Lúcás 3 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL III. Missiún Eóin agus a sheanmóiniú. Críost dá bhaisteadh aige.

¹ Sa chúigmhadh bliain déag d’ímpireacht Thiberias Caesair, nuair a bhí Pontius Pílát i n’uachtarán ar Iúdaéa, agus Héród ’n-a thetrarc ar Ghaililí, agus a dhritháir Pilib ’n-a thetrarc ar Ituria agus ar chrích Traconítis, agus Lisanias ’n-a thetrarc ar Abilína,

² I n aimsir an dá árdshagart Annas agus Caiphas, do thárla briathar Dé ar Eóin mac Sacariais sa bhfásach.

³ Agus tháinig sé ar fuid na gcríoch go léir ar bruach Iórdain ag fógairt baiste chun aithrighe agus chun maitheamhnachais peacaí,

⁴ Mar atá sgríobhtha i leabhar na bhfocal adubhairt Isáias fáidh: Guth duine ag glaodhach sa bhfásach: Deinidh slígh an Tighearna d’ollamhú: Deinidh na bóithre do dhíriú dhó;

⁵ Líonfar gach gleann, agus ísleófar gach sliabh agus gach cnoc, agus beidh gach cam ’n-a dhíreach agus gach garbh ’n-a slígh réidh,

⁶ Agus chífidh gach feóil an slánú a dhéanfaidh Dia.

⁷ Agus deireadh sé leis an muintir a thagadh amach chun go mbaistfí iad: A shíol na n-aithreach nimhe, cé mhúin daoibh-se conus dul ó’n ndíbhfeirg atá ag teacht?

⁸ Tugaidh uaibh, d’á bhrígh sin, toradh a bheidh chómh maith leis an aithrighe, agus ná cromaidh ar a rádh: Tá Ábraham i n’athair againn. Deirim libh go bhféadfadh Dia sliocht do thógaint chun Ábrahaim ó-s na clochaibh sin.

⁹ Tá an tuagh curtha ar phréimh na gcrann cheana féin. Agus gach crann ná tabharfaidh toradh fóghanta uaidh gearrfar é, agus curfar sa teine é.

¹⁰ Agus do cheistigh na daoine é, agus dubhradar: Cad ’tá le déanamh againn má ’seadh?

¹¹ Agus d’fhreagair sé agus dubhairt leó: An t-é go bhfuil dhá chasóig aige tugadh sé do’n t-é ná fuil aige; agus an t-é go bhfuil bia aige deineadh sé mar an gcéadna.

¹² Agus tháinig puibliocánaigh ag triall air go mbaistfí iad, agus dubhradar leis: A Mháighistir, cad tá le déanamh againn?

¹³ Agus dubhairt seisean leó: Ná deinidh níor mó ’ná mar atá ceapaithe dhaoibh le déanamh.

¹⁴ Agus do cheistigh saighdiúirí é, agus dubhradar: Cad tá le déanamh againne? Agus dubhairt sé leó: Ná deinidh lámhláidir ar aoinne, agus ná deinidh cúlchaint ar aoinne, agus bídhidh sásta le nbhúr dtuarasdal.

¹⁵ Agus bhí na daoine ag breithniú agus ag machtnamh ’n-a gcroidhe féin i dtaobh Eóin, go mb’fhéidir gur bh’é Críost é.

¹⁶ Agus d’fhreagair Eóin agus dubhairt leó go léir: Táim-se ag bhúr mbaisteadh le h-uisge; ach tiocfaidh duine is treise ’ná mé, duine nách fiú mé go ndéanfainn iall a bhróige do sgaoileadh. Baistfidh sé sin sibh leis an Spioraid Naomh agus le teine.

¹⁷ Tá a ghaothrán ’n-a láimh aige agus glanfaidh sé a úrlár buailte, agus cruinneóchaidh sé a chuid cruithneachtan isteach ’n-a sgioból, agus dóghfaidh sé an cáth le teine nách féidir a mhúchadh.

¹⁸ Agus do chraobhsgaoil sé a lán neithe eile do sna daoine ’ghá gcómhairliú.

¹⁹ Ach Héród, an tetrarc, nuair a labhair sé leis i dtaobh Héródias, bean a dhrithár, agus i dtaobh na ndroch-bheart eile a dhein Héród,

²⁰ Chuir sé an méid seo leó go léir, agus chuir sé Eóin i bpríosún.

²¹ Do thárla, ámhthach, nuair a bhí na daoine go léir dh’á mbaisteadh, agus nuair a baisteadh Íosa agus bhí sé ag guidhe, gur h-osgaladh an spéir,

²² Agus gur thúirling an Spioraid Naomh air i riocht corpartha, mar bheadh colúr, agus tháinig guth as an spéir: Is tusa mo Mhac dílis; is ort atá mo ghreann.

²³ Agus bhí Íosa féin ag dul ’n-a dheichmhadh bliain fichid nó mar sin, ’n-a mhac, dar le daoine, ag Ióseph, mac Hélí, mic Mathat,

²⁴ mic Lebhí, mic Melchí, mic Ianna, mic Ióseph,

²⁵ Mic Matatias, mic Amos, mic Nahúm, mic Heislí, mic Nagge,

²⁶ Mic Mahat, mic Matatias, mic Semeí, mic Ióseph, mic Iúda.

²⁷ Mic Ioanna, mic Résa, mic Sorobabel, mic Salatiel, mic Nérí,

²⁸ Mic Melchí, mic Addí, mic Chósam, mic Elmadain, mic Héir,

²⁹ Mic Iósé, mic Elieseir, mic Iórím, mic Mathat, mic Lebhí,

³⁰ Mic Simeóin, mic Iúda, mic Ióseph, mic Iónain, mic Eliacim,

³¹ Mic Melea, mic Menna, mic Matata, mic Nátán, mic Dáibhid,

³² Mic Iessé, mic Óbéd, mic Boos, mic Salmóin, mic Naassóin,

³³ Mic Aminadaibh, mic Áram, mic Esróin, mic Pháres, mic Iúda.

³⁴ Mic Iacóib, mic Isaaic, mic Ábrahaim, mic Tárá, mic Nachór,

³⁵ Mic Sarug, mic Ragau, mic Phaleg, mic Ebeir, mic Sale,

³⁶ Mic Cainan, mic Arphacsad, mic Sém, mic Nóe, mic Lamech,

³⁷ Mic Matúsala, mic Enóch, mic Iáred, mic Malaleél, mic Caïnán,

³⁸ Mic Enós, mic Sét, mic Adam, mic Dé.