Lúcás 23 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL XXIII. Tuairisg na Páise ar leanmhaint.

¹ Agus d’eirigheadar go léir agus do rugadar ag triall ar Phílát é.

² Agus chromadar ar neithe do chur ’n-a leith, agus deiridís: Fuaramair é seo ag cur na ndaoine ar a n-aimhleas, agus ag cosg cíosa do thabhairt do Chaesar, agus ’ghá rádh gur b’é Críost an rí é.

³ Agus do chuir Pílát ceist chuige agus dubhairt sé: An tusa rí na n-Iúdach? Agus dubhairt seisean ’ghá fhreagradh: Deirir é.

⁴ Agus dubhairt Pílát le h-uachtaráin na sagart agus leis an sluagh: Ní bhfaighim aon choir sa duine seo.

⁵ Ach do ghéaruigh ortha-san agus dubhradar: Tá sé ag buaireamh na ndaoine, ag teagasg ar fuid Iúdaéa go léir, ag tusnú ó Ghaililí go dtí an áit seo.

⁶ Nuair a d’airigh Pílát Gaililí d’fhiafraigh sé ar Ghaililíach an duine.

⁷ Agus nuair a thuig sé gur le cómhacht Héróid a bhain sé, chuir sé ag triall ar Héród é, mar bhí Héród i n-Ierúsalem na laethanta san.

⁸ Agus nuair a chonaic Héród Íosa bhí áthas ana-mhór air, óir bhí sé abhfad ag súil le h-é d’fheisgint, mar bhí sé tar éis a lán d’aireachtaint ’n-a thaobh, agus bhí súil aige go bhfeicfeadh sé mírbhúilt mhór éigin aige ’á dhéanamh.

⁹ Agus dhein sé a lán cainte ’ghá cheistiú. Ach níor thug seisean aon fhreagra air.

¹⁰ Agus sheasamh uachtaráin na sagart agus na Sgríbhneóirí agus iad coitchianta ag cur ’n-a leith.

¹¹ Agus thug Héród agus a lucht airm tarcuisne dhó, agus chuir sé éadach bán air, chun magaidh, agus chuir sé thar n-ais ag triall ar Phílát é.

¹² Agus tháinig caradas an lá san idir Phílát agus Héród, mar, namhaid ab eadh iad d’á céile roimis sin.

¹³ Agus do chruinnigh Pílát uachtaráin na sagart agus maithe an phobuil agus na daoine.

¹⁴ Agus dubhairt sé leó: Thugabhair chúgham an duine seo mar go raibh sé ag cur na ndaoine ar aimhleas, agus féach, do cheistigheas os bhúr gcómhair é agus ní bhfuaras ciontach i n-aon nídh é de sna neithibh atá agaibh ’á chur ’n-a leith.

¹⁵ Agus ní lúgha ’ná mar a fuair Héród; mar do chuireas ag triall air sibh, agus féach níor deineadh aon nídh leis ba chómhionan le bás.

¹⁶ Smachtóchad é agus leigfead chun siubhail é.

¹⁷ Ach bhí air aoinne amháin do leigint saor chúcha mar gheall ar lá na féile.

¹⁸ Ach do liúigh an pobul go léir agus dubhradar: Tóg uainn é seo agus sgaoil chúghainn Barabbas,

¹⁹ Fear a bhí istigh le marbhú duine agus mar gheall an cheannairc a deineadh sa chathair.

²⁰ Ach do labhair Pílát leó airís a d’iarraidh Íosa do leigint saor.

²¹ Agus is amhlaidh a liúghadar níos aoirde: Dein é chéasadh; dein é chéasadh.

²² Agus dubhairt seisean leó an trímhadh h-uair: Agus cad é an t-olc atá déanta aige? Ní bhfaighim aon choir bháis ann; smachtóchad é, d’á bhrígh sin, agus leigfead chun siubhail é.

²³ Ach do leanadar-san ag liúirigh do ghuthanaibh árda go ndéanfaí é chéasadh, agus do bhuaidh a nguthana.

²⁴ Agus thug Pílát mar bhreith an nídh a bhí uatha do dhéanamh.

²⁵ Agus do leig sé saor chúcha an fear a dh’iarradar, an fear a bhí istigh le marbhú duine agus le ceannairc; agus thug sé Íosa dhóibh chun a dtoile dh’imirt air.

²⁶ Agus nuair a bhíodar ’ghá bhreith leó do rugadar ar dhuine ó Chíréné dár bh’ainim Símón, agus é ag teacht isteach ó’n dtuaith, agus chuireadar an chros ar a mhuin chun í dh’iompar i ndiaidh Íosa.

²⁷ Agus bhí mórán daoine ’ghá leanmhaint, agus mná, agus iad ag gol agus ag caoi mar gheall air.

²⁸ Agus d’iompuigh Íosa ortha agus dubhairt sé leó: A mhná Ierúsaleim, ná bhídhidh ag gol mar gheall orm-sa, ach bhídhidh ag gol ar bhúr son féin agus as son bhúr gclainne.

²⁹ Óir tiocfaid na laethanta ’n-a ndéarfar, Is aoibhinn do sna h-aimridibh, agus do sna broinníbh nár rug clann, agus do sna cíochaibh nár thál bainne.

³⁰ An uair sin cromfaid daoine ar a rádh leis na sléibhtibh, Tuitidh anuas orainn; agus leis na cnocaibh, Clúdaighidh sinn.

³¹ Óir má dheinid siad na neithe seo sa n-adhmad ghlas, cad a déanfar sa n-adhmad chríon?

³² Agus bhí bheirt eile, beirt mhéirleach, d’á mbreith i n-aonfheacht leis chun iad do chur chun bháis.

³³ Agus nuair a bhíodar tagaithe chun na h-áite ar a dtugtar Áit an chloiginn do chéasadar ansan é, agus an bheirt bhitheamhnach, duine, acu ar a láimh dheis agus an duine eile ar a láimh chlé.

³⁴ Agus dubhairt Íosa: A Athair, maith dhóibh; óir ní fios dóibh cad ’tá acu ’á dhéanamh. Agus do rainneadar a bhaill éadaigh, ’ghá gcur ar chrannaibh.

³⁵ Agus bhí na daoine ’n-a seasamh ag féachaint air, agus bhí na h-uachtaráin ag magadh faoi leó, agus deiridís: D’fhóir sé ar dhaoinibh eile, fóireadh sé air féin, má ’sé an Críost é a toghadh ó Dhia.

³⁶ Agus bhí na saighidiúirí ag déanamh magaidh faoi, ag teacht agus ag tabhairt fínéigre dhó,

³⁷ Agus deiridís: Má’s tú rí na n-Iúdach saor tú féin.

³⁸ Agus bhí sgríbhinn sgríobhtha os a chionn i litreachaibh Gréigise agus Laidne agus Eabhra: RÍ NA N-IÚDACh É SEO.

³⁹ Agus thug duine de’n bheirt bhitheamhnach a bhí ar crochadh masla dó, agus deireadh sé: Má’s tú Críost dein tu féin agus sinne do shaoradh.

⁴⁰ Ach do fhreagair an fear eile é ag milleán air, agus dubhairt sé: An amhlaidh ná fuil eagla Dé ort agus tú fé’n ndaor-bhreith chéadna?

⁴¹ Sinne ámhthach, le ceart, mar do tugadh dúinn an rud a bhi tuillte againn; ach níor dhein an duine seo aon droch-nídh.

⁴² Ansan dubhairt sé le h-Íosa: A Thighearna, nuair a thiocfair ad rígheacht cuimhnigh orm-sa.

⁴³ Agus dubhairt Íosa leis: Deirim, leat go fíos go mbeidh tú i bhflathas Dé indiu am’ fhochair-se.

⁴⁴ Ansan bhí sé tímpal na sémhadh h-uaire, agus tháinig doircheacht ar an ndomhan go léir go dtí an naomhadh h-uair.

⁴⁵ Agus do doirchigheadh an ghrian; agus do stracadh brat an teampail tré n-a lár.

⁴⁶ Agus dubhairt Íosa, do ghuth árd: A Athair, cuirim mo spioraid isteach ad’ lámhaibh. Agus ag rád na bhfocal san dó, d’éag sé.

⁴⁷ Agus nuair a chonaic an taoiseach céad cad a thárla thug sé glóire do Dhia, agus dubhairt sé: Fíoraon ab eadh an duine seo gan amhras.

⁴⁸ Agus an tsluagh go léir daoine a bhí ann ag féachaint ar an radharc san, agus do chonaic na neithe a thuit amach, thánadar thar n-ais agus iad ag bualadh a n-ucht.

⁴⁹ Agus a lucht aithne go léir, agus na mná do lean é ó Ghaililí, do sheasuigheadar abhfad amach, ag féachaint ar na neithe sin.

⁵⁰ Agus féach, fear dár bh’ainim Ióseph, agus de’n chómhairle ab eadh é, fear fóghanta fíoraonta;

⁵¹ Níor thoiligh sé leis an gcómhairle ’ná le n-a ngníomhartha; ó Arimatéa b’eadh é, cathair i n-Iúdaéa; agus bhí sé ag súil le rígheacht Dé:

⁵² Tháinig sé sin ag triall ag Pílát, agus d’iarr sé corp Íosa air.

⁵³ Agus thóg sé anuas é, agus d’fhill sé i línéadach é, Agus chuir sé i dtuama é a bhí gearrtha i gcaraig, agus nár cuireadh aoinne ann go dtí san,

⁵⁴ Agus bhí lá an ollamhuighthe ann, agus bhí an tsabbóid ag teacht.

⁵⁵ Agus tháinig na mná a lean é ó Ghaililí agus chonacadar an tuama agus conus mar a bhí an corp curtha ann.

⁵⁶ Agus d’fhilleadar agus d’ollamhuigheadar spíosra agus oíle, agus ansan do ghlacadar a suaimhneas i gcaitheamh na sabbóide, do réir na h-aithne.