Masalimo 148 - Buku Lopatulika

Zolengedwa zonse zilemekeze Mulungu

¹ Aleluya. Lemekezani Yehova kochokera kumwamba; mlemekezeni m'misanje.

² Mlemekezeni, angelo ake onse; mlemekezeni, makamu ake onse.

³ Mlemekezeni, dzuwa ndi mwezi; mlemekezeni, nyenyezi zonse zounikira.

⁴ Mlemekezeni, m'mwambamwamba, ndi madzi inu, a pamwamba pa thambo.

⁵ Alemekeze dzina la Yehova; popeza analamulira, ndipo zinalengedwa.

⁶ Anazikhazikanso kunthawi za nthawi; anazipatsa chilamulo chosatumphika.

⁷ Lemekezani Yehova kochokera ku dziko lapansi, zinsomba inu, ndi malo ozama onse;

⁸ moto ndi matalala, chipale chofewa ndi nkhungu; mphepo ya namondwe, yakuchita mau ake;

⁹ mapiri ndi zitunda zonse; mitengo yazipatso ndi yamikungudza yonse:

¹⁰ Nyama zakuthengo ndi zoweta zonse; zokwawa, ndi mbalame zakuuluka.

¹¹ Mafumu a padziko ndi mitundu yonse ya anthu; zinduna ndi oweruza onse a padziko.

¹² Anyamata ndiponso anamwali; okalamba pamodzi ndi ana.

¹³ Alemekeze dzina la Yehova; pakuti dzina lake lokha ndi lokwezeka; ulemerero wake uli pamwamba padziko lapansi ndi thambo.

¹⁴ Ndipo anakweza nyanga ya anthu ake, chilemekezo cha okondedwa ake onse; ndiwo ana a Israele, anthu a pafupi pa Iye. Aleluya.