142 Qullqi tuqit jan waltʼäwinak utjki uka tiempotaki Biblian jiskʼa tʼaqanakapa

Nayan Diosajjawa take cunatejj jumanacan jan utjquisa ucjja churapjjätam Cristo Jesusan walja c'ajquiri kamir cancañaparjama.

Ucatsti jumanacajj jan llaquisipjjamti aqham sasa: ‘¿Cunsa mank'añäni? ¿Cunsa umañäni, cunampiraquis isisiñäni?’ sasa.

Diosat jayancquis uca jakenacaquiw take aca yänacatjja llaquisisipqui, ucampis jumanacan alajjpachanquir Awquimajj yatiwa cuntejj jumanacaru waquisipctam ucjja.

Uqhamasti, nayrakatajj Diosan reinopa munapjjam, uqhamarac cunatejj chekäqui jupan nayrakatapanjja ucanaca, ucatsti take aca yänacajja jumanacarojj churataquïpjjätawa.

Nayajj waynäyätwa, jichhasti niyaw ch'ama karitäjjta: janipuniw asqui jaker apanucut uñjcti, janiraquiw wawanacapar mayjasirs uñjcti.

Asqui jakejj sapüruw qhuyapayasi, mayt'araqui, allchhinacapasti asqui catokäwïcaspas uqhamawa.

“Tatitur take chuymamampi catuyasim; juman ch'iqhi cancañamaruquejj jan alcatasimti.

Take luräwinacamanjja Tatitutjja amtasipunim, ucatsti jupajj cheka thaquinjamwa irpascätam.

Tatituw awatirejjajja, janiw cunats t'akhescäti:

Diosajj jumanacarojj take casta bendicionanacwa jilarquir churapjjeristamjja, uqhamat jumanacajj take cunampis phokt'atäpjjañamataqui, ucat take asqui luräwinacan yanapt'asipjjañamataqui.

Kamirinacajj jan cunaniruw tucupjje, mank'at t'akhesipjjaraqui, Tatitur thakerinacasti janiw cunats t'akhesipcaniti.

Diosajj janiw Wawaparus perdonquiti, ucatpï Wawaparojj jiwañaru catuyejja jiwasanacan juchanacas laycu. Uqhamasti ¿janiquit take cuns churquistani Wawapamp chicjja?

“Mayipjjam, Diosajj churapjjätamwa; thakapjjam, jicjjatapjjaraquïtawa; puncsa lekt'apjjam, jist'aratäpjjaraquïtawa.

Mayirejja catokewa, thakheristi jicjjataraquiwa, puncu lekt'irirusti jist'arataraquiwa.

Jacobon Diosapan yanapat jakejj cusisiñaniwa, Tatitu Diosapar suyt'irejj cusisiñaniwa.

Tatitun bendicionapawa kamiriptayi; janiw cuna llaquisiñsa ucampi chicajj apayanquiti.

Tatiturojj take chuymamp alcatam, asc luraraquim, oraken jacasim, chekaparac jacam;

Asqui jakejj yatiñ cancañampiw parli, lajjrapajj chekap sarnakañ khanañchi.

Diosapan leyinacap chuymapar catjjäsi, cayunacapasti janipuniw llust'caniti.

Ñankha lurir jakejj asqui jakeruw uñch'uqui, jupar jiwayañ amtaraqui;

Tatitusti janiw amparapar jalt'ayquiti, janiraquiw taripäwin juchañchat uñjasiñap munquiti.

Tatitur takpach chuymamp suyt'am, jupar jaysaraquim, jupaw orak catokañamataquejj ch'amañchätam, ñankha luririnacan t'unjasïwip uñjaraquïta.

Ñankha lurir jakeruw jach'achasir uñjta, ch'ojjña kokjam jilantasquir uñjaracta;

uca khepat wasitat uñjir sarta, jupasti tucusjjataynawa, jupar thakasasti janiw jicjjatcti.

Asqui jaker uñtam, suma jaker uñjam: jutir jacañapajj sumancañ jacañäniwa;

ñankha luririnacasti tucjatäpjjaniwa, jutir pachpa jacañapaw t'unjascani.

Asqui jakenacajj Tatitut yanap catokapjje, juparaquiw jan walt'añ urunacan arjjatiripajja.

Tatiturojj suma chuymamp munasim, jupasti chuyma mankheman mayisitamarjamaw churätam.

Jan ajjsaramti, nayaw jumampïscta, jan ajjsaramti, nayäsctwa juman Diosamajja. Nayaw ch'amañchascäma, nayaraquiw yanapascäma, atipjiri amparajjampiraquiw uywascäma.

Take llaquisiñanacamsti Diosar jaytapjjaraquim, jupasti jumanacatjja llaquisiraquiwa.

¡Tatitojj jach'añchatäpan! Tatitur ajjsartir jakejj cusisiñaniwa, arsutanacapar munasir jakejj cusisiñaniwa.

Ñankha lurir jakesti jupar uñjasajj k'apisiwa, jan camächirjamäjjasajj laca ch'aqhanacap t'urusi. Ñankha jakenacan inampst'añ chuymapajj aynacht'aniwa.

Asqui jaken allchhinacapajj acapachan kollanäpjjaniwa, sarakerinacapasti oraken munañanïpjjaniwa.

Walja yänacaw utapan utjani, jaker qhuyapt'ayañapasti jan tucusquirïniwa.

Yatiñan jaken utapanjja kamir cancañanaca, suma k'aphinacawa utji, ucampis jan amuyt'an jakesti take cunanacapwa tucji.

Ucjjarusti Jesusajj discipulonacaparojj siwa: “Sapjjsmawa, jan llaquisipjjamti cuna mank'añatsa ni cunamp isisiñatsa.

Jacañajj mank'at sipans juc'amp munatawa, uqhamaraqui janchisti isit sipansa.

Uñtapjjam jamach'inacaru, ucanacajj janiw phawapquisa, ni apthapipquisa, ni juyra imasiñanacapas utjquiti, ucampis Diosaw ucanacarojj mank'ayi. ¡Jumanacajj uca jamach'inacat sipans juc'ampi munatäpjjtawa!

¿Jumanacat cawquïris wal llaquisisinjja mä jisc'ampi jiljjataspajja?

Ucampis jumanacajj jani mä jisc'sa lurcasasti, ¿cunatarac mayanacat llaquisipjjtasti?

Diosar llaquinacam catuyam, jupasti ch'aman tucuyätam, Diosar jaysirin aynacht'añapjja, janipuniw jupajj muncaniti.

Nayar art'asitan ucapachajja, mayisitaparojj jaysäwa. Jupamp chicaw t'akhesiñancä, llaquisiñat irpsü, jach'aruw aptä;

“Sapjjaracsmawa, jan llaquisipjjamti, cuntejj mank'apcäta, umapcaraquïta, isisipcäta ucanacatjja. ¿Janiti jacañajj mank'at sipansa juc'ampi sumäqui, janchisti isitsa juc'ampïcaraquejja?

Uñtapjjam jamach'inacajj jalasqui uca, janiw jupanacajj satapquis ni apthapipcaraquisa, janiraquiw juyranacsa pirwanacarus imapquiti, ucampis alajjpachanquir Awquimaw ucanacarojj mank'ayi. Uca jamach'inacat sipansa jumanacajj juc'amp munatäpjjtawa.

Ucampisa wali llaquisitapatsti, ¿qhitis jumanacatjja jacañapjja mä horampisa yapt'asispa?

Jan ucasti Tatitu Diosamat amtasipjjam, juparaquiw uca yänac jicjjatañataquejj ch'am churapjjtam, uqhamatwa jumanacampi phokhasi cawquïri arust'äwirutï awquinacamampi mantawaycäna ucanacajja.

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.

Uqhamajja asqui lurañanjja janiw karjasiñasäquiti, janitejj karjtcañäni ucajja, horasaparuw cosechjja apthapiñäni.

Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim.

Diosajj jumanacarojj churapjjaraquïtamwa samarañapa, ucasti take cuntejj jakejj amuyt'caspas ucat juc'amp jach'awa. Uca samarañasti jumanacan chuymanacamsa, amuyunacamsa imaniwa Cristomp mayaquïpjjatam laycu.

Juc'a yänacan asqui jakejj juc'amp asquiwa, kamirïsin ñankha lurir jakenacat sipansa;

ñankha lurir jakenacarojj Tatituw tucusiyani, asqui jakenacarusti Tatituw uywasiraquini.

Nayatjja jithektayita ch'ojjña lurañampita, c'arisiñampita, janiraqui uywistati kamirsa, jan cunansa, jan ucasti cunatejj jacañajjataqui mank'añajj waquisqui ucac churita.

Nayajj kamirëjjerista ucajja inas jumatjja armasjjerista: “¿Qhitirac Diosasti?” sasa; pobrërista ucasti inas lunthatasjjerista, uqhamat kollan sutimwa nayajj p'enkachayirista.

Umanjam maqhatañamächejja, nayaw jumampïscäjja, jawiranac maqhatañamächejja, janiw jalantasin jiwcätati; ninanjam pasañamächejja, janiw naqhantcätati, ninas janiw jumanjja naccaniti.

Aca orakenquir kamirinacarojj sañamawa: “Jan jach'a jach'a tucupjjamti” sasa, janiraqui kamir cancañaparus alcatasipjjpati, ucanacasti tucusiriquiwa. Ucat sipanjja jacquiri Diosaru catuyasipjjpan, qhititejj take cunsa jilarquir churquistu cusisit jacañasataqui ucaru.

¡Tatitur ajjsart'ir jake, cusisiñanïtawa, Tatitur jaysir jake, cusisiñanïtawa.

Ch'ama tucutamatjam mank'asïta, cusisitaw utjasïta, take cunas waliquiw sararapïtam.

Arunacamajj sarnakäwejjatac khanawa, thaquejjan khantiriraquiwa.

Suyt'añanjja cusisitaquïpjjam; t'akhesiñanaca utjipanjja llamp'u chuymanïpjjaraquim. Janirac Diosat oracionan mayisiñjja armasipjjamti.

Tatay, jumaw sum uñjtajja qhititejj mä sapa amtañaniquïqui ucarojja, jupan jumaru iyawsatap laycu,

ch'eka amparamajj ucan jicjjatitaspa, cupi amparamasti janiw antutquitaspati.

Jesusasti jupanacar uñtasinjja sänwa: —Jakenacataquejj take acanac lurañajj wali ch'amawa, ucampis Diosataquejj janiw ch'amäquiti —sasa.

Nayranacajjampiw kollunac uñatatta: “¿cawquitarac yanapast nayatac jutani?” sasa.

Yanapajj Tatitut nayatac jutani, alajjpach acapach lurir Tatituta.

Kamir jakejj pobrenac taypinjja mä reyjamawa; manuninaca taypinjja, kollke mayt'irejj reyjamaraquiwa.

Tatituw asqui jaken jacañ urunacap imasqui, catokäwipasti wiñayataquïniwa;

pisi maranacan janiw pist'ayasipcaniti, mach'a pachansti jilarquir mank'añanïpjjaniwa.

Tatay, jumar wakaychirinacataquejj jach'a munasiñ imaraptajja, jumar maqhatirinacarusti taken uñjcañaw qhuyapayasiñam uñachaytajja;

Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.

Diosaw imantasiñasajja, ch'amañchirisasa, jupaw chijinacan arjjatirisajja.

ucampis Tatitojj situwa: “Munasiñajjaquiw jumataquejj waquichatajja, nayan ch'amajjasti juc'ampi sumaw uñsti cunapachatï jakejj t'uqha jicjjatasqui ucqha” sasa. Uqhamajj nayajj cusistwa, Criston ch'amapajj nayan t'uqhasiñajjan uñstañapataqui.

Khepa urunacanjja acanacajj tucjatäniwa, ucanacan diosapasti jupanacan quipca munañanacapaquiwa. Jupanacasti p'enkasiñäqui ucatsti wali jach'a jach'araquiw tucupjje. Acapach yänacatacwa wal lup'isipcaraqui.

Ñankha lurañat jithektasim, asc luraraquim, jacañamataquisti utajj utjapunïtamwa.

Take luräwinacamjja Tatitun amparapar jaytam, ucatsti amtäwinacamajj phokhasiniwa.

Ch'aman sayt'asipjjañäni, jan pächasisa, iyawsäwisanjja cuntejj suyt'ctan ucanjja, Diosasasti phokhaniwa cuntejj arsuwayquistu ucjja.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Tatay, nayajj jan cunanïtwa, llaquitaraquïtwa, janiquiy nayat armasistati; jumaw nayan arjjatirejjätajja, khespiyasiñajjätasa: ¡Diosajjay, janc'aquiy jutam!

Ucampis Kollan Ajayun luräwipajja acanacawa: munasiña, cusisiña, samaraña, llamp'u chuymanïña, takempis sumancaña, qhuyapayasirïña, take cunansa phokherïña,

llamp'u chuymanïña, janchin munañapar atipjaña. Acanac contrasti janiw cuna leyis utjquiti.

Diosajj arsutanacaparojj phokhapuniwa. Juparaquiw Jesucristo Tatitusampi chekäpjjañamataqui jawsapjjtamjja.

Dios sapanac ajayojjajj samarañ jicjjati, khespiyasiñajjajj jupat juti.

Ch'ajjwañanacarojj jan wayusipjjamti; janirac lunthatasiñar chuym catuyasipjjamti; kamiris tucusipcätajja, kollker jan alcatapjjamti.

Diosan arsutap ist'ta, jupan arsut arup yatta: “Diosajj ch'amaniwa, ch'amasa, munasiñas jupanquiwa, jupaw sapa maynirojj lurataparjam wajjt'i” sasa.

Jupaquiw khespiyitu, arjjataraquitu. Janiw pächascäti, jupaw imantasiñajjajja.

Jupanaracwa take Diosan arsutanacapajj phokhasejja. Ucatpï cunapachatejj Diosar yupaychctan ucqhajj “Uqhamäpan” sistanjja, Cristo Jesús toke.

Takenin nayranacapaw jumarojj uñch'uquisipctam, jumaw waquisitarjam mank'añ jupanacar churtajja.

Jumaw amparam lokatattajja, take jaquirinacarusti asquinac jilarquir churtajja.

“Acapachanjja jan imapjjamti walja yänacjja, aca orakenjja thuthaw thuthantasqui, ucatsti inamaya imataquiwa. Uqhamaraquiw acapachan imat yänacjjarojj lunthatanacajj mantasin lunthatsupjjaraqui.

“Cunapachatejj pist'ayasitanacaru yanapt'cäta ucqhajja, jan jakenacarojj yatiyamti, cunjämtejj c'ari parlirinacajj sinagoganacana, callenacana lurapqui uqhamjja. Jupanacasti jakenac nayrakatanjja wali sumat uñt'atäñwa munapjje. Nayasti khanacwa sapjjsma, uca luräwipatjja catokjjapjjewa.

Jan ucasti jumanacajj alajjpacharu suma yänaca imasipjjam, ucansti janiw qharus thuthantquiti ni ina ch'usarus tucuscaraquiti, janiraquiw lunthatanacas lunthatcaraquispati.

Jumanacan chuymanacamasti cawquincquitejj uca suma imasitanacamajj ucancaraquiniwa.

Janïraw jupanacajj jawsapquitaniti, ucapachaw nayajj jupanacar jaysä; janïraw parlañsa tucuyapcaniti ucapachaw nayajj jupanacar ist'ä.

Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.

Jumaw nayarojj irnokesta, sayt'ayaraquista: arsutanacam yatekañajjataquejj ch'iqhi chuymay churita.

Uca laycuw iyawsañasampi jac'achasiñasa munasir Dios Awquisan tronoparojja, jiwasat qhuyapt'ayasiñapataqui, uqhamarac munasiñapata jiwasar yanapt'añapataqui, p'ist'ayasctan uca horasanacana.

Ucampis isisatejj utjascchejja, uqhamarac mank'añasatejj utjascchejja, ucampejj cusisitaquïscañasawa.

Nayajj Tatituruw takpach chuymajjamp suyt'äyäta: jupasti naya toker alt'anisin arnakasitajjar ist'i;

Asqui cancañamat arsuñjja, janiw chuymajjar imantcti, arsutam phokherïtamampita, khespiyäwimampit yatiyta, jach'a tantachasïw taypinsti, janipuniw qhuyapayasiñamampita, asqui cancañamampit amuct'cti.

Tatay, janiquiy chuymam nayatac jist'antasimti, qhuyapayasiñamamp asqui cancañamampejj imapunitpan,

jan jact'cay llaquinacaw muyuntitu, juchanacajjaw jatjjattitu, janiw ucanac jact'irjamäcti; pachpa juchanacajjaw catuntitu, juyqhur uñtataw jicjjatasta. P'eke ñic'utajjat sipan juc'amp jilawa, ch'amasti pist'araquituwa.

Tatay, nayar waytir jutaquimaya, Tatay, janc'aquiy nayar yanapt'irejj jutam;

nayar jiwayañatac thakerinacajj, p'enkpun atipjayasipjjpan; nayar ñankha lurañ amtirinacajj, mä p'enk jaltapjjpan;

nayat larusir jakenacajj, p'enkapat jaltjjapjjpan.

Jumar thakerinacasti cusisipjjpan, jumamp chic larusipjjpan; khespiyäwimar munirinacajj arsupjjapunpan: “Tatitojj jach'a ch'amanipuniwa” sasa.

Tatay, nayajj jan cunanïtwa, llaquitaraquïtwa, janiquiy nayat armasistati; jumaw nayan arjjatirejjätajja, khespiyasiñajjätasa: ¡Diosajjay, janc'aquiy jutam!

jiwañ p'iyat waysusitu, mic'ayar jalantquiriruw khespiyitu; karka patjjaruw cayunac tact'ayitu, tact'añajjaruw ch'amañchi.

Khepärmanthisti wali alwatwa sartasipjjäna Tecoa wasara tokeru sarañataqui. Mistuña horasansti Josafat reyejj sayt'asisinwa säna: “Ist'apjjeta Jerusalenanquiri, uqhamarac Judá orakenquir jakenaca: Tatit Diosamaru iyawsapjjam, ucatsti janiw ajjsarapcätati; jaysapjjam profetanacaparu, ucatsti take cunasa jumanacataquejj waliquïscaniwa” sasa.

Takpach chuymajjampiw Tatitur jach'añchä, janiw qhuyapayasiñapat armascäti.

Tatitur jach'añchapjjam: angelanacapa, arsutanacap phokherinaca, arupar janc'ac jaysirinaca.

Tatitun alajjpach tamanacapa, jupar jach'añchapjjam, munañap phokher loktirinacapa, jach'ar aptapjjam.

Takpach luratanacapa, Tatitur jach'añchapjjam, jupan apnakat orakpachan jach'ar aptapjjam. ¡Takpach chuymajjampiw Tatitur jach'añchä!

Tatituw takpach juchanacajjat pampachitu, jupaw take usunacajjat c'umarachitu;

jupaw amay imäwit khespiyitu, juparaquiw munasiñamp qhuyapayasiñamp phokt'itu;

Tatituw asquinacamp cusisiyitu, pacar uñtat machakar tucuyaraquitu.

ucampis jumar tucjañäquis uca armjja janiw qhitis jichhacam lurquiti. Qhitinacatejj jumar juchañchapcätam ucanacarojj amuct'ayätawa. Ucwa nayajj churta qhitinacatejj nayar sirvipquitu ucanacarojja: ‘Atipjäwi’ Tatituw ucjja arsu.

Llaquinacajjajj walipun yapjjatascän ucapachaw chuymachäwimampejj cusisiyista.

Tatiturojj siwa: “Jumätaw imantasiñajjajja, jarc'akasiñajjasa, Diosajjay, jumaruw takpach chuymamp alcatsma” sasa.

Nayar jutapjjam take karjatanaca jatjatanaca, nayaw samarayapjjäma.

Nayan yugojja apapjjam, ucatsti nayat yatekasipjjaraquita. Nayasti llamp'u chuymani, alt'at chuymaniraquïtwa, ucatwa almaman samarañapjja jicjjatapjjäta.

jisct'añataqui —¿Jumätati jutañapäquis uca Cristojja, jan ucajj yakharuch suyapjjäjja? —sasa.

Nayan yugojjasti jasa apañaquiwa, qhumojjasti sinti phisnaquiraquiwa.”

Janiraquiw yakha yakhäñajj utjquiti judionacataquejja, ni yakhanacampisa, jupaquiraquiw takenin Tatitupajja take jupar art'asqui ucanacarusti take cuns churaraquiwa.

Ucjjarojj, jilatanaca, lup'ipjjam cunatejj chekäqui, cunatejj maynïr asqui uñjañäqui, cunatejj wali sumäqui, cunatejj k'omäqui, cunatejj muncañäqui, cunatejj aytat luräwinacäqui. Lup'ipjjam, take cunatejj sumäqui yupaychañataquïqui ucanacata.

Ucampis Tatay, jumaw nayan arjjatirejjätajja, jumaw jach'ar aptirejjätajja, jumaraquiw ch'amañchirejjätasa.

Ucatwa jumanacajj wali cusisita sarnakasipjjtajja, inas waquisiracchi mä juc'a pacha cunayman yant'anacan t'akhesipjjañama ucasa.

Jumanacan iyawsañanacamasti mä korir uñtataw ninampi yant'atäñaparaqui. Cawquïri iyawsañatï uca yant'anaca pasqui ucasti uca tucusir korit sipansa juc'ampi jila alaniwa. Uqhamatpï jumanacan iyawsañanacamajja, yant'atäsinjja sumat uñt'atänejja, jach'aru aptataraquïniwa cunapachatejj Tatit Jesucristojj jutcani ucapachajja.

Uñisirinacajjan uñjcañaw mank'añ waquicharapista, k'apquir kollampiw p'ekejjat jawintista, vasojjasti phokharasquiwa.

Tatitojj sapür jach'añchatäpan, Diosaw jan walt'añanacas apasqui, jupaw Diosasajja, khespiyasiñasasa.

Qhititï churañ yatqui ucaw juc'amp catoke; churiristi churatapatjamwa catokaraquini.

Alajjpachanquir Take atipirin imat sarnaker jakejja,

Uqhamasti, nayrakatajj Diosan reinopa munapjjam, uqhamarac cunatejj chekäqui jupan nayrakatapanjja ucanaca, ucatsti take aca yänacajja jumanacarojj churataquïpjjätawa.

Acat mä juc'a urunacarojj ñankha lurir jakenacajj chhaktjjaniwa; jupanacar thakcätasa, janiw jicjjatcätati;

llamp'u chuymaninacasti orak catokapjjani, jilarquir sumancañampiw cusisipjjaraquini.

Janirac kollkerus munapjjamti; cunatejj utjapjjtam ucampejj cusisitaquïpjjam, Diosajj siwa: “Janiw cunapachas jaytcämati ni armt'ascämasa” sasa.

Uqhamajj jichhajja, take iyawsañampiw arssnajja: “Tatituw yanapt'irejjajja; janiw cuntejj jakejj lurquitaspa ucjj ajjsarcäti” sasa.

Jacht'asis yapuchirinacajj, cusisiñampiw apthapjjapjjani.

Jathanac apasajj jachasisas sarapcchejja, jayllt'asisaw cutinjjapjjani, trigo yawitanacap markt'ata.

Jumaruw yuspagarsma, muspharcañpun nayataquejj lurtajja, ¡ucsti sumpun yatista!

Take yant'anactï jumanacajj t'akhesipcta ucanacajja, cunjämtï mayninacajj t'akhesipqui uqhamaraquiquiwa. Jumanacajj Diosaruw catuyasipjjañamajja, jupasti janiw jumanacarojj jach'a jan atipcaya yant'anacjja churapcätamti. Cunapachatï yant'ajj jutcani ucqhajja, Diosajj cunjämatsa uca yant'ar atipjañjja yanapapjjaraquïtamwa, uqhamatwa atipjapjjäta.

Chuymajjasa, janchejjas tucusisquiwa, ucampis Diosaw wiñay catokäwejjajja, jupaw chuymajjarojj catjjäsisqui.

Uqhamasti jilatanaca, Diosan qhuyapayasiñap laycuw achict'apjjsma, jumanacajj Diosarojj jacquir ofrendjamay loktasipjjam, Diosar cusisiyquiri loktata. Ucawa Diosataquejj ajayu token chekpach Diosar sirviñajja.

Maynit maynicamaw munasipjjañama jila purjam take chuymampi, suma aytat sarnakañansti purapat suma ajjsartañampi uñjasisa.

Ch'amañchasipjjam, janipun jayrasipjjamti, Tatiturusti take chuyma sirvipjjam.

Suyt'añanjja cusisitaquïpjjam; t'akhesiñanaca utjipanjja llamp'u chuymanïpjjaraquim. Janirac Diosat oracionan mayisiñjja armasipjjamti.

Maynïr iyawsirinaca pist'ayasipanjja yanapt'apjjam. Visitanac jutipansti sumrac catokapjjam.

Bendecipjjaraquim qhitinacatejj jumanacarojj t'akhesiyapctam ucanacarojja. Jupanacataquisti bendicionanaca mayipjjam, jan maldecipjjamti.

Cusisipjjaraquim qhitinacatejj cusisitäqui ucanacampejja, jachapjjaraquim jachirinacampejja.

Jumanac taypinjja mä amtaniqui jacasipjjam. Janiraqui jach'a jach'a tucupjjamti, jan ucasti alt'at chuymani tucupjjam. Janiraqui wali yatiñanjamas tucupjjaraquimti.

Janiraqui ñankhat ñankha cutt'ayapjjamti; cunatejj asquïqui ucrac take jakenacan nayrakatapanjj lurapjjam.

Cawquicamatejj jumanacan ch'amanacamajj utjqui, ucacamajj takenimpis sumancapjjam.

Munat jilatanaca, jumanac purajj jan uqhamat uqham lurjasipjjamti, jan ucasti Diosar jaytapjjam, jupawa mutuyascani. Kellkatanjja siwa: “Nayaruw wact'itu mutuyascañajja, nayaraquiw phokhascäjja, siw Tatitojja.”

Janiy jumanacajj acapacha saräwinacarjamajja jacjjapjjamti, jan ucasti amtañanacamanjja machakat amtasjjapjjam, uqhamat jumanacan jacañanacamajj sumäjjañapataqui. Uqhamatwa jumanacajj Diosan munañapjja yatipjjäta, cunatejj asquïqui, cunatejj Diosarojj cusisiyqui, k'omäcaraqui ucanacsa.

Asqui lurir jakejja yänacapjja wawanacapans wawanacaparuw jaytawayi, ucampis jucharar jaken yänacapajja, asqui jakenacataquiw kheparjjani.

Naya, juman Tatitu Diosamaw, jumarojj amparat wayjjarsma, irparacsma; nayaw saracsma: ‘Jan ajjsaramti, nayaw yanapascäma.’ ”

Nayajj Dios sapanac samarañ jicjjatta, suyt'añajjajj jupat juti.

Uca khepatsti Abrahamajj, uca chekarojj aqham sasaw sutichäna: “Tatitojj cunatejj waquisqui ucjja churasiriwa” sasa. Ucatwa jichhacam uca kollojj “Tatitojj cunatejj waquisqui uca churasiriwa” sasa sutichatäsqui.

jupasti churistaniwa take cuntejj mayiñäni uca, camachinacapar jaysatas laycu, luräwinacasamp cusisiyatas laycuraqui.

Diosaw khant'ayistu, imaraquistu; jupaw qhuyapayasiñampi, aytat cancañamp churi. Jan camscay asqui jaquir jakenacarojj, Tatitojj munasiwa, jach'aruw apti, asquinacap churaraqui.

Jumaw imantasiñajjätajja, jarc'akasiñajjätasa, arunacamaruw takpach chuymajj catuyta.

Cheka lurir jaken utapan take cunapas jan tucusquiriw utji, ucampis ñankha lurir jaken cuna jicjjatatanacapasa jan cunataquiwa.

Nayajj waynäyätwa, jichhasti niyaw ch'ama karitäjjta: janipuniw asqui jaker apanucut uñjcti, janiraquiw wawanacapar mayjasirs uñjcti.

Iyawsäwi laycuraquiw sarnakasctanjja, janiw uñjatas laycuti.

Take toket nayar muyuntista, amparamampiw imjjäsista.

“¿Janit pä jamach'is juc'a kollker aljasquejja? Ucampis janiw maynisa aca orakerojj liwektquiti jan Diosan munañapatjja.

Felipe, Bartolomé, Tomás, Mateo impuesto cobriri; Jacobo Alfeon yokapa; Tadeo, yakha sutipasti Lebeo sataraqui;

Ucampis jumanacatjja take ñic'utanacamasa mayat mayat suma jact'atawa.

Uqhamasti jan ajjsarapjjamti, jumanacajj uca jisc'a jamach'inacat sipanjja wali jila alanïpjjtawa.

Jichhasti Tatitojj marcaparojj siwa: “Cunatejj wasüru pascän ucjja jan amtcjjamti, janirac juc'ampi cunanacatejj pascän ucanacs amtcjjamti.

Nayaw jichhajj take cunsa machak lurä, ucsti jichpacharaquiw uñjäta. Wasaran thaquinacwa jist'arä, jan achuri orakensti jawiranacwa jist'araraquï.

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

Diosajj janiw Wawaparus perdonquiti, ucatpï Wawaparojj jiwañaru catuyejja jiwasanacan juchanacas laycu. Uqhamasti ¿janiquit take cuns churquistani Wawapamp chicjja?

Arunacamajj nayan cusisiñajjawa, arsutanacamajj nayan amuyt'ayirejjawa.

Jacobon Diosapan yanapat jakejj cusisiñaniwa, Tatitu Diosapar suyt'irejj cusisiñaniwa.

Jupaw alajjpach acapach luri, lamar kotarusa, take ucan utjirinacarusa. Jupajj arsutap phokhapuniwa.

T'akhesiyat jakenacaruw chekapar uñji, mank'at awtjatanacaruw mank'añ churaraqui. Tatituw catuntat jakenacarojj antutnucuyi.

Ucampis uca mä juc'a urunacana t'akhesipjjatama pasjjepansti, Diosajj jumanacarojj sumwa tucuyapjjätam, sum sayt'ayapjjaraquïtam. Uca Diosasti qhititejj take bendicionanac churquistu ucawa, uqhamarus Jesucristompi chicäñasataquiraquiwa jawsistu wiñayataqui.

Tatituw khanajjasa, khespiyasiñajjasa, ¿qhitirurac ajjsarästi? Tatituw jacañajjar arjjati, ¿cunarurac ajjsarästi?

Yanapt'asipjjam maynit maynicama take cuna apañanacanjja, uqhamanwa Criston leyip phokhapjjäta.

Nayajj yattwa, take acanacatjja walicwa mistuscäjja, jumanacan oración luratanacamampi, uqhamarac Jesucriston Ajayupan yanapapampi.

Cupi tokeru, jan ucajj ch'eka tokerus saranucütajja, khepäjjamatsti mä aru ist'äta, saraquïtamwa: “Aca chekaw thaquejja, sarasipcaquim” sasa.

Uqhamaraqui jumanacan khanamajj jakenacataquejj khant'aracpan. Uqham suma wali luräwinacam uñjasa jumanacan Dios Awquimaru yupaychapjjañapataqui.

Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa.

Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu.

Takpach chuymamp Tatitur alcatirejj, cusisiñan jakewa, jupajj janiw kallasirinacar thakquiti, janiraquiw c'ari diosanacar yupaychirinacarus thakquiti.

Munasiñamamp qhuyapayasiñamampejj sapürupuniw nayamp chicäsqui, Tatay, utamansti wiñayapuniw jacä.

Takpach almajjampiw Tatitur suyt'ascta, takpach chuymajjampiw arunacapar iyawsaracta.

Nayajj Tatituruw suyt'ascta, khanjtaniñap uñch'uquir jaket juc'ampi.

Thakañasaw maynit maynicama cunjäman yanapt'asiñasataqui munasiñanïñasataqui, uqhamarac suma luräwinac uñacht'ayasa.

Janiraquiw tantachasïwinacasar janejj sarañasäquiti cunjämtejj yakhepanacajj jan sarapquiti uqhama, jan ucasti maynit mayniruw waytt'asiñasa, Tatitun jutäwipa jac'ancjjatapa yatisinsti juc'ampïñapawa.

Tatituru jach'añchiri jakensti take chuyma jupar suyt'añaw utji, uqhamarac wawanacapas Tatitun imatäniwa.

Cheka thaquin sarnakañ ajllista, arunacamaruw munasta;

uqhamaraqui jumapacha mank'at awtjatarus mank'ayäta, llact'atarus pist'ayasiñapanjja yanapt'araquïta ucapachajja, khanamajj ch'amacan khantani, ch'iwinacamasti chica uru khanar uñtataw khanani.

Nayajj jumarojj irpascapunïmawa, wasaransti mank'añjja jilarquir churaraquïma, janchimarusti ch'amañcharaquïmawa, mä suma karpata pankar yapjamaw tucuraquïta, mä uma jalsur uñtataw tucüta, umamasti janiw tucuscaraquiniti.

Take acanacansti atipirinacat sipansa juc'ampïtanwa jiwasar munquistus ucan yanapapampi.

Nayasti sum yattjja, Diosajj cuna suma luräwinactï jumanacampi kalltqui ucanacajj lurascaquiniwa, Jesucriston jutañapcama.

“Amuct'jjapjjam, nayan Diosätajj uñt'apjjam: Nayajj marcanacat juc'ampïtwa, oraket juc'ampiraquïtwa.”

Ewjjt'am sum sarnakapjjañapataqui, asqui luräwinacana kamirquipstapjjpan, ucatsti janc'aquiraquïpjjpan, cunatejj jupan utjqui uc mayninacaru churañataqui.

“Sapjjaracsmawa, jan llaquisipjjamti, cuntejj mank'apcäta, umapcaraquïta, isisipcäta ucanacatjja. ¿Janiti jacañajj mank'at sipansa juc'ampi sumäqui, janchisti isitsa juc'ampïcaraquejja?

Uñtapjjam jamach'inacajj jalasqui uca, janiw jupanacajj satapquis ni apthapipcaraquisa, janiraquiw juyranacsa pirwanacarus imapquiti, ucampis alajjpachanquir Awquimaw ucanacarojj mank'ayi. Uca jamach'inacat sipansa jumanacajj juc'amp munatäpjjtawa.

Diosan reinopajj janiw mank'añäquis ni umañäquisa, jan ucasti cheka sarnakaña, cusisiña, sumancaña Kollan Ajayu toke ucawa.

Tatitojj janiw marcaparojj apanuccaniti, janiraquiw jupanquirinacarus jaytanuccaniti.

“Cunapachatï yanapt'añajj amparamancascchi ucqhajja, jan ‘Janiw’ siscamti qhititejj yanapa maycätam ucarojja.

Jan jumanacajj cunats llaquisipjjamti, take cunsa Diosar sapjjam oracionana, mayipjjam yuspagarapjjaraquim.

Tatitojj art'asirinacapan jac'apancasquiwa, takpach chuymamp jupat art'asirinacan jac'apanquiwa.

Jupar arquirinacan munataparjamaw phokhe, arnakasitanacap ist'i, khespiyaraqui.

Cawquintejj munasiñajj utjqui ucanjja janiw utjquiti ajjsarañajja. Ucat sipana chekpach munasiñanejja ajjsarañjja apanucuwa; ajjsarañasti mutuña catokañataquiwa. Maynitejj ajjsarascchi ucajja, janiw chekpach munasiñanïquiti.

Juman ch'amam catokerinacajj cusisiñanïpjjewa, kollumcam puriñ munirinacajj cusisiñanïpjjewa.

Jachañ taypinjam saraquipapcan ucapachajja, uma jalsuruw tucuyapjjani, jallumppachaw asquinacamp phokhantani;

ch'amanacapajj jiljjataniwa, Sión marcansti Diosaruw uñjapjjani.

Cristojj libre sarnakasiñwa churistu, jiwasanacan uqham sarnakasiñasataqui. Jumanacajj ch'amampi uca khespiyat jacañan sarantapjjam, jan wasitampi esclavon jacäwiparu cutt'apjjamti.

“Tatiturojj take kamir cancañamampi jach'añcham, yapumat nayrïri achunac churañampiraqui;

Tatitojj Sión marcar wasitat cusisiycän ucapachajja, samcäcaspas uqhamänwa.

Lacajj larusiñampiw atipjayasïna, lajjrasti cusisiñ k'ochunacampiw phokhantasiraquïna. Ucapachasti Diosar jan uñt'irinacajj sapjjänwa: “Tatitojj jach'a luräwinac jupanacataquejj luri” sasa.

Jïsa, Tatitojj jach'a luräwinac lurarapistu, jiwasanacasti wali cusisitäpjjäyätanwa.

Sión kolluna llact'atanacarojj khella lanti mä corona churañataqui, jachañ lantsti suma k'apquir cusisiñ kollanaca, chuyma cawcst'ata sarnakaña lantsti, yupaychañ k'ochunaca. ‘Atipt'iri roble kokanaca’ sasaw sutichapjjaraquïtam, pachpa Tatitun ayrutanaca c'ajquir cancañapa uñacht'ayañataqui.

¿Cun sañänisa take acanacarojja? Diosatejj jiwasampïchejja, ¿qhitirac jiwas conträspasti?

Ucampis jumanacajj ajllit jakenacäpjjtawa, reyir sirviri tucuyat sacerdotenacäpjjaractawa; mä k'oma marcäpjjtawa; Diosan ajllisit marcapäpjjaractawa. Acasti lurasiwa, jumanacajj Diosan muspharcañ luräwinacap yatiyapjjañamataqui. Uca Diosaraquiw jumanacarojj ch'amacat irpsusinjjapjjtam, suma muspharcañ khanapar mantjjapjjañamataqui.

chuymaman munataparjam phokpan, take amtäwinacam phokhasiypan.

Atipjatamat takpachaniw cusisipjjä, Diosasan sutiparusti wiphalanac qhiwtapjjä, ¡Tatitojj takpach mayisitanacamar jaysacpanaya!

Diosaruw takpach chuymamp iyawsta, arunacap jach'ar aptaracta; Diosaruw takpach chuymamp alcatta, janiw cunarus ajjsarcti: ¿Camächaraquitan jakesti?

Nanacan Diosajja, ¿janit jumajj jupanacar mutuycätajja? Nanacansti janiw ch'amanacajjajja utjapquituti uca jach'a ejercitojj nuwir jutapquitu ucampi nuwasiñataquejja. ¡Nanacasti janiw cun lurañataquis ch'amanïpcti, ucatwa jumaruqui utanipjjsmajja! ” sasa.

ni patancqui ucasa, ni mankhancqui ucasa, ni cuna yakha yänacasa Diosan munañapatjja apakquistaspati, uca munasiñsti Cristo Jesús Tatitus tokwa uñacht'ayistu.

Tatay, jumaruw mayisinsma;

Tatitojj qhuyapayasiñamp asqui cancañampipuniw irpi, arusjäwipamp arsutanacapamp imir jakenacarojja.

Tatay, juchanacajjajj waljapuniwa, sutiman jach'ätap laycuy takpach juchanacajjat pampachita.

Tatitur wakaychir jakerojj, arcañ thaqui uñacht'ayi:

asquinacampiw juparojj muyuntayi, wawanacaparusti orak catokasjjañapataquiw churjje.

Tatitojj arquirinacapampejj sum parlasi; jupanacarusti arusjäwir mantatap uñt'ayi.

Nayajj Tatituruquipuniw uñtta, jupaw take jan walt'añanacat khespiyitu.

Tatay, uñtaniquitaya, nayat qhuyapt'ayasita, sapaquiw uñjasta, llact'ataraquïtwa;

chuymajjajj juc'ampipuniw llaquisi, take llaquinacajjat irpst'asita.

Llaquinacajjaru, ch'ama tucutanacajjar uñtanim, take juchanacajjat pampacharaquita;

timanacajjan waljanïtap uñtanim, jiwayañ chuymampiw uñisipjjetu.

Diosajjay, jumaruw take chuymamp alcatsma: janiquiy p'enk tucuñar jalantañajj munamti, janirac timanacajjas nayat larusipjjetpati;

Qhititejj kamir cancañapar alcatqui ucajja, mä waña laphir uñtataw jalaktani, ucampis asqui jakenacajja mä kokan layminacapjamawa ch'ojjñtani.

Tatiturojj suma chuymamp munasim, jupasti chuyma mankheman mayisitamarjamaw churätam.

“Mayipjjam, Diosajj churapjjätamwa; thakapjjam, jicjjatapjjaraquïtawa; puncsa lekt'apjjam, jist'aratäpjjaraquïtawa.

Ucatwa jiwasanacajj walja iyawsañani jakenacampi muyuntatätan, cunatejj jarc'quistu ucjja maysaru apanucuñäni, uqhamarac jiwasar apnakquistu uca juchsa, ucatsti ch'amañchasisa jalañäni cunatejj nayrakatar jalañasäqui ucanjja.

Dios sapanac ajayojjajj samarañ jicjjati, khespiyasiñajjajj jupat juti.

Uca suyt'äwinsti janiw cuna mayjt'añas utjquiti, Diosasti jiwasan chuymanacasarojj munasiñapwa phokhantistu Kollan Ajayu churquist uca toke.

“Take qhitinacatejj umat pharjata sarnakapjjta ucanacajj umt'ir jutapjjam, jan kollkeninacajj jutapjjam, inaqui trigo mayisipjjam, ucatsti mank'apjjaraquim, vinompi, lechempi inaqui mayisipjjam.

“Cunjämatejj jallus, qhunus alajjpachat sarakanejja, janiraqui cutcatcjjeti, jan ucasti orakeruw chullunti, orakjja suma jasa tucuyi alinacsa mistuyaniraqui, jathas achuraqui yapuchañataquejja, t'ant'as mank'añataquejj utjaraqui,

uqhamaraquiw lacajjat mistquis uca arunacajja, janiw nayan ucarojj ch'usaqui jan cun lurasajj cuttancaniti, jan ucasti cuntejj nayajj muncta ucwa luri, cuntejj nayajj siscta ucwa phokharaqui.

“Jumanacajj ucatjja cusisitaw mistunjjapjjäta, marcamarusti sumaquiw cuttawayjjapjjaraquïta. Jumanacar uñjasinsti montenacasa, kollunacasa cusisiñat k'ochupjjani, pampanquiri kokanacasti amparanacapwa t'ajjllisipjjaraquini.

Ch'aphi alinac lantisti pinonacaw alipjjaraquini, athapillunac lantisti suma pankaranacaw jilapjjaraquini; ucaw Tatitun sutipjja jach'ar aptani, ucasti wiñayataqui khanañchäwiraquïniwa, janiw t'unjatäcaraquiniti.”

¿Cunatsa kollkenacam cunatejj jan t'ant'äqui ucar inamaya churasipcta? ¿Cunatsa kollkenacam cunatejj jan asquïqui ucar inamay tucjasipcta? Sum ist'apjjeta, ucatsti suma mank'anac mank'apjjäta, sinti suma mank'anac mank'apjjäta.