Efésios 4 - Kaxinawá Bíblia (BR)

Jesusunabus mekei putanametimakiri hatu yusĩnikiaki, na hãtxarã

¹ Nenu eska ẽ bika tenei hiweyushũ meairã, nukũ Shanẽ Ibũ ea yununi ẽ akubainaiwẽ taeshũ ea atxitã ea mekeimashũ ea heneabumakẽ hau mã ikũwaĩbu Deusũ matu kenani hiwei pepai haskakĩ mã unãkubainũbũ ẽ matu yunuai xinaĩrakubaĩkãwẽ.

² Eskairã, bebukaini keãma betsa binũama inũ, duapai betsabu abui inũ, hĩ hĩ ikĩ hawara bebũkiri anũ ika hawaira sinama ikũwaĩ betsabube nui uĩnanaĩ teneshũ uĩrakubaĩkãwẽ.

³ Ha Yushĩ Pepatũ matu dasi waiwẽ taea unãnuma hiwei ikũwaĩ dasibibube putanameama haskas hiwekubaĩkãwẽ.

⁴ Maturã, habias yura matu wakatsis ikĩ Deusũ matu kenanishũ habias Yushĩ Pepa matu inãtã hawẽ kuxipawẽ habias hiwekuĩa matu manakamaikiki, Jesus mã ikũwaĩburã.

⁵ Haskawẽ taea nũ Shanẽ Ibu bestitxai hayaki. Ha inũ, ha besti nũ ikũwaĩ inũ hawẽ besti xinã betsatã yura betsabu unãti wamanũ ika mã naxiakeakemisbuki.

⁶ Ha dikabi Deus bestitxairã, dasibi ikũwaĩbũ Epaki. Dasibi hawenabu shanẽ ibushũkĩ hawẽ kuxipa dasibi matu uĩmakubainikiki.

⁷ Hanushũ nuku tibi duawakĩ hawẽ kuxipa nũ hayanũ nuku inãkatsis ikĩ Cristõ nuku tibi abukĩ inãpakeikiki, ha kuxipawẽ nũ dayanũbunã.

⁸ Haska Jesus shanẽ ibukĩ haki sinataibu binutã hawenabu pepa manakumiskiri Deusũ hãtxa Davĩ keneni yuikĩ: “Habu binukĩ maematã iyuniki. Hakia habũ txibãmisbu pepabu pepawẽ hatu manakumiski”, iniki.

⁹ Na inakainikiri kenekĩ haskararakiri Davĩ xinãkĩ yuini matu yuinũ nĩkakãwẽ. Messias Deusbe nai anu hiwea mai anu ha dukũ butui taeniki.

¹⁰ Ha dukũ habias butua ana hawẽri inakaini nenuma nai binutã haska huyama ana hawẽri hawẽ kuxipa haki dasi keyuniki.

¹¹ Ha haska hamebi huyamashũ betsabu hawẽ kuxipayabu hatu wakĩ betsabu hawẽ hãtxa yuishunikabu hatu wakĩ betsabu hakiri kakape txanikubaunikabu hatu wakĩ betsabu yusĩnanaĩ mekenikabu hatu watã hatu yunuakeakebainiki.

¹² Hatu haska wabaĩkĩ hawenabũ hawẽ daya tibi hau ashunũbũ hatu pewatã hatu yunubainiki, hau kuxipanamei haska Deusũ abuai hakiri ana tapĩ Cristõ yurai nũ mestenepakubainũbunã.

¹³ Haskakũkaini dasibi putanameama ikũwaĩbuki dasitã Deusũ bakekiri tapĩkubaĩkĩ Cristo ikũhairawai hawa xinã betsa wama Cristokiri unãnepai dasibibu nũ itirubuki.

¹⁴ Haskakẽ ana bake mixtĩbũ xinaĩ keska ana hiweyamakubainãkãwẽ. Eskaki, matu yuinũ nĩkakãwẽ. Huni betsa betsapabũ bake mixtĩbu beparanabu hawaira nĩkamisbuki. Nuku habiaskari wakĩ yura betsa parananãkĩ Deusũ yusĩa kayabi txibãma yusĩa bena watã matu yusĩaĩbu hatu nĩkakĩ hatũ hãtxa ikũwãkĩ bake mixtĩbũ hamapai tibi txibaĩ imis keskai ana iyamakubainãkãwẽ.

¹⁵ Hakia abunamekĩ hãtxa kayabi yui nukũ Shanẽ Ibu Cristo keskai ewai hiweyukubainãkãwẽ, Cristo nukũ bushkakẽ haki dasi tsamitã nũ hawẽ yura ewawairã.

¹⁶ Hanua Cristo nukũ Shanẽ Ibuwẽ taea dasibi ikũwaĩbu nuku dasiwa nuinamekĩ, ikũwaĩbu tibitũ daya betsa Deus ashuaĩbu inũ ikũwaĩbu dasibi merabewakĩ Cristowẽ taeshũ nukunabu dasibi mã hatu kuxipa wakubainaii, nukũ pabu tibi ewai nũ kuxipamis keskakinã.

Jesus ikũwaĩburã, hiwea bena hayabukiaki, na hãtxarã

¹⁷ Nukũ Shanẽ Ibũ kenawẽ eska ẽ matu yuikĩ yunuai ea nĩkakãwẽ. Habũ Deus unãma benuabu ikaibu keskai ana hiweyamakãwẽ, habũ xinã txakabu benuawẽ haska hiwea unãma hamakiri kane kane akanikikirã.

¹⁸ Habu mexu merã nia keskashũ xinã txakakĩ pe xinãtirubuma unaĩsmapabuki, haburã, hawa benima pae Deus anua huaiwẽ benimama haska hawa tapiãma unaĩsmapa besti habu huĩti kuxiburã.

¹⁹ Ana hawa dakeama txakabu hamapai atimapa tibi hawẽ yura inãkĩ hawẽ kemuhairai huĩti kuxi hiweabuki, tsua ibubis e ikamarã.

²⁰ Hakia maturã, Messias Cristo ikũwãkinã, habu hiwemisbu keskakĩ mã tapiãma iniki.

²¹ Haskawẽ taeshũ bebũkiri Deusũ Katuakiri hawẽ kakape ẽ matu yusĩma haskai ha hiwenikiri tapĩkĩ mã nĩkaimarã, txanima Jesus anua ha besti yui kayaki.

²² Haskawẽ taeshũ matubunã, matũ hiwea sheni shabakabi yuikĩ txiterikãwẽ. Haska uatiã txakabui hiwekũkaĩkĩ txakabu betsa betsapawẽ kemukĩ ibubis parananaĩ mã ikũkainairã, putai beshterikãwẽ.

²³ Matũ xinã bena watã haska Deusũ abukĩ matu katumai besti xinãkãwẽ.

²⁴ Matũ hiwea bena tari bena sawea keskakĩ matũ yushĩ bena wakĩ Deusũ matu damiwani hawẽ Yushĩ keskarikãwẽ. Haska txakabu pashkatã meribikũkaini mã hiwea pepaswẽ txanima hãtxa besti txibãkubaĩshanaii.

Jesus ikũwã kayabirã, eskai mestẽtikiri Paulõ yusĩnikiaki, na hãtxarã

²⁵ Eskatianã, nũ Jesus ikũwaĩburã, nũ yura bestitxai keskaki. Haskawẽ taea hawara yui mã hãtxairã, ana txani txakai parananãma matunabube shabakabi yuinamekubaĩkãwẽ.

²⁶ Ha inũ, maturã, tsuara mã sinatamisrã, ana hawẽ txakabuyamakãwẽ. Tsukira sinatabiatã ana manai hatishuĩra bari txai tanama ushariama daenamekubaĩkãwẽ.

²⁷ Mã haskabumakẽ Satanásã matu parãkĩ kanematiruki.

²⁸ Ha inũ, metimai mã yumetsumisburã, hanũ matũ yumetsu henetã xinã betsa watã hanũ matũ mekenẽ daya xinãbaũ hamapai tibi dayakĩ pawarikãwẽ. Hanushũ ha dabukũ pashkashũ yura nuitapaibu mã hatu inãtirubuki.

²⁹ Haska inũ, ana hãtxa txakabu yuiama hãtxa pepawẽ besti hãtxakĩ matunabu ana kuxipa wakĩ ikũhairawamakĩ merabewakĩ hatu benimawakubaĩkãwẽ, habũ matu nĩkaiburã.

³⁰ Haskakẽ habe matu hiwemakatsis ikĩ hamebi Deusũ nai anu matu iyushanũ, iwanã, hawenabu wakĩ matu unãti wakatsi matu inãni hawẽ Yushĩ Pepa ma hayarã, ana txakabukĩ hawẽ Yushĩ Pepa punu nukawayamakubaĩkãwẽ.

³¹ Haska inũ, harakirira matu txakabuwabu has xinaĩ mã amua nimis, inũ mã pubẽhairamis inũ, mã sinatamis inũ, mã kũyã itxakayamamis inũ, sheti ikama mã ha imis inũ, hamapai txakabu betsa betsapa matũ hashpa anua kaĩmisrã, matubunã, puta keyurikãwẽ.

³² Hakia maturã, mã pepakatsis ikairã, matunabuwẽ nui bestikubaĩkãwẽ. Hawara mã hatube txakabumis daenametã duanameirã, matũ txakabu hakimarabetã ana xinãma pepakubaĩkãwẽ, haska Cristõ matũ txakabu buanikẽ Deusũ ana xinaĩsma keskairã.