Apocalipse 21 - Kaxinawá Bíblia (BR)

Jerusalém bena Joãonẽ uĩnikiaki, na hãtxarã

¹ Ha haskaibutiã habu dukũ bari inũ, ushe inũ, bixi inũ, mai damiwani bepemanai shabakainaya iãnẽwã batapari hayamaya habiatiãri ana uĩkĩ nai bena inũ mai bena tashniriai ẽ uĩriaxinaki.

² Hanushũ ana betsa tashnikiranai uĩkĩ aĩbũ huni benewanũ, iwanã, hawẽ beneki nukui kanũ ika hawẽruai keskamis Jerusalém maewã bena ma dasibi iruya pepaya Deusũ nai anua buteaya

³ shanẽ ibu haki tsauti anushũ hui kuxipawẽ yuiai ẽ nĩkaya: “Uĩa. Na maerã, haki, ha merã yurabube Deus hiwepakeshanairã. Hawẽ hatube hiweirã, hawenabubes ishanikiki. Deus ha besti habũ mekenika ishanikiki.

⁴ Haskawẽ taea habu kashamisbu hatũ beũ tashka watã ana mawa hayama inũ, ana saĩ ikama inũ, kasha hayama inũ, isĩ hayama dasibi haska Deusũ hawẽ bika hiweti wani beshtekĩ ana ha hayama waki”, ikaya

⁵ hanua shanẽ ibu haki tsauti anushũ nukũ Shanẽ Ibũ ea yuikĩ: “Txanima hãtxa xinã kaya ẽ mia yuiai keneriwe, eskarã. Uĩa. Eãnã, dasibi ẽ bena wakĩ keyuaii”, itã

⁶ ana ea yuikĩ: “Dasibi haskashanai ẽ yuinirã, ma ẽ akĩ keyuaki. Ea dukũ ẽ ini inũ niti ikama ẽ hiwepakeshanaii. Tsuabũra ũpash akatsis ikĩ manuaibu keska ea anu beaibu ẽ hatu hiwea inãshanaii, hawa hatu pakamamarã.

⁷ Ha inũ, tsuabũra ea danãma habũ maemakĩ binumisburã, ea ẽ hatũ mekenika Deus ikaya habu ẽ bakebu na mae bena anu hawa benuama ebe hiwei ikibi ipakeshãkanikiki.

⁸ Hakia hamẽ ekiri hãtxabiai eki dakemis inũ, eki petxia hawa xinaĩsbuma inũ, yura betsabe danãnanãmisbu inũ, yura betsa tenãmisbu inũ, txutanamebaũmisbu inũ, mukayakĩ Satanásã kuxipa yukamisbu inũ, yushĩ dami betsa kẽwãmisbu inũ, txani txakabaũmisbu habu dasibi ẽ kupia hanu buirã, ha iã hanu enxofre menui here hi hi ikai anu ha hatũ dabeki mawa meshãkanikiki”, ea wa ẽ matu keneshunaii.

⁹ Hanushũ sete nai tsumabũ ha sete Deusũ yurabu hawẽ henea kupiti mese kẽtxa betsa mata tsuma eki nukushũ ea yuikĩ: “Txashuwã bakẽ aĩyãshanai yusĩkĩ mia kayatiwamanũ nerishũ uĩyuwe”, iwanã,

¹⁰ ha nai tsuma ẽ yushĩki nukushũ nama keskawẽ mati keyatapa anu ẽ yushĩ ea iyushũ Jerusalém maewã pepahaira meribi Deusũ nai anua buteai ea uĩmaxina matu yuinũ nĩkakãwẽ.

¹¹ Hawẽ maewã txasharã, Deusũ shabawaki. Nẽkati betsa jaspe kasmai cristal karuhaira beshnã bixtu keska bakamanai txashamai ẽ uĩshuki.

¹² Hawẽ kene keyatapa kuxipawẽ dakẽbauna inũ, hawẽ hikiti shui beputiya 12 hayaki. Ha inũ, ha hikiti shui tibi anu nai tsuma betsã keshea inũ hikiti shui mamaki tibi Israelĩ 12 bababu shukua tibitũ habũ hatũ kena betsa tibi kene hayaki.

¹³ Ha inũ, bari huaikiri lesteuri hikiti shui dabe inũ besti haya inũ, norteuri habiatiri haya inũ, sulkiri habiatiri haya inũ bari hikiaikiri oesteuri habiatiri hayariki.

¹⁴ Ha inũ, hawẽ kene keyatapa hawẽ kuxipa wati 12 mixkipawã hawẽ mestẽwãkĩ tsamabauna keneyaki. Ha inũ, txashuwã bakẽ 12 tsuma kuxipayabũ kena tibi mixkipawã tibiki nea hayaki, hatũ kenarã.

¹⁵ Hanua ha nai tsumã ea hãtxa waitũ maewã inũ hawẽ hikiti shui inũ hawẽ kene kawana tananũ, iwanã, hawẽ tanati tawa keska ouro tsumashũ

¹⁶ hawẽ tanashuki. Maewã hawẽ txaipa inũ hawẽ hashpa inũ hawẽ keyatapa hawa binuama habiatishũbus 2.200 quilômetro iakea hayaki.

¹⁷ Hanushũ kene hawẽ hashpari tanashuki. Hunibũ tanamis keska wakĩ nai tsumã ha tanatiwẽ kene hawẽ keshtu 64 metro tanashuki.

¹⁸ Hawẽ kenekiri matu yuinũ nĩkakãwẽ. Ha dukũ mae hirabi ouro keska dasibi taxipa txashahairaki. Ha inũ, hawẽ kenerã, jaspe nẽkati nãketapa beshnã karuhaira kenekawana hayaki.

¹⁹ Ha inũ, mixkipawã habuki kene tsamabaunabu nẽkati karuhaira tibiwẽ dauyaki. Mixkipawã ha dukũ jaspe nẽkati hayaki. Ha segundo safira nẽkati nãketapa hayaki. Mixkipawã ha terceiro calcedônia nẽkati hayaki. Ha quarto esmeralda nẽkati nãke kurupa hayaki.

²⁰ Ha quinto sardônica nẽkati hayaki. Ha sexto sárdio nẽkati hayaki. Ha sétimo crisólito nẽkati paxinipa kurupa hayaki. Mixkipawã ha oitavo berilo nẽkati ãkunepa hayaki. Ha nono topázio nẽkati hayaki. Ha décimo crisópraso nẽkati ãkunepa beshmas hayaki. Ha undécimo jacinto nẽkati nãke beshmas hayaki. Ha 12 mixkipawã hawẽ henea ha duodécimo ametista nẽkati minanepa hayaki.

²¹ Ha inũ, ha 12 beputi tibirã, pérola txuri mane ewapahairabuki. Ha inũ, maewã hawẽ niti bai kayarã, beshnãhaira ouro has bishtu keska bakamanaikiki.

²² Ha inũ, Deusũ maewã bena hirabi anushũ Epa Deus Shanẽ Ibu binu keyua inũ hawẽ bake txashuwã habu kẽwãkubaĩmisbuwẽ taea hawẽ kẽwãti hiwe hayama ẽ uĩshuki.

²³ Ha inũ, ha maewã anurã, Epa Deus hawẽ kuxipawẽ txashahairamis inũ txashuwã bake bĩ keskai txashai hi imiskẽ ana bari inũ ushe hawẽ txasha ana habu hayamaki.

²⁴ Haska inũ, nawabu dasibi ha maewã anu mapuirã, bĩ txasha keskawẽ mapushãkanikiki. Ha inũ, shanẽ ibu Deusunabu mai hirabi anuabũ hatũ mabu pepa Deus inãshãkanikiki.

²⁵ Ha inũ, hawẽ beputirã, shaba ikibi ikawẽ taea bepẽmanaibi bepẽmanaki, hawa ana yame hayamawẽ taearã.

²⁶ Ha inũ, beputi shui anu hikikĩ nawa betsa betsapa xarabũ Deus kẽwãkĩ dasibi hawẽ hawẽrua hayabu inanũ ika hikishãkanikiki.

²⁷ Haskabiakẽ tsuabura atimapamisbu inũ, hawara Deusũ danãmis amisbu inũ, habu txani txakamisbu habu hari hikitaskama ishãkanikiki. Hakia hamẽ habu hikirã, tsuabũra kena txashuwã bakẽ hiwe kuĩa una merã Deusũ netãni habu besti Deusũ mae bena anu hikishãkanikiki.