Hebreus 12 - Kaxinawá Bíblia (BR)

Hawẽ bake ikũwaĩbu Deusũ hatu pewamiskiaki, na hãtxarã

¹ Haskakẽ nukunabũ habu dukũtũ Deusũ yubaka hãtxa ikũwãkĩ bika betsa betsapa hatu tenemakĩ memabu habuã hatũ xinã nuku uĩmakubainishũ natiã nuku uĩkanikiki. Xinanãkãwẽ. Nuku hatũ itimaska wai inũ hamapai txakabu tibitũ nuku beshetiru henetã beamabaĩkĩ hawara pepa Deusũ nuku yubamis ha xinaĩ kuxipai dayashũkĩ heneyamakubainãkãwẽ.

² Cristo nuku ishuni hakiri dukũ unãkĩ xinãkubainãkãwẽ. Habũ nũ ikũwaĩbu nũ haki txiti ikabu hatunã ma nuku pewashũkubainikiki. Haskawẽ taea Jesus cruzkia nuitapairã, ha itxakawakĩ nuitapawaibu hawẽ dake xinãma nuku mawashuniki. Haskairã, nuitapawabiabu mawakĩ binutã benima paepayabi hawẽ Epã shanẽ ibu tsauti yusiuri habe shanẽ ibui tsaushanai unaĩ iniki.

³ Ha inũ, yurabu hatu merabewakĩ hatu uĩmabia habũ ikũwãkatsi ikama huni txakabubũ Jesus itxakawabu yumãbiakĩ hawẽ Epã yunuti hãtxa Jesusũ heneama ini haska keska xinãkubaĩkãwẽ, Jesus ikũwaĩ punu nukai Deusũ baiwẽ kabiai mã beshtekeyamakubaĩshanũbunã.

⁴ Ha inũ, txakabu tibi binui mã bika tenekubainai Jesus nuku ishuni keskai tsua mã mawariamaki.

^5-6 Ha inũ, nũ hawẽ bakebu Deusũ nuku yusĩni mã hakimaii. Matũ shenipabu shanẽ ibu unãnepa Salomãonẽ eska hawẽ bakebu yuikĩ: “Ẽ bakebuũ, haska Deus matuwẽ nuikĩ matu pewamis matu yuinũ nĩkakãwẽ. Deusũ tsuabura abukĩ hawara bika tenemakĩ hatu kupimiski. Ha inũ, tsuabura Deusũ hawenabu wakĩ hatũ txakabu hatu unãmamiski, nũ ana ayamashanũbunã. Haskawẽ taeshũ hawara bikawẽ Deusũ matu unãmai danãyamakãwẽ. Ha dikabi, matu kũyã akaya punu nukariayamakãwẽ”, hatu haska wapauni na hãtxa hakimayamakãwẽ, Deusũ habias matu ana yuiai keska xinãkinã.

^7-8 Ha inũ, huni dasibibũ hatũ bakebu abukĩ yusĩkĩ hatu pewamiswẽ taeshũ: “Ẽ bakebu pewanũ”, iwanã, hawara bika Deusũ matu tenemakĩ matu pewaikiki, matu besti pewamarã, hakia ikũwaĩbu betsa betsapa habiaskasri hatu wakinã. Hamẽ bika tenemakĩ Deusũ matu pewama mã hawẽ bakema keska itiruki, bake ibuuma keskairã.

⁹ Ha inũ, nũ huni ewariama nukũ ibubũ nuku yusĩkĩ nemahairakĩ nuku tapĩmakubainibuki. Hatũ yusĩa bikabiakẽ tapĩkĩ nũ hatu abukubainibuki. Hakia haska nũ wani binukĩ nukũ Epa Deus nai anua abukĩ natiã hawẽ hãtxa nĩkakubaini nũ habe hiweshanaii, hawa txakabuwẽ nuku kupiamarã.

¹⁰ Na mai anu nuku hiwemakĩ yumewakĩ nukũ ibubũ yusĩkĩ bika tenemakĩ nuku beshmas pewayunibuki. Hakia nũ Deusunabu meribi wakĩ nuku pewakĩ bika tenemakĩ Deusũ xinãmis keska txanima nukũri nũ xinãkubainũbũ Deusũ nuku pewakubaĩmiski, nuku ha keskari wanũ ikarã.

¹¹ Ha inũ, txanima Deusũ pewakĩ nuku kupia shuama mebiatã txipu hakimatã hanushũ hawẽ yusĩa pepa tapĩkĩ hawẽ hiwea unãnuma pe hiwekũkainai unãtirubuki.

¹² Deusũ pewati yusĩa bikabiakẽ ana mesteĩ kuxipakĩ ana Deus kẽwaĩ matũ mekẽ mexãtã dãti ishũ kẽwãkĩ heneyamakubaĩkãwẽ.

¹³ Ha inũ, Jesus ikũwaĩ hawawẽra bika teneaibu punu nukai hau txĩtũyamanũbũ haska Deusũ abuai yusĩkĩ bai kayabikiri hatu pe unãmakubaĩkãwẽ.

Deusũ hãtxa danaĩnã, mesehairakiaki, na hãtxarã

¹⁴ Ha inũ, tsuabura dasibibube mã unãnuma hiwekatsis ikairã, nuikipakĩ dasibi nukũ Shanẽ Ibũ yusĩa txibaĩ pepa besti hiwekubaĩkãwẽ. Hamẽ mã pepai hiweismarã, haskatã nukũ Shanẽ Ibuki dasitã mã hiwetirubumaki.

¹⁵ Tsuabura Deusũ inãkuĩ pepa danãma hau hayai keyunũbũwẽ. Hamẽ haskama tsuara mã huĩti sinayarã, sika tatxa paepa keskatũ hatu daũkĩ akawakĩ yurabu mã hatu danãmatiruki. Uĩrakubaĩkãwẽ.

¹⁶ Matunã, tsuara txutawẽ kemukĩ Deusũ hawẽ pepa ma matuki tanabiani kaneyamakãwẽ. Haskakĩ Esaũ Deuskiri xinãma piti bestiwẽ kemukĩ xinãkĩ hawẽ betsa mashkubiakẽ hawẽ piti pinũ, iwanã, haska iuwatũ pepa bimis inãniki, hawena benukinã.

¹⁷ Hamẽ Esaũ txipu hawẽ epa yuikĩ: “Mĩ bake iuwa besti earã, hau Deusũ ea duawashanũ Deus ea yukashũriawe”, atuxia hakia hawẽ bake mashku Jacõ hawẽ epa Isaque parã dama Deus yukashũkĩ menetã hawẽ epã haska washũ Esaú ana hawawẽ pewatima nemabia kashahairakĩ Esaũ ana yukabia hawẽ epã hawẽ yuba haska washũ ana maewashũtima inikiaki, haska matubũ mã unaĩnã. Mã txipu haskariatirubuki. Uĩrakubaĩkãwẽ.

¹⁸ Nukunabu Israelbu txaimashũ uĩnibu keska ma haskamaki. Hatukiri ana matu yuinũ nĩkakãwẽ. Habunã, mati ketia here hi ikai tsuã metiruma iniki. Ha inũ, mexu merã inũ niwe kuxipa shũku ikai anu mapunibu keska mã haska keskamariki.

¹⁹ Ha inũ, trombeta txã ikai nĩkama hawa Deusũ hui kaĩyaĩ nĩkamari inibuki. Hamẽ habuã ha hui tashniai nĩkakĩ hau ana hãtxayamanũ nemakĩ ea anibuki.

²⁰ Haska Deusũ shabakabi hatu yuia hawenabu Moisés nemakĩ: “Tsuara hawẽ mati anu paikẽ hau mawanũ mãkãwẽ tsaka tsaka akasmakĩ txatxitiwẽ pupe akĩ hatu debuwakãwẽ, inabu inũ yuraburã”, akĩ hatu yuiai nĩkai haska tenetirubuma inikiaki, ha yunuti mesewẽ taearã.

²¹ Deusũ hawẽ kuxipa tashnima mesehaira uĩaĩbũ habiaskariai Moisés hatu yuikĩ: “Eari datei ẽ saki saki ikaii”, inikiaki.

²² Maturã, nukũ shenipabu na mai anua Deuski nukua datenibu keskama txanima kayabi Mati Sião inũ Deus hiweatũ maewã Jerusalém pepa txasha txasha ikai nai anu hanu hawẽ nai tsumabu hanu haki dasia tsuã hati tanatiruma habũ Deus kẽwaĩbu haskabu anu mã ma ikũwaĩ haki kemaki.

²³ Habu dukũtũ Deus ikũwaĩ hawẽ bake ikubainibu ma hatũ kena nai anu hatu keneshũ netãni ha yurabu Deus hiweshuni pemisbu hatũ yushĩ Deus dasibi pewanikatũ ma hatu hawa txakabuma wayama Deus dapi ma haki kemani mapuabu nũ xinaiĩ.

²⁴ Ha dikabi Jesusũ hawẽ yuba bena nuku washũkinã, mawai hawẽ himi habakĩ Abelĩ himi binuniki, hawẽ taeshũ Deusũ nukũ txakabu nuku buashũti wakinã. Hamẽ Abelĩ himirã, hawẽ taea Deus sinatai hawẽ yupukunaniki, tsuã txakabu buatimarã.

²⁵ Ha inũ, Mati Sinai anushũ Deusũ hawẽ yunua hatu yuibia nĩkama hawẽ kupiti pashama inibuki. Ikis nai anushũ Deusũ hawẽ bakebetã nuku yusĩaĩ haskanibu keskakĩ nũ nĩkama nukuri nũ haskatã pashatirubumawẽ taeshũ hawara Deusũ nuku unãmai haki petxitã danãma uĩrakubainãkãwẽ.

²⁶ Ha inũ, hatu yusĩaĩtiã hawẽ huiwẽ Deus hiwemistũ mai patxa sakumatã txipu ana hatu yubakĩ: “Ana bestiwakĩ mai inũ hawara nai anua dasibi ẽ ana patxa sakumashanaii, mai bestimarã”, hatu waimakẽ nuku keneshunibuki.

²⁷ Hakiri yuikĩ: “Ana bestiwakĩ ẽ ashanaii”, inirã, ha mai damiwani anua hamapai tibi maewakeaketã hanushũ hawara Deusũ abuai maewama hau betsama ipakeshanũbũ dasibi damiwani Deusũ ana patxa sakumaya hawara Deusũ mekekatsi ikama hamebi yamai keyushanairã, nũ tapĩtirubuki.

²⁸ Hanu Deus shanẽ ibui hiwemis hawẽ shanẽ nuku hanu hiwemashanairã, hawa maeama ishanikiki. Haskakẽ Deus pehaira wakĩ kẽwãkĩ xinã txãkãwãkĩ haki mesekĩ hawara haska abuai keska benimawakĩ ashũkubainãkãwẽ.

²⁹ Nukũ Deus kuxiparã, txi keskaki, dasibi yamawakĩ keyutirurã.