Hebreus 13 - Kaxinawá Bíblia (BR)

Haskakĩ nũ Deus xinã txãkãwãtirukiaki, na hãtxarã

¹ Ma hawẽ henea yusĩa kene ẽ matu bumai uĩkãwẽ. Jesus matubetã ikũwaĩbube nui heneama hatube abunamei duanamepakekubaĩkãwẽ.

² Haska besti xinãkĩ hamapai pepa hakimama matuki bai beaibu itã hatu duawakĩ pimakubaĩshãkãwẽ. Habiaskari wakĩ ikũwaĩbu betsabũ Deusũ nai tsumabu hawa unãma hatu pimakĩ ushãpaunibukiaki.

³ Ha inũ, Jesus ikũwaĩbuwẽ taeshũ bitxiti hiwe anu hatu bitxiabu hatuwẽ petxiama hatuwẽ nuikĩ matu habe bitxiabu keska xinãkĩ hatu merabewakubaĩshãkãwẽ, haskai nuitapaibu unãkinã. Ha inũ, hatu itxakawaibuwẽ nuikĩ hatu merabewakãwẽ, habiaskari matu waibu mã metiru xinãkinã.

⁴ Ha inũ, txutanamebaũmisbu inũ beneyabia inũ aĩyãbia txakabui kemumisbu Deusũ hatu unãti watã kupiakeakeshanaiwẽ taea tsuãra ikũwaĩ aĩyãtã betsawẽ ana kemuama ha besti uĩ haska mã abunamerabeai mekei habe hiwekubaĩkãwẽ. Beneyatãri betsawẽ ana kemuamari ha besti uĩ haska mã abunamerabeai mekei habe hiweriakubaĩkãwẽ.

⁵ Haska inũ, hawẽ mabu itxa wanũ ika peiwẽ kemuama hawara besti mã hayawẽ benimakubaĩkãwẽ, Deusũ nuku yubakĩ: “Ẽ matu putama inũ ẽ matu henetaskama ishanaii”, iniwẽ taearã.

⁶ Haskakẽ ma nuku yubani haska haki txiti itã hawa dateama yuikĩ: “Yavé Deusũ ea merabewamiswẽ taea hamapai tibiwẽ tsuabũra txakabuwanũ ishũ ea amanũ ikaibu ‘Ẽ Shanẽ Ibũ ea merabewaya ẽ dateamaki’ ”, ikĩ hatu yuikubaĩtiki, dateamarã.

⁷ Haska inũ, Deusũ hãtxa Cristokiri habũ matu yusĩkĩ matu pe mekekubaĩkĩ matu xinã betsa wamanibuki. Haskawẽ taeshũ habũ Deus ikũwãkĩ txibãkubainibu haska hatũ hiwea pepa akĩ henebainibu xinãkĩ matũri ikũwãriai habiaskariai hiweriakubaĩkãwẽ.

⁸ Ha inũ, Jesus Cristorã, hawa maei betsaisma habiaskaski, uatiã inũ, natiã ikai inũ, ipakeshanairã.

⁹ Haskakẽ yusĩa betsa betsapa benawakĩ matu yusĩaĩbu hatu hawa nĩkayamakubaĩshãkãwẽ. Hamẽ nũ Deus xinãkubainaibu nukuwẽ nuikĩ merabewakĩ nuku kuxipa wamiski. Hakia habu parananãkĩ betsa kaya hatũ beya pitikiri matu yusĩkĩ bikawaibu hatu nĩkayamakãwẽ, piti beya betsakiri txibãkĩ matũ huĩti tsuã ana kuxipa watirumakirã.

¹⁰ Ha inũ, nukũ txakabu buanũ ika Jesus ma nuku mawashuni nukubu nũ hayabiakẽ tsuabũra judeubũ shenipabũ beya henekatsi ikama yuinaka menukĩ hatũ txakabu buanũ ikaiburã, hamẽ akanikiki. Nukũ merabenãtũ kuxipa hayatirubumariki.

¹¹ Ha inũ, Deus daewakĩ nukunabũ txakabu hau Deusũ buatã ana xinãyamanũ Deusbe nukunabu hãtxashunika shanẽ ibu binuatũ yuinaka tesẽshũ hatũ himi meribihaira dĩtu anu bukẽ hanua hawẽ nami mae pekatxushũ hawẽ yura kuakĩ keyumisbuki.

¹² Habiaskari wakĩ hawẽ himiwẽ hawenabũ txakabu Deus buamashũkĩ nuku meribi pepawanũ ika mae pekatxu anuari Jesus nuku tenãshunaburi nuku mawashuniki.

¹³ Haskakẽ Jesus anibu keska wakĩ nukuri nuitapa wakĩ dakewaibu ha bai Jesusũ nuku tatesshũbaini txibãkĩ judeubũ beya ana xinãma nuitapabiai dakeama ikubainãkãwẽ.

¹⁴ Haska inũ, na mai anu nũ hiweyuarã, mae putatimai has ibua hawẽ nui nũ hanus ipatirubumaki. Hakia Deusũ maewã pepa ha yubani tashnimashanai haskawẽ nũ hiweshanai xinã bestikĩ nũ manakayuaii.

¹⁵ Haskakẽ Jesus Cristo nuku mawashuni xinãkĩ heneama nukũ huiwẽ Deus kẽwãkubainãkãwẽ. Haska wakĩ nũ Deus benimawatiruki, yuinaka kuapaunibu keska wakinã.

¹⁶ Ha inũ, Deus xinã txãkãwanũ, iwanã, ana matũ hamapaiwẽ nuiama pepakĩ ikũwaĩ betsabuwẽ nuikĩ hatu merabewai hawara mã haya itxapa kasmai eskarabes pashkashũ yauxiama hatu inãkĩ heneyamakubaĩkãwẽ, haska wakĩ Deus xinã txãkãwãkinã.

¹⁷ Ha inũ, matu yusĩkĩ mekekubainaibu hatũ yusĩa nĩkatã hatuki txiti ikĩ txibãkubaĩkãwẽ. Haska matu putama hawa huĩrukuãma mekekubaĩmisbu habiaskari Deusũ unãkĩ hatu manakumiski. Ha inũ, hatũ daya itimaska wama nĩkahairakĩ mã hatu benimawakubaĩtirubuki. Hakia nĩkama mã hatu itimaska wakĩ mã hawa tapĩkĩ pewai kaĩtirubumaki.

¹⁸ Ha inũ, Jesusũ hãtxa yusĩkĩ nũ pe txibãmis unãkĩ dasibi pe hiwekĩ nũ hatu pe uĩmakubainũbũ Deus dayuikĩ nukukiri ea ashũkubaĩkãwẽ.

¹⁹ Ha inũ, matu anu ẽ ana txĩtũkatsis ikaiwẽ taeshũ menã Deus ea yukashũrikãwẽ, matu anu ẽ hawaira kashanunã.

Deusũ hau hatu duawakubainũ yununikiaki, na hãtxarã

²⁰ Nukũ Shanẽ Ibu Jesusũ himiwẽ Deusũ yuba bena ikibi ika ma pewani hawẽ bake txashuwã mekenika pepa keska nukũ mekenã bestẽwanitũ unãnuma hawẽ kuxipawẽ nuku hiwemakubaĩkatsis ikikiki.

²¹ Deusũ haskakiri matu xinaĩ yubakani hatũ hau matu dasibi pewakubainũwẽ. Habiaskari wakĩ haska abuai keska wakĩ hau nuku amariakubainũwẽ, Jesus Cristowẽ taeshunã. Haskakẽ nukũ merabenã Cristo kẽhairawakubainãkãwẽ. Haskakirã.

²² Ẽ betsabu inũ ẽ puibuũ, ẽ kene txaipamawẽ ẽ matu merabewakĩ benimawakatsis ikai hawa eki sinatama xinã pewatã uĩrakubaĩkãwẽ.

²³ Ha inũ, nukũ betsa Timóteo bitxiti hiwe anua ma tashnimaxinabu ẽ matu unãmaii. Hawairakirã eki nukuaya habe kashũ ẽ matu betximai kashanaii.

²⁴ Ha inũ, matu yusĩkĩ matu mekekubaĩmisbu inũ Deusunabu matubetã ikũwãmisbu dasibiri ẽ hãtxa ẽ matu bumaii. Ha inũ, Italia mai pakea anushũ ikũwãmisbũ hatũ hãtxa matu bumariakanikiki.

²⁵ Haskakẽ Epa Deusũ hau matu dasibi duawakubainũwẽ, hawẽ pepawenã. Hatiski, ẽ hãtxarã.