Kasta
100 Biblian jiskʼa tʼaqanakapajja, sapa maynir mayjtʼayañataki
Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.
Jilatanaca, janiw nayajj ucampejj sañ munapcsmati niyas jicjjatquirista uqhama, jan ucasti cunatejj khepancqui ucjja, armanuctwa, nayrancquis uc jicjjatañcamaw ch'amañchasiscta, cawqharutejj puriñasäqui, ucar puriñataqui, alajjpachan chürawi catokañataqui, cunataquitejj Diosajj Cristo Jesús tokejj jawsquistu uc catokañataqui.
janiw cuna asqui luratas laycuti, jan ucasti qhuyapayasiñap laycuwa khespiyistu jarekäwi toke. Kollan Ajayu toke machakat naciyaraquistu machak jacañ churasa.
Chekpachansa Cristompi chicaw bautismo toke jiwasanacajj imantatäjjtanjja, ucatsti jiwatäjjaractanwa, ucat jactasina mä machak jacañan jacañataqui, cunjämtejj Cristojj jactawaycäna Dios Awquin jach'a ch'amap laycu uqhama.
Jumanacarusti mä machak chuyma, mä machak ajayu uscjjapjjaraquïma. Jumanacatsti uca kala chuymjja apakjjapjjaraquïmawa, mä llamp'u chuyma churjjapjjaraquïma.
Jichhasti machakat isthapitäpjjtawa, uca machakar tucuñasti sapürunjamaraquiw juc'amp machakar tucus sarasqui Diosan munañaparjama, uca Diosaraquiw uca machakar tucuñjja luri, jupar sum uñt'añascama.
Nayra jacäwinacamarjam sarnakañjja apanucupjjam, uca sarnakäwisti cunayman jucha lurañanacampi sallkjatänwa. Jumanacajj machakar trocatäjjapjjañamawa ajayunacamansa uqhamarac amuyt'añanacamansa, ucatsti Diosan munañaparjama luratäqui uca machak jacäwimpi isthapisipjjam, suma k'oma cheka cancañan jacapjjaraquim.
Nayajj jiwjjtwa Cristompi chic ch'accatata, ucampis janiw nayajj jacjjtti, jan ucasti Cristow nayan jacjje. Aca janchin jactsa ucajja, Diosan Yokaparu iyawsatajj laycuquiw jacasctjja, nayar munasinwa jacañapa naya laycu apt'asiwayi.
Uqhamasti, qhititï Cristompëjjchi ucajj machak jakëjjewa. Nayra luräwinacasti tucusjjaraquiwa, jichhajj take cunas machakar tucutawa.
Ucampis Diosan munasiñap laycuquiw cunäctejj ucätjja, munasiñapasti nayataquejj janipuniw inamayäquiti. Take apostolonacat sipan jilaracwa irnakawaytjja; ucsti janiw nayat irnakctjja jan ucasti Diosaw qhuyapayasiñapanjja nayamp chicäscaraquïna.
Diosajj Cristomp chicaw jumanacar jacañ churapjjtam, jan wali luräwinacamana uqhamarac juchanacaman jiwatäsipcäyätas ucqha.
Uqhamajj sarnakäwinacamanjja sum amuyasipjjam. Yatiñ cancañampi jacapjjam, janirac jan yatirinacjamajja. Jan tiempjja ina ch'usaru tucuyapjjamti, urunacajj jan walëjjatap laycu.
jan ucasti, jupan cusisiñapajj Tatitun arupawa, uca arupatsti arumay uruw lup'i. Jupajj, jawir thiyan ayruntat kokar uñtatawa: waquisitarjamaw achunac churi, laphinacapajj janiw wañsquiti; ¡take luräwinacapasti walt'ascaquipuniwa!
Qhititejj: “Diosampiw jacascta” sasqui ucajja, cunjämatejj Jesucristojj jaccäna uca quicparaquiw jacañapa.
Ucampis jichhajj juchata khespiyatäjjasinjja Diosan sirvirinacapaw tucuwayjjapjjtajja. Ucasti wali sumawa jumanacataquejja, Dios chuymaracwa tucuyapjjtam, wiñay jacañracwa jicjjatapjjäta.
uqhamat Diosanquirinacajj wali yatiñanïpjjañapataqui, take casta suma luräwinacatac suma waquichatäpjjañapataqui.
Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja. Qhitinacarutejj Diosajj nayratpach uñt'cäna ucanacarojja, kalltatpachwa jupataqui yakhachasiwayjje jupan wawapjamäñapataqui, uqhamat jupan Wawapajj jilïrïñapataqui walja jilatanac taypina.
Jumanacajj nayampi mayaquïpjjam, cunjämatejj nayajj jumanacampi mayaquïtjja uqhama. Mä laymi sapajj janiw achcaspati, janitejj alipampi mayaquïcchi ucajja; uca pachparaquiwa jumanacajj jan achupcasmati janitejj nayampi mayaquïpcasma ucajja.
Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.
Janchi awquinacasajj juc'a tiempotaquiquiw chekachawayistu cunjämtejj amuyupanjj walïquejj uqhamaru, ucampis Diosajj jiwasan asquisataqui, kollan tucuñasataqui, cunjämatejj jupajj kollanäqui uqhamaruw chekachistu. Chekpachansa janipuniraquiw cuna mutuyäwi catokasas —Walic mutuyitojj —sisctanti, jan ucasti usustuwa, qhitinacatejj uca mutuyäwi toke yatekapjje ucanacajj mä suma asquin samarañanracwa jacapjje.
Mayipjjaractwa jumanacajj Tatitunquirjama sarnakapjjañamataqui, uqhamarac cunatejj jupataquejj asquïqui ucanac lurapjjañamataqui, uca suma luräwinacamajj mä suma cosechjama utjañapataqui, Diosarus juc'ampi sumrac uñt'apjjañamataqui.
Ucampis uca leyin munañaparojj jiwatäjjtanwa, jichhasti khespiyatäjjtanwa Ajayun machak jacañan Diosaru sirviñataquejja, janiw uca merk'e leyejj kellkatäcän ucarjamati.
Ucampis khespiyiri Tatit Jesucristosar uñt'apjjam, munasiñapanraqui jiltapjjam. ¡Jupasti jach'achatäpan jichhas, wiñayataqui! Uqhamäpan.
Machak k'ochu lacajjar uchitu, Diosajjar yupaychañ k'ochu. Uc uñjasajj waljaniw chuym ch'alljjtayasipjje, Tatiturusti take chuymampiw iyawsapjje.
Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.
Diosan arupasti jacasquiwa, jach'a ch'amaniraquiwa. Purapar arini espadat sipansa juc'ampi ariraqui, ucasti almampir ajayumpirojj juc'amp mankhacamaw puri, lup'ïwinacsa, chuyman amtäwinacapsa khanstayaraquiwa.
Ucampisa munapjjamaya ch'amacht'asitanacamasti suma asqui tucuñapataqui, uqhamata jumanacajj suma jiltatäpjjañamataqui, janiraqui cunas pist'añapataqui.
Uqhamapï munat jilatanaca, Diosan take aca arsutanacapajj jiwasataquiwa. Ucatpï take cunatejj k'añuchquistaspa ucatjja jithektañasajja, ucatsti k'oma sarnakañasawa janchisansa, uqhamaraqui ajayusansa. Diosar ajjsarasaraquiw juparojj take catuyasjjañasajja.
Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja.
Juparu iyawsapcatayna uca judionacarojj Jesusajj sänwa: —Jumanacatejj chekpach sayt'apjjäta cuntejj sapjjsma uqhamarjama ucqhajja, nayan chekpacha discipulonacajjaw tucupjjäta. Uñt'apjjaraquïtawa cunatejj chekäqui ucjja, uca cheka cancañasti khespiyat sarnakasiñ churapjjaraquïtam.
Jumanacpacharac yant'asipjjam, iyawsañanacamanjja suma ch'amanïpjjtati janicha uc yatiñataqui. ¿Janit jumanacasti amuyasipcta Jesucristojj jumanacampïtapsti? K'ari jilatanacäpcasmas ucqhaquiw Cristojj jan jumanacampïcaspatejja.
Jiwasatejj khanan jacstan, cunjämatejj Diosajj khanancqui uqhamjja, mayaquïtanwa maynimpi maynimpisa, Jesucristo Yokapan wilapaw take juchanacasat k'omacharaquistu.
Ucampis cuntejj Diosan arunacapajj yatichquistu uc lurapjjaraquim, janiraqui alek isch'uquirinacaquïpjjamti, uqham alek isch'uquisajja jumanacpachaquiw sallkjasisipcasma.
Diosajj jumanacatjja jupar catuyat jacapjjañamwa muni; jan qhitis wachoka jucha lurañan sarnakpanti,
Sumancapjjam, maynit maynicama qhuyapt'ayasirïpjjam, perdonasirïpjjaraquim maynit maynicama, cunjämtejj Diosajj jumanacaru perdonapjjtam Cristo toke uqhama.
Ucampis jumanacajj janiw janchin munañanacapar sirviñataqui jacapctati, jan ucasti Ajayun sirviñataquiw jacapjjta, Diosan Ajayupatejj jumanacjjan jacchi ucqhajja. Qhitinacatejj jan Criston Ajayupanïqui ucanacajj janiw Cristoncquiti.
Sinti arumäjjewa, urusti niyaw jac'achasisinqui, ucatpï apanucuñasajja cunatejj ch'amacan lurasquis ucjja, ucatsti cunjämtejj mä soldadojj armantasqui uqhamaraquiw armantasiñasa khanan sarnakañataqui.
Jumanacajj machakar trocatäjjapjjañamawa ajayunacamansa uqhamarac amuyt'añanacamansa, ucatsti Diosan munañaparjama luratäqui uca machak jacäwimpi isthapisipjjam, suma k'oma cheka cancañan jacapjjaraquim.
Cuntejj lurapjjäta, uqhamarac arsupjjäta ucanacjja Tatitun sutiparu lurapjjam, Dios Awquir yuspagarasa Jesucristo toke.
ucampisa take qhitinacatejj Tatitur iyawsapqui ucanacasti machak ch'amanacanïpjjaniwa; pacalinacar uñtataraquiw thoktapjjani, jalanakasinsti janiw karipcaniti, sarnakasas janiraquiw ch'amtayapcaniti.
Cunjämtejj Ajayu tok jactanjja, uca pachparaquiw Ajayumpi cuna luräwinacasansa irpayasiñasajja.
Jesusasti juparojj saraquïnwa: —Diosan arupanjja kellkatawa: ‘Janiw jakejj t'ant'a sapampiquiti jaccani, jan ucasti take cuntejj Diosajj sisqui uca arunacampiw jacaraquini’ —sasa.
“Tatitur take chuymamampi catuyasim; juman ch'iqhi cancañamaruquejj jan alcatasimti. Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.
“Nayätwa uva alejja, jumanacasti layminacäpjjtawa. Qhititejj nayampi mayaquïchi, nayasti jupampi mayaquiraquïta, uquïrejj walwa achuraqui, uqhamasti jumanacajj jan nayampejj janiw cuns lurapcasmati.
Awquirojj maytwa jupan jach'a muspharcañ kamir cancañapat ch'am jumanacar churañapataqui, Diosan Ajayup toke,
Qhitinacatejj Cristoncjjapjje ucanacajja, janchin munañanacapjja ch'accatjjapjjewa ñankha amtañanacampi, uqhamarac munañanacapamp chica.
Uqhamasti jilatanaca, Diosan qhuyapayasiñap laycuw achict'apjjsma, jumanacajj Diosarojj jacquir ofrendjamay loktasipjjam, Diosar cusisiyquiri loktata. Ucawa Diosataquejj ajayu token chekpach Diosar sirviñajja.
Ucatsti asu wawanacjama suma k'oma ajayun leche munapjjaraquim, uqhaman jumanacajj suma jiltapjjañamataqui khespiyatäpjjañamataquiraqui,
Nayrajj jumanacajj ch'amacanwa jacapjjäyäta, ucampis jichhajja Tatitumpi mayachasipjjatamatjja, khananwa jacjjapjjta. Uqhamajj khananquirinacjama jacapjjam.
Wawanacajja, wasitampiw jumanac laycojj t'akhesiñan jicjjatasta, cunjämatejj mä taycajj wawachasiñataquejj t'akhesi uqhama, t'akhesiscaquipunïwa Cristojj jumanac taypin sayt'añapcama.
Pachpa sumancañ Diosajj jumanacarojj phokhat k'omachäwimp k'omachpan, uqhamarac imaracpan ajaysa, almsa, janchissa, jan acch'a juchani Tatit Jesucristosan jutañapcama.
Uqhamaraquiy jumanacajj amuyasipjjam juchataquejj jiwatäjjapjjatama, ucampis Diosataquejj jacasipctawa, Cristo Tatitun mayaquëjjapjjatamata.
Ucatwa janipuni nanacajj mayjt'asipcti: Janchinacajjajj sapürusa aynacharus sarjjchi ucasa, ajayunacajjajj sapürutjamaraquiw machakar tucusqui.
Diosaw suma amtäwinac churapjjtam, jupa pachparaquiw yanapasipctamjja uca lurañanac phokhañanjja jupan munañaparjama.
Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.
Circuncidatäñasa, jan circuncidatäñasa, janiw cunataquis asquïquiti, ucampis machak jakenac tucuñasaw waquisejja.
Diosaw jiwasanacar luristu, Cristo Jesusampi asqui luräwinac lurañasataqui, jupan nayratpach waquicht'ataparjama.
Diosaw jiwasarojj ch'amacanacan munañapat khespiyanistu, Jesucristo Yokapan apnakatäñataquiw uchasiraquistu. Uca Yokapasti jiwäwipampiw khespiyaraquistu, juchanacasat pampachasa.
Ucjjarusti Jesusajj juparojj sänwa: —Khanacwa sisma, qhititejj jan wasitat nascani ucajja, janiw Diosan reinopjja uñjcaspati —sasa.
Jumanacasti machakatwa nasjjapjjtajja, janiw jiwir jakenacatti, jan ucasti Diosan arunacapatwa. Uca arunacasti jan jiwiriwa, wiñayataquiraquiwa.
Qhitinacarutejj Diosajj nayratpach uñt'cäna ucanacarojja, kalltatpachwa jupataqui yakhachasiwayjje jupan wawapjamäñapataqui, uqhamat jupan Wawapajj jilïrïñapataqui walja jilatanac taypina.
Ucatpï jiwasanacajja, ajanunacasajj jan uca velompi imantatäjjatap laycojj mä espejor uñtatjamaw Tatitun jach'a cancañapatjja c'ajtanjja. Uqhamaraquiw jiwasajj juc'ampi juc'ampi Cristjama tucusctan juc'ampi khanapajj jiwasancatap laycu. Ucwa Ajayüquis uca Tatitojj jiwasanacataquejj luri.
Juc'ampis cheka parlasina, munasiñ ajayunwa, cunayman toket jiltañasajja, Cristompejj mayar tucusina, cawquïritejj cuerpon p'ekepäqui ucampi.
Jumanacatjja yakhepanacajj uqhamäpjjaraquïyätawa, ucampis jichhajj k'omachatäjjapjjtawa, Diosarus catuyatäjjapjjaractawa, Tatit Jesucriston sutiparu, uqhamarac Diosan Kollan Ajayup tokeraqui.
Cawquïri layminacajjatejj jan achqui ucanacarojj jupajj qhuchhuraraquiwa, ucampis cawquïri layminacatejj achqui ucanacarojj k'omacharaquiwa juc'ampi achuñapataqui.
Jichhasti Tatitojj marcaparojj siwa: “Cunatejj wasüru pascän ucjja jan amtcjjamti, janirac juc'ampi cunanacatejj pascän ucanacs amtcjjamti. Nayaw jichhajj take cunsa machak lurä, ucsti jichpacharaquiw uñjäta. Wasaran thaquinacwa jist'arä, jan achuri orakensti jawiranacwa jist'araraquï.
Diosay, uñaquipitaya, chuymajjar uñantam, nayarojj yant'itaya, lup'itanacajj uñt'araquim, nayatejj ñankha thaquin sarnakerïstjja, cheka thaquinjamay irpasita.
Jumanacatejj janchin munañanacaparjamaqui sarnakasipcät ucajja jiwapjjätawa, ucampis Ajayun toke jiwayapjjäta uca janchin munañanacapa ucajja, chekpachansa jacapjjätawa.
Criston munasiñaparaquiw jariyapjjetu, maynin takenitaqui jiwatap yatjjasina, ucataracwa takenisa jiwapjjaraqui. Cristojj takenitaquiw jiwi, qhitinacatejj jacasipqui ucanacajj jan jupanacpachataqui jacjjapjjañapataqui, jan ucasti Cristotaqui jacjjapjjañapataqui, jupanac laycu jiwasina jactqui ucataqui.
Ucjjarojj, jilatanaca, lup'ipjjam cunatejj chekäqui, cunatejj maynïr asqui uñjañäqui, cunatejj wali sumäqui, cunatejj k'omäqui, cunatejj muncañäqui, cunatejj aytat luräwinacäqui. Lup'ipjjam, take cunatejj sumäqui yupaychañataquïqui ucanacata.
Jiwasatejj juchanacas arsusiñänejja, jupajj chekawa, asquiraquiwa juchanacas perdonañataqui, uqhamarac take jan walinacata k'omachañataquisa.
Yattanwa, nayra jacañasajj jupampi chica ch'accatatäjjewa uqhamat jiwasan cuna jan walitejj utjqui ucajj t'unjatäñapataqui, uqhamat jan juc'ampi juchar sirvjjañasataqui.
Diosajj janiw ajjsarañ ajayu churquistuti, jan ucasti ch'amani, munasiñani, chekapar amuyt'aña ajaywa churistu.
Qhitinacatejj janchin munañaparjam jacasipqui ucanacajja acapachan jacañatacwa llaquisipjje, ucampis qhitinacatejj Ajayump jacapqui ucanacajj Ajayu token jacañatwa llaquisipjjaraqui.
Ucatwa nayajj Tatit laycu presötjja, achict'apjjsmawa jumanacajj Diosan jawsatanacjama sarnakapjjam.
Jesusasti discipulonacaparojj saraquiwa: —Maynitejj nayar arcañ munchitu ucajja, jupa quipcat armt'aspan, ucatsti arquitpan jacañap apt'asirjamäcchi ucasa.
Ucampis Kollan Ajayun luräwipajja acanacawa: munasiña, cusisiña, samaraña, llamp'u chuymanïña, takempis sumancaña, qhuyapayasirïña, take cunansa phokherïña, llamp'u chuymanïña, janchin munañapar atipjaña. Acanac contrasti janiw cuna leyis utjquiti.
Tatay, arsutajjajj jumar cusisiyquirïpan, chuymajjan lup'itapajj nayrakatamcam purinpan, jumaw imantasiñ karkajjätajja, khespiyirejjätasa.
Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa. Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu.
Acwa sapjjsma, Ajayun munañaparjam sarnakapjjam, uqhamatjja janiw janchin munañaparjam sarnakcjjapjjätati.
Ucampis jichhajj k'oma jacañanpun jacjjapjjam, jumanacar jawsir Diosasti kollanätap laycu. Diosan arunacapan kellkatasti saraquiwa: “Jumanacajj kollanäpjjam, nayasti kollanätwa uca laycu” sasa.
Take qhititejj acanac Jesucristotjja suyt'qui ucajja, jupa pachpawa k'omachasi cunjämatejj Tatit Jesucristojj k'omäqui uqhama.
Diosajj jumanacarojj munapjjtamwa, jupancapjjañamataquiw ajllisipjjtam. Uqhamajj qhuyapayasiñampi, suma jakëñampi, jisc'ar tucuñampi, llamp'u chuymanïñampi isthapitay sarnakapjjam.
Jan ucasti Jesucristomp isthapt'asipjjam, janiraqui lup'ipjjamti janchin munañapa lurañjja.
Ucatpï ch'amacht'asipjjañamajja iyawsatanacamarojja suma luräwinacampi yapjjatapjjañamataqui; suma luräwinacarusti amuyt'asiñampi; amuyt'asiñarusti, jumanacpach suma sarnakañampi; jumanacpach suma sarnakañarusti, llamp'u chuymampi; llamp'u chuymanïñjjarusti, Diosar munañampi; Diosar munañarusti, jilapurjam sarnakañampi; jilapurjam sarnakañarusti, munasiñampi. Jumanacantejj take acanacajj utjanejja, ucatsti ucjja sum jilayapjjaraquïta ucqhajja, jumanacan jacañamajj janiw inamayataquïcaniti, janiraquiw inamayataqui Tatiturus uñt'apcaraquïtati.
Uqhamaraqui jumanacan khanamajj jakenacataquejj khant'aracpan. Uqham suma wali luräwinacam uñjasa jumanacan Dios Awquimaru yupaychapjjañapataqui.
Jumanacajj Diosan munat wawanacapäpjjtawa, jupajj cunjämäquitejj uqhamäpjjaraquimaya. Cuntejj Diosataquejj asquïqui uc yatekañ munapjjapunim. Ch'amacanquirinacan jan cunatac sirviri luräwinacapanjja jan sarnakapjjamti, jan ucasti, uca jan wali luräwinacjja khanaru apsupjjam. Jupanacan jamasan luräwinacapat arsuñas p'enkasiñjamawa; ucampis cunapachatejj take uca jan walinacajja khanaru uñstayatächejja, take cunas khanaw yatisi, khanampisti take cunwa uñjasi. Ucatpï aqham sejja: “P'arjjtasim, juma iquirejja; jiwatanac taypit sarthapim, Cristow khant'ätam” sasa. Uqhamajj sarnakäwinacamanjja sum amuyasipjjam. Yatiñ cancañampi jacapjjam, janirac jan yatirinacjamajja. Jan tiempjja ina ch'usaru tucuyapjjamti, urunacajj jan walëjjatap laycu. Jan lokhëpjjamti, jan ucasti cunäquitejj Tatitun munañapajja uc amuyañaru uscusipjjam. Jan machjasipjjamti, machjasiñasti jiwañaruw api; antisas Kollan Ajayumpi phokt'atäpjjam. Salmonacampi maynit maynicama chuymachasipjjam, yupaychañ k'ochunacampi, ajayun k'ochunacamp k'ochusina, uqhamarac Tatituru take chuymamp yupaychasina. Munasiñan jacapjjam, cunjämtejj Cristo Tatitojj munasquistu uqhama. Jupajj jiwasanac laycuw jacañap apt'asi, mä wilañchat ovejar uñtata, Diosatac suma k'apquir ofrenda loktasa.
Ucatpï jilatanaca, cunjämtejj Tatitojj janchipan t'akhesiwayejja, jumanacajj janc'aquïpjjañamaraquiwa t'akhesiñataquejja. Ucatwa uca janchin t'akhesirejja, juchjja apanucuwayjje, Sapa maynis cunjämtejj Diosat ch'am catokquejj uqhama maynirojj sirvpan, uqhamata take bendiciontï Diosajj churquistu ucajja sum apnakañasataqui. Maynitejj parlchejja, Diosan arunacaparjam parlpan. Maynitejj qhitirus mä asqui lurchejja, Diosan ch'amapampi ucjja lurpan. Take cuntejj lurapjjta ucajja Diosar yupaychañataquïpan Jesucristo toke, juparuraqui munañanïñasa, jach'a cancañasa churatäpan wiñayan wiñayapataqui. Uqhamäpan. Munat jilatanaca, jan mayjt'asipjjamti uca jach'a yant'anaca jumanacjjaru jutatapatjja, mä cuna jan walis jutcaspa uqhama. Jan ucasti cusisipjjam Tatitjama t'akhesipjjatanacamatjja, uqhamata cusisiñan phokt'atäpjjañacamataqui cunapachatejj jupajj jach'a cancañapampi uñstancan uc uñjapcäta ucqhajja. Tatit laycutejj jumanacar jan wali arunacampi tokepjjätam ucajja, cusisiñanïpjjtawa, Diosan Ajayupasti jumanacjjaruw utt'asi. [Jupanacasti uca Ajayu contraw jan wali parlapjje, ucampis jumanacajj uca Ajayurojj jach'añchapjjaractawa.] Maynitejj jumanacat t'akheschi ucajja, jan jake jiwayatap laycu t'akhespati, lunthatasitap laycus, cuna jan wali luratap laycusa, jaken chh'ajjwañanacapar mantatap laycusa. Ucampis maynitejj Cristor arquirïtap laycu t'akheschejja, janiw p'enkasiñapäquiti t'akhesitapatjja, jan ucasti Diosar yupaychañapawa sutip apatap laycu. Horasajj purinjjewa, Diosan taripäwipajj wawanacapata kalltañapataqui. Taripäwitejj jiwasampi uqham kalltchi ucajja, ¿cunjämaraquïni qhitinacatejj Diosar jan iyawsapqui ucanacan tucuyapasti? “Asqui jakenacatejj ch'ama tucuñampi khespiyaschi ucajja, ¿cunjämaraquïni jucharar jaketaquisti?” Uqhamajja, Diosan munañaparjam t'akhesirinacajja, asquinac lurasipcañapaquiwa, Diosaruraquiw almanacapsa catuyasipjjañapa, qhititejj jiwasar lurirïqui ucaru, jupasti chekaparaquiwa. Diosan munañaparjam take jacäwipana jacjjañapataqui, jan janchin munañaparjam jaysañataquejja.