, Ha’e ipy’aporã ohay’úgui ichupekuéra. Ha’e ojogua ichupekuéra ha omopu’ã jevy jey ha ohupi ichupekuéra ijyva ári ymaite guive.

Ñanderuete ohayhuetégui opaite tetãyguakuérape Ha’e ome’ẽ Ita’ýra peteĩetévape, opaite ojeroviáva guive hese ani hag̃ua oñehundi, oguereko hag̃ua uvei pe tekove tapia g̃uarãva.

Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.

Che añeno ramo, ake porã ha apáy py’aguapýpe, che Ruete oñangareko porãgui cherehe. Ndakyhyjemo’ãi 10.000 soldádogui, oñembo’y ramojepe che jerekuévo.

Peẽ pehasa asy ramo pende jerovia rehehápe, Ñanderuete penderovasáta. Ani pekyhyje, ha’ekuéra pendejopyete ramo, ani pene’angekõitei.

Py’aguapypópe añeno ha upeichaite ake avei, che Ruete, Nde rupínte aiko porãkuaa.

Ha oime ramo pende apytépe peteĩ iñarandu’ỹva, tojerure Ñanderuetépe, Ha’e katuete ome’ẽta arandu oimeraẽ ojerurévape, ha nombotovemo’ãi.

Upévare ñamomba’eguasu Ñanderuetépe, Ha’e voi ñanemombareteiteve hag̃ua, ñande jajeruréva térã ñapensakuaávagui, ipu’aka rupi, ha omba’apóva ñandepype. Upéicharamo Hesu Crísto iglesiaygua tomomba’eguasu Ñanderuetépe Hesu Crísto rupi, ko ára atyguasúpe ha opaite ára atyguasurãme, péva he’ise tapia g̃uarã, taupéicha (amen).

Ne mborayhu iporãve jeikovégui, che juru nemomba’eguasu manteva’erã. Che jurúpe che romboetéta, nde rérape añembo’éta ahupívo che pokuéra (yvága gotýo).

Iko’ẽmbátama, ha pe ára og̃uahẽmbotáma, upévare tekotevẽ jaheja pe tembiapo vai ha jajapyhy pe ñorãirõ rembiporu tesape rendy reheguáva.

Pe mborayhu añeteguáva ogueropu’aka opaite mba’e ha opaite mba’e oguerovia, opaite mba’e oha’ãrõ ha ogueropu’akapa.

Hesu Crísto ñanembopy’aguapy oñondive, pe tápia (barréra) oĩva’ekue ñane pa’ũme Ha’e oitýma, upévare Israel retãygua ha tetã ambueygua oñombopy’apeteĩma avei Hesu Crísto rupi, Ha’e omboykégui pe ñorãirõ oĩva’ekue ñande apytépe.

Añetehápe, vy’apópe ha torypápe pesẽ joáta, ha py’aguapy reheve peju jevýta; umi cérro ha umi cerrorusu opurahéi joáta pene renondépe, ha umi yvyra ñu rupigua ojepopete joáta.

Pe Pytu Porãmbáva ñanemokyre’ỹ ha ñanepytyvõ ñamboyke hag̃ua ñande py’apy kangy ha ñanepytyvõ ñañembo’e hag̃ua hekoitépe Ñanderuetépe, Ha’e oipota háicha ha ovale hag̃uáicha ichupe g̃uarã upévare pe Pytu Porãmbáva ojerure ñanderehe pyahẽ oje’e’ỹkuaáva reheve.

Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme. Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme. Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã. Upévare pemombarete jevy pende jyva ikane’õva ha pene renypy’ã ikangýva. Pemyatyrõ pende rape ikarẽva, ani hag̃ua pende pykuéra ikaráu, tokuera uvei. Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope, ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe. Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31). Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope). Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka. Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra. Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.

Pe py’apy rory ombohova porã ijárape ha pe py’apy oñembyasýva omokangy ichupe.

Ndajeruréi Nde reipe’a hag̃ua ichupekuéra ko yvy árigui, ajerure uvei Nde reñangareko hag̃ua hesekuéra mba’evaígui (Añagui).

Ñanderuete voi omoĩmbava’erã imba’eitágui opaite peikotevẽva guive, Hesu Crísto reko jajaipa rupi.

Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.

Nde katu, che Ruete, che Jára oporoporiahuverekóva ha ipy’a porãva, nembegue ndepochy hag̃ua, ha nde poriahuvereko ha nde py’aporã katu ituichaite.

Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).

Hesu Crísto ndopoimo’ãi iñe’ẽ ome’ẽva’ekuégui, Ha’e voi penemombarete ha oñangarekohína penderehe mba’epochýgui.

Ajepy’apy jave ahenói Ñanderuetépe, ha Ha’e cherendu ha chemosãso. Ñanderuete oĩ guive chendive ndakyhyjemo’ãi yvyarigua rembiapo vaígui.

Nde remo’ã haguére ikangývape, Nde reipytyvõ haguére umi ojejopývape, Nde reiko haguére ñemo’ãha ramo oky tuicha ha kuarahy hakuete jave, umi iñañáva pu’aka opa reíta ku ama opa rei háicha ojohu guive pe óga tápiare.

Ñanderuete ojapova’erã mba’e iporãitéva chéve g̃uarã, ne mborayhu ndopamo’ãi araka’eve, ani repoi ne rembiapokuégui.

Ndajeruréi katu hesekuéra añónte, ajerure avei umi ojeroviátava nderehe iñe’ẽnguéra rupi. Opavavete oiko hag̃ua oñondive peteĩ py’ápe, Nde reiko háicha chepype, ha Che aiko háicha ndepype, upéicha ha’ekuéra oiko hag̃ua avei ñandepype, yvyariguakuéra oguerovia hag̃ua Nde chembou hague.

Upéramo pende apysa ohendúta pe ñe’ẽ pende rapykuéguio he’íva: Kóa ha’ehína pe tape, peiko ipype; ha ani pejepoítei pende akatúa gotýo ni pepia pende asu gotýo.

Ñanderuete rehe ajerovia, upévare ndakyhyjemo’ãi. Mba’épa umi yvyarigua ojapokuaa cherehe.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Ñanderuete tome’ẽ heko jajái mba’eitagui pe pu’aka penemombareteve hag̃ua pehóvo pendepype Ipytu Porãite rupi. Hesu Crísto oiko hag̃ua pende py’apýpe pende jerovia rupi, ha pene mborayhu toñembohapo mbareteha tokakuaa porãve ohóvo,

Ha pe Tesape ningo ohesape pytũmbýpe, ha pe pytũ ndaipu’akái hese.

Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua. Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

Ku sy omoangapyhy háicha imembýpe, péicha Che voi pomoangapyhýta peẽme, ha Che pomoangapyhýta Jerusalen távape.

Peikuaa porãke, Che pombopu’akáta pepyrũ hag̃ua mbói ha alacran rehe, ha pendepu’aka hag̃ua Satana rehe, ha’e katu ndaikatúi ojapo mba’eve ivaíva penderehe.

Ñanderuete katu oikohína chéve g̃uarã che mo’ãha ramo, ha Ha’e che itaguasu (salvador) che akañykuaahápe.

Ani pejepy’apy ni peñemondýi pende py’apýpe, pejerovia uvei Ñanderuete rehe ha pejerovia avei cherehe.

Ñanderueténte omboguata porãkuaa yvyariguakuérape, oguata ramo hape porãre. Ha’e oñepysãnga ramojepe ndo’apamo’ãi, Ñanderuete ojokótare ichupe ipógui.

Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.

Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a. Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.

Ñanderuete ndivénte che ánga opytu’ukuaa, ichuguínte aha’ãrõ ñepytyvõ. Ha’émante che itaguasu ha che pytyvõharaguasu. Ha’e che mo’ãhára, ndachepysyrymo’ãi.

Ipy’a rory umi iñembyahýiva ha ijy’uhéiva ñembojovake heko pegua rehe, oñemohyg̃uatãva’erã ichupekuéra.

Che hermanokuéra, che ningo nda’eséi ahupitypáma hague, peteĩ mba’e año ajapo, cheresarái umi mba’e tapykuépe opytava’ekuégui ha añeha’ãmba ahupity hag̃ua umi mba’e oĩva che renonderãme. Aguata ahávo ag̃uahẽ meve hu’ãme ha ahupity hag̃ua che rembiapo repy, Ñanderuete ome’ẽtava opavave umi Ha’e ohenoiva’ekuépe Hesu Crístope g̃uarã.

Hesu Crísto ñe’ẽ porãite hi’añete ha ija oimeraẽva ojapyhy hag̃ua. Hesu Crísto ou ko yvy apére osalva hag̃ua angaipavórape, ha ijapytépe che pe ituichaveva’ekue. Upévare Hesu Crísto chemyenyhẽ iporiahuverekógui, péva ijopói chéve g̃uarã, ojehechauka hag̃ua che rekove rupi, imborayhu tuicha oha’ãrõva opaite ojeroviátavape g̃uarã, ohupity hag̃ua avei Hesu Crísto rupi pe tekove opa’ỹva.

Pemombarete pende po ikane’õva, ha pemohatã pene retyma ikangýva. Peje ipy’a kangývape: Peñembopy’aguasu, ani pekyhyjétei, pende Jára oútama omyengovia hag̃ua penderehe ija’e’ỹva rembiapo vaikue, Ñanderuete voi oúta, ha peneguenohẽta pende jejopy vaígui.

Upévare che hermanokuéra ahayhúva, peñembo’y hatãkena, pemỹi’ỹre (akatúape ni asúpe, Deuteronómio 28,14), pemba’apo katu kyre’ỹme pene rembiapópe, ha peikuaa porãke opaichagua tembiapo pejapóva guive Ñanderuetépe g̃uarã ndareiriha (ndojeitymo’ãiha tesaráipe).

Ñanderuete toiko ore Jaratee ramo opaite árape g̃uarã, Ha’e ñanesãmbyhyva’erã pe ñemano amo gotyove g̃uarãgui jepeve.

upeichavéramo jepe che aĩ tapiaite nendive, Nde chejoko porãgui che po akatúagui. Nde chemboguata porã ne rekombo’e rupi, ha ipahápe chemog̃uahẽ porãta ne rendápe. Nde’ỹre, mba’éiko arekóta yvágape. Ha nde’ỹre mba’eve ndaipotái ko yvy ape ariguágui. Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

Yvagakuéra ha yvy ohasapáta, che ñe’ẽ katu ndohasamo’ãi ojejohu’ỹre.

Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.