1Tantara 4 - Baiboly Katolika

4. IREO FOKO TANY ATSIMO Zanak’i Jodà: i Sobala

¹ Zanaka lahin’i Jodà: i Faresa, i Hesbôna, i Karmì, i Hora sy i Sobala.

² I Raià zanaka lahin’i Sobala, niteraka an’i Jahata; i Jahata niteraka an’i Akamaia sy i Lahada. Ireo no fokon’i Sareanina.

I Hora

³ Izao avy no avy amin’ny rain’i Etama: i Jezrahela, i Jesema, sy i Jedebosa, ary Asalelfônì no anaran’ny anabavin’ireo.

⁴ I Fanoela no rain’i Gedôra, ary i Ezera no rain’i Hosa. Ireo no zanaka lahin’i Hora, lahy matoan’i Efrata, rain’i Betlehema.

I Asora

⁵ Nanambady roa i Asora, rain’i Tekôe, dia i Halaà sy i Naarà,

⁶ ka ny naterak’i Naarà taminy dia i Oozama, i Hefera, i Tenamì ary i Ahastarì: ireo no zanaka lahin’i Naarà.

⁷ Ny zanaka lahin’i Halaà dia i Sereta, i Isaara sy i Etnàna.

⁸ I Kaosa niteraka an’i Anoba sy i Sôbobà, ary ny fokon’i Aharehela, zanaka lahin’i Aroma.

⁹ Nomena haja noho ny rahalahiny i Jabesa ary nataon-dreniny hoe Jabesa ny anarany, fa hoy izy: «Nijaly aho no niteraka azy.»

¹⁰ Niantso ny Andriamanitr’i Israely i Jabesa nanao hoe: «Raha mitahy ahy Ianao, ka halalahinao ny faritaniko, ary momba ahy ny tananao, sy arovanao amin’ny loza aho mba tsy ho zoim-pahoriana...» Ary nomen’Andriamanitra azy izay nangatahiny.

I Kaleba

¹¹ I Kaleba rahalahin’i Soà niteraka an’i Mahira, rain’i Estôna;

¹² i Estôna niteraka ny fokon-dRafah, i Fese sy i Tehinà, rain’ny tanàna Naasa. Ireo no olona ao Rekah.

¹³ Zanaka lahin’i Seneza: i Otoniela, i Saraià. Zanaka lahin’i Otoniela: i Hatata sy i Maonatì.

¹⁴ I Maonatì niteraka an’i Ofrà; i Saraià niteraka an’i Jôaba, rain’ny ao an-dohasan’i Karaskima, fa mpiasa izy ireo.

¹⁵ Zanaka lahin’i Kaleba, zanak’i Jefone: i Hira, i Elà, ary i Nahama. Zanaka lahin’i Elà: i Seneza.

¹⁶ Zanaka lahin’i Jaleleela: i Zifa, i Zifà, i Tirià ary i Asraela.

¹⁷ Zanaka lahin’i Esrà: i Jetera, i Mereda, i Efera, ary i Jalôna. Ilay Ejiptianina novinadin’i Mereda, niteraka an’i Miriama sy i Samaì ary i Jesbà, rain’i Estamao.

¹⁸ Ilay vehivavy Jody vadiny anankiray, niteraka an’i Jareda, rain’i Gedôra, sy i Hebera rain’i Sôkô, ary i Ikotiela rain’i Zanôe. Ireo no zanaka lahin’i Betià zanaka vavin’i Faraôna, nalain’i Mereda ho vady.

¹⁹ Zanaka lahin’ny vadin’i Odaià, anabavin’i Nahama: ny rain’i Keilà, ilay Garmiànina, sy ny rain’i Estamao ilay Makatianina.

²⁰ Zanaka lahin’i Simôna: i Amnôna, i Rinà, i Ben-Hanàna ary i Tilôna. Zanaka lahin’i Jesì: i Zôheta sy i Ben-Zôheta.

I Selà

²¹ Zanaka lahin’i Selà, zanak’i Jodà: I Hera rain’i Lekà; i Laadà rain’i Maresà sy ny fianakaviana amin’ny fokon’ny mpanao biso sy amin’ny fokon’i Askebea,

²² sy i Jôkima ary ny olona ao Kôzebà sy i Jôasa sy i Safara izay samy nanapaka tany Moaba, sy i Jaskôbi-Lemeka. Zavatra efa ela izany.

²³ Ireo no mpanefy vilany sy mponina tany Netaima sy i Gederà, nonina teo anilan’ny mpanjaka izy, dia niasa ho azy.

I Simeôna

²⁴ Zanaka lahin’i Simeôna: i Namoela, i Jamina, i Jariba, i Zarà, i Saola, i Seloma zanany,

²⁵ i Mapsama zanany, i Masmà zanany.

²⁶ Zanaka lahin’i Masmà: i Hamoela zanany, i Zakora zanany, i Semeì zanany.

²⁷ I Semeì nanan-janaka 16 lahy sy enim-bavy, tsy nanan-janaka maro ny rahalahiny, ary tsy nitombo toy ny zanak’i Jodà ny fianakaviany rehetra.

²⁸ Ny nonenan’izy ireo dia tao Bersabea, tao Môladà, tao Hasar-Soala,

²⁹ tao Balà, tao Asoma, tao Tôlada,

³⁰ tao Batoela, tao Hormà, tao Sikelega,

³¹ tao Bety-Markabôta, tao Hasar-Sosima, tao Bety-Beraì ary tao Saarima: ireo no tanànany aman-jana-bohiny, hatramin’ny andro nanjakan’i Davida.

³² Azy ireo koa i Etama, i Aena, i Remôna, i Tôkena sy i Asàna, tanàna dimy,

³³ mbamin’ny zana-bohiny rehetra izay tao amin’ny manodidina an’ireo tanàna ireo, hatrany Baala. Ireo no fonenany, sy ny taratasy tetiaram-pirazanan’izy ireo.

³⁴ I Môsôbaba, i Jemleka, i Jôsà, zanaka lahin’i Amasiasa,

³⁵ i Joela, i Jehò, zanak’i Jôsabiasa, zanak’i Saraiasa, zanak’i Asiela,

³⁶ i Eliôenaì, i Jakôba, i Isôhaià, i Asaià, i Adiela, i Ismiela, i Banaia,

³⁷ i Zizà, zanak’i Sefeì, zanak’i Alôna, zanak’i Idaià, zanak’i Semrì, zanak’i Samaia.

³⁸ Ireo lehilahy voatonona amin’ny anarany ireo, dia samy filohany amin’ny fianakaviany avy; nitombo fatratra ny fokom-pianakaviany,

³⁹ ka nankany amin’ny hadilalan’i Gadôra izy, hatrany amin’ny ilany atsinanana amin’ny lohasaha, mba hitady tany fiandrasam-biby fiompiny.

⁴⁰ Dia nahita tany fiandrasam-biby lonaka sy tsara izy, tany malalaka, mandry feizay sy miadana; taranak’i Khama ny mponina tao fahataloha.

⁴¹ Tamin’ny andron’i Ekeziasa, mpanjakan’i Jodà, no nahatongavan’ireo olona voasoratra anarana ireo. Noravany ny lain’izy ireo mbamin’ny Maônita hitany tao, ka nony efa nataony anatema mandrak’androany, dia izy ireo no nisolo toerana azy, nonina teo, satria nisy ahitra ho an’ny biby fiompiny tao.

⁴² Nisy taranak’i Simeôna koa, dimanjato lahy no isany, nankany amin’ny tendrombohitra Seira. I Faltiasa, i Naariasa, i Rafaiasa, ary i Oziela zanak’i Jesì, no filohan’ireo.

⁴³ Nandresy ny Amalesita sisa afa-nandositra izy ireo dia niorim-ponenana teo mandrak’androany.