Levitikosy 8 - Baiboly Katolika

2 FANOMEZAM-PAHEFANA NY MPISORONA Fomba fanamasinana

¹ Ary niteny tamin’i Môizy i Iaveh nanao hoe:

² «Alao i Aarôna sy ny zanany miaraka aminy, ny fanamiana, ny diloilo fanosorana, ny ombalahy hatao sorona noho ny ota, ny ondralahy roa, ary ny sobika misy ny mofo tsy misy lalivay;

³ ka vorio ny fiangonana rehetra, ho eo anoloan’ny varavaran’ny trano lay fihaonana.»

⁴ Dia nataon’i Môizy izay nandidian’i Iaveh azy, ka vory teo anoloan’ny varavaran’ny trano lay fihaonana ny fiangonana,

⁵ dia hoy i Môizy tamin’ny fiangonana; «Izao no nasain’i Iaveh atao.»

⁶ Nasain’i Môizy nanatona i Aarôna sy ny zanany, ka nodioviny tamin’ny rano.

⁷ Ary i Aarôna nampiakanjoiny ny akanjo anatiny, noetràny ny fehikibo, nampiakanjoiny ny akanjo lava, nosalorany ny efôda izay nogiaziny tamin’ny fehin’efôda, ary nafatony teo aminy.

⁸ Napetany taminy ny saron-tratra, ary nakambany tamin’ny saron-tratra ny Orima sy ny Tomima,

⁹ nasatrony ny lohany ny hamama, dia nataony teo anoloan’ny hamama ny takela-bolamena, ilay diadema masina, araka ny nandidian’i Iaveh an’i Môizy.

¹⁰ Ary nalain’i Môizy ny diloilo fanosorana dia nohosorany ny Fonenana mbamin’izay rehetra tao anatiny, ka nohamasininy.

¹¹ Nofafazany izany impito ny ôtely; nohosorany avokoa ny ôtely sy ny fanaka rehetra momba azy mbamin’ny tavy amam-paladiany, mba hahamasina azy.

¹² Dia norotsahany diloilo fanosorana ny lohan’i Aarôna, ka nohosorana izy, mba hahamasina azy.

¹³ Nasain’i Môizy nanatona koa ireo zanak’i Aarôna dia nampiakanjoiny ny tonîka, nohetràny fehikibo, ary nafatony teo amin’ny mitra, araka ny nandidian’i Iaveh an’i Môizy.

¹⁴ Dia nasainy naroso ny ombalahy hatao sorona noho ny ota, ka i Aarôna sy ny zanany nametra-tanana teo ambonin’ny lohan’ny ombalahy hatao sorona noho ny ota.

¹⁵ Namono azy i Môizy dia naka tamin’ny ra dia notentenany manodidina tamin’ny rantsan-tanany ny tandroky ny ôtely ary nanadio ny ôtely izy, naidiny teo an-tongotry ny ôtely ny ra ary nanamasina azy izy, nanao ny fanonerana ao aminy.

¹⁶ Manaraka izany nalainy avokoa ny sabora, ny saron-tsinainy, ny saron’atiny, ary ny voany roa mbamin’ny sabora momba azy ka nodorany hanetona teo ambony ôtely.

¹⁷ Fa ny tenan’ny ombalahy kosa, ny hodiny, ny nofony, ary ny tain-drorohany, dia nodorany tany ivelan’ny toby, araka ny nandidian’i Iaveh an’i Môizy.

¹⁸ Dia nasainy naroso ny ondralahy hatao sorona dorana, ka i Aarôna sy ny zanany nametra-tanana teo ambonin’ny lohan’ny ondralahy.

¹⁹ Dia novonoina izy, ary i Môizy nanidina ny rany manodidina tamin’ny ôtely.

²⁰ Raha efa izany norasainy ho voatetika ny ondralahy, dia nodoran’i Môizy hanetona ny lohany mbamin’ny tetiny ary ny saborany.

²¹ Nosasany tamin’ny rano ny tsinainy aman-tongony, dia nataon’i Môizy indray mandotra hanetona ny ondralahy manontolo; sorona dorana ho hanitra ankasitrahina izany, sorona atao amin’ny afo ho an’i Iaveh, araka ny nandidian’i Iaveh an’i Môizy.

²² Nasainy naroso koa ny ondralahy anankiray, ny ondralahy fanokanana; ka i Aarôna sy ny zanany nametra-tanana teo ambonin’ny lohan’ny ondralahy aloha,

²³ izay vao namono azy i Môizy, dia naka tamin’ny rany, nanentenany ny tendron-dravintsofin’i Aarôna ankavanana, ny ankiben-tanany havanana, ary ny ankiben-tongony havanana.

²⁴ Nampanatoniny koa ny zanak’i Aarôna, dia notentenany ra ny tendron-dravin-tsofin’izy ireo ankavanana, ny ankiben-tanany havanana, ary ny ankiben-tongony havanana, vao naidiny manodidina ny ôtely ny ra.

²⁵ Raha efa izany nalainy ny sabora, ny hofany, ny sabora saron-tsinainy rehetra, ny saron’atiny, ny voany roa mbamin’ny saborany ary ny feny havanana.

²⁶ Ny sobika nisy ny mofo tsy misy lalivay izay napetraka teo anatrehan’i Iaveh, nangalany mofomamy tsy misy lalivay iray, mofomamy misy diloilo iray, ary mofo manify iray, napetrany teo ambonin’ny sabora sy ny fe havanana,

²⁷ nataony teo an-tanan’i Aarôna sy ny zanany ireo zavatra ireo, dia nahevahevany ho fanatitra teo anatrehan’i Iaveh.

²⁸ Dia nesorin’i Môizy avy teo an-tanany indray ireo ka nodorany hanetona eo ambonin’ny ôtely teo ambonin’ny sorona dorana, fa sorona fanokanana izany, ho hanitra ankasitrahina, sorona atao amin’ny afo ho an’i Iaveh.

²⁹ Dia nalain’i Môizy ny tratran’ny ondralahy fanokanana, ka nahevahevany ho fanatitra eo anatrehan’i Iaveh; io no anjaran’i Môizy araka ny nandidian’i Iaveh an’i Môizy.

³⁰ Dia nakan’i Môizy ny diloilo fanosorana sy ny ra teo ambonin’ny ôtely, nafafiny tamin’i Aarôna sy tamin’ny fanamiany, ary tamin’ireo zanak’i Aarôna sy tamin’ny fanamiany, ka nohamasininy avokoa i Aarôna sy ny fanamiany, ary koa ny zanany sy ny fanamiany.

³¹ Ary hoy i Môizy tamin’i Aarôna sy ny zanany: «Andrahoy eo anoloan’ny varavaran’ny trano lay fihaonana ny hena, fa eo no hihinananareo azy, miaraka amin’ny mofo ao anaty sobika fanokanana, araka ny nandidiako hoe: i Aarôna sy ny zanany no hihinana azy.

³² Ary dory amin’ny afo izay sisa tsy lany amin’ny hena sy ny mofo.

³³ Tsy hiala eo anoloan’ny varavaran’ny trano lay fihaonana ianareo, mandritra ny hafitoana, dia mandra-pahatapitra ny andro fanokanana anareo, fa haharitra hafitoana ny fanokanana anareo.

³⁴ Izao atao anio izao, dia nodidian’i Iaveh hatao mandritra ny hafitoana hanaovana ny fanonerana ho anareo.

³⁵ Hijanona hafitoana andro aman’alina, eo anoloan’ny varavaran’ny trano lay fihaonana ianareo, ka hitandrina ny didin’i Iaveh mba tsy ho faty ianareo, fa izany no didy azoko.»

³⁶ Dia nataon’i Aarôna sy ny zanany ny zavatra rehetra nandidian’i Iaveh tamin’ny alalan’i Môizy.