Mpitsara 1 - DIEM PROTESTANTA

Naka toerana tao Kanahàna ny Israelita

¹ Taorian’ny nahafatesan’i Josoa dia nanontany ny TOMPO ny Israelita hoe: «Iza amin’ny fokonay no tokony handeha voalohany hanafika ny Kanahanita?»

² Dia namaly azy ny TOMPO hoe: –Ny vatan-dehilahy amin’ny fokon’i Joda, fa hatolotro azy ny tany.

³ Dia hoy ny vatan-dehilahin’i Joda tamin’ny taranak’i Simehôna rahalahin’i Joda hoe: –Andeha hiaraka aminay haka ny faritany natokana ho anay, ka hiarahantsika manafika ny Kanahanita; avy eo dia haka ny faritaninareo miaraka aminareo koa izahay. Dia nikambana tamin’ny vatan-dehilahin’i Joda ny olona tao amin’ny fokon’i Simehôna,

⁴ ka niara-nanafika izy roa tonta. Dia natolotry ny TOMPO azy ny Kanahanita sy ny Perizita, ka nahafatesany vatan-dehilahy andiany folo tao Bezèka.

⁵ Hitany tao Bezèka ny mpanjaka Adônỳ-Bezèka ka notafihiny, ary resiny ny Kanahanita sy ny Perizita.

⁶ Vaky nandositra i Adônỳ-Bezèka saingy nenjehin’ireo ka tratrany, dia notapahiny ny ankiben-tanany sy ny ankiben-tongony.

⁷ Ary hoy i Adônỳ-Bezèka hoe: –Mpanjaka fitopolo, tapaka ankiben-tanana sy ankiben-tongotra, no nitsimpona hanina teo ambany latabatro; koa izay nataoko ihany no navalin’Andriamanitra ahy! Dia nentina ho any Jerosalema i Adonỳ-Bezèka ary maty tany.

⁸ Dia nanafika an’i Jerosalema ny vatan-dehilahin’i Joda ka nahazo azy; ary novonoiny tamin’ny sabatra ny mponina sady nodorany ny tanàna.

⁹ Taorian’izany, dia nidina ireo hiady tamin’ny Kanahanita izay nonina teny an-kavoana sy tany amin’ny faritra atsimo ary tany amin’ny lemak’i Sefelà.

¹⁰ Avy eo dia nandeha izy namely ny Kanahanita tao Hebrôna, izay nantsoina hoe Kiriata-Arbà tamin’izany fotoana izany, ka nandresy ny tarik’i Sesay sy i Ahimàna ary i Talmay.

¹¹ Avy tao Hebrôna izy no nandeha namely ny mponina tao Debîra izay nantsoina hoe Kiriata-Sefera tamin’izany fotoana izany.

¹² Dia hoy i Kaleba hoe: «Izay mandresy an’i Kiriata-Sefera ka mahazo azy dia homeko azy i Haksà zanako vavy ho vadiny.»

¹³ Ary i Hôtniela, zanakalahin’i Kenaza izay zandrin’i Kaleba, no nahazo ny tanàna; koa nomen’i Kaleba azy i Haksà zanany vavy ho vadiny.

¹⁴ Rehefa tonga teo anilan’i Hôtniela razazavavy, dia notoroany hevitra mba hangataka saha amin’ny rainy. Vao nidina niala tamin’ny borikiny kosa i Haksà, dia nanontanian’i Kaleba ny amin’izay ilainy;

¹⁵ ka izao no navaliny azy: –Mba anaovy fanomezana aho! Tany ngazana any atsimo no natolotrao ahy, ka mba omeo loharano aho. Dia nomen’i Kaleba azy ny loharano any ambony sy ny loharano atỳ ambany.

¹⁶ Ary ny Kenita, taranaky ny rafozan-dahin’i Mosesy, dia niainga avy tao Jerikao, tanàna be rofia. Niainga niaraka tamin’ny vatan-dehilahin’i Joda izy ka nandeha nanorim-ponenana tany amin’ny taniefitr’i Joda tao atsimon’i Harada ary niara-nonina tamin’ny Hamalekita.

¹⁷ Ary ny vatan-dehilahin’i Joda dia mbola nandeha nanafika niaraka tamin’ny taranak’i Simehôna rahalahin’i Joda ihany ka nandresy ny Kanahanita nonina tao Tsefata. Noravany tanteraka io tanàna io, ka nanomboka hatreo ny anaran’ny tanàna dia nataony hoe Hôrmà na Faharavana.

¹⁸ Avy eo dia nalain’ny olon’i Joda koa ny tanàna Gazà sy Askelôna ary Hekrôna mbamin’ireo faritra manodidina azy avy.

¹⁹ Ny TOMPO mihitsy no efa nomba ny olon’i Joda tamin’izany, ka azony ny faritra be tendrombohitra. Nefa tsy voaroakany ireo mponin’ny tany lemaka, satria nanana kalesy vy ireny.

²⁰ Dia nomena an’i Kaleba i Hebrôna araka izay efa nolazain’i Mosesy azy. Ireo tarika hanakita telo mponin’i Hebrôna dia noroahin’i Kaleba hiala tao.

²¹ Fa ny Jebosita izay nonina tao Jerosalema kosa dia tsy voaroakan’ny taranak’i Benjamîna, ka mbola miara-nonina amin’ny taranak’i Benjamîna ao Jerosalema mandraka androany.

²² Ny taranak’i Efraîma sy i Manase zanakalahin’i Jôsefa kosa dia niakatra nanafika an’i Betela ary nombàn’ny TOMPO.

²³ Nandefa iraka izy aloha mba hijery ny tanàna, izay nantsoina hoe Lozy tamin’izany fotoana izany.

²⁴ Dia nahita lehilahy iray nivoaka avy tao an-tanàna ireto iraka, ka niteny taminy hoe: –Atoroy anay ny fomba hidiranay ao an-tanàna, dia hamindra fo aminao izahay.

²⁵ Dia natoron-dralehilahy azy ny fomba hidirany ao an-tanàna. Koa naringan’ireo tamin’ny sabatra ny mponina tao an-tanàna, fa ilay lehilahy sy ny fianakaviany manontolo kosa navelany handeha.

²⁶ Dia nankany amin’ny tanin’ny Hetita ralehilahy ka nanorina tanàna anankiray nantsoiny hoe Lozy; ka mbola izany ihany no anarana entiny mandraka androany.

²⁷ Ary ny taranak’i Manase dia tsy naharoaka ny mponina tao Bety-Seàna sy Tahenàka na ny tao Dôra sy Jiblehama ary Megidao na tamin’ireo tanàna madinika samy miankina aminy avy; koa nanohy nipetraka tamin’izany faritany izany hatrany ny Kanahanita.

²⁸ Ary na dia efa natanjaka aza i Israely tatỳ aoriana, dia tsy naharoaka azy ireo mihitsy fa nampanompo azy fotsiny.

²⁹ Ny taranak’i Efraîma ihany koa dia tsy naharoaka ny Kanahanita izay nonina tao Gezera; ka nipetraka teo anivon’ny Efraîmita ireo Kanahanita tao Gezera.

³⁰ Ny taranak’i Zebolòna dia tsy naharoaka ireo mponina tao Kitrôna na ny tao Nahalôla; ka nipetraka teo anivon’ny Zebolonita ireo Kanahanita ireo saingy nampanompoiny.

³¹ Ny taranak’i Asera dia tsy naharoaka ny mponina tao Hakao sy Tsidôna na ny tao Mehaleba sy Akziba na ny tao Helbà sy Afîka ary Rehôba.

³² Koa nipetraka teo anivon’ny Kanahanita izay nonina teo amin’ny tany ireo Aserita satria tsy naharoaka azy.

³³ Ny taranak’i Naftalỳ dia tsy naharoaka ny mponina tao Bety-Semesy sy Bety-Hanata; ka nonina teo anivon’ny Kanahanita izay nipetraka tao ireo Naftalita saingy nampanompo azy.

³⁴ Ny Amôrita kosa dia naharesy tosika ny taranak’i Dana teny amin’ny faritany be tendrombohitra ka tsy namela azy hidina teny amin’ny tany lemaka.

³⁵ Nanohy nipetraka tao Hara-Heresa sy Aialôna ary Sahalbima ny Amôrita; kanjo tato aoriana dia nanjakan’ny taranak’i Efraîma sy i Manase izy, ka voatery nanompo azy.

³⁶ Ny faritanin’ny Edômita kosa miainga eo amin’ny fiakarana Hakrabima, dia eo amin’ny harambato no ho miakatra.