Gálatas 5 - Kaxinawá Bíblia (BR)

Jesus besti txibaĩ txĩtũtimakiaki, na hãtxarã

¹ Haska inũ, Moisés nemati inũ hawẽ yunuti nũ ana txibãyamanũbũ Cristõ nuku kaĩmaniki, Moisés yusĩa txibaĩ nũ ana hatũ escravo iyamanunã. Matu haska nemanikẽ Jesus besti txibaĩ ana xinã betsa wama judeubũ yusĩa danaĩ ana hatũ dayaru escravo iyamakubaĩkãwẽ.

² Haskakẽ hawara ẽ Paulõ ẽ matu yuiai nĩkairakãwẽ. Ha dukũ judeubũ hatũ beya matu txibãmakĩ matũ hina kubitxi matu meshtematã hanushũ Jesus matu ikũwãmaiburã, hamẽ Cristo nuku mawashuni mã hamẽ ikũwãkanaii.

³ Ana matu shabakabi yuinũ ea nĩkakãwẽ. Tsuabura judeubũ hatũ beya matu txibãmanũ, iwanã, Moisés yusĩniwẽ matu nĩkamas kemumakĩ matũ hina kubitxi matu meshtemaiburã, haska Moisés yununi inũ nemani mã hawẽ pepakatsis ikairã, hatubetã haska besti menekĩ txibãkubaĩkãwẽ.

⁴ Haska Moisés yusĩa txibaĩ pepanũ ika txĩtũkirã Deus matuwẽ nuini pepa danaĩ Cristo henei mã hawenabumaki.

⁵ Hanua nukunã, Jesuski dasitã nũ ikũwaĩwẽ taeshũ Deusũ Yushĩ Pepatũ nuku merabewaya Deus kaneismatũ nukũ txakabu nuku buashuniwẽ pepai nũ habe hiwekuĩshanai hawa teama nũ manayukubainaii.

⁶ Haska inũ, Jesus ikũwãkĩ hina kubitxi meshteaibu inũ meshteabuma hamẽ ikanikiki. Hakia Jesus Cristo ha besti ikũwaĩ nui benimai nũ haki txiti ikubainaibu besti nũ hawenabuki.

⁷ Haskakẽ hãtxa kayabi mã nĩkahairakubainaya parãkĩ tsuabũ ha hãtxa txanima mã txibãyamanũbũ matu nemakubaĩkanimẽkaĩ?

⁸ Habũ matu paraĩbũ hatũ yusĩanã, Deusunamaki. Deusũ matu katunitũ haska hãtxa matu yusĩsmaki.

⁹ Hakia misi wakĩ hawẽ shasha wati eskarabes kapã aka shashai keskai tsuabũra txani hãtxa eskarabes xinãkĩ txibãkĩ ha katxu txani hãtxa mirima txibãshãkanikiki, Jesuskiri ana xinãmarã.

¹⁰ Haska yunukĩ ẽ matu keneshunai uĩtã habiaskari mã ikũwãriakubaĩshanai Deus ẽ ikũwaiĩ. Hamẽ tsuabura mapushũ matu xinã betsa wamakĩ habuã matu itimaska waiburã, Deusũ hatu unãtã kupishanikiki.

¹¹ Mã ẽ betsabu inũ ẽ puibuũ, hunibu dasibibũ hau hatũ hina kubitxi meshtenũbũ ẽ hatu yusĩmiswẽ taeshũ ea itxakawama ikeãkanaii. Hakia eã yusĩkinã, Jesus huni txakabu keska cruzkia mawani ẽ hatu yusĩamakẽ ea danãbumari ikeãkanaii.

¹² Haskakẽ judeubũ beya txibãkĩ huni betsabũ hina kubitxi matu binũ, iwanã, yusĩ mapushũ matu bikawaiburã, hatũ hina hirabi hau meshte keyurianũbũwẽ.

¹³ Ẽ betsabu inũ ẽ puibuũ, mã judeubũ beyauma hawama mã hiwekubainũbũ Deusũ matu katuniki. Haskai hiwekĩ matũ yura meke txakabuwama nukunabube duanamei hatube nui merabenamekubaĩkãwẽ.

¹⁴ Ha inũ, Deusũ hawẽ nemati inũ hawẽ yunuti Moisés nuku yusĩmakĩ itxawani matu yuinũ nĩkairakãwẽ: “Mimebi mĩ nuimis keskawẽ huni betsa nuitapai hawaumawẽ nuikĩ hatu merabewakubaĩkãwẽ”, iwanã, Deusũ Moisés kenema nukũ shenipabu nuku yusĩshuniki.

¹⁵ Hakia yuinaka hawẽ betsabe keyunamekĩ tenã keyumis keskakĩ, maturã, ikũwaĩ betsabube mã binũkatsis iki yuãnanaĩ maturi mã beshtekei yamatirubuki. Pe mekekĩ uĩrakubaĩkãwẽ.

Deusũ Yushĩ Pepatũ nuku mekekubaĩmiskiaki, na hãtxarã

¹⁶ Eska ẽ matu yusĩmis ana matu yuinũ nĩkakãwẽ. Hawara Deusũ Yushĩ Pepatũ matu yusĩa nĩkatã haskai besti pepai hiwekubaĩkãwẽ. Hamẽ haska xinã txakakĩ matũ yurã haska abuai matu amanũ, iwanã, yunuaiwẽ matũmebi txakabukĩ xinãyamakubaĩkãwẽ.

¹⁷ Hakia hawara txakabu mã abuai Deusũ Yushĩ Pepatũ danãmiski. Haska inũ, hawara hawẽ Yushĩ Pepatũ abuai txakabũri danãriamiski. Ha dabe binunãnaĩbũ maturi pepapaikĩ haratura mã heneama mã kanemiski, ibubisrã.

¹⁸ Hakia Deusũ Yushĩ Pepatũ besti ma matu mekeaya Moisés yunuti inũ hawẽ nematiwẽ Deusũ matu ana hawẽ mekeamaki.

¹⁹ Haska inũ, heshe txakabu banabu txakabu hukũmis keskai tsuabura txakabũ hatu mekea habũ akĩ shabakabi txakabuwakubainaibu hatu uĩtirubuki, hatũ kemu txakabuwẽ aĩbuaibube inũ hunibube txutanamekinã, atimapa betsa betsapa beya wakinã.

²⁰ Haska inũ, yushĩ txakabu kẽwãkĩ hawẽ kuxipawẽ daunãnãkinã, yurabu hãtxaibu hatu nemakinã, kũyã ikirã, hawenabuwẽ nuiamarã, hawara betsa hayawẽ taeshũ hatu binũkatsis ikĩ danãkinã, yura betsabuki hawaira sinatakinã, hatuki ha ikĩ hatu sa akĩ keyukinã, ibubis hawara pepa bikĩ xinã betsa betsapa wai hiweabuki.

²¹ Haska inũ, hawara tsuara betsa haya binũ, iwanã, hawẽ kemuirã, beyuskĩ nushuti paepa aki paeinã, pikehaira bestinũ ika yushĩ betsa kẽwaĩ nawakĩ hamapai txakabu betsa betsapa wamisbu hanu Jesus huaitiã ha yura haskabu habe buama ishãkanikiki. Haskakẽ bebũkiri bari betsatiã ẽ matu yusĩkĩ yuima: “Hamapai txakabu betsa betsapa akaibu dũkekubaĩkãwẽ”, iwanã, habiaskari ẽ ana matu yunuaii.

²² Hamẽ betsarã, heshe pepa banabu pepa hukũmis keskai tsuabura Deusũ Yushĩ Pepatũ mekeshũ amakĩ hatu pe hiwemabainairã, eska shabakabi hatu anua tashnimiski, abunamei hawenabuwẽ nuirã, benimakĩ Deus kẽwaĩnã, unãnuma hiwea tsuki sinatamarã, hĩ hĩ ikama hawara teneirã, hatu txikixwabu kũyã akamarã, hatu duawairã, yauxiama hawara pepa hatu inãkubainirã, hawara yubakashũ kaneama akirã,

²³ babutã hãtxaisma inũ shetxakaismarã, hamebi hawẽ yura pe mekemisrã. Mã haskakũkainaiwẽ taeshũ Moisés yusĩawẽ tsuã matu hawa nematirubumaki.

²⁴ Hakia Jesus Cristo cruzki mastabu mawani keska wakĩ nũ Jesus ikũwaĩbu nukũ txakabu itxawatã Jesusbe cruzki nuku mastashunibu keskaki, ana txakabu nũ meyamanunã.

²⁵ Haska inũ, natiã Deusũ Yushĩ Pepatũ nuku hiwemaiwẽ taeshũ hawara ha bestitũ nuku yunukĩ amai nĩkatã hiwekubainãkãwẽ.

²⁶ Haskakẽ nukuburã, ibubis keãma betsa binũkatsis ikama hawara yura betsã bimiswẽ kemuama inũ hawẽ nuiama hiwekubainãkãwẽ.