ပေါလု၏ ဂျေရုဆလင်မြို့ခရီးစဉ်1 ကျွန်ုပ်တို့သည် သူတို့နှင့် ခွဲခွာပြီးသည့်နောက် သင်္ဘောလွှင့်လျက် ကောသကျွန်းသို့ တိုက်ရိုက်သွားကြ၏။ နောက်တစ်နေ့တွင် ထိုကျွန်းမှ ရောဒုကျွန်းသို့ရောက်၍ ထိုမှတစ်ဆင့် ပါတရမြို့သို့ ရွက်လွှင့်ကြပြန်၏။ 2 ထိုမှတစ်ဖန် ကျွန်ုပ်တို့သည် ဖိုနီးရှားပြည်သို့ သွားမည့်သင်္ဘောကိုတွေ့သဖြင့် ပြောင်း၍ စီးကာ ရွက်လွှင့်ကြ၏။ 3 ဆိုက်ပရပ်ကျွန်းကို မြင်ရသောအခါ တောင်ဘက်မှ ဖြတ်ကျော်၍ ဆီးရီးယားပြည်သို့ သင်္ဘောဖြင့်ရွက်လွှင့်ပြန်၏။ သင်္ဘောပေါ်မှ ကုန်ပစ္စည်းကိုချရန် တိုင်ရာမြို့၌ ကမ်းကပ်ကြ၏။ 4 ထိုနေရာတွင် ကျွန်ုပ်တို့သည် တပည့်တော်တချို့ကို ရှာတွေ့သဖြင့် သူတို့နှင့်အတူ ခုနစ်ရက်နေကြ၏။ သူတို့က သန့်ရှင်းသောဝိညာဉ်တော်ဖွင့်ပြခြင်းအားဖြင့် ပေါလုကို ဂျေရုဆလင်မြို့သို့ မသွားရန်ပြောကြ၏။ 5 ခုနစ်ရက်ပြည့်သောအခါ ကျွန်ုပ်တို့သည် ခရီးဆက်ကြ၏။ တပည့်တော်အားလုံးတို့သည် ဇနီး၊ သားသမီးများနှင့်အတူ ကျွန်ုပ်တို့ကို မြို့ပြင်ထိလိုက်ပို့ကြ၏။ ကမ်းခြေသို့ရောက်သောအခါ ကျွန်ုပ်တို့သည် ဒူးထောက်၍ ဆုတောင်းကြ၏။ 6 ထို့နောက် အချင်းချင်း နှုတ်ဆက်ကြပြီးမှ ကျွန်ုပ်တို့သည် သင်္ဘောပေါ်သို့ တက်၍ သူတို့သည်လည်း မိမိတို့အိမ်သို့ ပြန်ကြ၏။ 7 တိုင်ရာမြို့မှ ပတောလင်မြို့သို့ရောက်ကြလျှင် ပင်လယ်ခရီးစဉ်ပြီးဆုံးလေ၏။ ထိုမြို့တွင်ရှိသော ယုံကြည်သူများကို နှုတ်ခွန်းဆက်ကြ၍ သူတို့ထံ၌ တစ်ရက်တည်းခိုကြ၏။ 8 နောက်တစ်နေ့တွင် ကျွန်ုပ်တို့သည် ထိုမြို့မှ ထွက်ခွာ၍ ဆီဇာရီးယားမြို့သို့ ရောက်ကြ၏။ ကျွေးမွေးခြင်းအမှုကို ဆောင်ရွက်ရန် ရွေးချယ်ခြင်းခံရသောလူခုနှစ်ဦးအနက် တစ်ဦးဖြစ်သော၊ သတင်းကောင်းဟောပြောသူ ဖိလိပ္ပု၏အိမ်သို့ ဝင်၍ တည်းခိုကြ၏။ 9 ထိုသူ၌ ပရောဖက်ပြုဟောနိုင်သော သမီးပျိုလေးဦးရှိ၏။ 10 ထိုအိမ်တွင် ရက်အနည်းငယ် တည်းခိုနေထိုင်ကြစဉ် အာဂဗုအမည်ရှိသော ပရောဖက်တစ်ဦးသည် ယုဒပြည်မှဆင်းလာပြီးလျှင် 11 ကျွန်ုပ်တို့ထံ လာရောက်လည်ပတ်၏။ ထိုသူသည် ပေါလု၏ခါးပတ်ကိုယူ၍ မိမိလက်နှင့် ခြေကို တုပ်နှောင်ပြီးမှ “သန့်ရှင်းသောဝိညာဉ်တော်က ‘ဂျူးတို့သည် ဤခါးပတ်ပိုင်ရှင်ကို ဂျေရုဆလင်မြို့၌ ဤကဲ့သို့ချုပ်နှောင်၍ လူမျိုးခြားတို့၏လက်သို့ အပ်နှံကြလိမ့်မည်’ ဟု မိန့်တော်မူသည်” ဟူ၍ ပြောလေ၏။ 12 ဤစကားကို ကြားသော ကျွန်ုပ်တို့နှင့် ထိုအရပ်ရှိလူတို့သည် ဂျေရုဆလင်မြို့သို့ မသွားရန် ပေါလုကို တောင်းပန်ပြောဆိုကြ၏။ 13 သို့ရာတွင် ပေါလုက “သင်တို့သည် ငိုကြွေးလျက် ကျွန်ုပ်စိတ်နှလုံးကို ပူဆွေးဝမ်းနည်းစေရန် အဘယ်ကြောင့် ပြုကြသနည်း။ ကျွန်ုပ်သည် ဂျေရုဆလင်မြို့၌ ထောင်ကျခံရန်မျှသာမက သခင်ယေရှု၏အမည်နာမအတွက် အသေခံရန်ပင် အသင့်ရှိပါ၏” ဟု ပြန်ပြောလေ၏။ 14 ကျွန်ုပ်တို့သည် ပေါလုအား တောင်းပန်ပြောဆို၍ မရသောအခါ တိတ်ဆိတ်စွာ နေလျက် “ဘုရားသခင်၏အလိုတော်အတိုင်းသာ ဖြစ်ပါစေ” ဟု ဆိုကြ၏။ ဂျေရုဆလင်မြို့သို့ ပေါလုရောက်ရှိခြင်း15 ထိုနေ့ရက်များလွန်ပြီးနောက် ကျွန်ုပ်တို့သည် ပစ္စည်းများကို အသင့်ပြင်ဆင်၍ ဂျေရုဆလင်မြို့သို့ တက်သွားကြ၏။ 16 ဆီဇာရီးယားမြို့မှ တပည့်တော်တချို့သည်လည်း ကျွန်ုပ်တို့နှင့်အတူ လိုက်ပါလာကြပြီး သူတို့က တပည့်တော်ဟောင်းတစ်ဦးဖြစ်သော ဆိုက်ပရပ်ကျွန်းသား မနာသုန်၏အိမ်သို့ တည်းခိုရန် ခေါ်သွားကြ၏။ 17 ဂျေရုဆလင်မြို့သို့ ရောက်သောအခါ ယုံကြည်သူများက ကျွန်ုပ်တို့အား လှိုက်လှဲစွာ ဧည့်ခံကြိုဆိုကြ၏။ 18 နောက်တစ်နေ့တွင် ပေါလုသည် ကျွန်ုပ်တို့နှင့်အတူ ယာကုပ်ထံ သွားရောက်တွေ့ဆုံ၏။ အသင်းတော်အကြီးအကဲအားလုံးတို့လည်း ရှိနေကြ၏။ 19 ပေါလုသည် သူတို့အား နှုတ်ဆက်ပြီးနောက် မိမိလုပ်ဆောင်သောအမှုတော်အားဖြင့် လူမျိုးခြားတို့အပေါ်၌ ဘုရားသခင်ပြုတော်မူသော အမှုတို့ကို တစ်ခုချင်းပြောပြလေ၏။ 20 ဤအကြောင်းကို ကြားသောအခါ သူတို့သည် ဘုရားသခင်အားချီးမွမ်းကြ၏။ ထို့နောက် ပေါလုအား “ချစ်ရသောညီ… ထောင်ပေါင်းများစွာသောဂျူးတို့သည် ယုံကြည်လာကြ၍ သူတို့အားလုံးသည် မောရှေ၏ပညတ်ကျမ်းကို လေးလေးနက်နက်လိုက်နာသောသူများ ဖြစ်ကြသည်ကို သင်သိမြင်၏။ 21 သင်သည် လူမျိုးခြားတို့အထဲတွင် နေထိုင်ကြသောဂျူးလူမျိုးအပေါင်းတို့အား မောရှေ၏ပညတ်တရားကို စွန့်လွှတ်၍ ကလေးငယ်များကို အရေပြားလှီးခြင်းမပြုပေးရန်နှင့် ဓလေ့ထုံးတမ်းစဉ်လာအတိုင်း မလိုက်နာရန် သွန်သင်နေသည့်အကြောင်းကို သူတို့ကြားသိထားကြ၏။ 22 သို့ဖြစ်၍ မည်သို့ဆောင်ရွက်ရပါမည်နည်း။ သင်ရောက်လာကြောင်းကို သူတို့သည် အမှန်ကြားသိကြမည်ဖြစ်၏။ 23 ထို့ကြောင့် ကျွန်ုပ်တို့ ပြောသည့်အတိုင်း ပြုလော့။ ကျွန်ုပ်တို့တွင် သစ္စာကတိပြုထားသောလူလေးယောက် ရှိ၏။ 24 ထိုသူတို့ကို ခေါ်သွား၍ သင်သည်လည်း ထိုသူတို့နှင့်အတူ သန့်ရှင်းစင်ကြယ်ခြင်းဝတ်ကို ပြုလော့။ သူတို့၏ဆံပင်ရိတ်ရန် ကုန်ကျသမျှကိုလည်း သင်ပေးဆောင်လော့။ ဤသို့ဖြင့် သင်နှင့်ပတ်သက်၍ သူတို့ကြားသိထားသောသတင်းသည် မဟုတ်မမှန်ဘဲ သင်ကိုယ်တိုင်ပင်လျှင် ပညတ်တရားကို စောင့်ထိန်းလျက် လိုက်နာနေကြောင်း အားလုံးကသိမြင်လာကြလိမ့်မည်။ 25 ယုံကြည်လာကြသောလူမျိုးခြားများအတွက်မူ သူတို့သည် ရုပ်တုများကို ပူဇော်ထားသောအစားအစာကို စားသုံးခြင်း၊ သွေးကို စားသုံးခြင်း၊ လည်ညှစ်သတ်သောတိရစ္ဆာန်များ၏အသားကို စားသုံးခြင်းနှင့် တရားနှင့်မညီသော မေထုန်ပြုခြင်း စသည်တို့ကို ရှောင်ကြဉ်ရန် ကျွန်ုပ်တို့ဆုံးဖြတ်၍ စာရေးပေးပို့ကြပြီ” ဟု ဆိုကြ၏။ ပေါလုဖမ်းဆီးခံရခြင်း26 နောက်တစ်နေ့တွင် ပေါလုသည် ထိုလေးဦးတို့ကိုခေါ်၍ သူတို့နှင့်တကွ သန့်ရှင်းစင်ကြယ်ခြင်းဝတ်ကို ပြု၏။ ထို့နောက် ဗိမာန်တော်ထဲသို့ဝင်၍ သူတို့တစ်ဦးစီအတွက် ပူဇော်စရာဆက်သမည့်အချိန်ဖြစ်သော သန့်ရှင်းစင်ကြယ်ခြင်းဝတ်ကို ပြုသည့်ရက်များ ပြီးဆုံးမည့်အချိန်ကို အသိပေးကြေညာလေ၏။ 27 ခုနစ်ရက်ပြည့်လုနီးသောအခါ အာရှပြည်မှလာသောဂျူးတချို့သည် ဗိမာန်တော်ထဲ၌ ပေါလုကိုတွေ့မြင်ကြ၍ လူထုပရိသတ်အားလုံးကို လှုံ့ဆော်ကြ၏။ ထို့နောက် သူ့ကို ဖမ်းဆီးကာ 28 “အစ္စရေးလူမျိုးတို့… ကူညီကြလော့။ ဤသူသည် ကျွန်ုပ်တို့၏လူမျိုးကိုလည်းကောင်း၊ ပညတ်တရားနှင့် ဤဗိမာန်ကိုလည်းကောင်း ဆန့်ကျင်လျက် နေရာတိုင်း၌ရှိသော လူအပေါင်းတို့အား သွန်သင်နေသူဖြစ်၏။ ထိုမျှမက ဂရိလူမျိုးတို့ကိုလည်း ဗိမာန်တော်ထဲသို့ခေါ်ဆောင်လာ၍ ဤသန့်ရှင်းသောနေရာကို ညစ်ညမ်းစေပါပြီ” ဟု အော်ဟစ်ပြောဆိုကြ၏။ 29 ထိုသို့ပြောဆိုရခြင်းအကြောင်းမှာ သူတို့သည် ပေါလုကို ယခင်က ဧဖက်မြို့သားတရောဖိမ်နှင့်အတူ မြို့ထဲ၌ တွေ့ခဲ့၍ ပေါလုသည်ထိုသူကို ဗိမာန်တော်ထဲသို့ ခေါ်ဆောင်ခဲ့သည်ဟု မှတ်ယူကြသောကြောင့်ဖြစ်၏။ 30 ထိုအခါ တစ်မြို့လုံးဆူပူအုံကြွလျက် လူတို့သည်ပြေးလာကြ၏။ ထို့ကြောင့် ပေါလုကိုဖမ်းဆီး၍ ဗိမာန်တော်အပြင်သို့ဆွဲထုတ်ပြီး တံခါးများကို ချက်ချင်းပိတ်လိုက်ကြ၏။ 31 သူတို့သည် ပေါလုကိုသတ်ရန် ကြိုးပမ်းနေကြစဉ် ဂျေရုဆလင်တစ်မြို့လုံး ရုန်းရင်းဆန်ခတ်ဖြစ်နေသောသတင်းသည် ရောမတပ်ဖွဲ့တစ်ဖွဲ့၏တပ်မှူးကြီးထံ ရောက်လေ၏။ 32 တပ်မှူးကြီးသည် စစ်သားများနှင့် တပ်မှူးများကို ချက်ချင်းခေါ်၍ လူထုပရိသတ်ထံသို့ ပြေးဆင်းသွားလေ၏။ လူထုသည် တပ်မှူးကြီးနှင့်စစ်သားတို့ကို တွေ့မြင်သောအခါ ပေါလုကိုရိုက်နှက်နေရာမှ ရပ်တန့်သွားကြ၏။ 33 ထိုအခါ တပ်မှူးကြီးသည် အနားသို့လာကာ ပေါလုကိုဖမ်းဆီး၍ သံကြိုးနှစ်ချောင်းဖြင့်ချည်နှောင်ထားရန် အမိန့်ပေး၏။ ထို့နောက် သူက ပေါလုမည်သူဖြစ်ကြောင်းနှင့် မည်သည့်အမှုပြုခဲ့ကြောင်းကို လူထုပရိသတ်တို့အား စတင်မေးမြန်းလေ၏။ 34 သို့ရာတွင် လူထုပရိသတ်ထဲမှ တစ်ယောက်တစ်မျိုးအော်၍ ရုန်းရင်းဆန်ခတ်ဖြစ်နေသောကြောင့် တပ်မှူးသည်အဖြစ်မှန်ကို မသိနိုင်ပေ။ ထို့ကြောင့် ပေါလုကို တပ်စခန်းထဲသို့ခေါ်ဆောင်သွားရန် အမိန့်ပေးလေ၏။ 35 လှေကားနားသို့ရောက်သောအခါ လူထု၏ဆူပူသောင်းကျန်းမှုသည် အလွန်ပြင်းထန်လာသောကြောင့် စစ်သားများသည် ပေါလုကို ထမ်း၍ ခေါ်သွားကြရ၏။ 36 နောက်မှလိုက်လာသောလူအုပ်ကြီးသည်လည်း “သူ့ကိုသတ်ပစ်လော့” ဟူ၍ အော်ဟစ်ကြ၏။ လူထုအား ပေါလုစကားပြောခြင်း37 ပေါလုသည်မိမိကို တပ်စခန်းသို့ခေါ်ဆောင်သွားခါနီးတွင် တပ်မှူးကြီးအား “သင်နှင့်ကျွန်ုပ် စကားအနည်းငယ်ပြောပါရစေ” ဟု ခွင့်ပန်၏။ တပ်မှူးကြီးက “သင်သည်ဂရိစကား ပြောတတ်သလော။ 38 မကြာသေးမီက ပုန်ကန်ထကြွလျက် သူပုန်လေးထောင်တို့အား တောကန္တာရထဲသို့ ခေါ်ဆောင်သွားသည့် အီဂျစ်လူမျိုးသည် သင်မဟုတ်လော” ဟု ပြန်မေး၏။ 39 ပေါလုက “အကျွန်ုပ်သည် ဂျူးလူမျိုးဖြစ်၍ ဆီလီဆီးယားပြည်ရှိ ထင်ရှားကျော်ကြားသော တာရှုမြို့မှ မြို့သားတစ်ဦး ဖြစ်ပါ၏။ လူထုပရိသတ်တို့အား စကားပြောခွင့်ပြုရန် ကျွန်ုပ်တောင်းဆိုပါ၏” ဟု ဆိုလေ၏။ 40 တပ်မှူးကြီးက ခွင့်ပြုသဖြင့် ပေါလုသည်လှေကားပေါ်တွင် မတ်တတ်ရပ်၍ လူထုကြီးအား ငြိမ်သက်စေရန် လက်ရိပ်ပြလေ၏။ လူထုသည်တိတ်ဆိတ်ငြိမ်သက်သွားသောအခါ ပေါလုသည် ဟေဗြဲဘာသာစကားဖြင့် အောက်ပါအတိုင်းပြောကြားလေ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.