Mateus 15 - Kaxinawá Bíblia (BR)

Hawara atimapa nũ xinãmistũ nuku txakabuwamiskiaki, na hãtxarã

¹ Hanua betsatiã Jerusalémkiria bai bexiãbu fariseubu inũ Deusũ hãtxa kenenibu yusĩnanãmis betsabu Jesuski nukushũ uĩkĩ yukakĩ:

² —Nukũ shenipabũ beya txibãkĩ piriama nũ mepanui taemiski. Haskakĩ mĩ tsumabũ nukũ shenipabũ beya txibãma mepanuama pikanimẽkaĩ?— akabu

³ haska waibu Jesusũ haturi yukakĩ: —Matunã, matũ beya txibãkĩ Deusũ yununi betsa watã haskakĩ mã ana txibaĩsbumamẽ?

⁴ Haska Deusũ yuini matu yuikĩ xinãmanũ nĩkakãwẽ. “Matũ epa inũ matũ ewa merabewakĩ hatu duawakubaĩshãkãwẽ. Hakia matũ ibubu mã hatu itxakawaya hau matu tenãshanũbũwẽ”, akĩ yunubianikẽ

⁵ hakia matũri huni betsa yusĩtxakakĩ: “Matũ ibubu hawarawẽ merabewati mabu mã haya mã haki tanabia Templo anu inãkuĩkatsi mã butiru mã xinãtiruki. Tsuã matu ana bikawatirubumaki”, iwanã, hatu yusĩmisshũ

⁶ ana hatu yusĩkĩ hau hatũ ibubu ana hatu duawakĩ merabewayamanũbũ pepaibu haska nemakĩ mã hatu beshtekubaĩmiski. Haska wakĩ Deusũ yununi danãkĩ matũ beya betsa betsapa besti mã txibãkubainaii— iwanã

⁷ —Bebũkiri Isaías mã beparamenikabukiri Deusũ yuimakĩ:

⁸ ‘Na yurabunã, hatũ hãtxawẽ ea kẽwãbiakĩ hatũ huĩtiwẽ ea xinaĩsbumaki.

⁹ Ha inũ, itxatã hawa ea kẽwãkĩ pewaisbumaki. Hakia hunibũ yunuawẽ besti hatu yusĩkubaĩmisbuki’, aka hawẽ hãtxa yuishunika Isaíasĩ nĩkatã nuku keneshuniki— hatu atã

¹⁰ hanushũ Jesusũ yurã kaiãri kenakĩ hatu itxawashũ yusĩkĩ: —Na haskaibukiri matu yusĩnũ nĩkatã tapĩkãwẽ.

¹¹ Hawara yurabũ piabu hawa hatu txakabuwaismaki. Hakia yurabũ huĩti meranua hawara hãtxa txakabu xinaĩ anua tashnikĩ hatũ hatu txakabuwamiski, Deus sinatamakinã— hatu waya

¹² hanua nũ hawẽ tsumabũ xinãbirã Jesus dapi nitã nemakĩ: —Ha fariseubu mĩ hatu yusĩaĩ nĩkatã mia nĩkama miki sinataiburã, mĩ uĩyamamẽ?— nũ wa

¹³ Jesusũ nukuri yuikĩ: —Tsuabũra ea inũ ẽ Epa ikũwãma nukũ hãtxa danaĩbu ẽ Epãri hatu danãriashanikiki, mibã tsuã banama hamebi hukuĩma tatxayabis betsea keska wakinã.

¹⁴ Hau xinã inũbũwẽ. Huni bekũmã huni betsa habe bekũ iyupai harakiri iyuai unãma habia dabe mikĩ maebaĩ di irabemisbuki. Ha beparameaibu haska keskabuki, habũ tsua merabewatirumarã. Haskakẽ hawa hatu yuiyamakãwẽ— nuku wa

¹⁵ Pedrõ Jesus yuikĩ: —Na mĩ pitikiri hatu yusĩshurã, shabakabi nuku yuiwe— aka

¹⁶ Jesusũ nuku yuikĩ: —Matũri, mã nĩkakĩ pewariabumamẽ?

¹⁷ Shabakabi matu yusĩnũ nĩkakãwẽ. Hawara yurabũ piabu hatũ xinãki naneama hawa hatũ xinã txakabuwatirumaki. Hakia hawara piabu hatũ hatuki nanea puiabu kaĩmiski.

¹⁸ Hakia hatũ xinã meranua hawara txakabu haya hawẽ txakabumisbuki.

¹⁹ Hanua eska yurabu haya hatũ xinã uke merã aruabu txakabu xinãkĩ shabakabi tashnimamisbuki, eska tibi xinã meranua shabakabi kaĩkinã, huni betsaki yubakatã tenãkinã, huni betsã aĩ txutãkinã, shebi hayabu txutabaũkinã, yumetsuirã, txani txakairã, yura betsa ha akinã.

²⁰ Haska tibi yurabũ xinã anua tashnikĩ hatu txakabuwamiski, Deus sinatamakinã. Hakia fariseubũ beya txibãma mepanuama pikĩ Deus sinatamatirubumaki— nuku aniki.

Canánawa aĩbu betsã ikũwaĩwẽ taeshũ Jesusũ merabewanikiaki, na hãtxarã

²¹ Hanua Jesus kaĩkaini mae dabe Tiro inũ Sidom dapi kakẽ

²² hanua judeubuma Canánawa aĩbu betsã Jesus betxitã txibaĩ kakĩ unãshubima huu akĩ kenakĩ: —Yusĩnaã, mĩ Davĩ babaki. Ewẽ dabanã ikĩ ẽ aĩbu bake yushĩ txakabũ ea bika tenemaĩkikiki. Ea kaĩmashũyuwe— akubiranaya

²³ Jesusũ nĩkabiai hawa yuiama kai tinĩ tinĩ ikainaya hanushũ nũ hawẽ tsumabũ yunukĩ: —Huu ikĩ nuku mese wabiranikiki. Nitxĩwẽ, hau kanunã— akĩ nũ yuikubaina

²⁴ atimas Jesus niti itã aĩbu yuikĩ: —Israelbu txashuwã benuabu keska besti ẽ hatu yusĩkubainũ Deusũ ea yununiki. Ẽ mia merabewatirumaki— abia nĩkama

²⁵ hukirã ha bebũ dãti itã yuikĩ: —Shanẽ Ibuũ, ea haska wama ea merabewawe— aka

²⁶ Jesusũ yuikĩ: —Israelbũ piti biãshũ kamã anu putatimaki— akaya

²⁷ aĩbũ hãtsiri ana yuikĩ: —Heẽ. Habiaskaki. Shanẽ Ibuũ, ẽ kamã keskaki. Israelbũ tapukishũ piabu hawẽ pese kamanẽ mitumisbuki. Haska keskari wakĩ ẽ bake meranua yushĩ txakabu ea kaĩmashũyuwe— aka

²⁸ nĩkatã Jesusũ yuikĩ: —Ẽ haska yuiai ikũwãkĩ mĩ pe yuiaii. Haskakẽ mĩ bake anua yushĩ txakabu ma kaĩkaĩshuki. Uĩritãwẽ— akaya habiatiãri hawẽ bake meranua yushĩ txakabu kaĩkainaya kayanikiaki.

Isĩ betsa betsapa hayabu Jesusũ hatu shushawanikiaki, na hãtxarã

²⁹ Haska wabirani hanua iaketãkirani Jesus kaĩkirani Galiléia iãnẽwã ketãbirãkĩ binubaini mati anu mapekea tsaukẽ

³⁰ hanu tsauwa xinãbirani yurã kaiãnẽ hawenabu isĩ teneaibu hau Jesusũ hatu shushawashunũ tiribu inũ, bekũbu inũ, txãtui tseresnibu inũ, huyubu inũ, isĩ betsa betsapa teneaibu iweshũ ha dapi hatu hanabu shushawai

³¹ uĩkĩ ha huyunibu hãtxaibu uĩkĩ txãtui tseresnibu ni peaibu uĩkĩ bekũnibũ uĩaĩbu uĩ habaa iake iakekĩ Israelbũ mekenika Deus kẽwãkĩ taewakubainaibũ

Jesusũ 4.000 hunibu pimanikiaki, na hãtxarã

³² habianushũ nũ hawẽ tsumabu Jesusũ kenashũ nuku yuikĩ: —Ma shaba dabe inũ besti ea nĩkakĩ habũ piti ma keyuabuwẽ taea ẽ hatuwẽ nuiaii. Hatũ hiwe anu piti mais ẽ hatu nitxiã bui bai putxinĩ punu nukai babui unãyamastirubuki— nuku waya

³³ —Hanu tsua hiweabumanua hania piti bishũ hati hunibu nũ hatu pimatirumaki— nũ wa

³⁴ Jesusũ nuku yukakĩ: —Hati misi mã hayamẽ?— nuku wa —Sete misi inũ baka pixta eskarabes nũ hayaki— nũ wa

³⁵ hanushũ Jesusũ ha yurã kaiã yunukĩ: —Ha maĩ tsaubaũkãwẽ— hatu watã

³⁶ ha sete misi inũ bakari bishũ Deus kẽwãtã misi tũkepakekĩ bakari tekepakekĩ nũ hawẽ tsumabu nuku inãpakea ha yurã kaiã nũ inãkeakebauna

^37-38 hanushũ dasibibũ yaniwai benimai pepeaibũ 4.000 hunibu besti tanakĩ hatũ aĩbuaibu inũ hatũ bakebu nũ tanama hanushũ ha pikãshu hatũ teshe itxawakĩ sete kuki nũ matawaya

³⁹ Jesusũ hatu yunukĩ: —Ma ẽ kai inũ burikãwẽ— hatu wabaini hanua nũ hawẽ tsumabubes shashũ inatã kai Magdala mai pakea anu nũ kaniki.