150 Tatitun Kusisiñapat Biblian jiskʼa tʼaqanakapa

Ucjjarojj Esdras chachajj sänwa: “Sarjjapjjam, mank'asinipjjam sumïri mank'anaca, umapjjaraquim mojjsa vinonaca, ucatsti churapjjaraquim qhitinacantejj jan mank'añapajj utjqui ucanacaru, jichhürusti Tatitusaru loktatätap laycu. Janiraqui llaquisipjjamti, Tatitusti cusisiñapampiw jiwasar ch'amañchistani” sasa.

Jumaw jacañ thac uñacht'ayitäta, nayrakataman jach'a cusisiñaw utji; jac'amansti wiñay cusisiñaw utjaraqui.

Tatituncasajj cusisitäpjjapunim take urunacana. Wasitat sapjjsma, cusisipjjam.

Uca suyt'añ churiri Diosajja, cusisiñampi, sumancañampi jumanacar phokhantpan juparu iyawsapjjatam laycu, uqhamat uca suyt'añanjja phokt'atäpjjañamataqui Kollan Ajayun ch'amap toke.

Jumamp arjjatayasiñ thakerinacajj cusisipjjpanaya, jupanacar imascatam laycojj, cusisiñat wiñayapun k'ochupjjpan. Jumar munasirinacajj jumïpan cusisipjji:

Tatituw ch'amajjajja, arjjatirejjasa: juparuw takpach chuymamp iyawsta, jupasti yanapt'ituwa. Chuymajjajj cusisitawa, Tatituruw k'ochü, yuspagararaquï.

“Aqhamjja nayajj jumanacar parlapjjsmawa nayampi cusisipjjañamataqui, cusisiñampi phokt'atäpjjañamataquiraqui.

Ucampis Kollan Ajayun luräwipajja acanacawa: munasiña, cusisiña, samaraña, llamp'u chuymanïña, takempis sumancaña, qhuyapayasirïña, take cunansa phokherïña,

“¡Tatituncjjasinjja cunjsa cusistjja! Diosajjancatajjatsti cusisiñan phokt'atätwa nayar khespiyatap laycu, atipjañsa churatap laycuraqui. Cunjämatejj mä casarasir waynajj coronap uchasejj uqhamätwa, jan ucajj cunjämatejj mä casarasir tawakojj c'achacht'asejj uqhamätwa.

Jupampiw chuymanacasajj cusisi, kollan sutiparuw take chuymamp iyawsapjjtan.

Jichhüruw Tatitojj lurcän uca urojja: cusisipjjañäni, c'uchirasipjjaraquiñäni.

Cusisitäpjjapunim.

Jan inact'as orapjjam.

Take cunatsa Diosar yuspagarapjjam, Diosasti jumanacatjja uqhamwa muni, Cristo Jesusan iyawsirinacapjamajja.

Jumanacajj jan uñjapcsta ucasa, Jesucristorojj munapjjtawa, uqhama jan uñjcasasa iyawsapjjaractawa, waliraqui cusisipjjtajja. Uca jach'a cusisiñanacamasti janiw arunacampi arsuñjamäquiti,

uqhama almanacamataqui khespiyasiñ jicjjatapjjatamatjja. Uca laycuraquipï jumanacajj iyawsapjjtajja.

Lacajj larusiñampiw atipjayasïna, lajjrasti cusisiñ k'ochunacampiw phokhantasiraquïna. Ucapachasti Diosar jan uñt'irinacajj sapjjänwa: “Tatitojj jach'a luräwinac jupanacataquejj luri” sasa.

Jïsa, Tatitojj jach'a luräwinac lurarapistu, jiwasanacasti wali cusisitäpjjäyätanwa.

Jumaw chuymajjarojj juc'amp cusisiñ uchtajja jilarquir trigoninacat sipansa, vinoninacat sipansa.

“Janisay higo kokanacajj pankarcpan, janisay uva alinacas, olivonacas achcpan; yapunacas janisay achunac churcpan; ovej tamanacas k'alasay tucusiscpan, janisay uywanacajj uyunacan utjcjjpan,

ucampisa cusisiñamp phokt'ataquïscäwa, Dios Tatitojjay nayan khespiyirejjächejja uca laycu.

Jichhasti munat jilatanacajja, Tatituncjjasinjja cusisipjjam. Nayataquejj janiw cuna ch'amäquis jumanacar wasitat kellkaniñajja, ucasti jumanacataquejj asquiwa.

Diosaw nayar khespiyirejja, juparuw iyawsta, janiw cunsa ajjsarcäti. Tatituw nayan arjjatirejjajja, nayar ch'amañchirejjasa, jupaw khespiyirejjajja.”

Jumanacas cusisitaw sarapjjaraquisma, jupan khespiyasiñ umapat umt'irejja,

Khanajj asqui jaketaquejj c'ajtiwa, cusisiñasti chekap chuyman jakenacataquejj khantaraquiwa.

¡Asqui jakenaca, Tatitump cusisipjjam, kollan sutip jach'añchapjjam!

Asqui jakenaca, Tatitump cusisipjjam, khana chuymaninaca, Tatitur cusisiñat jach'añchapjjam.

Asqui jakenacan suyt'äwipasti cusisiñ catokañapawa utji, ucampis ñankha jakenacan suyt'äwipasti tucusiniwa.

Tatitur cusisiñamp k'ochupjjam, takpach orakenquirinaca,

cusisit chuymamp Tatitur loktapjjam, jallallt'asis nayrakatapar mantapjjam.

Diosan reinopajj janiw mank'añäquis ni umañäquisa, jan ucasti cheka sarnakaña, cusisiña, sumancaña Kollan Ajayu toke ucawa.

k'apisiñapajj mä juc'ataquiquiwa, munasiñapasti wiñayataquiwa; jayp'u tokerutejj jachañajj puristanejja, willjta tokerojj cusisiñaw utj- jjestani.

Arunacamajj nayatac wiñay catokäwiwa, arsutanacamajj chuymajjaruw cusisiyi.

“Jumanacajj ucatjja cusisitaw mistunjjapjjäta, marcamarusti sumaquiw cuttawayjjapjjaraquïta. Jumanacar uñjasinsti montenacasa, kollunacasa cusisiñat k'ochupjjani, pampanquiri kokanacasti amparanacapwa t'ajjllisipjjaraquini.

Asqui jakenacasti cusisipjjewa, Diosan nayrakatapan cusisipjje, cusisiñat t'isctapjji.

Uqham phokt'at marcajj cusisiñan marcawa, Tatitut Diosanïqui uca marcajj cusisiñaniwa.

Cunapachatejj jumajj nayaru parljjayista ucapachajja, arunacamjja nayajj mank'jamwa mank'ayäta; uca arunacamaw chuymajjarojj cusisiyaraquïnjja, nayasti jumancaracstjjaya, take ch'amani Dios Tatitu.

Alajjpachanquir Diosay, jumïpan jach'a cusisiñajj utjitu; sutim aytasaw k'ochuracsma.

Tatay, luräwinacamajj nayatac cusisiñawa, luratanacamajj cusisiñampiw phokt'itu.

Nayasti Tatitumpiw cusisï, nayar khespiyatapat cusisï.

Janiraquiw ucaquïquiti, jan ucasti t'akhesiñansa cusisiractanwa, uqhamatwa yatiractanjja t'akhesiñajj llamp'u chuymanïña yatichatapa.

Uqham llamp'u chuymanïñasti mä sumaruw jiwasarojj mistuyistu, uqham sumar mistuyatäsinsti suyt'añaw utjistu.

Uca pachparaquiw jumanacajj jichhajj llaquisipjjta; ucampis nayajj wasitampiw cutt'anis uñjapjjäma, ucqhawa jumanacajj wal chuymanacaman cusisipjjäta, uca cusisiñsti janiw qhitis apakapcätamti.

Asqui cancañarojj munastawa, ñankharusti uñistawa: ucat Diosamajj jumar ajllistam, masinacam taypin cusisiñampiw phokhanttam.

Diosay, nayajj altaramaruw jac'achasï, arpamp chicaw yuspagaräma. Diosajjay, jumaw jacañajjarojj cusisiytajja.

¡Jupan nayrakatapanjja jach'a cancañawa utji! ¡Ch'amasa, cusisiñasa, Santuariopan utji!

Efraín marcajj mä soldadjamäniwa. Vino umatjamaw chuymapajj cusisinejja, uc uñjasajj wawanacapajj cusisiraquiniwa. ¡Chuymapasti cusisiraquiniwa Tatitu laycu!

Nayajj qhuyapayasiñamaruw take chuymamp iyawsta: chuymajjajj nayar khespiyatamat cusisi.

Takpach orakejj cusispan, jan jact'cay islanacajj cusisipjjpan. ¡Tatituw Reyejja!

Jan tucusquir asquinac jupar churtajja, jupamp chic sarnakatam laycuw cusisiñamp phokhanttajja.

Tatitu, mä jach'a cusiscañwa apantajja, cusisiñasti walipuniwa. Jakenacsa waljaptayaractawa, takeniw juma nayrakatanjja cusisipjje, yapu apthapiña urunacanjama, cunjämatejj jakenacajj cusisipqui kamir cancaña jaljasisajj uqhama.

khespiyäw cusisiñam wasitat churjjeta, ch'aman ajayumamp thurt'ayita.

cusisiyapjjapunita uqham mä wawaqui suma jacasipjjatamampejja, mä munasiñan mayachataquiraqui uca quipca ajayuniquiraqui, mä sapa amtäwiniquiraqui.

Tatay, jumar cusisiñamp yupaychir marcajj cusisiñaniwa: khanamamp khant'ayat sarnaker marcajj cusisiñaniwa,

juman sutim laycuw sapür cusisiñanïpjje, juman asqui cancañam laycuw cusisipjje.

Uca urunsti sataraquïniwa: “Acapi jïwasan Diosasajja, juparuw iyawstan, juparaquiw jiwasarojj khespiyistu, cusisipjjañäni, c'uchirtasipjjaraquiñäni, jupaw khespiyistu.”

Takpach marcanaca, ampar t'ajjllirasipjjam, cusisiñat art'asiñamp Diosar jach'añchapjjam:

“Jichhajj jutjjasctwa juman ucaru; aca arunacjja sistwa acapachanccasina, jupanacajj nayjama cusisiñampi phokt'atäpjjañapataqui.

Jumar thakerinacasti cusisipjjpan, jumamp chic larusipjjpan; khespiyäwimar munirinacajj arsupjjapunpan: “Tatitojj jach'a ch'amanipuniwa” sasa.

Suyt'añanjja cusisitaquïpjjam; t'akhesiñanaca utjipanjja llamp'u chuymanïpjjaraquim. Janirac Diosat oracionan mayisiñjja armasipjjamti.

Tatitu Diosaw jumanac taypincasqui, ¡jupajj take ch'amaniwa, juparaquiw khespiyätam! Diosasti jumar uñjasinjja cusisiniwa, munasiñapampejj machaka jacañrac churätam; cusisiñapansti k'ochuraquiniwa,

Ucampis jan cusisipjjamti ñankha ajayunacan jumanacar jaysapjjatam laycojja, jan ucasti cusisipjjam sutinacamajj alajjpachan kellkatätapata —sasa.

Jacht'asis yapuchirinacajj, cusisiñampiw apthapjjapjjani.

Jathanac apasajj jachasisas sarapcchejja, jayllt'asisaw cutinjjapjjani, trigo yawitanacap markt'ata.

Jan ucasti cusisipjjam Tatitjama t'akhesipjjatanacamatjja, uqhamata cusisiñan phokt'atäpjjañacamataqui cunapachatejj jupajj jach'a cancañapampi uñstancan uc uñjapcäta ucqhajja.

Ucat chuymajjajj walpun cusisi, ajayojjas cusisi, janchejjas samararaqui.

Cusisitaqui jacasipjjam, jumanacasti alajjpach marcanjja churäwinac catokapjjäta. Uqhamaracwa nayra profetanacarojj uñisipjjerïna, qhitinacatejj jumanacat nayrakata jacawayapjjäna ucanacarojja.

Wali khana arumpi parlañajjaw utjitu, uqhamaraqui wali cusisiñaw jumanacatjja utjitu. Take t'akhesiñanacajj taypinsti, walwa ch'am catjjatta, cusisiñans phokt'ataraquïtwa.

Israel marcajj utjayiripat cusispan, Sión marcan wawanacapajj Reyipat cusisipjjpan.

Sapjjsmawa, uca pachpawa alajjpachanjj juc'amp cusisiñajj utji mä juchararan arrepientisitapatjja, llätunc tunca llätuncani asqui jakenacajj jan cunats arrepientisipjjañapajj utjqui ucanacat sipansa.

Uqhamaraquiw Tatitun khespiyatanacapajj cuttanipjjani, Sión marcarusti cusisiñat arnakt'asisaw mantanipjjani, ajanunacapasti wiñayataquiw c'uchiquïni; cusisiñampi, sumancañampwa jicjjatapjjani, t'akhesiñasa, jachañasa tucusjjaraquiniwa.

Sapüruw templon tantachasipjjäna. Utanacapansti mayaquiw t'ant'a pachjasajj mank'asipjjäna take cusisiñampi, llamp'u chuymampiraqui.

Tatay, lacajjajj jumar k'ochusajj cusisiniwa, juman khespiyat ajayojjas cusisiraquiniwa.

Qhuyuraraquïtawa, ucatsti thayaw apasjjaraquini, tutuca thayaraquiw willitatjjani. Ucapachaw jumajj Tatitun cusisïta, Israelan Kollan Diosapatsti cusisiraquïtawa.

Nayajj yatistwa jacascañajja jumanacar yanapt'añataqui, ucat jumanacan juc'ampi cusisiñajj utjañapataqui iyawsañanacamana.

Take acapachanquir jakenaca, Tatitur cusisit k'ochupjjam,

Tatitur iyawsirinacasti wali cusisitäpjjänwa. Kollan Ajayumpi phokt'atäpjjaraquïnwa.

Jumaw nayan yanapirejjätajja, ¡amparamancasajj cusisitätwa!

Jachañajjarojj cusisiñaruw quipstaytajja, llaqui is apakasinjja, cusisiñ isimpiw isthapiyistajja;

Tawakonacajj c'uchiquiw thokt'asipjjani, waynanacasa, chuymani jakenacasa uqhamaraqui. Nayaw jupanacarojj chuymacharaquï, jachatanacapsa cusisiñaruw tucuyaraquï, t'akhesiñanacapat sipansa juc'ampi jach'a cusisiñwa churäjja.

Sión marcarusti cusiscañ k'ochunac k'ocht'asisaw mantapjjani, cusisitapuniw jacapjjani. Cusisiñampi, sumancañapwa jicjjatapjjani, jachañasa, t'akhesiñasa ucanjja tucusjjaniwa.

Ñankha lurir jakenacan lup'itanacapanjja c'ariwa utji; sumanquir jakenacan suma ewjja arunacapansti cusisiñawa utji.

Sacerdotenacaparojj khespiyasiñ isimpiw isthapiyä, arquirinacaparusti cusisiñampiw art'asiyä.

Wiñayataqui cusisiñampi c'uchirt'asiñampi phokhantasipjjam, cuntejj nayajj usccä ucanacata, nayasti mä cusiscañ Jerusalén lurt'araquï, ucan jaquir jakenacasti c'uchiquïpjjaraquiniwa.

Naya quipcaw Jerusalenatjja cusisëjja, marcajjar uñjasinsti cusisiraquïwa. Ucanjja jachañajj janiw utjcjjaniti, janiraquiw llaquisiñat aykoñas utjcaniti.

Diosan munañapächi ucajj nayajj cusisita jumanacan ucaru puriñajjataqui, ucat sumancañajj jumanacanjj utjañapataqui.

Cusisit chuymajj jaken jacañapwa sumaptayi, ucampis llaquisit chuymajj jan ch'aman tucuyi.

Chuymajjasti Khespiyir Tatitu Diosajjan cusisi.

jupar uñtapjjam, jumanacasti cusisipjjätawa, ajanunacamajj janiw p'enk tucupcaniti.

Orakpachan jaquirinaca, Tatiturojj cusisiñamp k'ochupjjam, art'asipjjam, jallallapjjam, k'ochupjjaraquim:

¡Alajjpacha, cusisiñat arnakasim cuntejj Tatitojj lurqui ucata! ¡Orak mankhanaca, cusisiñat arnakasipjjam! ¡Kollunaca, uqhamaraqui ch'uminaca take kokanacamampi, cusisiñat arnakasipjjam! Tatitojj jach'a cancañap uñacht'ayatap laycu, Israelar, Jacobon marcaparu khespiyatap laycu.

Ucanac uñjasinjja takeniw uca marcanjja wal cusisipjjäna.

Jumanacajj nanacaru uñtasaw sarnakapjjta, uqhamarac Tatituru uñtasa. Ucatsti Kollan Ajayojj churapctam uca cusisiñampiw Tatitun arunacapjja catokapjjta, jach'a t'akhesiñanacsa catokapcsta ucasa.

“Samarañwa jaytapjjsma. Nayan samarañajjwa churapjjsma, ucampis janiw nayajj samarañjj churcti cunjämtejj acapachajj churqui uqhama. Jan llaquisipjjamti ni ajjsarapjjaraquimsa.

Janiw ucaquïcaraquiti jan ucasti Diosancjjasinjja cusisiractanwa Jesucristo toke, Tatit Jesucristos tokew Diosampejj sumancthapitäjjtanjja.

¡Alajjpacha, cusisiñat art'asim! ¡Orake, walpun cusisiraquim! ¡Kollunaca, cusisiñatsti wal arnakasipjjam! Tatitun marcaparu chuymachatap laycu, llaquisiñ horasapansti Tatitojj marcapatjja qhuyapt'ayasiwa.”

Take acapachanquir jakenaca, Tatitur cusisit k'ochupjjam,

Diosay, jumaw yant'arojj puriyapjjesta, kollkerjamaw k'omachsupjjesta,

sipitaruw jalantayapjjesta, jach'a llaquinacampiw apjjatapjjesta:

qhitimpis taquisiyapjjaquistawa; nina cheka, uma chekaw maqhatapjjta, ucampis khepa tokeruw samart'ayapjjesta.

Loktäwinac apt'ataw utamar mantä, nayrakataman churäwinac naqhayarapïma, uqhamat jumar arsutanac phokhä,

chijincasin jumar arscäyäsma, uca arsutanac phokhä.

Liq'i uywanac altaramjjar loktäma, orko ovejanac loktanïma, toronacampi, cabranacamp jumar loktañatac jiwayarapïma.

Diosar arquirinaca, ist'ir jutapjjam, nayatac luratanacap yatiyapjjäma:

juparuw lacajjajj art'asi, lajjrajjasti juparuw jach'añchi.

Jan wali amuyutejj utjitasapänjja, Tatitojj janiw ist'quitasapänti;

Diosasti ist'ituwa, achict'asiñamp mayisitajjarojj jaysituwa.

kollan sutipar k'ochupjjam, aytat cancañapar k'ochunac k'ochupjjam;

Jumaw amsta toksa, aynach toksa lurtajja, Tabor kollump Hermón kollumpejj cusisitaw sutim jach'añchapjje.

Jutapjjam, Tatitur k'ochupjjañäni, arjjatir khespiyirisar cusisit jayllipjjañäni;

Pusi tunc maraw qhä jakenacataquejj k'apisïyäta, ucat säyäta: Aca marcajj wali pantjataw sarnake; ¡janiw arsutanacajjar jaysapquiti!, sasa.

Ucat k'apisiñajjan juramento lurta: Janiw samarañajjar mantapcaniti” sasa.

yuspagarañ chuymamp nayrakatapar mantapjjañäni, phust'añanacamp chic jupar jallallapjjañäni.

Uqhamwa acanacjjat jumanacarojj kellkanipjjsma cusisiñanacajjajj phokhatäñapataqui.

Anasti aca oración luraraqui: “Tatitu, nayasti take chuymaw juman cusista, jumajj nayar ch'ama churatamata. Jichhacuchapï uñisirinacajjatjja arsusïjja, jumaw nayarojj yanapt'ista uca laycu. ¡Wali cusisitätwa!

Asqui jakejj Tatitumpiw cusisini, jupampiw arjjatayasini, k'oma chuyman jakenacasti cusisitaw jacasipjjani.

Marcanacajj cusisiñat k'ochupjjpan, asqui cancañamp acapachar apnakatam laycu. Chekaparuw takpach marcanac saraytajja.

Uca khepatsti Pablompir Silasampir utapar irpasinwa mank'ayäna. Jupamp familiapampisti Diosar iyawsapjjatapatjja, wal cusisipjjäna.

¡Jerusalenan t'unjatanaca, cusisiñat k'ochusipjjam wali ch'amampi, Tatitojj marcaparu qhuyapayasitap laycu, uqhamaraqui Jerusalenarus khespiyatap laycu!

¡Asqui jakenaca, Tatitump cusisipjjam, kollan sutip jach'añchapjjam!

Amtasipuntwa jachatanacamatjja, ucatwa uñjañ munirisma wali cusisiñajjataqui.

Sionan utjasiranaca, cusisiñat arnakasipjjam, Israelan Kollan Diosapajj jumanac taypincatapata, take acapachan jach'a ch'amapampi.”

Tatitojj Sión marcar wasitat cusisiycän ucapachajja, samcäcaspas uqhamänwa.

Lacajj larusiñampiw atipjayasïna, lajjrasti cusisiñ k'ochunacampiw phokhantasiraquïna. Ucapachasti Diosar jan uñt'irinacajj sapjjänwa: “Tatitojj jach'a luräwinac jupanacataquejj luri” sasa.

Awquejj waliw cusisi wawapan yatiñ cancañanïtapata cheka lurirïtapata, ucatwa jach'ar aptasi.

Sacerdotenacamajj cusisiñ isimp isthapisipjjpan, jumar iyawsirinacajj cusisiñat art'asipjjpan.

Sión kolluna llact'atanacarojj khella lanti mä corona churañataqui, jachañ lantsti suma k'apquir cusisiñ kollanaca, chuyma cawcst'ata sarnakaña lantsti, yupaychañ k'ochunaca. ‘Atipt'iri roble kokanaca’ sasaw sutichapjjaraquïtam, pachpa Tatitun ayrutanaca c'ajquir cancañapa uñacht'ayañataqui.

Ucatpï, munat jilatanaca, jumanacarojj wal uñjañ munapjjsma, jumanacaquïpjjtawa nayan cusisiñajjajja, uqhamarac nayan wajjt'asïwi catocañasa. Nayan munatanacajja, ch'amanipuni Tatitumpejj sarantapjjam.

Tatiturojj suma chuymamp munasim, jupasti chuyma mankheman mayisitamarjamaw churätam.

Jesusaruy uñtañäni, jupatwa iyawsañasajj juti, juparaquiw uca iyawsañasjja phokhachani. Jesusasti crusanwa t'akhesi, jan uca casta jiwañaru p'enkasisa. Jupajj yatisïnwa uca t'akhesitapatjja khepürunjja cusisiñ jicjjatañapata; ucatsti Diosan tronopan cupëjjaparuw kont'asi.

Cunjämatejj mä waynajj mä tawakompi casarasejja, uqhamaraquiw Diosajj jumarojj esposapata catokasjjätam, wasitatwa sayt'ayjjätam; jumampisti c'uchiquiw jacasiraquini, cunjämatejj mä chachajj warmipampejj cusisejj uqhama.

Yatiractanwa Diosajj jupar munirinacarojj take cunsa asquitaquiw waquicharapi qhitinacatejj jupan amtataparjam jawsatäpqui ucanacataquejja.

Jach'a mank'äwinquir jakjamaw cusisï, lacajjasti cusisitaw jach'añchätam.

“Jach'a tucupjjam kollana sutipatjja. ¡Cusisipjjpan Tatitur thaker jakenacan chuymapajja!

¡Cunj asquisa jisct'aru arunac jicjjatañajja, ucat juc'ampisa horasapar jicjjatañajja!

Nayajj Tatitump chicapuniw sarnakascta, jupaw cupëjjajjanqui, janiw cunas tincuyquitaniti.

Ucat chuymajjajj walpun cusisi, ajayojjas cusisi, janchejjas samararaqui.

Janiw cunatejj jan walïqui ucatjj cusisiñ yatquiti, jan ucasti cunatejj chekapäqui ucat cusisiñ yati.

Jumar thakerinacasti cusisipjjpan, jumamp chic c'uchirasipjjpan; khespiyäwim thakerinacajj wiñayapun arsupjjpan: “Diosajj jach'a ch'amaniwa” sasa.

“Pusïri, pheskëri, pakallköri, tunquïri phajjsina ayunañajja cusisiñaruw cuttanejja, cusisiña fiestaruraqui Judá familiat jutirinacataqui. ¡Munapjjam jumanacajj cheka arsuñampiru sumancañampiru!”

Antioquiar purisinjja, Bernabeajj wal cusisïna, cunjämtï Diosajj jupanacar bendiscatayna uc uñjasajja. Jupanacarusti ewjjt'awayiwa: “Take chuymamp Tatitur arcapjjam” sasa.

Cusisiñamp c'uchirtasiñamp phokhantita, p'aquintat ch'aqhanacajjasti wasitat cusisipjjpan.

Cunapachatejj oración lurcta ucapachajja, take jumanacataquejj cusisiñampiw mayirapipjjsma.

¿Janit wasitat jacañ churapquitäta, marcaman jumamp cusisiñapataquejja?

¡Sionan utjir jakenaca, cusisipjjam jumanacajja, cusisipjjam Tatitu Diosamana! Jupaw jalljja horasaparu apayanipjjtam, nayra jallu, uqhamarac khepa jallsa, cunjämtejj nayran apayancän uqhama.

Uc sasinjja amparapwa uñacht'ayi, uqhamarac ch'illapsa. Discipulonacasti Tatitur uñjasinjja cusisipjjänwa.

Cusisit chuyman jakesti ajanupanjja cusisitaraquiwa; llaquit chuyman jakesti llaquita ajanuniwa.

¡Tatay, reyejj ch'am churatamat walpun cusisi, atipjayatamat wali cusisitawa!

willjtatpach qhuyapayasiñamamp phokt'apjjeta, jacañajjansti cusisiñampiw k'ochupjjä;

Jumaw imantasiñajjätajja: jan walt'añanacat khespiyista, atipjäwi k'ochunacampiw muyuntayaraquista.

Wawanacajja, jiwasan munasiñasajj janiw lacaquïñapäquiti; jan ucasti chekpach munasiñasajj luräwinacasana uñjasiñapawa.

¡Sión kollojj cusispan! Chekap arsutanacamampejj Judá orakenquir marcanacajj cusisipjjpan.

Patronasti juparojj siwa: ‘Waliquiwa, jumajj wali suma sirvirïtawa. Juc'äquis ucaru wali sum phokhatamatjja nayajj jichhajj waljäquis ucaruraquiw uchäma. Jichhasti mantanim ucatsti nayampirac cusisim’ sasa.

Jupanacasti yupaychasinjja wali cusisitaw Jerusalenar cutt'awayjjapjjäna.

Jumanacajj carcelanquirinacatjja sintisipjjäyätawa, cusisiñampiraquiw t'akhesipjjäyätajja cunapachatï utjirinacam aparapcäyätam ucqhajja, alajjpachanjja ucat juc'amp suma wiñayataquiraqui catokañanacama utjatapa yatisina.

Nayajj arsutamampejj cusisitätwa, imantat yänac jicjjatasin cusisir jakjamätwa.

Jïsa, Tatitojj jach'a luräwinac lurarapistu, jiwasanacasti wali cusisitäpjjäyätanwa.

lirio pankarjam pankarpan, cusisiñampisti phokt'asiracpan. Diosajj juparojj Líbano kollur uñtatwa wali suma tucuyani, wali suma achuri orakeraqui Carmelo jan ucajj Sarón sisqui uca kollunacjama. Takeniw Tatitun c'ajquir jach'a cancañapa uñjapjjani, Diosan jach'a cancañapa.

Wal cusisipjjam uqham t'akhesisajja, alajjpachan catokañanacamajj jach'äniwa; quicparacwa nayra awquinacapajj profetanacarojj lurapjjerïna.

pampanacajj ovej tamanacampiw phokhantasi, vallenacas yapunacampiw isintasi, cusisiñat takpachaw k'ochupjje.

Davidajj saraquïnwa: “¡Cusisiñanïpjjewa qhitinacarutejj Diosajj juchanacapat pampachqui ucanacajja. Jan wali luratanacapasti pampachatäjjaraquiwa!

¡Cusisiñanïpjjewa qhitinacatejj juchanacapat jan juchañchatäpqui ucanacajja!” sasa.

Uñacht'ayaraquistawa jacañar irpir uca thaqui chek sarañsa. Nayan jac'ajjancañamampisti, cusisiñampiw phokhantaraquitäta.’

Almajjay, ¿cunatarac llacthapistasti?, ¿cunatarac ajjsarthaptasti? Diosaruc suyt'am, wasitat jach'añchjjäta. ¡Jupaw cusisiñajjasa, Diosajjasa!

Diosajj ajllit marcaparojj cusisit irpsunïna, cusisiñat arnakt'asisaw mistunjjapjjäna.

Jupanacaru asquinac lurasinsti nayajj cusisiraquïwa, take chuymaraquiwa jupanacarojj aca oraken utjasiyaraquï” sasa.

Qhaya urunjja walja sacrificionacawa loktasïna, jakenacasti walipuniwa cusisipjjäna Diosajj jupanacaru jach'a cusisiñampi phokt'atap laycu. Warminacasa, wawanacasa wali cusisitäpjjaraquïnwa, ucatsti Jerusalenana cusisiñajj utjcäna ucajja jayatpachwa ist'asïna.

Suma liq'i vaca kall irptanisin qharsupjjam. ¡Mank'apjjañäni, uqhamarac fiesta luraraquiñäni!

Aca wawajjasti jiwatänwa, jichhasti jactanjjewa; chhakatänwa, jichhasti jicjjatatäjjewa’ sasa. Ucat fiesta lurañ kalltapjjäna.

Tatitun thaquipan sumätap k'ochupjjani, Tatitun c'ajquir cancañapan jach'ätap laycu.

Jupanacajj wali jach'a jan walt'añanacancchïn ucasa, wali cusisitäpjjewa. Jan cunanïpcchi ucasa, take chuymaw cusisiñampi churapjjäna kamirinacäcaspas uqhama.

Mä sapa Dios, jiwasan Khespiyirisaraqui, jupajj ch'amaniw jumanacar imañataquejja jan tincupjjañamataqui, ucatsti jan k'añuni cusisiñan phokt'ata jupan c'ajquir nayrakatapan uñstapjjañamataqui.

Juparuya yupaychañasa, jach'a cancañasa, ch'amasa, uqhamarac munañanïñasa churatäpan Tatit Jesucristo toke wiñayan wiñayapataqui. Uqhamäpan.

Mä casarasïwinjja casarasiri warmin chachapäcani, ucapï casarasir waynajja, jupan parlatap ist'asinjja amigopajj wal cusisi. Nayajj uca pachparaquiw cusista.

Qhä chekanwa Tatitu Diosaman nayräjjapana mank'apjjaraquïta, ucatsti familianacamampi chicaw cusisipjjäta luräwinacaman achupa uñjasina, cunanacampitejj Diosamajj bendicipjjätam ucanacata.

jupanacajj cusisiñatsa k'ochusipjjaniwa, chuymanacapan cusisiñajj utjatap laycu, ucampis jumanacajj arnakasipjjätawa, wararipjjaraquïtawa, llaquisiñatsa chuymanacamajj cawcst'ataraquïniwa.

Wali cusist'asisaw sarantapjje, reyin utaparuw mantapjjaraqui.

Cristo tokeraquiw jiwasanacajj Diosarojj jac'achastanjja, iyawsäwi laycu jupat bendiciona catokañataqui. Uca bendicionansti takeniw ch'amani sayt'atätanjja, Diosan marcaparu mantañataqui suyt'äwinsti cusisitätanwa.

Dios Tatay, ucat ajayojjajj jan amuct'as jach'añchañ k'ochunac k'ochuni, jumarusti wiñayaw yuspagaräma.

Jilatanacajja, jumanacajj wali c'uchiquïpjjañamawa cunapachatejj cunaymani yant'anac pasapcta ucapachajja.

Ucatwa jumanacajj wali cusisita sarnakasipjjtajja, inas waquisiracchi mä juc'a pacha cunayman yant'anacan t'akhesipjjañama ucasa.