1Tantara 4 - DIEM PROTESTANTA

Ny taranak’i Joda araka ny lisitra hafa

¹ Ny zanakalahin’i Joda dia i Peretsa sy i Hetsirôna mbamin’i Karmỳ sy i Hora ary i Sôbala.

² I Reaià, zanakalahin’i Sôbala, no ray niteraka an’i Jahata; ary i Jahata no ray niteraka an’i Ahomay sy i Lahada: izy mirahalahy ireto no razamben’ny tarika Tsôrehatita.

^3-4 Ireto no zanakalahin’i Hora, lahimatoan’i Efrata sady mpanorina an’i Betlehema: i Natama sy i Jizrehela ary i Jismà sy i Jidbasa; ny anabavin’izy efa-dahy kosa atao hoe Hatselpônỳ; ao koa i Penoela mpanorina an’i Gedôra, ary i Hezera mpanorina an’i Hosà.

⁵ I Asehora, mpanorina an’i Tekôa, dia nanana vady roa: i Helà sy i Naharà.

⁶ I Naharà no reny niteraka an’i Ahozama sy i Hefera ary i Temenỳ sy i Ahastarỳ; ireo no zanakalahin’i Naharà.

⁷ Ny zanakalahin’i Helà kosa dia i Tsereta sy i Tsôhara ary i Etnana.

⁸ I Kôtsa no ray niteraka an’i Hanoba sy i Tsôbebà; ary izy koa no razamben’ny tarik’i Aharihela, zanakalahin’i Haroma.

⁹ Nisy atao hoe Jahebetsy, izay nalaza kokoa noho ireo rahalahiny. Ny reniny no nanome ny anarany hoe Jahebetsy satria hoy izy: «Zoim-pahoriana aho, raha niteraka azy».

¹⁰ Ary niantso an’ilay Andriamanitr’i Israely i Jahebetsy ka nanao hoe: «Enga anie hotahînao tokoa aho, ka hohalalahinao ny taniko; ary aoka ny tananao homba ahy, ka hataonao lavitra ahy ny loza mba tsy ho zoim-pahoriana aho!» Dia nohenoin’Andriamanitra izay nangatahiny.

¹¹ I Keloba, rahalahin’i Sihà, no ray niteraka an’i Mehira izay rain’i Estôna.

¹² Ary i Estôna no ray niteraka an’i Bety-Rafà sy i Pasea ary i Tehinà; ity Tehinà ity no mpanorina ny tanànan’i Nahasa. Ny taranak’ireo no mponina tao Rekà.

¹³ Ny zanakalahin’i Kenaza dia i Hôtniela sy i Seraià; ary ny zanakalahin’i Hôtniela dia i Hatata sy i Mehônôtahy.

¹⁴ I Mehônôtahy no ray niteraka an’i Hôfrà; ary i Seraià no ray niteraka an’i Jôaba razamben’ny ao Geharasima na hoe Lohasahan’ny mpiasa, fa mpiasa izy ireo.

¹⁵ Ireo zanakalahin’i Kaleba zanakalahin’i Jefonè dia i Hiro sy Elà ary i Nahama; ary ny zanakalahin’i Elà dia i Kenaza.

¹⁶ Ny zanakalahin’i Jehalaleela dia i Zifa sy i Zifà ary i Tirià sy i Asarela.

¹⁷ Ny zanakalahin’i Hezrà dia i Jetera sy i Mereda ary Hefera sy i Jalôna. Ary nanambady an’i Bitià, zanakavavin’ny Farao, i Mereda, ka niteraka an’i Miriama sy i Samày ary i Jisbà ilay mpanorina an’i Estemôa;

¹⁸ ary i Jehodià, vadiny hafa koa, dia niteraka telo mirahalahy: i Jereda mpanorina an’i Gedôra, i Hebera mpanorina an’i Sôkao, ary i Jekotiela mpanorina an’i Zanôa.

¹⁹ Ny anabavin’i Nahama no vadin’i Hôdià; ireo zanakalahin-dravehivavy dia ilay mpanorina ny tanàna Kehilà izay an’ny Garmita sy ilay mpanorina ny tanàna Estemôa izay an’ny Mahekatîta.

²⁰ Ny zanakalahin’i Simôna dia i Amnôna sy i Rinà ary i Bena-Hanàna sy i Tilôna. Taranak’i Jisehỳ: i Zôheta sy ilay zanakalahin’i Zôheta.

²¹ Taranak’i Selà, zanakalahin’i Joda: i Hera mpanorina an’i Lekà; i Lahedà mpanorina an’i Maresà; ireo tarika mpanenona lamba rongony tao Bety-Asbea;

²² i Jôkima sy ny mponina tao Kôzebà; ary i Jôasy sy i Sarafa, izay samy nanambady vehivavy môabita vao niverina nonina tao Betlehema: zavatra efa tranainy izany.

²³ Ny taranak’izy mirahalahy no mpanefy vilany sady mponina tao Netahima sy Gedera; tamin’ny alalan’ny mpanjaka no nonenany tao satria asa ho an’ny mpanjaka no nataony.

Ny taranak’i Simehôna

²⁴ Ny zanakalahin’i Simehôna dia i Nemoela sy i Jamîna mbamin’i Jariba sy i Zera ary i Saoly.

²⁵ I Saloma no zanakalahin’i Saoly, i Mibsama zanakalahin’i Saloma, i Mismà zanakalahin’i Mibsama.

²⁶ Ny zanakalahin’i Mismà dia i Hamoela sy i Jakora ary i Simehỳ.

²⁷ I Simehỳ dia nanana zanakalahy 16 sy zanakavavy enina, fa ireo rahalahiny kosa tsy nisy niteraka zanakalahy maro; koa ny fokon’i Simehôna manontolo dia tsy nitombo hoatra ny taranak’i Joda.

^28-32 Mandra-panjakan’i Davida, dia ireto no tanàna nonenan’ny taranak’i Simehôna: i Beera-Seba sy i Môladà, i Hatsary-Sohala sy i Bahalà, i Hetsema sy i Tôlada, i Betoela sy i Hôrmà, i Tsiklàga sy i Bety-Markabôta, i Hatsary-Sosima sy i Bety-Birỳ ary i Saharaîma mbamin’ireo tanàna kely momba azy avy. Teo koa ireto tanàna dimy ireto: dia i Hetama sy i Haîna, i Rimôna sy i Tôkèna ary i Hasàna

³³ mbamin’ny tanàna kely rehetra manodidina ireo tanàna ireo hatrany Bahalato. Ireo no toeram-ponenan’ny taranak’i Simehôna ary samy nanana ny tantaram-pirazanana manokana izy.

^34-38 Ireto voatonona anarana ireto no filoha teo amin’ny tarika nisy azy avy: i Mesôbaba sy i Jamelèka, i Jôsa zanakalahin’i Amatsià, i Jôela, i Jehò ilay zanakalahin’i Jôsibeià sy zafin’i Seraià ary zafiafin’i Hasièla, i Eliôhenay sy i Jahakôbà, i Jesôhaià, i Hasaià sy i Hadiela mbamin’i Jesimiela sy i Benaià ary i Zizà ilay zanakalahin’i Sifehỳ sy zafin’i Alôna sy zafiafin’i Jedaià sy zafin-dohalik’i Simrỳ ary zafin-kitrokelin’i Semahià. Samy nihamaro fatratra ny fianakaviany,

³⁹ ka nandeha nankany akaikin’i Gedôra, dia hatrany atsinanan’ny lohasaha mba hitady ahitra ho an’ny andian’ondriny.

⁴⁰ Koa nahita ahitra milenodenoka sady tsara izy ireo ary midadasika ny tany sady milamina feizay; taranak’i Hama no mponina tao taloha.

⁴¹ Tamin’ny andron’i Hezekià mpanjakan’i Joda no tonga tao ireo filohan-tarika voasoratra anarana ireo ka namely ny tranolay sy ny toby fiarovana hitany tao ary nandringana ny taranak’i Hama; dia nonina tao nisolo toerana azy mandraka androany, satria nisy ahitra ho an’ny andian’ondriny tao.

⁴² Ary tamin’ny taranak’i Simehôna dia nisy lehilahy dimanjato notarihin’i Pelatià sy i Neharià ary i Refaià sy i Hoziela izay samy zanakalahin’i Jisehỳ; nankany an-tendrombohitr’i Sehira ireo,

⁴³ ka namely ny Hamalekîta sisa afa-nandositra, dia nonina tany mandraka androany.