137 Umi versíkulo bíblico oñeʼẽva Pyʼaguapy Interior rehe

Pe py’aguapy ame’ẽta peẽme, che py’aguapy añeteguáva ningo, ndaha’éinte pe py’aguapy yvyarigua ome’ẽva, upévare anítei peñemondýi ni peneangekõitei.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.

Ha Ñanderuete py’aguapy, ituichaitevéva opaite yvyarigua arandúgui, ha ko py’aguapy kóva oñangarekóta pene remiandu ha pene pensamientokuéra rehe Hesu Cristopype.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Ñanderuete ome’ẽ ipu’aka hetãme g̃uarã, Ñanderuete ohovasa hetãme ipy’aguapy reheve.

Ejei tembiapo vaígui ha ejapo tembiapo porã, eheka pe py’aguapy, upéi eñeha’ãmbaite rejoko hag̃ua ha eiko ipoguýpe.

Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

Ñanderuete ñanemo’ã ha ñanemombaretéta jajejopy vai jave,

Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.

Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã.

Ndépa ha’ehína pe Crísto ouva’erãva térãpa roha’ãrõta gueteri ambuépe.

Che cangálla ningo hu’ũ asy ha ivevúi pe cárga aguerahaukáva peẽme.

Ipy’aguapy umi ohayhúva ne rembipota, ha ha’ekuéra noñepysãngamo’ãi.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Ne ñe’ẽ chemoangapyhy ajepy’apy jave, ne ñe’ẽ chemoingove jevy.

Opaite pende jepy’apykuéra peity hi’ári, Ha’e ningo oñangarekohína penderehe.

Ani rekyhyje, Che voi aĩgui nendive, aníke nde py’akangy, che ha’égui nde Jára, nemombaretéva, tapiaite roipytyvõta, ha añangarekóta nderehe che pu’aka rupive.

Ekirirĩ Ñanderuete renondépe, ha ejerovia hese. Ani ndepochýtei rehecha ramo iñanáva rapére oĩ po’a poty.

Upe ohekáva mba’evai oñembotavyse voi; ha upe ohekáva mba’eporã, oporombovy’a.

Pe Pytu Porãmbáva katu hi’a: Mborayhu añeteguáva, tory, py’aguapy, paciéncia, oporombohorýva, py’aporã, jerovia,

ñemomirĩ, jejokokuaa. Moises rembiapoukapykuéra katu noñemoĩri ko’ã Pytu Porãmbáva’a rehe.

Ñanderuete ndivénte che ánga opytu’ukuaa, ichuguínte ou chéve ñepytyvõ.

Ani pejeroviátei pirapire rehe ojepe’áva mbaretépe térã oñemondava’ekue rehe, oñemboheta hetave ramo pende pirapire, ani pemoĩtei hese pende py’a (ani pejerovia pende pirapire rehe).

Ñanderuete oñe’ẽva’ekue, ahendu porã iñe’ẽ he’ívo: Pende Ruete ipu’akapa,

ha nendive, che Jára, oĩ poriahuvereko, ha Nde remyengovia peteĩteĩvape hembiapokue ojerure háicha.

Ha’énte hína che itaguasu ha chepytyvõva añetehápe, Ha’e ningo chemo’ãva, ndachepysyrymo’ãi.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

Che hermanokuéra pepensa avei opaite añetegua rehe, opaite mba’e oñemomba’eguasukuaáva rehe, opaite heko peguáva rehe, opaite justícia rehe, opaite ipotĩva rehe, opaite ipy’a porãva rehe, opaite ñe’ẽ ñemyasãi porã rehe, opaite heko porãva rehe, opaite ñemboete rehe.

Chembo’éna tajapo ne rembipota, Nde ha’égui che Jára, nde Pytu Porãite tachemboguata tape porãre yvy ape ári.

Jaiko mbaretépe ñande jeroviápe ñamyi’ỹre, Ñanderuete katuete ojapopava’erã he’imava’ekue guive,

Ejeroviáke nde py’aite guive Ñanderuete rehe, ha ani rejejoko ne arandu rehe.

Nemandu’áke hese opaite nde rape rehe, ha Ha’e omyesakãta ne raperã.

Ajapysakáta ore Ruete he’ítava rehe, Ha’émante ombopy’aguapy hetãme ha umi heko potĩvape, anive hag̃ua ojavy jevy hikuái.

Ore Ruete, Nde orembopy’aguapy, nderupínte ore rembiapokuéra osẽ porãmba.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Añembyasyete ningo, eñangarekomína cherehe ne ñe’ẽ he’i háicha.

Mborayhupype ndaipóri kyhyje, pe mborayhu oĩmbáva hekópe omosẽ uvei pe kyhyje, pe kyhyje oguerúgui jehasa asy; upévare upe okyhyjéva ne’ĩra gueteri oguereko mborayhu oĩmba heko peguáva.

Umi oñemomirĩvape oñeme’ẽta ko yvy imba’erã ramo ha ovy’aitéta ohasa porãtaháre.

Peheka umi mba’e yvága peguáva, ani yvy ariguáva.

Ipy’a rory umi ombopy’aguapýva umi oñorãirõvape, ha’ekuéra oñemboherava’erã Ñanderuete ra’ykuéra.

Py’aguapypópe añeno ha upeichaite ake avei, che Ruete, Nde rupínte aiko porãkuaa.

Ha justíciagui heñóita tapia g̃uarã py’aguapy, angapyhy ha kyhyje’ỹ.

Eme’ẽmína chéve akã porã ha eñangarekomína cherehe ajapo hag̃ua che py’aite guive ne rembiapoukapy.

Ha pejapo opaite mba’e che pohekombo’eva’ekue ha pehenduva’ekue chehegui, ha pejapo opaite mba’e pehechava’ekue che ajapova’aína. Ha pe py’aguapy Jára (Hesu Crísto) oĩhína katuete penendive.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

Che katu ajerovia nderehe, che Ruete, che ningo ha’e: Nde, che Jára.

Nde pópe oĩmba che arakuéra, cheguenohẽmína umi cherehe ija’e’ỹva ha chemuñáva pógui.

Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.

Peteĩ tapicha reko ombovy’a ramo Ñanderuetépe, umi hesekuéra ija’e’ỹvape jepeve Ñanderuete omoingo porã jevy hendive.

Nde po cheapo ha chemongakuaa chéve, cherekombo’e che aikuaa porã hag̃ua ne rembiapoukapy.

Péina ápe, Che aĩ nendive, ha añangarekóta nderehe mamo rehoha rupi, ha rogueru jevýta ko yvýpe nde reho hágui, ndorohejamo’ãigui, rejapopa peve Che ha’eva’ekue guive ndéve.

Oñemoherakuã ramo mba’evai ndokyhyjemo’ãi, ojeroviágui ipy’aite guive Ñanderuete rehe.

Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

Che aha’ãrõ Ñanderuete chepytyvõ hag̃ua, che ánga oha’ãrõ ne ñe’ẽ ojejapopa hag̃ua hekoitépe.

Che ánga oha’ãrõve Ñanderuetépe umi guárdia pyhare peguágui, oha’ãrõva iko’ẽmba hag̃ua.

Umi ojeroviáva Ñanderuete rehe katu oñemombarete jevýta, oveve yvateva’erã ku ñapykanícha, oñaniva’erã hikuái ha ndaijuku’amo’ãi, ha oguata pukuva’erã hikuái ha naikane’õmo’ãi.

Ñanderuete oipytyvõ heko potĩvape, ha Ha’e oñangarekóta hesekuéra ojejopy vai jave.

Evy’aite Ñanderuete ndive, Ha’e tome’ẽ ndéve nde py’apy ojeruréva.

Ñanderuete oipytyvõ ha oguenohẽ ichupekuéra ijejopy vaígui, ha’ekuéra ojerovia haguére hese.

Che cangálla ningo hu’ũ asy ha ivevúi pe cárga aguerahaukáva peẽme.

Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva.

Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

Ndache’a’éi umi tapicha hova mokõivare, ahayhu uvei ne rembiapoukapykuéra.

Eñangareko porãve nde py’apy rehe opaite ambue mba’égui, ichugui heñóigui pe tekovete.

Og̃uahẽ ramo pe ára che akyhyjeha, nderehe katu ajerovia.

Ñanderuete ñepytyvõ amombe’úta, iñe’ẽ oikóta katuete, Ñanderuete rehe ajerovia ha ndakyhyjemo’ãi. Mba’épa yvyarigua ikatúne ojapo cherehe.

Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.

Anítei pejepy’apy mba’eve rehe, pemombe’u uvei opaite mba’e pene ñembo’e rupi Ñanderuetépe, pembohasa ichupe g̃uarã pene rembijerure pene agradecimiénto reheve.

Umi ñe’ẽ he’íva guive che juru ha heñóiva che py’apýpe tahorýkena ne renondépe, che Ruete, Nde voi chemo’ã ha chesalváva.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Pe yvy apýra guive amba’ejerure asýta ndéve, che py’a ikangypáma. Cheguerahamína upe itaguasu ijyvatevéva ári.

Peẽ ndapehechái ramo jepe Hesu Crístope, pejerovia hese, pehayhu ichupe ha pemomba’eguasu ichupe vy’a tuicha reheve, ndaikatúiva ja’e yvy arigua ñe’ẽ rupi ha peẽ penerenyhẽ heko jajáigui,

Che ajepy’apy heta ramo jepe añandu Nde chemoangapyhy ha Nde rembovy’a jevy che ánga.

Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

Ag̃uiete oĩ Ñanderuete mayma ohenóiva guive ichupe, umi ohenóiva jeroviapópe ichupe.

Nde, embopy’aguapy ichupekuéra ha py’aguapy porã rupi ha’ekuéra ojeroviáta nderehe.

Pejerovia Ñanderuete rehe opaite árape, Ñanderuete, pe Jaraitéva ndivénte jajohu ñemo’ãha ijapyra’ỹva.

upévare ñag̃uahẽ jeroviapópe iguapyhaguasúpe, jahupity hag̃ua iporiahuvereko ha jajohu hag̃ua ipy’aporã, Ha’e ñanepytyvõ hag̃ua ñaikotevẽha árape.

Upévare Che ha’e peẽme: Ani pejepy’apy pene rembi’urã rehe térã pemboy’uva’erã rehe, térã peẽ pemondeva’erã rehe; ndaituichavéi mba’e piko ñande rekove, tembi’úgui; térã ñande rete aógui.

Pema’ẽna umi guyra ovevéva ára rehe, ha’ekuéra noñemitỹi ni nomono’õi mba’e ra’ỹinguéra iñongatuhápe, upeichavéramo jepe pende Ruete, yvágape oĩva, omongaru ichupekuéra. Ha peẽ ningo mba’eguasuve ichuguikuéra.

Py’aguapypópe aha’ãrõ Ñanderuetépe, ha Ha’e oñemboja cherehe ha ohendu che mba’ejerure asy.

Nañomíri nde justícia che py’apýpe, aikuaauka uvei nde reko hekoitépe ha ne mborayhu. Nañomíri ne añetegua ni nde poriahuvereko, amyasãi uvei atyguasúpe.

Che Ruete, anína rejoko chehegui nde poriahuvereko, nde poriahuvereko ha ne añetegua tapia toñangareko cherehe.

Ojere cherehe mba’evaieta ojepapakuaave’ỹ meve, che rembiapo vaieta cherupitýma, ha ndaikatúi ajesaupi. Umía hetave che akã raguekuéragui, ha che py’a ndoiko porãvéi, ho’áma yvýre.

Tahi’ãite ndéve chepytyvõmi hag̃ua, Nde, che Jaraite. Che Ruete, pya’emína eju chepytyvõ hag̃ua.

Toñemotĩ ha tojesarea joaite peteĩcha umi ohekáva ohundi hag̃ua che rekove. Tokañy hapykue gotýo ha toñemotĩ opaite umi chehundiséva.

Toñemotĩ ha toñemondyipa umi oñembohorýva cherehe, ha chehundiséva.

Tovy’a ha tahory opaite umi nderekáva, ha opaite ojeroviáva guive nderehe te’i: Ñanderuete ningo ituichaiterei voi.

Ajepy’apy ha ahasa asy ramojepe, (aikuaa porã) Ñanderuete oñangarekotaha cherehe. Nde voínte che pytyvõhára, Nde, che Ruete, eju pya’e chesalva hag̃ua che jejopy vaígui.

Ha’e cherenohẽma pe yvykuágui, ahasa vai haguégui pe tuju karugua vaietégui; chepe’a ha emoĩ che pykuéra itaguasu ári chemboguata porã jevy hag̃ua.

Ha upéi omoĩ che jurúpe peteĩ purahéi pyahu, amomba’eguasu hag̃ua che Ruetépe. Heta oĩta ohechátava ko’ã mba’e, okyhyjéta Ñanderuetégui ha ojeroviáta hese.

Hesu Crísto rupínte oĩ perdon opaite tetãyguakuérape g̃uarã, Ha’e oguerúgui pe py’aguapy yvága pegua huguy rupínte, oñeñohẽva’ekue ikurusúre.

Aníkena ñanekane’õ jajapo hag̃ua ñane rembiapo iporãva, hi’árape ñamono’õva’erã, katuete nañaneate’ỹi ramo.

Upe oikóva pe Jára Ijyvatetéva ãme ha pe Ipu’akapáva poguýpe,

Pevy’a tapiákena.

Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10).

Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.

Ha Ñanderuete ñanembopy’aguapýva, toĩ opavave penendive, taupéicha (amen).

Heta jepy’amongeta oĩ ñande py’apýpe Ñanderuete rembipotánte katu ojehuva’erã ñande rekovépe.

Ñanderuete ñanemo’ã porã ha kuarahýicha ñanderesape. Jeporiahuvereko ha terakuã porã Ñanderuete ome’ẽkuaa. Ha umi heko potĩvape Ha’e ohovasava’erã.

Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.

Pevy’a tapia Hesu Cristopype, ha ha’e jevy: Pevy’ákena.

Aiko ramo jepy’apy vaípe, Nde chemoangapyhy jevy, Nde chepytyvõ umi cherehe ija’e’ỹvagui ha Nde voi reipyso nde po akatúa chepytyvõ hag̃ua.

Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia,

ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza,

ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.

Ñanderuete mborayhu katu oĩ peteĩ ára atyguasu guive ambue ára atyguasu peve umi okyhyjéva ichugui ndive, ha ijustícia opyta iñemoñarenguéra peve,

umi ojapóva guivénte iñe’ẽme’ẽ, ha umi imandu’áva hembiapoukapy rehe ojapo hag̃ua hekoitépe.

Oñembyai ramojepe che ro’o ha che py’a, Nde, che Ruete repytava’erã che mba’erepyetéva.

ha pende Ruete pomboguatáta opaite árape ha penemohyg̃uatã porãta pende yvy ikangy ramojepe ha Ha’e omombaretéta pende rete ha pejoguaitéta ku ka’avoty oñembohykuévape meme árape, ha yvu hi’y hetávape, ndahypáiva araka’eve.

Ñande jaguerekógui ñande jerekuévo ku araícha heta techahare ojeroviaitéva, upévare jaipe’a ñandejehegui opaite mba’e ñandejopýva ha ñandejokoséva, ha avei pe angaipa ñanemoñuhãséva, ha ñañani paciéncia reheve pe carréra oñemoĩva ñane renonderãme.

Umíva ningo mbovy ára ñandehavira hi’ã háichante ichupekuéra, kóva katu ñanerekombo’e ha ñandehavira ñande reko iporãve hag̃ua ha ñande reko ojoguave hag̃ua Hesu Crísto reko porãme.

Añetehápe opaichagua jehavira jahasa asy aja, nañanembovy’amo’ãi, hasy uvei; upéi katu hi’a justícia ha py’aguapy, umi ojepokuaávape g̃uarã.

Upévare pemombarete jevy pende jyva ikane’õva ha pene renypy’ã ikangýva.

Pemyatyrõ pende rape ikarẽva, ani hag̃ua pende pykuéra ikaráu, tokuera uvei.

Peñeha’ãke peiko hag̃ua py’aguapýpe opavave ndive ha peñemboheko porã, ko’ãva’ỹre avave ndohechamo’ãi Hesu Crístope,

ha peñangareko porãke ani hag̃ua avave pende apytépe omboyke Ñanderuete mborayhu ni ijopói (Hesu Crísto) ha péva ojehúta peiko ramo py’arópe pende rapicha ndive, koichagua teko ningo penemongy’a ha penemyangekõi ha ováta heta hapicha rehe.

Anítei oime pende apytépe peteĩ opoíva Ñanderuetégui, ojehu haguéicha Esau ndive; okaru porã hag̃uánte ha’e, ovende ta’ýra ypykue reko, (Génesis 25,31).

Peikuaa voi ningo uperire, Esau ohupityse hague avei itúva jehovasa, itúva katu ombotove ichupe. Heta tesay reheve oheka itúva ohovasa peve ichupe avei; pe jehovasa iporãvéva katu oñeme’ẽmba jepéma, (Jacóbope).

Peẽ napeñembojaiva’ekue pe cérro rehe (Israelguakuéraicha), ikatúva rehe ojepoko oĩháme tata hendýva, arai hũetéva, pytũmby ha yvytu jepoka.

Ha napehendúi avei pe turu (trompéta) pu ni Ñanderuete ñe’ẽ. Upéramo Israelguakuéra ojerure asy anive hag̃ua Ha’e oñe’ẽ ichupekuéra.

Ha ñama’ẽ Hesu rehe, Ha’e voi ñande jerovia apohare, hendive ñañepyrũ jajerovia ha hendive ñag̃uahẽ ñande jerovia ru’ãme. Hesu oha’ãrõ pe vy’a outavahína ichupe g̃uarã, upévare Ha’e ohasa asy ha omano ikurusúre otĩ’ỹre. Ha ko’ág̃a Ha’e oguapyhína Ñanderuete yke akatúape.

Ipy’a rory umi imba’embyasýva, Ñanderuete voi omoangapyhyva’erã ichupekuéra (Apocalípsis 21,4).

Evy’aite Ñanderuete ndive, Ha’e tome’ẽ ndéve nde py’apy ojeruréva.

ha umi Jerusalengua ojepy’apy asývape ame’ẽukáta iñakã jeguakarã, tanimbu rãngue; acéite ryakuã porã, jahe’o rãngue; ahoja tory rehegua, jepy’apy rãngue; hérata tajy justícia rehegua, Ñanderuete oñotỹtava ohechauka hag̃ua heko jajaipáva.

Hesu Crísto py’aguapy toisãmbyhy pende py’apýpe, upevarã avei peẽ peñehenói peiko hag̃ua peteĩ tete añóme, ha peagradece ichupe.

Hesu Crísto ñe’ẽ tomyenyhẽ pende py’apy opaite árape peñohekombo’e opaite arandúpe ha peñomokyre’ỹ Salmokuéra, purahéi ha ñembo’e rupi, ha peagradece Ñanderuetépe pende py’aite guive.

Pe py’apy rory ombohova porã ijárape ha pe py’apy oñembyasýva omokangy ichupe.

Umi oñembotuicháva heta oñembohory ramojepe cherehe, ndapiái nde rapégui,

Upéicharamo ndapeikovéima angaipa rembiguái ramo, peẽ ndapeikovéiguima Moises rembiapoukapy poguýpe, Ñanderuete mborayhu ha iporiahuvereko poguýpema uvei peikopeína ko’ág̃a.

Che Ruete, che romomba’eguasu Nde cheguenohẽ haguére cherayhu’ỹva pógui, ha Nde nderehejái ha’ekuéra oñembohory cherehe.

Peikuaa porãke, Ñanderuete, che Jára chesalvataha; ajerovia hese ha ndakyhyjemo’ãi; Ha’e chemombarete, upévare apurahéita ichupe g̃uarã, Ha’e chesalvágui.

Vy’apópe peguenohẽva’erã y pe salvacion yvúgui.

Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.

Ñande rekoharã ningo oĩ yvágape, upégui ñaha’ãrõ avei ñane salvacion Ñandejára Hesu Crísto rupi.

Ñe’ẽ porã ojogua eiraitépe hapichakuérape g̃uarã, mba’e vevúi asy hi’ángape g̃uarã ha pohã ikanguekuérape g̃uarã.

Ne rendápe, che Ruete, amog̃uahẽ che ánga.

Opaite Ñanderuete rapekuéra ohechauka iporiahuvereko ha imborayhu, umi oñongatúva ha ojapóvape g̃uarã iñe’ẽ.

Nde réra rehehápe, Nde, che Ruete, eperdona che rembiapo vai, heta ramo jepe.

Mba’épa ojehúta upe kuimba’e okyhyjéva Ñanderuetégui, Ha’e ohekombo’éta ichupe oiporavokuaa hag̃ua haperã.

Ha’e oiko porãitéta ha iñemoñarenguérape g̃uarã opytáta ko yvy kóva imba’etee ramo.

Ñanderuete ohayhuhína umi okyhyjévape ichugui ha umi mba’e ha’ekuéra oikuaa’ỹva Ha’e omoarandúta ichupekuéra omoirũ porã guive ichupe.

Ajesareko Ñanderuete rehénte, Ha’émante oguenohẽta che pykuéra che ñuhãgui.

Ema’ẽmína cherehe ha cheporiahuverekomína, aimégui che año ha jejopy vaípe.

Ajepy’apyeterei ningo, cheguenohẽmína che jehasa asýgui.

Ema’ẽmína che jepy’apy asy ha che jehasa asy rehe, ha cheperdonami opaite che rembiapo vaíre.

Ema’ẽmína umi cherehe ija’e’ỹvare, mba’eichaitépa oñemboheta hetave hikuái ha pochy vaipópe chejukase.

Che Jaratee, nderehe ajerovia, anítei chemotĩ umi cherehe ija’e’ỹva térã umi cherehe oñembohorýva renondépe.

Ñanderuete ipy’aporãgui penerenoiva’ekue Hesu Crísto rupi heko jajaipa tapia g̃uarãvape. Pehasa asy rire sapy’ami, Ha’e voi penemboheko porãta, penemombaretéta, penemohatãta ha penemohenda porãta.

Hesu Crísto ñanerenói pe teko sãsóme g̃uarã, upévare pepyta hatãkena pe teko sãsóme ha anítei peñemoĩ jevy tembiguái cangálla poguýpe.

Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

Ñanderuete oipota umi Ha’e oikuaámava ymaguare guive, ojoguava’erãha ita’ýra Hesu Crísto ra’ãngápe (heko porãme), Hesu Crísto ningo oiko hermáno peteĩha ramoiñermanokuéra apytépe.

Ne rembiapoukapykuéra ningo añetegua memete, reiete oñemoĩ cherehe hikuái, chepytyvõmína.

Pyharevépe tañandu ne mborayhu, nderehe ajeroviágui, ehechaukamína chéve che raperã aguata porã hag̃ua, che ánga nderehénte ojerovia.

Ha opaite nde ra’ykuéra oikóta nde Ruete remimbo’ekuéra ramo; ha pe py’aguapy oñemboheta hetavéta ichupekuéra g̃uarã.

Ñanderuete rembiapoukapykuérape ndaipóri jejavy, omoangapyhy katu yvyariguakuérape, opaite mba’e Ñanderuete he’íva guive katuete ojehu avei, Ha’e omoaranduhína umi oikuaa’ỹvape.

Ñanderuete rembiapoukapy iporã ha ombohory yvyarigua py’apy, Ñanderuete rembiapoukapy hesakã ha ohesape porã yvyarigua resakuéra.

Ko ára kóvape Ñanderuete ombosako’i, upévare javy’aite ha ñanderory hesehápe.

Opaite ko’ã mba’evai ñande jagueropu’akapa Hesu Crísto rupi, ñanderayhúgui.

Ñanderuete ningo che rekove resape ha che salvador, mávagui piko akyhyjéta. Ñanderuete che rekove mombaretehára, mávagui piko añemondýita.

Che ha’égui nde Ruete, nde Jára, Che rojapyhýma nde po akatúagui ha ha’e ndéve: Ani rekyhyje, Che roipytyvõta.

Nda’éi ko’ã mba’e ajejopy vaígui, che voi ajepokuaáguima, añecontenta hag̃ua arekomíva rehevénte.

Che ahasa asykuaa ha areko hetakuaa, che ryg̃uatãkuaa ha cheñembyahyikuaa, che ajepokuaáma hemby ramo térã opa ramo che pirapire.

Upévare amomba’eguasúta Ñanderuete ñe’ẽ, iñe’ẽ ae amombe’úta.

Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure.

Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

Ajahe’o rãngue, ajeroky vy’apópe. Nde rejoráma che ao vosakue rehegua, ha cheku’a jopyha torypápe.

Ani rekyhyjétei, Che aĩgui nendive; kuarahyresẽguio aguerúta ne ñemoñarenguérape, ha kuarahyreikéguio ambyatýta ichupekuéra.

Aníke rehejátei pe arandu, ha’e ningo oñangarekova’erã nderehe; ehayhúke pe arandu, ha ha’e oñangarekova’erã nderehe.

Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

Ha ko’ág̃a, che Ruete, mba’épa aha’ãrõvekuaa, nderehénte ajerovia.

Peiko oñondive, peiko háicha Hesu Crísto ndive.

Peheka raẽ Ñanderuete rembipota ha hetãguasu, ha opaite ko’ã mba’e oñeme’ẽmbáta peẽme.

Upévare anive pejepy’apy ko’ẽ ramo g̃uarã rehe, pe ko’ẽ ramogua ára ogueru jevýtama ijehe ijepy’apyrã, péva iporãma (ovaléma) jaisu’u hag̃ua ko ára pegua jepy’apy.

Ñanderuete rape katu iporãite, Ñanderuete ñe’ẽ ipotĩmbyre opaite hese ojeroviávape g̃uarã, Ha’e ningo che mo’ãha.

Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.

Ñanderuete ndivénte che ánga opytu’ukuaa, ichuguínte aha’ãrõ ñepytyvõ.

Che añembokurusúmagui Hesu Crísto ndive, ndaikovéima che, Hesu Crísto oikógui chepype. Che aikove ramojepe che ro’ópe, aikove che jerovia rupi Ñanderuete Ra’y rehe, Ha’e cherayhúgui ha oñeme’ẽmava’ekue che aikove hag̃ua Ha’érupi.

Upéi umi cherehe ija’e’ỹva oguevipava’erã hapykuere gotýo, che amba’ejerure asy jave ndéve, che ningo aikuaa porã voi Ñanderuete oĩha chendive.

Pemoangapyhy, pembopy’aguapy che retãme, he’i Ñanderuete.

Upévare che hermanokuéra ahayhúva, peñembo’y hatãkena, pemỹi’ỹre (akatúape ni asúpe, Deuteronómio 28,14), pemba’apo katu kyre’ỹme pene rembiapópe, ha peikuaa porãke opaichagua tembiapo pejapóva guive Ñanderuetépe g̃uarã ndareiriha (ndojeitymo’ãiha tesaráipe).

Ore Ruete, Nde ningo reha’ãma ha reipyguara che rekove ha chekuaa porã voi.

upépe nde po chesãmbyhýta avei, ha nde po akatúa chejokóta.

Ha ha’e ramo: Pe pytũ tachemo’ã, ha pe pyhare jepeve opyta che jerekuévo,

pytũ jepeve nomoypytũmo’ãi mba’eve ndehegui, ha pe pyhare ojajái ramo ku arakuéicha, ndéve g̃uarã pytũ ha tesakã peteĩchaite.

Nde voi che rekove apohare, Nde cheapova’ekue che sy ryépe.

Che romomba’eguasu Nde cheapo porãitégui, ne rembiapokuéra mba’e techapyrãva, ha che ánga oikuaa porã voi ko’ã mba’e.

Ndehegui che reko noñemíri, Nde rejapo jave ñemiháme che rekove pe yvy ruguaitépe (nde tallérpe).

Nde resakuéra ohecháma che rekove oñepyrũ porã mboyve, ha ne kuatiañe’ẽme ojehaipáma opaite che rekove ararã oñepyrũ mboyve che ára peteĩha.

Nde, ore Ruete, ne pensamientokuéra ningo tuichaiterei mba’e chéve g̃uarã. Ndaikatúi ñambyatypa jaipota ramojepe.

Aipapa ramo oñemboheta hetave yvyku’i ra’ỹigui, ha apáy ramo añepyrũkuaa jevy hemby hetavégui.

Nde, ore Ruete, terejuka pe iñañávape; ha peẽ tekove tuguy ñohẽha, peñemboyke chehegui.

Nde reikuaapa aguapy térã apu’ã ramo, mombyry guive reikuaa porã che ajepy’amongeta jave rehe.

Ha’ekuéra oñembohoryhápe oñemoĩ nderehe, ha oiporu mba’e výro rei ramo nde réra.

Ndacha’éipa, che chepochy, ore Ruete, umi nderehe ija’e’ỹva rehe, ha umi oñemoĩva nderehe ndoikuaaséi mba’eve ndehegui.

Amboykéma ichupekuéra, che a’e’ỹha ramo aguereko ichupekuéra.

Eipyguara, Nde, ore Ruete, che rekove ha eikuaauka chéve che py’apýpe oĩva, chembojovake ha ehechauka che jepy’amongeta (pensamientokuéra).

Ema’ẽmína oĩpa chepype ñaña reko, ha chemboguata pe tape añeteguáva rehe.

Reikuaa che aguata térã che apytu’u ramo, ha reikuaapa che rapekuéra.

Chéverõ g̃uarã umi jehasa asy ko’ag̃agua jahasavañaína, ndaha’éi mba’eve, ñambojoja ramo pe teko jajaipáva rehe ojehechaukava’erã ñande rekoverãme.

Ñanderuete oikógui ipype ndoku’emo’ãi. Ñanderuete oipytyvõtagui ichupe ko’ẽtĩ jave.

Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).

Ko’ã Ñanderuete promésa rupi ñane ánga ojohu pytu’u añeteguáva ku barcoguasu oñeñapytĩ háicha sã mbaretépe ty’ãiguasúpe (áncla), upéicha ñande jajejoko hatãva’erã avei isã rehe (ipromésa rehe) oñeñapytĩvahína pe óga jojohuha aosãingo kupépe, oĩva yvágape.

Sã mbyky rehe aikose, aheka haguére ne rembiapoukapy.

Ñanderuete, pe Jaraite Pytu Porãitéva oĩ cheári, Ha’e cheporavo; Ha’e chemondo ambohasa hag̃ua iñe’ẽ porãva umi ohasa asývape, ha ambopy’aguapy hag̃ua umi ojepy’apývape, amombe’u hag̃ua umi oñeñapytĩvape ojejorapataha, ha ojepe’apataha cárcel rokẽnguéra;

Ne rembiapoukapy rape rehe aguatase, Nde chemoarandu porã che py’apýpe.

Péicha he’i Ñanderuete, Israel Jára Heko Porãitéva: Peñembyasy ramo pejapo vai haguére ha pejevy che rendápe, pejesalva hag̃ua, peñemomirĩ ha pejerovia ramo cherehe peẽ penembarete jevýta, peẽ katu ndapeipotáikuri,

Ha mba’éicha piko ikatúta ojekuaauka Hesu Crístope ichupekuéra, noñemondói ramo avavépe hendapekuéra. Ojehaíma Ñanderuete kuatiañe’ẽme: Iporãite ningo umi py omyasãiva mba’e iporãva, (Isaías 52,7).

Ñanderuete, nde poriahuvereko og̃uahẽ yvága peve, ha ne mborayhu ohupity araikuéra.

Ko’ág̃a, nde Jacóbo, pende Ruete rembiapo, nde apohare he’iuka ndéve: Ani rekyhyjétei, Che roperdonáma; Che rohenói nde réra rupi, nde ningo che mba’énteva voi.

Peẽ ningo che rechahare, he’i pende Ruete, ha che rembiguaikuéra, Che aiporavomava’ekue. Peẽ chekuaa ha pejerovia cherehe, ha peikuaa porã ndaiporiha ambue Jára; Che mboyve ndojejapói ambue jára, ha Che aikota’aína opa rire umi jára gua’u paha.

Chénte pende Jára ha che’ỹre ndaipóri avave ikatúva peneguenohẽ pende jehasa asýgui.

Che amombe’uka ha poikuaaukava’ekue che réra, ha Che poipytyvõva’ekue oĩ mboyve ambue jára pende apytépe. Peẽ voi che rechahare, he’i yvága Jára, Chénte apytava’erã tapia g̃uarã yvága ha yvy Jára ramo.

Ko ára kóva ha’e jevy: Ndaipóri avave ikatúva ohekýi peteĩ mba’e che pógui. Ha umi mba’e ajaposéva, katuete ajapóta avei, ha ndaipóri avave ikatúva chejoko.

Péicha he’i yvága Jára, Israel Jára Porã, Chémante posalváta: Penderehehápe amondova’ekue ichupe Babilóniape, omokañy hag̃ua ichupekuéra, ha umi Caldeaygua okañy avei ibarcoguasukuérape, umía rupi oñembotuichava’ekue.

Che voi ningo pende Ruete, pe Heko jajaipáva, Israel apohare, pene retã ruvichaguasu.

Péicha he’i pende Ruete, penembohapéva yguasu rupi ha ombosako’iva’ekue pe tape po’i y ipochyveha rupi.

Che voi aheja osẽ hag̃ua icárro, ikavaju, isoldádo aty ipu’aka reheve, aity hag̃ua ha ho’a opu’ãve’ỹ hag̃uáicha; oguepa hag̃ua hikuái, ku tataindy ogue háicha.

Ani peñemomandu’átei umi mba’e ohasamava’ekue rehe, ha ani peguerútei pene akãme umi mba’e ymaveguare.

Pema’ẽ porãke, Che ajapo mba’e ipyahúva; pya’ete ojekuaáta, ndapehechakuaái piko. Ambohape jevýta tape yvy perõ rupi ha ysyry, heñoi’ỹháme mba’eve.

Rehasa ramojepe hi’y hetaite rupi, Che aĩta nendive, ha ysyry ndetuicháva nderupity ramojepe nanembojahogamo’ãi. Rehasa ramojepe tata mbyte rupi, nderekaimo’ãi, ha pe tata rendy nanderapymo’ãi.

Ñanderuete ojoko umi ho’ávape, ha omopu’ã jevy umi ikangývape.

Pe Pytu Porãmbáva ñanemokyre’ỹ ha ñanepytyvõ ñamboyke hag̃ua ñande py’apy kangy ha ñanepytyvõ ñañembo’e hag̃ua hekoitépe Ñanderuetépe, Ha’e oipota háicha ha ovale hag̃uáicha ichupe g̃uarã upévare pe Pytu Porãmbáva ojerure ñanderehe pyahẽ oje’e’ỹkuaáva reheve.

Nde voi ha’égui che mo’ãhára ha che róga yvate mbarete cherehe ija’e’ỹva renondépe.