ISAIA 1 - ASII LAKDAP Bible (BSI)

¹ Ara lakdap na waiqtaq tsütsa thun arka Juda mungti nai Jerusalemti miitu, Shiikeawe raq Isaia ma atiichhikuq bomtsi. Isaia ka Amoj se. Apaiq raq shammi jaqsham wantaq arka hokhambi Ujjia, Jotham Ahaj kiimaq Hejekia raq Juda mung na hokham jaqsham wantaq pat wa.

Shiikeawe Raq Asenginok Sontlo

² Tati raq nguto, “Ra nai hiq lei, Ngi raq jam lai wa chongtiikang kra taironglaq! Nosere Ngi raq atiijonglu wanha thun raq ikiq khiitlo. Raüta iwokhong wa donghotlo.

³ Jam nyamsekong riika atati asap. Kiimaq kumtoq kong riimin atijongwe raq tsangshiq dung changba ka asap. Tsangshiq riika isenginok Israilnok raq Ngi saptlaq kriithaq na achan tsangshiq riimti ka saptlo. Shatmaq Israilnok raq Ngi ka akhiismin sapmak dongdii.”

⁴ Ümniika miqlaü she. Ümniika ngarai kaq mung ashi. Ümniika ashe kiimaq abi pinthum! Ümngarai riilishe ümniika patbaiq wanto! Ümniiraq Tati, asii Israilnok Shiikeawe kriika no na tsuqbaiqlaü. Laüta ümniiraq apaiq ka jainong nümiishe shungbaiqlaü.

⁵ Ümniiraq ikiq khü wanli she ka jam nguto sruriitlaü? Riita ümniiriika imo ka arthaq niimin laihea howan sha rotlaü? Israil loi, ümkhupo niika ümchaü sanha ami atsi phongli she. Kiimaq ümtsantsii nai ümkhutsai ka wiita atsi makaiq she.

⁶ Ümkhum ka ümkhupo maq riitea ümhokphi wiinai na saüli ka ami atsi ahü ahea ka bashi min tammak she. Ümkhum tlotli ka sintsang maq atsatrat mopung phongli she, kiimaq ami atsi atsam phongli she, kiimaq ümkhum na ami phong kriika anü tiiki raqraq lishe. Ümdü na ami thun kriika kham maq hetse hü. Kiimaq khea maq min jopkehü. Kriithun niika tsiq miimin juthü.

⁷ Ümmung ka miqchup tiithenbaiqto she. Kiimaq ümmung wa chela thun ka wiita wa maq chaqbaiqto. Raüta botkhulai rai she shotbaiqto. Ümniiraq liishat ümmakki na, pongmungti raq ümmung ka khatto. Raüta wiita jiiwanto. Raüta hiq maq hutse she shiithen baiqto.

⁸ Jerusalem lamlamseli she tiichongtlo. Arkiimin re raq chela trotam maq akom wan kun she. Wak na spiqro khechang baülitiipse ahai ikha, riimakla wak na kumchan tsung ruk hü pehü sitlaq ikha, asea awea raq aphaq wan nguli riitlaq ikhlishe sitlaü.

⁹ Riita Tati Ajong Pinthum raq khup wongkuq mak nguraü ka akha aso amose dongdii min tiichong mak, Sodom nai Gommora chela then wantaq kiikha ara Jerusalem chela armin laimiq mitiithen baiq wa.

¹⁰ Jerusalem lei, ümmung pengti tuwebi nai ümsengi mungmaiqse ka Sodom nai Gommora chelati ikha. Tati raq ümniima jamlai bom wa chongtlaq kra tailaq. Nashiq Shiikeawe raq ümniima jamlai wa shrinkuqtlaq kra samheawiq tiitsang tailaq.

¹¹ Apaiq raq ngutlo, “Ümniiraq arthun honglu takuq tlaü arka Ngi raq rariq rattlo ngutiisha tiima tlaü? Ümniiraq shamhea shamjü skusekong ka honglu na takuq lata wa na ngampü chaqtlaü kra Ngi ma raamak she. Hongto she. Ngi ka minsaü pongwetiim nai skusekong kiimaq chhechhi kong taalaüta atiijai raükuq tlaü kra chhilata itsütsa she sikito.

¹² Ümniiraq Ngi shomnoq tlaü akhing na arthun ara kuq wan laq nguta ümniima juro chongta? I Shomjam na arthun jimaq nishishi sham akai thun ara klolaq nguta ümjaq wa juro jaüta?

¹³ Ümniiraq ümchuwa honglu kuq wan tlaü kriika jamlai athü arii min ahü she. Ümniiraq homseng honglu kuqtlaü tsangngii kra shulata Ngi ka ishuli she sikito. Ümniiraq Jipi Jinye Poi thun, kiimaq Apii Ranaiq Poi thun, kiimaq noqku na shomnoq wan thungtlan thun kra chhilata ümchaü sanha ninlot mangshe. Arthun klowan tlaü arka ümngarai phong krai triishot laüta kuq wan tlaü.

¹⁴ Ümniiraq Ngi ma Jipi Jinye dong poi klo wan tlaü thun nai apii ranaiq haitlan thun kriika Ngi raq pinthum shulii tiikang. Arthun arka Ngi ma hekiilai jonghea, howan lot mang she.

¹⁵ “Ümtiikiiwa ümniiraq ümjaq ka ra na dolaüta achu mijaühaü, Ngi raq ümniika alü min liimang she mirha. Ümniiraq ümtinkhan li achu jaü raümin, Ngi raq tre mangshe. Jamkhano ngukla ümjaq ka maiq tiijai na atsam reawi she.

¹⁶ Ümkhum ka kongkhu tiisii helaq. Ümniiraq atinkhan abi ashut kiimung wan tlaü imakki na tiichhi rai tlaq ara kongkhu thaqbaiq tlolaq. Ngutiikang, ashut jaqsham tlaü thun ara thaqbaiqtlo laq.

¹⁷ Laüta tingting jaqsham kra shrinlaq. Liilaq, riikhaqli tingting jaqshamlaq. Di ama ikha maiq raq tiichamchaotlaq kra khrumlaq. Thüm waq mantise re ma tsangshiq raq jamlai phan lap phaq sea wan chang wa sitlaq kra khashkhaq kuqlaq. Kiimaq manti nyungre kra tiikhup wongkuq shat maq riimlaq.”

¹⁸ Tati raq ngutlo, “Riita ümchaü min bom ka riichong i. Ümkhum ka ngarai na tiitsam laüta maiq tiijai maq tlo laüta shiiroro she sitlaü. Shatmaq Ngi raq ümniika tsakhiiq ikha siirairaihea lüdiidii hea she mihekuqha. Ümkhum ka ngarai maq alorat kha maq, among tsaühea na saüli achhe wan kun she shiiroro ma she, li jiimin, Ngi raq ümniika umnirai railü tam ikha lüdiidiihea she mitlü kuqha.

¹⁹ Ümniiraq Ngi ibom tai laüta iwokhong na sihaüla, armung na hiqraikhü na ahea awa phan ümchu wa dongman wantlaq thun kra wok phetaktak she miphaqsiq wan haü.

²⁰ Shatmaq ümniiraq ikiq khiiruq la khiihaüla, ümniima atsai lam kli she misi. Arka Ngi Tati raq ngutiikang.”

Ngarai Kaü Chela

²¹ Kra chela ka man na tsapsaükapse maq siti riito. Shatmaq ümchaü sanha mephe nyung ikhiishe sitlo! Akhing ashi na kra chela na siti kechu maiqse tonglong riito. Shatmaq ümchaü ka maiqtseati matwe tsawe tonglongli she sitlo.

²² Jerusalem lei, man na akhing ashi na, ümniika kampho ikha silaü. Shatmaq ümchaü ka thiihü she sitlaü; ümniika che asumwiq chetsai ikha riilaü, shatmaq ümchaü ka ralang khamsangtili ikha sitlaü.

²³ Ümwelabi thun ka ikiq khiitikong siisaq. Kiimaq ahuk arot kong kongti siisaq she; tsangshiq raq wranaiqshe mungmaiqse jaq wa kongphiq jaqmiiq kiimaq tsiiqlap jaütlo. Tsangshiq raq rung maq thümwaq mantisetiim ka ümtiikiimin tiiwongkuq mak. Kiimaq manti nyungre raq tsangshiq kha ka phokuq ronglaq nguta rung na shok raü min liikuq mak.

²⁴ Arningkhan na, ümchaü min, Ajong Pinthum Tati, ningkun ajong rümti Israilnok Shiikeawe raq akha chongtlaq kra tiitsang dada tailaq: “Namshiq ka Ngi ma chiq nai re kong. Ngi raq namshiq khuthaq na iphuk she milamha. Krai mren namshiq raq Ngi ma ikhu tiitsi chang mintsa tiipa man she mirhan.

²⁵ Ngi raq namshiq khuthaq na kha ka atsin miishe mipho wanha. Jin ka khitiip na wa maq shu raüta jamkho jindaiq tiisiibaiqtlaq, kiikha namshiq khum kriimin wa maq shulata mitiisiibaiqha. Lata namshiq khum wa ashe ashi thun kra wiita mitiisiibaiqha.

²⁶ Ngi raq ümniima ümmung pengti tuwe jongbi nai ümniima taksu tsü chongketi ka, man na rathup raphaji na ümniiraq jamkho riimwan laü kiikha hali mishong kuq wan nongkang. Kiijiishetiq Jerusalem ka kechu chela kiimaq tsapsaü kapse chela nguta mingu wan.”

²⁷ Tati ka kechu, kha maq, apaiq raq Jerusalem ka kiimaq kiijaq siti mungmaiqse wiitarü raq maiqmii ngarai tiidii wanti mitiichhii kuq wan.

²⁸ Shatmaq ngarai kloti nai apaiq kiq khiiti thun ka wiita kunkun atsea mirbaiq. Apaiq wokhong wa dongho raüta, apaiq miimbaiq thüti ka loweatek wiita atsea mirbaiq.

²⁹ Ümniiraq pechong thun shomnoq wan kiimaq asii bagan thun chhijang wan kha na, ümniika pinthum tsantsi mongtsi she mitiishudaq wan haü.

³⁰ Ümniika ok chong jamkho tsaiki raüjaq shin wan tlaq ikhiishe mishin wan haü. Kiimaq kham ahü bagan shin wan tlaq ikhiishe mishinki haü.

³¹ Tsamkü shin phong ka wapüse tiidea raüli, amok riidungli lüwan tlaq ikha, maiq ümtin khan ajong alabi nguta tiitsakitlaqti thun kriimin tsangshiq raq ajiq nai abi jaqsham wantaq kriiriili, tsangshiq ka miqchup mitiithenbaiq wan. Kriishe ngu raüla, tsangshiq then wan tlaq kiiwa jurmin tiikhup wongkuqlot mak she miraq.