Jeremia 48 - Baiboly Katolika

Tenin’Andriamanitra mamely an’i Moaba

¹ An’i Moaba. Izao no lazain’i Iavehn’ny tafika, Andriamanitr’i Israely: Loza ho an’i Nabô, fa rava; safo-kenatra i Kariataima, fa azo; safo-kenatra ny trano mimanda, fa voazera;

² tsy misy intsony izay voninahitr’i Moaba! Any Hesebona no hidinihana ny loza hamelezana azy: Andeha hofongorantsika eo amin’ny firenena izy! Ianao koa, ry Madmena, hatao gina; mandeha manaraka eo aoriana ny sabatra.

³ Injany, avy ao Hôrônaima misy antsoantso hoe: «Fandringanana sy fandravana lozan-tany re!»

⁴ Montsana i Moaba; mandefa antsoantso ny ankizy madinika ao aminy.

⁵ Eny, fa misy fitomaniana ao amin’eny fiakaran’i Loita, mitomany ny olona no miakatra eo; eny, eo amin’ny fidinan’i Hôrônaima, fitarainam-pahoriana no re.

⁶ «Mandosira, vonjeo ny ainareo! Ho tahaka ny anjavidy an-tany foana anie izy.»

⁷ Fa noho ianao nitoky tamin’ny asan-tananao aman-drakitrao, dia ho lasan’ny hafa koa ianao; ary indray ho lasan-ko babo i Kamosy mbamin’ny mpisorona amam-pilohany rehetra.

⁸ Ho tonga hamely ny tanàna rehetra ny mpandringana, ka tsy hisy ho afaka aminy izy ireo na iray aza; ny lohasaha, hosimbana; ary ny tanety, horobaina, araka ny voalazan’i Iaveh.

⁹ Omeo elatra i Moaba, fa tokony hidina izy; horavàna ny tanànany, ka tsy hisy mponina intsony.

¹⁰ Ho voaozona anie izay mitsilamodamoka amin’ny asan’i Iaveh! Ho voaozona anie izay mihazona ny sabany tsy handatsa-dra!

¹¹ Hatry ny fony mbola zaza i Moaba dia nandry feizay, niotrika teo amin’ny faikany, tsy nafindrafindra vilany, tsy lasana ho any amin’ny fahababoana, ka dia naharitra ny tsirony, ary tsy niova ny fofony.

¹² Koa indro, tonga ny andro, - teny marin’i Iaveh, - hanirahako mpamindra am-bilany, hamindra vilany azy, hofoanany ny vilaniny, ary hovakiny ny sininy.

¹³ Dia ho menatra i Moaba noho ny amin’i Kamosy toy ny nahamenaran’ny taranak’i Israely, noho ny amin’i Betela izay nitokiany.

¹⁴ Ahoana no ahazoanareo milaza hoe: «Mpiady izahay, lehilahy mahery an’ady izahay?»

¹⁵ I Moaba efa rava; ny tanànany efa midona-tsetroka; ny zatovony voafantina, midina ho any am-pamonoana; - teny marin’ny mpanjaka. manana anarana hoe: Iavehn’ny tafika. -

¹⁶ antomotra ny fandravana an’i Moaba; mimaona fatratra ny loza hanjò azy.

¹⁷ Ianareo rehetra mifanakaiky aminy, samia mitsapa alahelo azy, ary ianareo rehetra mahalala ny Anarany, samia milaza hoe: «Ahoana no dia tapaka ny tehina mafy toy izany, ny tehim-panjakana kanto toy izany?»

¹⁸ Mietre amin’ny voninahitrao dia mipetraha amin’ny tany, ry mponina, zanaka vavin’i Dibôna; fa tafakatra hamely anao ny mpandringana an’i Moaba, ny mandanao efa voazerany.

¹⁹ Mijanòna eo an-dalambe, ka mitazàna, ry kala mponina ao Arôera; anontanio ny lehilahy mandositra, sy ny vehivavy mitsoaka, ka ataovy hoe: «Inona no mihatra?»

²⁰ «Mangaihay i Moaba, fa voazera; samia ianareo mitoloko sy mitaraina! Ambarao any Arnôna, fa rava i Moaba!»

²¹ Misy fitsarana tonga, mihatra amin’ny tany lemaka, amin’i Helona, amin’i Jasà,

²² amin’i Mefaata, amin’i Dibôna, amin’i Nabô, amin’i Beta-Deblataima,

²³ amin’i Kariataima, amin’i Beta- Gamola, amin’i Beta-Maona,

²⁴ amin’i Kariota, amin’i Bôsrà, sy amin’ny tanàna rehetra amin’ny tanin’i Moaba, na ny lavitra na ny akaiky.

²⁵ Voakapa ny tandrok’i Moaba, ary tapaka ny sandriny, - teny marin’i Iaveh. -

²⁶ Ataovy doroka izy, fa nitsangan-kanohitra an’i Iaveh. Aoka i Moaba hihosinkosina amin’ny loany, ary aoka izy koa ho tonga fihomehezana!

²⁷ Fa moa i Israely tsy fihomehezana taminao va? Moa nisy nahatratra azy ho naman’ny mpangalatra va? no dia nihifikifi-doha ianao, isaky ny miteny ny aminy?

²⁸ Ilaozy ny tanàna, mitoera any amin’ny vatolampiny, ry mponina any Moaba, ka aoka ho tahaka ny domohina izay manao ny akaniny eny ambonin’ny hantsana mangotanatana.

²⁹ Efa renay ny avonavon’i Moaba, ilay fatra-piavonavona, ny fisolanàndrany, ny avonavony, ny reharehany, ary ny hambom-pony.

³⁰ Izaho koa dia mahalala, - teny marin’i Iaveh, - ny fihoa-bavany sy ny bedibedy foanany, ary ny asany tsinontsinona.

³¹ Koa migogogogo aho, noho ny amin’i Moaba; midradradradra aho, noho ny amin’i Moaba rehetra, mitsetra ny olona, noho ny amin’ny mponina ao Kir-Heresa.

³² Mihoatra noho ny fitomaniana an’i Jazera no itomaniako anao, ry tanimboalobok’i Sabamà. Tafita ny ranomasina ny rantsanao tafapaka amin’ny ranomasin’i Jazera izy. Kanjo ny fitoazana anao amam-pitoazana ny voalobokao, nianjeran’ny mpandringana.

³³ Foana ny fifaliana amam-piravoravoana, eo amin’ny saha voavoly hazo mamoa sy ny tanin’i Moaba; nataoko tankina ny divay eo amin’ny barìka fandomam-boaloboka; tsy hosihosena intsony amam-pihobiana maresaka izy; ny hoby efa tsy hoby intsony.

³⁴ Noho ny antsoantson’i Hesebona re hatrany Eleale; hatrany Jasà, dia mandefa ny antsoantsony izy ireo; hatrany Segôra ka hatrany Hôrônaima, hatrany Eglata-Selisia, fa mbamin’ny ranon’i Nemrima aza no ho tankina.

³⁵ Tiako hofaranana ny amin’i Moaba, - teny marin’i Iaveh, - izay miakatra ho eo amin’ny fitoerana avony, sy manolotra emboka manitra amin’ny andriamaniny.

³⁶ Koa mitaraina hoatra ny sodina ny foko, noho ny amin’i Moaba; eny, ny foko, noho ny amin’ny mponina ao Kir-Heresa, mitaraina hoatra ny sodina. Koa very avokoa izay tombony efa azony.

³⁷ Fa nibory ny loha rehetra, voaharatra ny somotra rehetra, misy tetika amin’ny tanana rehetra, ary misy lasàka koa ny valahana.

³⁸ Eny ambony tafon-trano rehetra sy eny amin’ny kianja ao Moaba, tsy misy afa-tsy figogogogoana fotsiny; fa nomontsaniko i Moaba hoatra ny fanaka tsy ahoan’ny olona intsony, - teny marin’i Iaveh. -

³⁹ He ity fahatorotoròny! Mba misentoa ianareo. He ity fiambòhon’i Moaba amin-kenatra! Tonga fihomehezana i Moaba, tonga fampitahorana ho an’izay rehetra mifanakaiky aminy izy.

⁴⁰ Fa izao no lazain’i Iaveh: Indro izy miezaka hanidina toy ny voromahery, mamelatra elatra eo ambonin’i Moaba.

⁴¹ Azo i Kariota; afaka ny trano mimanda; ary ny fon’ny mpiady maherin’i Moaba amin’izany andro izany, dia toy ny fon’ny vehivavy mihetsi-jaza.

⁴² Voaongana i Moaba amin’ny maha-firenena azy, satria nitsangan-kanohitra an’i Iaveh.

⁴³ Tahotra, lavaka amam-pandrika, no mitatao anao, ry mponina any Moaba, - teny marin’i Iaveh. -

⁴⁴ Izay mandositra ny zava-mahatahotra azy, voan’ny fandrika; fa hataoko tonga aminy, dia amin’i Moaba, ny taona famangiana azy, - teny marin’i Iaveh. -

⁴⁵ Mijanona eo amin’ny alokalok’i Hesebona ny mpandositra lany hery; kanjo misy afo mivoaka avy ao Hesebona, ary misy lelafo avy ao afovoan’i Sehôna; ka nandevona ny valahan’i Moaba, sy ny karan-dohan’ny zanaky ny fitabatabana.

⁴⁶ Loza ho anao, ry Moaba! Very ny vahoaka ao Kamosy; fa ny zanakao lahy entina atao sesitany, ny zanakao vavy lasan-ko babo.

⁴⁷ Mbola hampodiko anefa ny voababo amin’i Moaba, any amin’ny farandro any, - teny marin’i Iaveh. - Hatreto ny fitsarana an’i Moaba.