DANIEL 9 - ASII LAKDAP Bible (BSI)

Daniel Raq Maiqmii Mungti Miitu Achu Jaüto

¹ Medi mung phan wa Ahasueras se Derias raq Bebilon mung ka lang wanto.

² Apaiq raq mung peng wanli maq wiishi she angu na, ngi raq asii lakdap thun kra sidi phat kang. Lata Tatiwe raq shammiwe Jeremia lümaq, Jerusalem thenkitaq kriika wiiroqmiishi na saüli kiikhiili misi wan nguta chongtaq, kra bomtsi ka shiwea wan kang.

³ Kra ningkhan, ngi raq Tati Shiikeawe jaq wa pinthum itsan itsii tiitsi lata, apaiq ma tiipaiq nea lam maq, amang maq, wunthaü riinaü khea samlata, kiimaq ikhakam na tapkhu maq nyat lata, achu jaü nga kang.

⁴ Ngi raq Tatiwe i Shiikeawe jaq wa achu jaükang kiimaq iphan imaq raq ngarai thun tang wantaq kra diikuq laq nguta achu jaü kang. Ngi raq ngukang, “Tati Shiikeawe lei, ümniika ajong pinthum. Krai mren naishiq raq ümniika shreng tiikai. Ümniika üm tongshong tri tsapkapkap maq rümti. Kiimaq ümnaq lungwii raüta ümwokhong na siti, kiimaq ümniiraq akuq haü aming wokhong na siwanti ka, thaqmaü phan maq lungwii tsii tiichhiketi.

⁵ “Naishiq raq ngarai tangkai. Naishiq raq abi kiimung klowan kai. Naishiq raq ashut klowankai. Ümniiraq aming lang ronglaq nguta akuq haü thun lang mai shishe wankai. Laita ümniiraq naishiq ma riikhaqli lam atiichhikuq haü kiiwa lamjiq nü na kihokai.

⁶ Ümniiraq ümjaqshisetiim shammibi tiiki laüta, naihokhambi ma, nai mungtubi ma, naiti tipaitiim ma, kiimaq naimungti mungmaiqse tlotli ma, ümmang chong raüta tra tiihokuq wan laü. Kra naishiq raq lang wan mai dea riikai.

⁷ Ümniika Tatiwe, ümniika phanrap tingting tri raükha tiipha shatti. Shatmaq naishiq riika maiqmii khu na, jeasi thoda hophaq wan laitli wranaiqshe siwankai. Arka tengto dea. Naishiq wiitarü raq hophaq tiikai. Juda mung na siti ngu i kiimaq Jerusalem na siti ngu i, kiimaq tlotli Israilnok mungmaiqse thun, ümniiraq pongmung na, aje na nai maiqmung thun luhea na, tiipin jobaiq laü. Jamkhano ngukla tsangshiq ka ümwokhong na simak riito.

⁸ Naishiq hokhambi, nai naishiqnok mungtubi, kiimaq naititiim raq alaipo ahü tsangjeasi chang jaqsham wanto, raüta ümman na ngarai klo wanto, Tatiwe lei.

⁹ Naishiq raq ümkiq khiiwan kai li jiimin, ümniika tiihang wan mangchan rümti, kiimaq ngarai diiketi.

¹⁰ O, Tatiwe naishiq Shiikeawe lei, ümniiraq naishiq ma, ümjaqshisetiim shammibi lümaq akuq haü thungtri ka lang wan ronglaq, lanta sirong laq nguta aming akuq haü kra lang wan mai dea riikai.

¹¹ Israilnok tlotli raq ümniiraq akuq haü aming wiita jinto. Raüta ümniiraq achong kuq haü ümbomtsi ka taimak tlea wanto. Naishiq ka ümman na shut wan kai dea. Kriikha na ümdise Mosheq lümaq akuq haü, tri raütu na waiq laü kra phan phan she dea naishiq khuthaq na ümmanson ka niwanto.

¹² Ümniiraq naishiq ma nai naimung pengti ma mo mitiihoha ngulaü kra tiiho wan laü dea. Ümniiraq Jerusalem ka mangjong tlotli na siti chela ahinti thaq na, pinthum heanghea tiichamchao wan laü.

¹³ Mosheq raq awaiq thü Thungtri lakdap na chongtlaq kra phanphan dea, naishiq ma manson chamchao ka kuqlaü. Shatmaq ümchaü min, O, Tati naishiq Shiikeawe lei, naishiq ka naishiq ngarai lam phan wa ümwokhong na jang wan laita, ümnaq tiichochi wan ka tiima ra mai sitiikai. Kiimaq ümniiraq akuq haü tengteng bomtsi kra phan phan siwan mai riitiikai.

¹⁴ O, Tatiwe lei, naishiq Shiikeawe lei, ümniiraq naishiq ka sintsang maq tsat wan miitu khekham khewan laü. Krai mren, naishiq ka tsat wan laü. Jamkhano ngukla ümniiriika tingting tri maq shin laüta, phokuq wan laü. Kiimaq naishiq raq ümbom ka tai wan mai riikai.

¹⁵ “O, Tatiwe lei, naishiq Shiikeawe lei, ümniiraq ümsenginok ka Ejip mung wa tsuq wan laüta üm ningkun jong kra tiichhikuq wan laü. Krai mren, ümningkun jong ka ümchaü min tsan na tiitsang shat thütlo. Naishiq raq ngarai tang wankai; naishiq raq ashut klo wan kai.

¹⁶ Ümniiraq man na naishiq tiikhup wongkuq wan laü. Krai mren, ümchaü min Jerusalemti ma ümtsan ka naq tiikhiq kiq she. Kriika ümchela, ümnaq asii hiqlam. Naimung tro na siti mung ahinti tlotli raq, Jerusalem nai ümsenginok ka shummii laqpii she saisitlo. Arka naishiq ngarai khana kiimaq naititiim raq abi ashut klo wantaq kriikha na shummiitlo.

¹⁷ O, Shiikeawe lei, ngi achujaü nai tiipaiqnea tiikang ara tai kuq laq. Ümshomjam tiithen baiqtaq kra tiiheakuq nonglaq. Tiiheakuq liidea, haüla maiqse angu kunli raq, ümniidea Shiikeawe nguta misap wan.

¹⁸ Naishiq achujaü tre laq, O, Shiikeawe lei; naishiq phana liilaq, ümtinkhan wa chamchao tiikai ara. Kiimaq ümmangchong raüta siti Jerusalem chamchao tlaq kra liilaq. Naishiq raq ümjaq wa achu jaü tiikai arka, ümniika tiihang mangchan rümti kha maq jaütiikai. Naishiq raq riikhaqli jaqsham tiikai nguta riimak.

¹⁹ Tatiwe lei, naishiq achu jaü tre laq. Tatiwe lei, naishiq mra diikuq laq. Tatiwe lei naishiq achu jaü tailaq. Laüta jaq ka shamkuq laq! Kra nguraü jiitiq maiqse angu wiita raq, ümniika Shiikeawe dea nguta misap wan. Naq tiihitkiq she! Ara chela arka ümchela. Kiimaq arnok arka ümsengi.”

Rase Gebriel Raq Riisham Bom Liichum Chongkuqto

²⁰ Ngi raq achujaü ka triilü wantlii maq jaü wan kang. Ingarai thun tiidii wan kang, kiimaq iphan, imaq Israilnok ngarai kra diikuq liidea nguta, Tatiwe, i Shiikeawe jaq wa apaiq asii Shomjam kra tiiheakuq liidea nguta tiipaiqnea kang.

²¹ Ngi ka akha achu jaü rea na, rase Gebriel, kongkhu lak na riishammak maq chhikang kra rase ka ra wa biwansaq raüta, i phana thiimkito. Kra akhing ka raji honglu kewan akhing bala riito.

²² Raüta apaiq raq ngi ma bom ka akha tru chongkuqto, “Daniel lei, ngi ümpha na saüki kang arka, riisham bomtsi liichum kra ümniima tiikho chongkekai kikang.

²³ Ümtiikiiwa ümniiraq Shiikeawe ma tiipaiq nea wan laü, apaiq raq ümnaq achu jaü ka treto. Apaiq raq ümnaq lungwiitlo. Kra ningkhan ngi ka ümniipha na kra bomtre liichum kra chongkekai saükikang. Riita ümchaü min riisham bomtsi liichum kra chongpha samhea tiitsang tailaq.

²⁴ “Shiikeawe raq, namshiqnok nai asii chela kra ngarai kharü mong wa nai ashut kharü mong wa tiichhiike wan miitu, rahiq jipi akhing ka, jang miishi maq rawii roqmiishi tiihong thüto. Ngarai ka midii kuq. Kiimaq pattup pat-sa miitu tingting kha miphokuq wan. Krai mren, riisham bomchong nai shammibi bomchong ka wiitashe mikupi wan. Kiimaq asii Shomjam kiimin jangshi ri hali Shiikeawe ma mikiinong kuq wan.

²⁵ Ara bomtsi ara ümtsan na samhea tiitsang shaq laq. Laüta liichum ka tak laq: Jerusalem chela kra tiihea haiwan miitu, aming tat tlaq kra akhing maq phawan raüta, Shiikeawe raq asengi sheati wela weshi shong wan tlaq kra akhing na saüli ka, jang miishishi maq wiimiishi kra milea wan. Kra akhing leawan jai miishetiq, Jerusalem chela ka mitiihea hai wan. Chela mong wa lam thun nai chela trotam maq kiitelong ruk thun kra thepthep atang tingsang she mitiihea hai wan. Raüta kriika jang miishi maq wiiroqtrok ri wiinai misi wan. Shatmaq kra akhing bala ka pinthum litkot chamchao akhing miraq.

²⁶ Kiimaq kra chongtlaq rawii akhing kra nyiwan jai she, Shiikeawe raq ashong wan welawe kriika, khühü lamhü na atsea mirbaiq. Kiimaq ningkun ajong hoti tuwe phenlabi raq khat wan raüta Jerusalem chela nai Shomjam kra mishthen baiq. Kra athum wan akhing ka jüchhang asaü wan ikha, re ka midong wan. Raüta mung ka mithen wan. Kriika Shiikeawe raq tiihongtaq kra phan phan miraq.

²⁷ Kra tuwe ka mangjong hiq na siti maiqmung pahea rai, rawii wiimiishi na saüli pharang rang maq silu mirja. Kra rahiq akhing ka wiijam she nyiwanto angu na, apaiq raq nyamse honglu takuq wan tlaq kra nai laihin honglu kuq wan tlaq jaqsham ka atiitsaq she mirbaiq. Raüta Riiqkhiq Phiiptsi Chang Sumla Kaü kriishe diilu pinthum ba asii thaq na asii Shomjam khok kriijaq mishong wan. Kra Shomjam tiisheshi wantiwe ka, Shiikeawe raq mitsat baiq wan shaq wiiwii, kra Riiqkhiq Phiiptsi Chang Sumla Kaü ka tiingashat li miraq.”