တမန်တော်ဝတ္ထု 20 - ခေတ်သစ်မြန်မာ သမ္မာကျမ်းမာကေဒေါနိပြည်နှင့် အခါယပြည်သို့ ပေါလုသွားရောက်ခြင်း 1 ထိုရုန်းရင်းဆန်ခတ်ပြုခြင်းအမှု ပြီးဆုံးသွားသောအခါ ပေါလုသည် တပည့်တော်များကို ခေါ်၍ အားပေးစကားပြောဆိုကာ နှုတ်ဆက်ပြီး မာကေဒေါနိပြည်သို့ ထွက်ခွာသွားလေ၏။ 2 ထိုဒေသများတစ်လျှောက် လှည့်ပတ်သွားလာကာ ယုံကြည်သူတို့အား အားပေးစကားများပြောကြားပြီးနောက် အခါယပြည်သို့သွား၏။ 3 ထိုမြို့တွင် သုံးလခန့်နေထိုင်၍ ဆီးရီးယားပြည်သို့ ရွက်လွှင့်ရန် ပြင်ဆင်နေစဉ် ဂျူးလူမျိုးတို့က မိမိကိုလုပ်ကြံရန် လျှို့ဝှက်ကြံစည်နေကြကြောင်းကို ပေါလုကြားသိရ၏။ ထို့ကြောင့် ပေါလုသည် မာကေဒေါနိပြည်ကိုဖြတ်၍ လှည့်ပြန်သွားရန် ဆုံးဖြတ်လေ၏။ 4 ဗေရိမြို့သားဖြစ်သော ပုရု၏သား သောပတရု၊ သက်သာလောနိတ်မြို့သားများဖြစ်ကြသော အာရိတ္တာခုနှင့် သေကုန္ဒု၊ ဒေရဗေမြို့သားဖြစ်သော ဂါယု၊ တိမောသေ၊ အာရှပြည်သားများဖြစ်ကြသော တုခိတ်နှင့် တရောဖိမ်တို့သည် ပေါလုနှင့်အတူ လိုက်ပါသွားကြ၏။ 5 ထိုသူတို့သည် ကြိုတင်သွားနှင့်ပြီး တရောမြို့၌ ကျွန်ုပ်တို့ကို စောင့်နေကြ၏။ 6 ကျွန်ုပ်တို့သည် တဆေးမဲ့မုန့်ပွဲတော်ရက်များ ပြီးသည့်နောက် ဖိလိပ္ပိမြို့မှ သင်္ဘောစီး၍ ငါးရက်ကြာလျှင် တရောမြို့သို့ ဆိုက်ရောက်ကြ၏။ ထိုမြို့တွင် ခုနစ်ရက်နေထိုင်ကြ၏။ တရောမြို့သို့ နောက်ဆုံးလည်ပတ်ခြင်း 7 ရက်သတ္တပတ်၏ပထမနေ့ရက်၌ ကျွန်ုပ်တို့သည် မုန့်ကိုချိုးဖဲ့ရန် အတူတကွစုဝေးကြ၏။ ပေါလုသည် နောက်တစ်ရက်တွင် ထိုမြို့မှ ထွက်ခွာရန် ရည်ရွယ်ထားသောကြောင့် ညသန်းခေါင်အချိန်ထိ တရားတော်ကို ဟောပြောလျက်နေ၏။ 8 ကျွန်ုပ်တို့စည်းဝေးကြသည့် အပေါ်ထပ်အခန်းတွင် ဆီမီးခွက်များစွာရှိ၏။ 9 ဥတုခုဟု ခေါ်သော လူငယ်တစ်ယောက်သည် ပေါလုကြာရှည်စွာဟောပြောနေစဉ် ပြတင်းပေါက်ပေါ်တွင်ထိုင်ကာ အလွန်အိပ်ငိုက်လျက်နေ၏။ ထိုသူသည် အိပ်ပျော်သွားကာ သုံးလွှာအထပ်မှ အောက်သို့ ပြုတ်ကျသဖြင့် သူ့အား ပွေ့ချီလိုက်သောအခါ သေဆုံးနေသည်ကို သိကြ၏။ 10 ထိုအခါ ပေါလုသည် အောက်သို့ဆင်း၍ သူ၏ကိုယ်ပေါ်၌ကိုင်းညွတ်လျက် လက်နှင့်ချီမကာ “မစိုးရိမ်ကြနှင့်။ ဤလူငယ် အသက်ရှိသေး၏” ဟု ပြော၏။ 11 ထို့နောက် ပေါလုသည် အပေါ်သို့ပြန်တက်၍ မုန့်ကိုချိုးဖဲ့လျက် သူတို့နှင့်အတူ စားကြ၏။ သူသည်လည်း အရုဏ်တက်ချိန်ထိတိုင်အောင် စကားဝိုင်းဖွဲ့ပြီးမှ ထွက်ခွာသွားလေ၏။ 12 သူတို့သည် အသက်ရှင်လျက်ရှိသော ထိုလူငယ်ကို ခေါ်ဆောင်သွားပြီး အလွန်စိတ်သက်သာရာရကြ၏။ ဧဖက်မြို့အသင်းတော်အကြီးအကဲများနှင့် ပေါလုတွေ့ဆုံခြင်း 13 ကျွန်ုပ်တို့သည် သင်္ဘောပေါ်သို့ ဦးစွာတက်ပြီးလျှင် ပေါလုကို ခေါ်တင်ရမည့် အဿုမြို့သို့ ရွက်လွှင့်ကြ၏။ သူသည် ထိုမြို့သို့ ကုန်းလမ်းခရီးဖြင့် သွားရန် ဆုံးဖြတ်ထားသောကြောင့် ဤသို့ စီစဉ်ခဲ့ခြင်းဖြစ်၏။ 14 ဤသို့ဖြင့် ကျွန်ုပ်တို့နှင့် ပေါလုသည် အဿုမြို့တွင် တွေ့ဆုံကြပြီး သူ့ကို သင်္ဘောပေါ်တင်ကာ မိတုလင်မြို့သို့ ဆက်လက်ရွက်လွှင့်ကြပြန်၏။ 15 ထိုမြို့မှ ရွက်လွှင့်၍ နောက်တစ်နေ့တွင် ခိအုကျွန်းသို့ ရောက်ကြ၏။ ထိုမှ တစ်ရက်လွန်ပြီးနောက် သာမုကျွန်းသို့ ဝင်၍ နောက်တစ်နေ့တွင် မိလက်မြို့သို့ ရောက်ကြပြန်၏။ 16 ပေါလုသည် အာရှပြည်တွင် အချိန်မကုန်ဆုံးစေလိုသဖြင့် ဧဖက်မြို့ကိုဖြတ်၍ ရွက်လွှင့်ရန် စိတ်ဆုံးဖြတ်ထားပြီးဖြစ်၏။ ဖြစ်နိုင်မည်ဆိုပါက ပင်တေကုတ္တေပွဲနေ့အမှီ ဂျေရုဆလင်မြို့သို့ရောက်ရှိရန် သူသည် စိတ်ပြင်းပြလျက်နေ၏။ 17 မိလက်မြို့သို့ ရောက်သောအခါ ပေါလုသည် လူလွှတ်၍ ဧဖက်မြို့ရှိ အသင်းတော်အကြီးအကဲများကို မိမိထံလာရောက်တွေ့ဆုံရန် ဖိတ်ခေါ်လေ၏။ 18 ထိုသူတို့ ရောက်လာကြသောအခါ ပေါလုက “ကျွန်ုပ်သည် အာရှပြည်တွင် ပထမဦးဆုံးရောက်သည့်နေ့မှစ၍ သင်တို့နှင့် ရှိနေသော အချိန်တိုင်းတွင် မည်သို့ပြုမူနေထိုင်သည်ကို သင်တို့သိကြပါ၏။ 19 ဂျူးတို့၏မကောင်းသောအကြံစည်များအားဖြင့် ကျွန်ုပ်ထံရောက်လာသော နှောင့်ယှက်မှုများကို သည်းခံလျက်နှင့်ပင် နှိမ့်ချ၍ မျက်ရည်များကျကာ သခင်ဘုရားအား အစေခံခဲ့၏။ 20 ဤသို့ဖြင့် လူထုပရိသတ်ရှေ့တွင်ဖြစ်စေ၊ တစ်အိမ်ဝင်တစ်အိမ်ထွက်ဖြစ်စေ၊ သွန်သင်ရာတွင် ကျွန်ုပ်သည် သင်တို့အတွက် အကျိုးရှိသောအရာကို ဟောပြောရန် မတွန့်ဆုတ်။ 21 နောင်တရ၍ ဘုရားသခင်ထံတော်သို့ ပြန်လာကြစေရန်နှင့် ကျွန်ုပ်တို့၏သခင်ယေရှုကို ယုံကြည်စေရန် ဂျူးလူမျိုးများနှင့် ဂရိလူမျိုးများကို လေးနက်စွာ ဟောပြောခဲ့၏။ 22 ယခု ကျွန်ုပ်သည် သန့်ရှင်းသောဝိညာဉ်တော်နိုးဆော်တော်မူသည့်အတိုင်း ဂျေရုဆလင်မြို့သို့ သွားမည်။ ထိုမြို့၌ မည်သို့ဖြစ်ပျက်မည်ကို ကျွန်ုပ်မသိ။ 23 သို့သော် ကျွန်ုပ်သည် အကျဉ်းချခံရ၍ ညှဉ်းပန်းနှိပ်စက်ခြင်း ခံရမည်ဖြစ်ကြောင်း သန့်ရှင်းသောဝိညာဉ်တော်သည် မြို့တိုင်းတွင် သက်သေခံဖော်ပြတော်မူ၏။ 24 သို့ရာတွင် ဘုရားသခင်၏ကျေးဇူးတော်နှင့်ဆိုင်သည့် သတင်းကောင်းကို သက်သေခံရန်အတွက် သခင်ယေရှုထံမှ လက်ခံရရှိသည့် အလုပ်တာဝန်နှင့် အမှုတော်ကို ပြီးစီးနိုင်မည်ဆိုလျှင် ကျွန်ုပ်သည် မိမိအသက်ကိုပင် မနှမြောပါ။ 25 ယခုမှာ ကျွန်ုပ်ဟောပြောသည့် နိုင်ငံတော်အကြောင်းကို ကြားခဲ့ရသော သင်တို့ရှိသမျှသည် နောက်တစ်ဖန် ကျွန်ုပ်မျက်နှာကို မြင်ကြရမည်မဟုတ်ကြောင်းကို ကျွန်ုပ်သိ၏။ 26 တစ်စုံတစ်ဦးသည် ထာဝရသေခြင်းနှင့် ကြုံတွေ့ပါက ထိုအရာသည် ကျွန်ုပ်၏တာဝန်မဟုတ်ကြောင်းကို ယနေ့ သင်တို့အား ကြွေးကြော်လိုက်ပြီ။ 27 အဘယ်ကြောင့်ဆိုသော် ဘုရားသခင်၏အကြံစည်တော်ရှိသမျှကို သင်တို့အား ဟောပြောရာ၌ ကျွန်ုပ်သည် မတွန့်ဆုတ်ခဲ့သောကြောင့်ဖြစ်၏။ 28 ထို့ကြောင့် သင်တို့သည် မိမိကိုယ်ကိုယ်လည်းကောင်း၊ သိုးစုအားလုံးကိုလည်းကောင်း ကြည့်ရှုပြုစုကြလော့။ သားတော်၏အသွေးတော်နှင့် ရွေးဝယ်ထားသောဘုရားသခင်၏အသင်းတော်ကို ထိန်းသိမ်းစောင့်ရှောက်ရန် ထိုသိုးစုများကို ကြည့်ရှုပြုစုသူများအဖြစ် သန့်ရှင်းသောဝိညာဉ်တော်သည် သင်တို့အား ခန့်ထားတော်မူ၏။ 29 ကျွန်ုပ်ထွက်သွားသည့်နောက် သိုးစုကိုမညှာမတာ ကိုက်ဖြတ်စားတတ်သောဝံပုလွေတို့သည် သင်တို့အထဲ၌ ဝင်လာလိမ့်မည်ကို ကျွန်ုပ်သိ၏။ 30 လွဲမှားစေသောအရာများကို ပြောဆို၍ တပည့်တော်များအား သူတို့နောက်သို့ လိုက်စေရန် ဆွဲခေါ်သွားမည့်လူတို့သည် သင်တို့အထဲမှလည်း ပေါ်ပေါက်လာလိမ့်မည်။ 31 ထို့ကြောင့် သတိနှင့်နေကြလော့။ ကျွန်ုပ်သည် သုံးနှစ်တာပတ်လုံး နေထိုင်ခဲ့သည်တွင် နေ့ညမပြတ် မျက်ရည်ကျလျက် သင်တို့အား တိုက်တွန်းနိုးဆော်ခဲ့သည်ကို သတိရကြလော့။ 32 သို့ဖြစ်၍ ယခု ကျွန်ုပ်သည် သင်တို့အား ဘုရားသခင်ထံတော်သို့လည်းကောင်း၊ ကိုယ်တော်၏ ကျေးဇူးတော်နှင့်ဆိုင်သော တရားတော်သို့လည်းကောင်း အပ်နှံပါ၏။ ထိုတရားတော်သည် သင်တို့ကို ဆောက်တည်ပေးနိုင်စွမ်းနှင့် သန့်ရှင်းစေတော်မူခြင်းခံရသောလူအပေါင်းတို့နှင့်အတူ သင်တို့ကို အမွေပေးနိုင်စွမ်းရှိ၏။ 33 ကျွန်ုပ်သည် မည်သူ၏ရွှေ၊ ငွေနှင့် အဝတ်အစားကိုမျှ မတပ်မက်ပါ။ 34 ကျွန်ုပ်နှင့် လုပ်ဖော်ကိုင်ဖက်များ၏လိုအပ်သောအရာများအတွက် ကျွန်ုပ်ကိုယ်တိုင် အလုပ်လုပ်၍ ထောက်ပံ့နိုင်ခဲ့သည်ကို သင်တို့သိကြ၏။ 35 ဤအရာအားလုံးတို့တွင် အလုပ်ကို ကြိုးစားလုပ်ဆောင်ခြင်းအားဖြင့် ဆင်းရဲသားများအား မစထောက်ပံ့ရမည်ကို ကျွန်ုပ်ပြသခဲ့၏။ ထို့ကြောင့် သခင်ယေရှုကိုယ်တိုင် မိန့်တော်မူခဲ့သည့် ‘ပေးကမ်းခြင်းသည် ရယူခြင်းထက် ပို၍မင်္ဂလာရှိ၏’ ဟူသော စကားတော်ကို သတိရကြလော့” ဟု ဆိုလေ၏။ 36 ဤအရာများကို ဟောပြောပြီးသောအခါ ပေါလုသည် ဒူးထောက်လျက် သူတို့အားလုံးနှင့်အတူ ဆုတောင်းလေ၏။ 37 ထိုအခါ သူတို့သည် ငိုကြွေးကာ ပေါလုကို ဖက်ယမ်းနမ်းရှုပ်လျက် နှုတ်ဆက်ကြ၏။ 38 နောက်တစ်ဖန် သူ့ကို တွေ့မြင်ရတော့မည်မဟုတ်ဟု ပေါလုပြောသောစကားကြောင့် ပို၍ပင် ဝမ်းနည်းကြ၏။ ထို့နောက် ပေါလုကို သင်္ဘောသို့ လိုက်ပို့ကြ၏။ |
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
Biblica, Inc.