Masalimo 97 - Buku Lopatulika

Ulemerero wa ufumu wa Mulungu

¹ Yehova achita ufumu; dziko lapansi likondwere; zisumbu zambiri zikondwerere.

² Pomzinga pali mitambo ndi mdima; chilungamo ndi chiweruzo ndizo zolimbitsa mpando wake wachifumu.

³ Moto umtsogolera, nupsereza otsutsana naye pozungulirapo.

⁴ Mphezi zake zinaunikira dziko lokhalamo anthu; dziko lapansi linaona nilinagwedezeka.

⁵ Mapiri anasungunuka ngati sera pamaso pa Yehova, pamaso pa Ambuye wa dziko lonse lapansi.

⁶ Kumwamba kulalikira chilungamo chake, ndipo mitundu yonse ya anthu ipenya ulemerero wake.

⁷ Onse akutumikira fano losema, akudzitamandira nao mafano, achite manyazi: Mgwadireni Iye, milungu yonse inu.

⁸ Ziyoni anamva nakondwera, nasekerera ana aakazi a Yuda; chifukwa cha maweruzo anu, Yehova.

⁹ Pakuti Inu, Yehova, ndinu Wam'mwambamwamba padziko lonse lapansi, ndinu wokwezeka kwakukulu pamwamba pa milungu ina yonse.

¹⁰ Inu okonda Yehova, danani nacho choipa: Iye asunga moyo wa okondedwa ake; awalanditsa m'manja mwa oipa.

¹¹ Kuunika kufesekera wolungama, ndi chikondwerero oongoka mtima.

¹² Kondwerani mwa Yehova, olungama inu; ndipo yamikani pokumbukira chiyero chake.