Kasta
149 Biblian jiskʼa tʼaqanakapajja, Diosan taqe kun yatitap toqet parlir jiskʼa tʼaqanaka
Tatay, jumaw chuymajj uñantista, nayar uñt'araquista: ch'eka amparamajj ucan jicjjatitaspa, cupi amparamasti janiw antutquitaspati. Ch'amacamp imjjatayasiñtejj amtirista, jan ucajj, khana urun ch'amac arumar tucuñaptejj muniristjja, ch'amacajj janiw jumat imantquitaspati, arum ch'amacajj urut sipan juc'ampiw khantaspa. ¡Ch'amacas urus jumataquejj pachpaquiwa! Jumaw nayarojj irnokasista, taycajjan puracapan utjayasista. Jumaruw yuspagarsma, muspharcañpun nayataquejj lurtajja, ¡ucsti sumpun yatista! Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama. Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana. Diosajjay, juman amtatanacamajj jan amuycayawa, ucanacajj jan tucusquiriwa. Ucanactejj jact'añ muniristjja, ch'allat sipan juc'ampïspawa; jaqhuñ tucuyirist ucasa, jumamp chicaquïsquiristwa. Diosajjay, ñankha luririnacarojj tucusiyamaya, jake jiwayirinacarusti nayat jithektayam, jumaw kont'atajjsa, sartatajjsa yattajja, lup'itanacajjarojj jayatpach amuytajja. jumjjat jan wal parlir jakenacat jithektayita, juma contra sayt'ir jakenacat jarc'aketa. Tatay, ¿janit jumar uñisirinacar uñisirïctjja? ¿Janit jumar kallasirinacar jisc'achirïctjja? Jan t'acurcay uñisiñampiw jupanacar uñista, uñisirejjat jupanacarojj uñt'ta. Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim, nayatejj ñankha thaquin sarnakerïstjja, cheka thaquinjamay irpasita. Jumaw sarnakatajjsa, samart'atajjsa yattajja, takpach sarnakäwinacajjajj juman uñt'atawa. Tatay, janïraw lacajjampis arscti ucqhaw jumajj takpach yatjjtajja.
Janiw cunas Diosan luratanacapatjja jupat imantascaspati, take cunaw khanstayata, uqhamarac jist'arata qhitirutejj jaqhuta churcañäni ucan nayrakatapanjja.
Chuymasatejj cunatsa juchañchchistojja, Diosajj juc'amp jach'awa chuymasat sipansa, jupasti take cunwa yatiraqui.
¿Janit yatipctasti, janit ist'cta? Tatituw, wiñay Diosajja, aca orakpacha lurirejja, janiw jupajj ch'amtayquiti, janiraquiw karjasquisa, yatiñ cancañapasti jan tucusquiriwa.
Tatitojj take chekanquiwa; jupajj uñch'uquisquiwa asqui jakenacaru, uqhamarac ñankha jakenacarusa.
¡Cunja sumas Diosan yatiñ cancañapajja, munañapasa, amuyt'apasa! Janiw jupan amtäwinacapjja khanañchcsnati, ni jupan thaquipsa amuyt'caracsnati. “Uqhamajj, ¿qhitirac Diosan amuyañapsti amuyt'isti? Jan ucajj, ¿qhitich jupar yatichi?
“Janïra jumar jacaña churcäyäsma ucqhatpachwa ajllïsma; janïra nascäyäta ucqhatpachwa nayajj yakhachäsma; marcanacan profetapäñamataquiw jumarojj uchsma” sasa.
¿Yattati jumajj cunjämsa kenayanacajj alajjpachan sarnakapjje, ucatsti Diosan asqui luräwipätapjja?
Juma Salomón munat wawajjasti, uñt'ätawa awquimana Diosaparu, ucatsti take chuymaraquiwa jupar sirvïta, uqhamarac suma amtampiraqui, Tatitusti take chuymanacjja sumwa uñji, uqhamarac yatiraqui cuna amtäwinacsa, lup'ïwinacsa. Uqhamasti jumatejj jupar thaktätajja, jupasti jumarojj jicjjatayasïtamwa, ucampis jumatejj jupat sarakäta ucajja, jupasti jumarojj wiñayataquiw jakonucütam.
¿Qhitis nayan nayräjjatjja imantasispajja? Alajjpachasa, acapachasa nayampi phokhantatawa. Naya Tatituw ucjja sista.
Tatitojj alajjpachatpach uñtani, take jakenacaruw uñjaraqui; acapachan takpach jaquir jakenacarojj utjäwipatpach uñch'uquisinqui, jupaw takenir amuy churi, juparaquiw take luräwinacap uñch'uquisqui.
Take acanacsti Diosajj Kollan Ajayu tokwa uñacht'ayistu. Uca Ajayusti take cunracwa yati, Diosan jan amuyt'cay amtatanacapsa yatiraquiwa. Jakenac taypitsti ¿qhitirac yatispa jaken amtatanacapsti? Cawquïritejj chuymapancqui uca ajayuquiw yatejja. Uqhamaraquipï Diosan amtatanacapjja pachpa Diosan Ajayupaquiraquipï yatejja.
Nayranacamajj lurat janchejj uñjäna; ucanacasti takpachaw kellkatamar kellkantasïna. Jacañ urunacajjajj suma jaqhutänwa, nayrïr uru janïr purinquipana.
Jaketaquejj walicjamaquiwa take luratanacapajja, ucampis Tatitojj yatiwa jakenacan amtäwinacapjja.
Nayan amtatanacajjasti janiw jumanacan amtatanacamjamäquiti, luräwinacajjas janiraquiw jumanacan luräwinacamjamäquiti.” Tatituw uqhamjja arsu. “Cunjämatejj alajjpachajj acapachat wali altonquejja, uqhamaraquiw amtatanacajjasa, luräwinacajjasa, jumanacan amtatanacamatsa, luräwinacamat sipansa wali altoraquiwa.” Tatituw ucjja arsu.
Ucampis Diosajj chuymanaca uñantasinjja yatiwa cuntejj Ajayojj sañ munqui ucjja, Ajayusti Diosan munañaparjamaw jupanquirinacataquejj mayi.
Naya Tatituwa, jaken chuymapjja uñjta, chuyma mankhapan amtatanacapsa yatiractwa; sapa maynirusa waquisitaparjamaw churaractjja, luratanacaparjamaraqui.”
Janiy jupanacjamäpjjamti, Awquimajj janïr arsupctas ucqhaw yatjje cuntï jumanacajj mayipcäta ucjja.
Jupaw khanañchi jamasan imantata yänacsa, cunatejj ch'amacancqui ucsa yatiraquiwa, khanasti jupancaraquiwa.
(Ucampisa ¿qhitis Diosarojj yatichaspajja? Jupajj alajjpachan utjirinacarusa juchañchiwa).
Ucampis Jesusajj janiw jupanacar alcatascänti, jupajj takeniru uñt'atap laycu. Jaker uñt'añataquejj janiw qhitin yatiyatäñasa waquiscänti, jan ucasti jupa pachpawa yatïna jaken chuymapa.
Mayawjansti saraquiwa: “Diosajj yatiwa acapach yatiñan jakenacan amtatanacapajj jan cunataqui asquïtapa.”
Diosan arupasti jacasquiwa, jach'a ch'amaniraquiwa. Purapar arini espadat sipansa juc'ampi ariraqui, ucasti almampir ajayumpirojj juc'amp mankhacamaw puri, lup'ïwinacsa, chuyman amtäwinacapsa khanstayaraquiwa. Janiw cunas Diosan luratanacapatjja jupat imantascaspati, take cunaw khanstayata, uqhamarac jist'arata qhitirutejj jaqhuta churcañäni ucan nayrakatapanjja.
ch'amacajj janiw jumat imantquitaspati, arum ch'amacajj urut sipan juc'ampiw khantaspa. ¡Ch'amacas urus jumataquejj pachpaquiwa!
¿Qhitirac Tatiturusti janiw walïctati saspasti? ¿Jan ucajj qhitich juparojj yatichaspajja? ¿Qhitis juparojj ewjjanacsa jan ucajj amuyt'äwi arunacsa churi? ¿Qhitich juparojj cheka cancañampi taripäwi uñjañ yatichaspa? ¿Qhitis juparojj yatiñ cancañsa yatichaspa? ¿Qhitich juparojj yatiñ cancañ churaspa?
Nayasti take onjjtatanacamwa uñt'smajja, take luräwinacamsa, nayajj yattwa nayataqui colerasitama.
Jupajj acapachjja mä thiyata mä thiycama uñji, uqhamaraqui alajjpachat aynacharu utjqui ucanacsa.
Tatitun ajayupasti nayjjanquiwa, ucatsti aqham sañajjataquiw saraquitu: “Aqham siw Tatitojja: ‘Uqhampï jumanacajj israelita jakenaca amuyt'asipjjtajja. Nayasti jumanacan amtäwinacamjja yatiractwa.
Jumajj sascamsa: “Janiw cunsa yatcäyätti” sasa, ucampis Tatitojj chuymamjja uñt'iwa, yatiraquiwa cunjämattejj khespiyascasamäna ucsa. Tatituwa sapa mayni jakenacarusa luratapatjama churi.
Nayasti take jupanacan luratanacapjja uñjtwa; janiw cunas nayatjja imt'ascaraquiti, juchanacapasti janiw nayan nayrakatajjatjja imt'ascaraquispati.
Tatitusti yatiñampi, ch'iqhi cancañampiwa sayt'ayi alajjpachsa, acapachsa. ucatsti jaya maranacaw jacasïta, cusisitaw sarnakasiraquïta. Jupasti yatiñampiwa lamar kotsa jaljtayi, jallsa kenayata puriyaraqui.
Jan qhitis jichhajj jach'achasiñampi parlpati, janirac qhitis sinti yatiñan tucpati, Tatitu Diosaw jichhajj take cunsa yati, juparaquiw jaken luräwinacapsa uñjaraqui.
Take cunasa Diosat juti, jupan lurataraquiwa, jupataquiraquiwa. Uqhamajj Diosajj wiñayataqui jach'achatäpan. Uqhamäpan.”
Tatitur thakhapjjam, ch'amapa thakhapjjam, take horasansa Tatitur thakhapjjam. Muspharcaña jach'a luratanacapata amtasipjjam, uqhamarac ewjja arunacapa arsutapatsa;
Janiw cuna jamasanquiris jan khanstirejj utjquiti, ni cuna imantatas jan yatisirejj utjcaraquiti.
¡Ay, cunaquïcani qhitinacatejj Tatitut imantasipjje ucanacataquejja, jupanacajj amtäwinacap Tatitut imantapjje, aruma ch'amacanacanwa ñankhanac lurapjjaraqui, sapjjaraquiwa: “Janiw qhitisa uñjquistuti, janiw qhitis amuyquiti”! sasa.
Tatitusti sumwa uñjasqui take acapachana cunanacatejj lurasisqui ucanacjja, uqhamata ch'ama churañataqui qhitinacatejj chekpachana juparu iyawsasipqui ucanacaru. ¡Jumasti mä lokjamawa uqham lurtajja! ¡Jichhat ucsarusti juc'ampi guerranacawa jumataqui utjani!” sasa.
Take jumanacarusti Dios Awquiw ajllisipjjtam nayratpacha amtataparjama. Kollan Ajayu tokeraquiwa jumanacarojj jupataqui yakhachasipjjtam, jupar jaysapjjañamataqui, Jesucriston wilapampi k'omachatäpjjañamataquiraqui. Jumanacasti Diosan bendicionanacapjja jilarquiri catokapjjam, uqhamarac suman sarnakasiñsa.
Quimsïri cutinjja jisct'äscaquïnwa: —Simón, Jonasan yokapa, ¿munistati? —sasa. Pedrojj llacthapisïnwa quimsa cuti: “Munistati” sas jisct'atapata. Jupasti sänwa: —Tata, jumaw take cuns yatta. Jumaw yatta nayajj jumaru munatajj-jja —sasa. Jesusasti sänwa: —Uqhamajj ovejanacajj awatim.
Jumajj take ucanacwa ist'tajja, ucat amuyasim, chekaw sañamajj waquisiraquiwa. Jichhajj machak yatiyäwinac yatiyäma, imantat yänaca cunanactejj jumajj jan yatcayäta ucanaca;
Tatituwa jaken sarnakäwipa sarayasqui; janiwa qhitis yatisquiti jupa pachpan tucuyäwipjja.
Jumaw sarnakatajjsa, samart'atajjsa yattajja, takpach sarnakäwinacajjajj juman uñt'atawa.
“Ucampis ¿chekäspati Diosajj aca orakena jacaspa ucajja? Alajjpachatejj jach'a cancañapampi jan jumar apjjäsiña puedcstamti ucajja, ¡aca templo lurarapcsma ucajja juc'ampiwa jan jumarojj apjjäsiñ puedquiristamti!
Ucampis Diosajj mä suma jan onjjtcaya kalltäwi uscuwayi, ucasti ucanjja aqham sas kellkantatawa: “Tatitojj uñt'iwa jupanquirinacarojja”; uqhamaraqui: “Take qhitinacatejj iyawsirïpqui ucanacajja take jan wali luräwinacatjja jithektañapawa” sasa.
“Jupasti mä sapa jaketacracwa take cast jakenacsa mirtayi take acapachan utjañapataqui. Jupan munañaparaquiw jakenacan kawkha maranaca acapachan utjañapasa, uqhamarac cawqhacam jacañapasa. Diosajj jakenacan jupar thakapjjañapataquiw uqham ucjj luri, inampis jupar cunjämats jicjjatapjjaspa. Ucampis Diosajj chekpachana janiw jayancquiti sapakat jiwasanacatjja.
Tatituw Jerusalenarojj wasitat sayt'ayi, Israel marcat ananucutanacarusti tantachthapiraqui. Janiw cawquïr marcampis uqhäm lurcänti, qhä marcanacajj janipuniw arsutanacap uñt'apcänti. ¡Tatitojj jach'ar aptatäpan! Jupaw chuyma usuchjatanacarojj waliptayi, chhojjrinacap c'umaracharaqui.
Jichhajj Diosajj jach'añchatäpan, jupajj ch'amaniwa cuntejj mayctan, lup'caractan ucanacata juc'ampi lurañataqui, ch'amap toke jiwasanac taypina luratapata.
Tatitun ajayupasti jupjjancapuniniwa, ucatsti yatiñampi, ch'iqhi cancañampi, suma amuyt'a chuymampi, ch'amampi, Tatitur uñt'añampi jupar ajjsarañampwa churani.
¡Jupa sapa yatiñ cancañani Diosaruqui jach'achatäpan, Jesucristo toke wiñayataqui! Uqhamäpan.
Diosay, jumarutejj armanucupjjeriscasamäna, yakha diosarutejj yupaychapjjeriscäyätjja, jumajj yatjjasamänwa, chuyma mankhanquir amtäwinac yatitam laycu.
Tatitutejj sum uñjchi, yatiracchi cunatï jiwañansa, sepulcronsa ucjja, ¡ucat juc'ampwa Tatitojj jakenacan chuymapjja uñt'i!
Parlapjjam, arsusipjjaraquim, munapjjsta ucapachajj jumanaccamaraqui jisct'asipjjam: ¿Qhitis nayratpacha take acanac arsünjja? ¿Qhitis nayra urunacatpach yatiyänjja? sasa. ¿Janiti naya Tatitu ucanac lurctsti? Janiw yakha Diosajj nayat sipan utjquiti. Nayat sipan yakha atipjiri khespiyiriraqui Diosajj janiw utjquiti.
“Wiñayataqui jach'añchatäpan Diosan sutipajja, jupanquiwa yatiñasa, ch'amasa. Jupaw urunacsa, maranacsa mayjt'ayaraqui, reyinacsa apakaraqui, uscuraqui. Yatiñaninacarusti juc'ampi yatiñwa churi, ch'iqhinacarusti juc'ampi ch'iqhi chuyma churaraqui. Jupaw khanañchi jamasan imantata yänacsa, cunatejj ch'amacancqui ucsa yatiraquiwa, khanasti jupancaraquiwa.
Diosajj jach'a munasiñapwa uñacht'ayistu, take yatiñ cancaña uqhamaraqui amuyt'a churasina. Uqhamaraquiw uñt'ayistu jan amuyt'cañ amtäwipjja, ucasti cuntejj jupajj munañaparjam amtqui ucawa.
Diosan thaquipajj chekapawa, Tatitun arsutanacapajj take chuymamp iyawscayawa, Diosajj jupar take chuymamp alcatirinacarojj imascapuniwa.
“Diosan thaquipajj chekapawa, Tatitun arsutanacapajj take chuymamp iyawscayawa, ¡Diosajj jupar take chuymamp alcatirinacarojj imascapuniwa!
Suma amuyt'a chuymay churita, yatiñ cancañ churaraquita, arsutanacamarojj takpach chuymampiw iyawsta.
¿Cawquincäyätas jumajja cunapachatejj nayajj aca orake utt'aycäyät ucapachajja? ¡Jumatejj chekpacha suma yatsta ucapachajj uca jisct'aru arusjjatita! cunapachatejj putunacaparu imantasipjje, jan ucajj kora taypinacarusa imantasipjje mä cunaru catuntañataquisa, ucapachajja? ¿Qhitis cuervo sat jamach'inacan wawanacaparojj mank'ayejja, cunapachatejj mank'a thakasa aywinakapjje, uqhamaraqui jach'at warart'asisa nayat mank'aña mayipjjaraquitu ucapachajja? ¿Yattati aca oraken kawkch'äñapäcäntejj ucjja? ¿Qhitisa aca orakjja uqhama lurejja?
Janchejjan jiltatapajj juman uñjatänwa, jan qhitin uñjcat irnokatäcäyät ucchañcama, orak mankhan utjayatäcäyät ucchañcama.
Alajjpach uñtapjjam ucatsti uñatatapjjaraquim: ¿Qhitis take ucanac uscojja? Qhititejj jupanacar mayat mayat jalanokqui ucajj sapakat mayniruw sutitcam jawsaraqui. Wali jach'aw ch'amapajja munañanïñapasa, janiraquiw maynis chhakquiti.
Tatitusti asqui jakenacarojj imiwa, mayisitanacapsa ist'araquiwa, ucampis jan wali lurir jakenacarojj janiw ist'quiti.”
Jesusasti yatiraquïnwa cuntejj jupanacajj lup'ipcän ucjja, ucatwa jupanacarojj saraquïna: —¿Cunatsa uqham jan wali amtañanïpjjta?
¡Tatitojj jach'ar aptatäpan! Diosasar k'ochuñajj cusiscañawa. Jupar suma k'ochunacamp jach'añchañaw waquisi.
Jakenacataqui Diosan amtatapajj mä lokhe cancañjamäqui ucajja, jakenacan yatiñ cancañapat sipansa wali jach'awa; uqhamarac Diosajj jan ch'amanjamäcchi ucasa, wali ch'amaniwa jakenacan ch'amapat sipansa.
¿Qhitis juparojj ewjjanacsa jan ucajj amuyt'äwi arunacsa churi? ¿Qhitich juparojj cheka cancañampi taripäwi uñjañ yatichaspa? ¿Qhitis juparojj yatiñ cancañsa yatichaspa? ¿Qhitich juparojj yatiñ cancañ churaspa?
Jach'a qhuyapayasiñamat amtasaw yatiyapjjani, juman asqui cancañamat jach'at jallallapjjani.
Nayaruw qhititu, nayra urunacatpacha cunäcäntejj Diosan amtäwipajj uca imantatanac jumanacar yatiyañataqui, uca Diosaw take cunsa luraraqui.
Ucampisa Diosajj wali ch'amani, yatiñaniraquiwa, jupajj uca suma amtatanacapjja phokheriwa.
¡Tatay, luräwinacamajj waljapuniwa! Yatiñ cancañampiw take cuns lurtajja, orakejj luratanacaman phokhantatawa.
“Cunjämatejj alajjpachajj acapachat wali altonquejja, uqhamaraquiw amtatanacajjasa, luräwinacajjasa, jumanacan amtatanacamatsa, luräwinacamat sipansa wali altoraquiwa.” Tatituw ucjja arsu.
Uqhamasti Tatitojj Job chacharojj mä jach'a thaya taypitwa parläna: Nayaw jach'a kotarojj korpa uscta, puncunacapsa llavempiw jist'antaracta. Ucatsti kotarojj saractwa: ‘Acacamaquiw purinïta, ucat juc'ampsti janiw pascätati; acaruw jach'a mathapinacamas t'unasiraquini’ sasa. Jan ucajj ¿cunapachacha jumajj c'ajquiri warawaranacarusa, ururusa khanjtaniñapataqui arsuraquïyätajja? ¿Uqhamaraqui khananjja take aca orakpacharu saratatañapa, uqhamat ñankha lurir jakenacajj imantasiñapataqui? Uqhamasti kollunacaw uñsti, ucatsti mä isïcaspasa uqhamaw coloraru tiñisiwayaraqui; ñankha jakenacatjja khanajj jarc'atawa; ajjsarañ churiri arunacaparusa amuct'ayataraquiwa. “¿Jumajj jach'a kota mankhanacjja uñjtati, cawqhattejj jach'a kotanacajj sartanqui ucjja? ¿Yattati cawqhanquisa ajjsarcaña jiwañan puncupajja? ¿Amuytati kawkch'äquitejj aca orakejj ucjja? ¡Yatsta ucapachajj arsumaya! “¿Cawquina imatäsquisa khanasa, ch'amacanacasa? “¿Qhitïtas jumajj nayan apnakatajjat pächasiñataquejja, uqhamaraqui pachpa arunacamampi jan yatitamsa uñacht'ayañataquejja?
Janiw cuna imantatas utjquiti, jan uñjatäñataquejja, uqhamarac ni cuna jamasanquiris, jan yatisirejj utjcaraquiti.
Nayaw take cunan tucusiñapsa, kalltatpach yatiyta, nayratpachracwa cunatejj khepat lurascani ucanacsa yatiytjja. Nayasti sistwa: ‘Amtatanacajjajj phokhasipuniniwa; take cuntejj amtcta ucanacjja lurapunïwa.
¡Cunja sumas Diosan yatiñ cancañapajja, munañapasa, amuyt'apasa! Janiw jupan amtäwinacapjja khanañchcsnati, ni jupan thaquipsa amuyt'caracsnati.
¡Jumanquiwa, Tata, jach'a cancañamasa, ch'amamasa, jach'ar aptatäñamasa, apnakañasa, jach'a reyi cancañamasa! Cunatejj alajjpachansa, aca orakensa utjqui ucanacajja jumanquiwa. Jumancaraquiwa apnakañamasa, jumajj Tata takenjjarusa jilïrïtam laycu. Jumataracwa jutaraqui kamir cancañasa, jach'äñasa. Jumaw take cunsa apnakascta. Ch'amasa, munañanïña cancañasa amparamanquiwa, ucatsti juman amparamancaraquiwa takeniru churañataqui kamir cancaña, uqhamarac munañanïñasa.
Yatiñ cancaña jicjjatañataquisti nayrakatajj Diosar ajjsartañawa; kollana Tatitur uñt'añajj ch'iqhi cancañanïñawa.
Tatitojj yatichituwa karitanacaru suma arunacampi chuymachañajjataqui. Sapa khantatiw nayarojj sum kont'ayitu, uqhamat suma ist'añajjataqui.
Amuyapjjam, cunjämsa phokhasisqui cuntejj nayratpach yatiycta ucajja, jichhasti machak yatiyäwinac yatiyaraquëjja, ucanacsti janïra uñstquipanwa jumanacarojj yatiyapjjsma.”
uqhamaraqui cunatejj nayra pachanacatpacha imantatäcän ucanaca uñacht'ayañajjataqui. Uca imantäwsti Diosajj jichhajj wawanacaparojj uñacht'ayjjewa.
Ucasti jach'a luräwipatjja mä juc'aquiwa, cuntejj ist'ctan ucasti jisc'a arunacaquiwa, ucampisa ¿qhitisa jach'a ch'amampi arsutapjja amuyt'aspa?”
Jupajj janiw alek uñcatasaqui cunsa uñjcaniti, ch'ajjwanacsa janiraquiw aleka parlanac ist'asaqui t'akjcaniti.
Qhitinacarutejj Diosajj nayratpach uñt'cäna ucanacarojja, kalltatpachwa jupataqui yakhachasiwayjje jupan wawapjamäñapataqui, uqhamat jupan Wawapajj jilïrïñapataqui walja jilatanac taypina.
Tatitojj jach'apuniwa, jach'ar aptatäñapajj waquisiwa, jach'a cancañapajj jan amuyt'cayawa.
Uca luratanacapatwa jach'añchäwi churañäni wiñay jach'a Reyirojja. Jupajj janiw cunapachas jiwquiti, janiraquiw uñjcsnati uca take yatiñan mä sap Diosarojja. Uqhamäpan.
“Cawquïri arunactï jan yatctan ucanacajj Diosanquiwa. Cunatejj jiwasajj yatctan ucanacasti, jiwasana, wawanacasampina aca camachi arunacapar phokhañasawa, cawquïrtï jupajj khanañchawayistu ucanacaru.
Yatiñ cancañan kalltapajj, Tatitur ajjsartañawa, jupar wakaychirinacajj wali amuyt'anïpjjewa; Tatitojj wiñayaw jach'añchatäni.
Jiwasan uca jach'a jilïr sacerdotesasti qhuyapt'ayasistaspawa t'uqha cancañasanjja, jupa quicparaquiw take casta yant'anaca jiwasjama t'akhesiwayi, ucampis jan juchar purisa.
¿Qhitis jach'a lamar kotjja amparapampi tupt'ejja; jan ucajj luc'anapampi alajjpachan kawkch'ätapsa tupt'ejja? ¿Qhitiraquis mä sapa tupuru take aca oraken lak'anacapsa apthapejja? ¿Jan ucajj take kollunacsa mä balanzar apjjatasin waytejja?
“¿Jumasti amuytati Diosan jach'a amtäwinacapar mantaña, ucatsti cunäquitejj jupajj uca yatiñsa? ¿Cunraqui lurasma Diosan amtäwinacapatejj alajjpachat sipansa juc'ampi jach'äqui ucasti? ¿Cunarac jumasti yattasti, Diosan amtäwinacapatejj mic'ayats juc'ampi mankhächi ucapachasti? Uca amtäwinacajj acapachat sipansa juc'ampi jach'awa, jach'a kotat sipansa juc'ampi jach'araquiwa.
Maynitejj take cuna yatir tucchejja, janïraw cunsa yatquiti. Ucampis maynitejj Diosar munchejja, Diosajj juparojj uñt'araquiwa.
Jumaw nayarojj irnokesta, sayt'ayaraquista: arsutanacam yatekañajjataquejj ch'iqhi chuymay churita.
Jakejj chuymapanjja cunanac lurañataquis amtaquiwa, ucampis Tatituw munañani uca amtäwiru phokhasiñapataquisa jan phokhasiñapataquisa.
Nayätwa Tatitojj, ucaraquiw sutejjajja, janiraquiw muncäti cunatejj nayar churañäqui ucjja yakhar churayañjja, janiraquiw yakha diosanacarus yupaychaycäti naya lantjja. Amuyapjjam, cunjämsa phokhasisqui cuntejj nayratpach yatiycta ucajja, jichhasti machak yatiyäwinac yatiyaraquëjja, ucanacsti janïra uñstquipanwa jumanacarojj yatiyapjjsma.”
Yatiñ cancañatjja parlaractwa qhitinacatejj iyawsäwinacapanjja suma jiltatäjjapjje ucanacaru, ucampis uca yatiñ cancañajja janiw acapachanquirïquiti ni acapachan munañan jakenacancquisa, ucanacasti tucusiriquiwa. Diosan yatiñ cancañapatwa parlapjjtjja, uca Diosan amtatapasti jan amuyt'cayawa. Aca orakejj janïra utjcän ucqhatpachracwa Diosajj ucanacjja amtäna jiwasan khespiyasiñasataqui, wiñayan wiñayapataqui.
Tatitojj situwa: “Nayranacajjajj jumaruw uñch'uquisctam, nayaw yatichascäma, nayaw amuyt'ayascäma, nayaw sarañamäqui uca thac uñachayascäma.
Uqhamaraquiw Kollan Ajayojj t'uqha cancañasan yanapistu, janiw yatctanti cunjämatejj oración lurañajj waquisqui ucjja, ucampis Kollan Ajayuw Diosarojj achict'asqui jiwasatjja jan amuyt'caya aykoñanacampi. Ucampis Diosajj chuymanaca uñantasinjja yatiwa cuntejj Ajayojj sañ munqui ucjja, Ajayusti Diosan munañaparjamaw jupanquirinacataquejj mayi.
Jichhajj take cunas jayphucjamaqui mä espejotjam uñjasctanjja, ucampis mä urojj take cuns khanwa uñj-jjañäni. Jichhajj yatiñajjajj janiw phokhatpachäquiti, ucampis uca uruw takpach uñt'jjäjja cunjämtï Diosajj nayar uñt'quitu uqhama.
Tatitusti siwa: “Alajjpachajj nayan konuñajjawa, orakesti cayunacajjan tact'asiñaparaquiwa. ¿Cawquirurac mä uta utacharapipjjetasma? ¿Cawquirurac samart'añataqui lurarapipjjetasma? “Jerusalenampi chica cusisipjjam, qhitinacatejj Jerusalenar munapjjta ucanacasti jupampi cusisipjjam; qhitinacatejj Jerusalenatjama jachapjjayäta ucanacasti jichhajj jupampi chicaraqui cusisipjjam; jupasti mä taycjamaraquiw jumanacarojj chuymachañampi uywapjjätam, uca chuymachasiñampi phokt'atäpjjañamcama. Ucatpï naya Tatitojj sistjja: “Nayaw jupjjarojj sumancañjja mä jawirar uñtata jutayä. Marcanacan kamir cancañanacapasti, mä jach'a jawirjamaraquiw jupjjarojj jutani. Jupaw jumanacarojj mank'ayapjjaraquïtam, amparaparuw ichusipjjätam, konkorinacapjjar kont'ayasaraquiw munart'asipjjätam. Cunjämatejj mä taycajj wawaparojj chuymachejja, uqhamaraquiw nayajj jumanacarojj chuymachapjjäma, Jerusalenansti chuymachasiña jicjjatapjjaraquïta.” Cunapachatejj jumanacajj acanac uñjapjjäta ucapachajj chuymanacamajj cusisiniwa; janchinacamasti mä korar uñtataraquiw ch'ich'tanini. Tatitusti sirvirinacap taypinjja ch'amapwa uñacht'ayani, uñisirinacap taypinsti colerasiñapa uñacht'ayaraquini. Tatitusti nina taypinjam purini, carronacapasti mä tutuca thayar uñtataraquiwa; colerasiñapasti ninjamaw purinini, mutuyäwipasti akquir ninjamaraquiw naqhani. Jïsa, Tatitojj ninampiw taripäwi lurani, take acapacharusti espadapampiraquiw uñjani, waljaniruraquiw jiwarayaraquini. Tatitusti siwa: “Qhitinacatejj pankar yapunacan yakha diosanacar yupaychañataqui catuyasipjjta, chica taypi saririr arcasa, qhitinacatejj qhuchi aycha mank'apjjta, achacun aychapsa jan ucajj yakha k'añu animalanacan aychapsa, ucanacajj mäpita tucjatäpjjätawa, nayasti luratanacamsa, uñt'aractwa yatiractwa uca laycu. “Ucapachasti naya quipcaw jutaraquï take jach'a marcanacaru, jisc'a marcanacaru tantacht'añataqui, jupanacasti jutasinjja c'ajquir cancañajja uñjapjjaraquini. Nayajj mä chimpu churä: yakhepanacarusti jaltayaraquïwa, marcanacaruw qhitaraquï, Tarsis, Libia, Lidia, ucanacaru cawqhantejj flecha sum apnakañ yatipqui uca marcaru, Tubal, uqhamaraqui Grecia, kota tokenquir jaya marcanacar cuna, uca marcanacasti janipuniw nayjjat parlirjja ist'apjjerïcänti, janiraquiw nayan jach'a cancañajjsa uñjapjjerïcänti; jupanacaraquiw nayan jach'a cancañajjat marcanacar yatiyapjjani. ¡Take acanacjja nayaw amparajjampi lurta, uqhamatwa utjañjja kalltapjjaraqui! Naya Tatituw ucjja arsta. “Cawquïr jaktejj nayajj uñtascta ucajj qhititejj pobre, llact'ata sarnakqui, arunacajjsa suma ist'caraqui, phokcaraqui ucawa.
Diosarojj maytwa jumanacar amuyt'ayañapataqui, cawquïri suyt'äwitaquitejj jawsquistu uc yatipjjañamataqui, cunja muspharcaña jach'a herenciatejj Diosajj churqui jupanquirinacaru uc yatipjjañamataquiraqui,
Diosajjay, jaltatanacajjajj juman jaqhutawa, jumaw jachatanacajj apthaptajja. ¿Janit ucanacast kellkataman khanäquisti?
Ucampis Tatitojj sänwa: “Jan jumajj uñnakapataqui, uqhamarac jach'a tansätapatacsa ajllimti, nayajj ucanacjja maysaruw apanuctjja. Janiw cuntejj jakejj uñcatqui uqhamäcaniti; jakejj uñnakacwa uñjejja, ucampisa nayajj jaken chuymapwa yatiractjja, ucwa uñjaractjja.”
Tata, jumajj cheka chuymani jakenac thaktajja. Mutuyaractawa, ucampisa janiw usuyasipquiti; Aynacht'ayascaractawa, ucampisa janiw yatekañ munapquiti. Kala chuymanïpjjewa, wali khorunacäpjjaraquiwa, janiraquiw cheka thaquiru cuttaniñsa munapquiti.
Jakejj chuymapanjja sarnakañapatwa lup'isqui, ucampis sarnakäwipjja Tatituw irpasqui.
Iyawsäwi laycuraquiw yattan Diosajj arupampi acapach luratapa, cuntejj jichhajj uñjtan ucajj jan uñjcayat luratätapa.
Uqhamaracwa Tatitojj take amtäwinacapjja luri. Jupajj muspharcaña amtäwinacaniwa, ucatsti wali amuyt'ampiraquiw uca amtäwinacapjja phokhe.
Cunanacatejj jan yatitäcän ucanacwa khanar apsu, cunanacatejj jamasan luratäcän ucanacsa khanaruw apsuraqui.
Diosajj take jakenacan jamasan luratanacapa Jesucristo toke taripcani uca urojja, khespiyasiñ arunaca nayajj yatichcta uqhamarjama.
“Awquejjasti take cunwa churjjetu ucampis janiw qhitis Yokarojj uñt'quiti, jan ucasti Awquiquiwa. Awquirusti janiraquiw qhitis uñt'quiti, jan ucasti Yokaquiw Awquirojj uñt'i, uqhamarac qhitirutejj Yokajj uñt'ayañ munqui ucanacampi.
Jakenacatsa yakhachatäjjaraquïnwa, mä animalaruw tucuraquïna; monte asnonacampi chicaw jacaraquïnjja, vacanacjamaw kora mank'araquïnjja, sullaraquiw janchiparus ch'aranjänjja, alajjpach Diosajj take jakenacjjarusa munañanïtapa, juparaqui apnakerinacsa qhitirutejj munqui ucarus utt'ayaraqui uc yatiñapcama.
“¿Janit pheska jamach'inacajj pä moneda kollker aljasquejja? Diosasti ucanacatjja janiw maynits armt'asquiti. Ñic'utanacamasa mayat maya jaqhutawa. Janiy ajjsarapjjamtejja; jumanacajj walja jisc'a jamach'inacat sipansa juc'ampi alanïpjjtawa.
Tatitun nayrakatapanjja janiw yatiñasa, ch'iqhi cancañasa, suma amuyt'anacasa cunäcjjeti.
Janïra jupanac nasquipanwa, janiraqui walsa jan walsa lurcän ucapachaw Diosajj Rebecarojj aqham säna: “Jilïri wawamajja sullca wawaman sirviripäniwa” sasa. Acasti cunatejj kellkatäqui ucampejj phokhasiraquiwa: “Wal munäyät Jacoborojja, ucampis uñisïyätwa Esaurojja” satampi. Uqhamatwa Diosan munañaparjam ajllisiñajj phokhasjje jupan amtataparjama, qhitinacarutejj jawsqui ucanacan luratanacap jan yäkasa.
“¿Cunarac jakesti, jupat amtasiñamataquisti? ¿cunarac jiwir jakesti ch'am churañamataquisti?”
Take ch'amani Tatitusti juramentompiw arsu: “Janiw khepar cuttañajj utjquiti, cuntejj amtcta ucajj phokhasipuniniwa, cunjämarutejj amtcta ucajj lurasipuniniwa.
Ucampis jilatanaca, jan jumanacajj armasipjjamti, Tatitutaquejj mä urojja waranka marampi sasiwa, waranka marasti mä urumpi sasiquiraquiwa.
Uqhamajj jumanacajj jan cunatsa mäqui juchañchapjjamti, jan ucasti suyt'apjjam Tatituru, jupaw take cunsa khanar apsuscani, cunatejj ch'amacan imantatäqui ucsa. Tatitojj take jakenacan amtatanacapsa khanaruw apsuni, ucatsti Diosajj sapakat maynirusa lurataparjamaraquiw uñjani.