Colosenses 3:5 - Kaxinawá Bíblia (BR) Haskakẽ na mai anua matũ kemurã, tenãkĩ akawarikãwẽ, eska tibi Deusũ nemani heneirã. Ana aĩbu betsa tibiwẽ kemuama inũ, ana hamapai tibibe txutanamebaunama inũ, hawara kemu atimapa betsa betsapa mã akatsis ikai inũ, ana pei inũ mabu betsa itxawanũ, iwanã, yauxikĩ kẽwãti betsa keska wakĩ pei inũ mabuwẽ kemukĩ kẽwãyamakubaĩkãwẽ. Kashinawa : Diosun Jesúswen taexun yuba bena yiniki Jaskaken na mai anua matun kemudan, tenankin akawadikanwen, eska tibi Diosun nemani jeneidan. Ana ainbu betsa tibiwen kemuama inun, ana jamapai tibibe chutanamebaunama inun, jawada kemu atimapa betsa betsapa man akatsis ikai inun, ana pei inun mabu betsa ichawanun, iwanan, yaushikin kenwanti betsa keska wakin pei inun mabuwen kemukin kenwanyamakubainkanwen. |
Hanua eska yurabu haya hatũ xinã uke merã aruabu txakabu xinãkĩ shabakabi tashnimamisbuki, eska tibi xinã meranua shabakabi kaĩkinã, huni betsaki yubakatã tenãkinã, huni betsã aĩ txutãkinã, shebi hayabu txutabaũkinã, yumetsuirã, txani txakairã, yura betsa ha akinã.
Haska txakabu besti xinãkubainaibuwẽ taeshũ Deusũ hatu henekinã, yurabu ana abunamekayabiama hatũ txakabuki dakeama daketapaibu hatu uĩkĩ anikiaki. Hawarawẽ yura pepabu dakeaibu ana dakeama aĩbuaibũ hunibu txutamakatsis ikama hakia habe aĩbu betsabe txutanamei itsai menamei ibunanãbu, inũ huniburi aĩbuwẽ ana kemukĩ txutakatsi ikama habe huni betsawẽ kemui habe txutanameaibuwẽ taeshũ hau haskai besti hiwekubainũbũ Deusũ hatu ana nemama henenikiaki. Haska hiwei dakeisbumawẽ taeshũ hatũ yura isĩ betsawẽ tenemakĩ Deusũ hatu kupikĩ taewaniki.
Eska tibi matawaibuwẽ taeshunã, hawẽ atimapaiburã, txutanametxakaiburã, yauxiaiburã, ha pewẽ hiweama txakabuwẽ hiweairã, betsabu hatũ hawara hayawẽ hatuki sinataiburã, yura betsa tenaĩburã, detenameaiburã, txani txakabaunaiburã, beparameaiburã, yuãnanaĩburã, haskai hiweabuki.
Haska inũ, matũ yura ana txakabu tsumawamayamakãwẽ, ha hamapaiwẽ nukũ yura hawẽ txakabu watimakirã. Eska wakinã, matũ xinã pe mekekĩ matũ yura hirabi Deus inãkĩ mekemariakubaĩkãwẽ. Ha inũ, yurabu mawatã ana besteã keskatã matũ yura pe mekekĩ matũ hiwea Deus inãtã pepashũkubaĩkãwẽ, matũ yura hirabiwẽ Deus duawakinã. Hawa kaneama ha bebũshũ pepakĩ akubaĩkãwẽ.
Ha dukũ nũ hawẽ hiwetxakani sheni Cristobe cruzki netãtã nũ habe mawani keskaki. Nũ haskaya nukũ xinã sheni Deusũ nuku betsa wamakẽ txakabũ nuku beshetã hawẽ tsumawakĩ ana nuku yunutirumaki.
Haskabiakẽ ẽ akubainai uĩ txakabũ ea beshetã ea tsumawatã ẽ xinã kayabi nematã ea henekatsi ikamakẽ haska Jesus ẽ dayashunai ẽ pe besti xinãtiruma shabakabi ẽ unãkubainaii.
Hanua nũ hiwei taeaitianã, hawẽ txakabu unãti Deusũ hawẽ yunuti inũ hawẽ nemati yununiki. Ha xinãkĩ nũ tapĩbiaya txakabu betsa betsapa nuku anua kemu tashniaiwẽ nũ txakabupauniki, haska hawẽ hiwetima txakabu mawa kayabiti besti birã.
Ikũwaĩ betsa matu anushũ txakabuhairawai hari matu anua kaka huai nũ nĩkairã: “Ikũwaĩ betsã hawẽ ibuã aĩ mebĩkĩ aĩwaĩmaki”, ikaibũ Habaa! Ikũwãbiai hawai mã haska hiweamẽ? Mã mesehairaii. Tsuabura ikũwãbumabiarã, haskai hiweabu nũ nĩkaismaki.
Maturã, betsabu ha ikaibu keska hiwebiakũkaĩkĩ Jesus Cristo mã ikũwaĩbu nukũ Shanẽ Ibu Jesus Cristõ kuxipa inũ Deusũ Yushĩ Pepatũ kuxipawẽ matu xinã betsa wamaya ikũwaĩ betsã matu naximabu matũ txakabu detsis dashkia keska wakĩ meribi habias besu keska wakĩ Deusũ Yushĩ Pepatũ matu pepawaniki.
Hamẽ betsarã, piti pikĩ yaniwai nũ hiwenũ Deusũ piti nuku washuniki. Ha inũ, nukũ haturã, haki piti nanekĩ nũ yaniwa hiwenũ nukũ hatu nuku washuniki. Habiaskabiakẽ betsatianã, piti inũ nukũ hatu ha dabe yama washanikiki. Haska inũ, nukũ yurarã, eskaki. Nĩkakãwẽ. Nukũ yurawenã, hawẽ hamapai betsa betspabube txutanametima Deusũ nuku waniki. Hakia nukũ Shanẽ Ibu Jesusunaki, nukũ yurarã. Na nukũ yurawẽ nukũ Shanẽ Ibu nũ dayashũtiruki.
Cristo nuku mawashunaya paka keska watã Deusũ nuku ibu wakĩ Jesusũ yura nuku waniki. Hawẽ Yushĩ Pepa nuku inã nukube dasia hiweawẽ taeshũ nukũ yurarã, ana nukunamaki. Haskakẽ nukũ yura meribi pe mekekĩ hawẽ Deus kẽwanãkãwẽ. Hamapai txakabu nũ amis Deusũ abuamabiakẽ hakia ibubis nukũmebi txakabu aki nũ txutanameairã, nukũ yura ibubis nũ txakabuwaii. Hanua aĩbu mĩ aĩma txutakĩ mĩ yura detsis keska wakĩ Deusũ Yushinĩ hiwe mã txakabuwaii, detsis keska wakinã. Haskakẽ tsuabũra aĩbu mĩ aĩma txutanũ, iwanã, ha xinã henetã ana hari mapuyamakubaĩkãwẽ.
Haska inũ, matũ mae ewapa anu ana ẽ kakẽ habũ txakabu betsa betsapa wakĩ kanekubaĩkĩ xinã betsa wariabumawẽ taeshũ Deusũ ea dakewashanaiwẽ ẽ dateaii. Uatiã mã txakabu heneriama ẽ matu uĩtanima keska ana habiaskaswẽ mã hiwea uĩ huĩti nixmahaira ẽ matuya kashatuxitiruki, eska tibiaibu uĩnã, tsuabura mã habũ txakabu heneriama haikaimas txakabuwẽ habũ xinã txakaibu inũ, huni dabe txutanameaibu inũ, aĩburi yura tibibube txutanameaibu inũ, atimapakĩ hatũ xinã benutã txakabu bestiwakubainaibuwenã. Ẽ betsabu inũ ẽ puibuũ, ẽ matu anu kariamakẽ matũ xinã betsa wai bebũkiri peparikãwẽ.
Hakia Jesus Cristo cruzki mastabu mawani keska wakĩ nũ Jesus ikũwaĩbu nukũ txakabu itxawatã Jesusbe cruzki nuku mastashunibu keskaki, ana txakabu nũ meyamanunã.
Ana hawa dakeama txakabu hamapai atimapa tibi hawẽ yura inãkĩ hawẽ kemuhairai huĩti kuxi hiweabuki, tsua ibubis e ikamarã.
Hamẽ, betsarã, Abraão Deusũ yununi txibãkĩ Deus unãmanũ, iwanã, judeubũ hatũ huni bake kaĩyã hatũ hina kubitxi meshtemisbu keska wakĩ natiã mã judeubumã Cristo mã ikũwaĩbu matu haki dasiwakĩ matũ hina kubitxi meshtea keska wakĩ matũ xinã txakabu inũ matũ beya txakabu Deusũ meshtea keska wakĩ matu putamaniki, xinã betsa wamakinã.
Haskakẽ Deusũ matu pepa besti wanũ, iwanã, matu yunukĩ: “Aĩbu mĩ aĩmawẽ kemuama inũ, huni mĩ benemawẽ kemuama haska ha dabe mã haya hatũ aĩbe besti hau txutanamekubainũbũwẽ”, iwanã, xinãmiski, Deusunã.
Pei inũ maburã, hatũ kemuti pae txakabũ hatu atxia hanu hayaki. Haska mabu inũ peiwẽ kemui Jesus Cristo ikũwaĩbu bestibu has besti dayanũ ika haska abuai hatũ xinã pe henetã ana Jesus Cristo ikũwaĩ xinãma ma hakimawẽ taea hanua hakiri hawẽ txakabu betsa betsapa tashnibirãkĩ hatu nuitapawamiski.
Matunã, tsuara txutawẽ kemukĩ Deusũ hawẽ pepa ma matuki tanabiani kaneyamakãwẽ. Haskakĩ Esaũ Deuskiri xinãma piti bestiwẽ kemukĩ xinãkĩ hawẽ betsa mashkubiakẽ hawẽ piti pinũ, iwanã, haska iuwatũ pepa bimis inãniki, hawena benukinã.
Ha inũ, txutanamebaũmisbu inũ beneyabia inũ aĩyãbia txakabui kemumisbu Deusũ hatu unãti watã kupiakeakeshanaiwẽ taea tsuãra ikũwaĩ aĩyãtã betsawẽ ana kemuama ha besti uĩ haska mã abunamerabeai mekei habe hiwekubaĩkãwẽ. Beneyatãri betsawẽ ana kemuamari ha besti uĩ haska mã abunamerabeai mekei habe hiweriakubaĩkãwẽ.
Haska inũ, hawẽ mabu itxa wanũ ika peiwẽ kemuama hawara besti mã hayawẽ benimakubaĩkãwẽ, Deusũ nuku yubakĩ: “Ẽ matu putama inũ ẽ matu henetaskama ishanaii”, iniwẽ taearã.
Mã unaĩ ikai hanua hukĩ matu ha imakĩ hãtxawẽ hanubi txitenamemakĩ matu detenamemairã, haska kaĩkinã, matũ huĩti meranua kemu txakabu tashnikĩ matu imaikiki. Mã haskakũkainairã, xinãkãwẽ.
Ẽ betsabu inũ ẽ puibuũ, ẽ matuwẽ nuikĩ yunuai ea nĩkakãwẽ. Mã txaikea huima mã ikũwãbumabe hiwea naxui ika keskaburã, ha yurabũ haska xinaĩ habũ kemu paewẽ matũ yushĩ atxishũ yabutã matu bika tenematirurã, haska abuama henekubaĩkãwẽ.
Hakia hamẽ ekiri hãtxabiai eki dakemis inũ, eki petxia hawa xinaĩsbuma inũ, yura betsabe danãnanãmisbu inũ, yura betsa tenãmisbu inũ, txutanamebaũmisbu inũ, mukayakĩ Satanásã kuxipa yukamisbu inũ, yushĩ dami betsa kẽwãmisbu inũ, txani txakabaũmisbu habu dasibi ẽ kupia hanu buirã, ha iã hanu enxofre menui here hi hi ikai anu ha hatũ dabeki mawa meshãkanikiki”, ea wa ẽ matu keneshunaii.
Hamẽ betsaburã, Deus danãkĩ hamapai txakabuwamisbu inũ, mukayakĩ Satanásã kuxipa yukamisbu inũ, txutanamebaũmisbu inũ, yura betsa tenãmisbu inũ, yushĩ dami betsa kẽwãmisbu inũ, dasibi hamapai tibi abubaũmisbu inũ, txani txakamisbu habu haskamisbu besti baxikushãkanikiki, habu Deusũ mae pepa anu hikiamarã.