Biblia Todo Logo
La Biblia Online
- Anuncios -


AJONJÜ 2 - Hawa Naga Bible 2001


Yehowa rueq Yerusalem muex Murx Tvgurc lvmz

1 Taungjix rueq vpiq thuinkhaq vtueq Zion kuex raungx nyauk maq puingc gay tueq. Vpiq rueq raungmungx raungc hvlc ngauz vngax kuex tvbac gay tueq. Vpiq thuinkhaq yaq raungnuiyq vpiq Shomc Yuimx doc muinz tuip gay shec tueq.

2 Taungjix rueq Yuda mungx nuex httax yaq ghaqtek vtueq menjenc muq maq tvbac gay tueq, Mungtan kuex tvkhup wungx jix nolaungx ghaqshungc htenc kuex tvrul tvbunx gay tueq. Vpiq rueq mungtan nuiyc kvruex wawc vyungx vlaungx bix muex yvlc svy juing tvhttuiuc tueq.

3 Vpiq kuex pinhtumc khaq vtueq Israel hungc vlaungc kuex tvbunx gay tueq; Vpiq rueq ralx httuiuc kaz tueq nuex naungshiq muex romc kuy tvkoc tvlvlc gay tueq. Vpiq kuex wvrluic ikhoc naungshiq muex khaq vtueq phvnx ruip saz kuex tvbac gay tueq.

4 Vpiq rueq naungshiq kuex ralx waz ikhoc vpiq laqsvnz htenc maq tvtsuingc taq yaq; Vpiq rueq naungshiq kokez nuiyc taungx wvnc lvmz lvp jix miq lotlaz kuex thvt gay tueq. Yerusalem ghaq vyuq naungshiq rueq vpiq thuinkhvy luic yaq kuex rvhumc vtix.

5 Taungjix rueq ralx ikhoc Israel kuex tvbac gay tueq; Vpiq rueq nolaungx ghaqshungc htenc nuiyc hoc htenc kuex tvbac gay tueq. Vpiq rueq Yuda miqsaz htenc htauk nuex vhtumx vguez yonzyex kuex tvhttuiuc kuq tueq.

6 Vpiq kuex naungshiq rueq nawk palx shix Shomc Yuimx kuex tvhuyx tvhut rop gay tueq; Vpiq rueq vsawc raungnuiyq htenc nuiyc Vguilc raungnuiyq htenc kuex tvhtumx gay tueq. Hokhvmx waz nuiyc shomc waz rueq muinz vpiq thuinkhvy kuex rv-ngvlc rvhumc wuez yaq.

7 Taungjix rueq vpiq shomrawx kuex tvdux gay ruiux vpiq vsawc Shomc Yuimx kuex kuiyqshuik kuiyq shix tvyaungc gay tueq; Vpiq rueq kvruex ruk htenc kuex httak gay tvkoc ralx muex lekuq tueq. Tsuinghez kuex kungkhux nuex naungshiq rueq vkoz vkez maq nawk palx ruiux shix baung nuex lotlaungc taungx vtueq guyc sez wuez yaq.

8 Yehowa rueq Zion palx ruk htenc kuex httak gay tvkoc htvp htaz tueq shex; Vpiq rueq kvruex vsuingc suing tvsawc ric tvbac gay tvkoc kvruex shenc lawc yaq. Majuiuc kuex pvrrawx htenc nuiyc ruk htenc kuex vdvmz nuex httak gay tueq.

9 Palx kaluix phuinz vphux htenc kuex ghaq nuex kvluip wvnc vtueq, tsuingshiq kaluix taung juing htenc tvhuyx tvhut rop gay tueq. Hokhvmx waz nuiyc muingc jungc vhttax jix htenc kuex majuiuc vthuq lvy rvhumc tueq. Tvrac kuex tvluing wuez muq, shvmmax bix rueq muinz Yehowa kox wawc romzyac lvp wuez muq.

10 Yerusalem wawc rullungx nyuiuz waz bix kuex ghaq nuex suinglix lix ngaungc vtueq, Tsuingshiq khux htenc htauk nuex bokkhuyx kop ruiux, tsuingshiq gvnz nuex ruiyhec khvy htumc htenc khelc svmx wuez yaq. Yalx tux nyuiuz rulx muinz tsuingshiq khux kuex ghaq nuex bumx wuez yaq.

11 Ngvy muik htenc kuex vkhoarc htuiz rueq htvl yaq; ngvy siyac kuex pinhtumc thuiuz sac yaq. Ngaz kuex ngvy miqsaz htenc bac wvnc ningkhvnc nuex yonz yex vtueq nulx wvnc vtaungx. Nosaz rulx nuiyc noshawx sahez kuex ghaqyungx lvmx htenc nuex maungc kaz wuez tueq.

12 Tsuinghez kuex kvmx vrvmc thuiuz muex vnyuiuz tamx kox wawc guyc thoz wuez yaq; Tsuinghez kuex vphiz vshuz jix ikhoc lvmx laungx htenc nuex woalc wuez yaq, Vnyuiuz tamx pvmc nuex jauz susuc maq pat wvnc tueq.

13 O Yerusalem lex, lungwawx vphaungx Yerusalem lex, ngaz rueq mkhoc jungc lot juing lac? Ngaz rueq mnoz muex mkhoc sitenc yatenc lot juing lac? Vkhoc kuilc daz kuex vshiz muinz rvhumc muq doc. Mnoz kuilc daz jamjaux kuex svmuktvrax ikhoc yunghvlc vhtaz lot miq; thuinz tvluimc juing httax lot muq.

14 Mshvmmax bix rueq vrot vkaq jungx yaq maq lvy vtueq mnoz muex yvmx jungc kuy juing muinz vguez; Tsuinghez rueq jungphvnx yaq kuex mmvrax lvmz tvdung jungx muq, tvkhic muq, mnoz muex laulawc gay kv-phux. Mnoz kuex thuinz kvlayc rac muq ngoz tueq tsuinghez rueq mnoz muex tvrvwvl kv-phux.

15 Ghaqyungx kvmaq lvy wvnc jix miq rueq mnoz muex shum -marc nueykuic wuez yaq. Tsuingshiq rueq khux kuex buil vtueq Yerusalem bac wvnc tueq kuex nueykuic wuez yaq. “Vruex ghaqyungx kuex vlungwawc juing ghaqyungx rvmuq haz? Vruex ghaqyungx kuex mungkawx kvsomc parc juing rvmuq haz?”

16 Mnoz muex ralx htenc lotlaz rueq mnoz kuex shummarc vtueq vshuiuc vpac thuinz maq lawc tvtsuingc wuez yaq. Tsuingshiq rueq tsuingshiq nuix bar tvyoar vtueq, “Piq kuex naungshiq rueq tvbac gay tiq shex! Naungshiq rueq bvmc vshix raungnuiyq kuex vruex raungnuiyq vruex rvtueq!” ngoz tueq jungx tueq.

17 Tvsuip nuex Yehowa rueq vshuimc tvkoc dvnc tueq yauk shuimc kuex shuimx tueq: Mvnnuex maq phuex naungshiq muex honc jungx kuq phuex rulc rv-ngvlc naungshiq muex menjenc muq maq, tvbac gay tueq. Vpiq rueq naungshiq ralx htenc muex tvtaungx gay lvmz kuq tueq, naungshiq dvy wvnc tiq kvraq tsuingshiq muex kokez juing kuq tueq.

18 O Yerusalem lex, mpalx ruk htenc rueq Taungjix muex m-guyc ramc shueq! Mmuik phic kuex yuix ruilx ikhoc raungnuiyq raungwvrx msvrc kueq; Mshauk pumz kuex vkhoarc vsez nuiyc vyonz vyex raz tueq nulx wvnc kueq!

19 Wvrx taungx kvtenc kakaz raz tueq Taungjix muex guyc sez ramc shuiuz; Mthuinz vmungx kuex ruiuc tvdung vtueq lvmx shuk vnoz htenc nuex thueyc khvm khvmz, Rvmc sac yaq nosaz rulx muex menjenc tvkoc vpiq kox wawc thoz shuiuz!

20 O Yehowa lex, lawc shuiuz! Mnoz rueq yvmx ngoz tueq lac nuiyshiq muex vkhoc murx tvgurc vphux? Yalxjuik rulx kuex tsuingshiq rueq lungwawx yaq nosaz rulx ngvmx htenc kuex phauk wuez yaq! Shomc waz bix nuiyc shvmmax bix muinz miqmac Shomc Yuimx mungx nuex thvy gay rvhumc wuez tueq!

21 Nyuiuz waz nosaz ngoz muq lvmx htenc nuex thueyc kaz wuez tueq, Yalx rox rulx nuiyc yalxjuik rulx muinz ralx waz yaung maq thvy gay rvhumc tueq. Mthuinz khaq yaq raungnuiyq tsuingshiq muex menjenc muq maq mnoz rueq thvt gay toq.

22 Mnoz rueq ngvy tvroz lotlaz nuex vkawc yawc juing moalx vshiz tvhungx tvkoc ralx htenc kuex gvl taq toq, Mthuinz khaq yaq raungnuiyq, vshiz muinz yuz wvnc lvp muq. Ngaz rueq lungwawx vtueq vdungx ghaq isaz hez kuex tsuingshiq rueq thvt gay tueq.

Hawa Naga Bible © Bible Society of Myanmar, 2014.

Bible Society of Myanmar
Síguenos en:



Anuncios


¡Síguenos en WhatsApp! Síguenos